Read Babanki Shwèʼ 17 Bible Online

Shwèʼ 17 - Babanki bible

Shwèʼ 17

¹Bol wenə viʼi wen jèʼ li chò fa ntə̀ʼ Amfibolis bènə̀ fa ntə̀ʼ Abòlòniyà ə̀ vì zaʼa a ntə̀ʼ Tèsàlonikà, a ngə̀ŋ tsèntə Vəjew tsen ndìʼ tsu.

²Bol dyʉ̀ a ngə̀ŋ ntsèntə̀ ayì ando ghə̀ njèʼè nè ə̀ lyɨ̀ mətsi mə nzhʉtəmə Vəjew ntaʼ, əsoʼtə nyʉ̀ a və mfʉ̀ fa Ŋwàʼlə̀ Nyìngòŋ.

³Ghə̀ nshə̀ʼtə̀ li laynsə̀ nyʉ̀ vyi a və diʼì a Ŋwàʼlə̀ Nyìngòŋ, gàʼà la, wìʼ yì a Nyìngòŋ ntsuʼ li ghʉ lì diʼi ne yenə ngəʼ ə pfʉ, və be nè ghə̀ lu fà pfʉ. Ghə̀ bè gàʼ la, “Yesò ghèn a ma gàʼà à ghə̀ŋ byìʼì wen lə̀ dìʼ wìʼ ayì.”

⁴Vəjew vətsenvə zhʉ ə byɨmə nyʉ̀ vyi a Bol ngàʼà mù tsèntə̀ nòynə Bol wenə̀ Silàs. Nòyn viʼi Glis a və nghoʼsə̀ Nyìngòŋ bè tsèntə̀ vəwenə ə boʼsə nə̀ ki vəghoʼkəvə.

⁵Vəjew vətsenvə sə kiʼ kənghə̀ʼ byìʼàndo viʼi ntsèntə̀ nòyn Bol wenə̀ Silàs ə̀ mù sə jèʼè pfʉtə voyndyə vəbyɨvə, və sə jèʼè zhòfə̀ chò fa ntə̀ʼ ə̀ dyʉ̀ kwàʼtə̀ təchʉ̀ tə ngə̀ŋ Jasòn, kəŋə Bol wenə̀ Silàs əghaʼ ə vì nə̀ vəwenə a shɨ viʼi.

⁶Vəwenə kwen tsu kò vəwenə lù yèn Bol wenə̀ Silàs mù ghàʼ Jasòn wenə̀ viʼi vəbyɨməvə vətsenvə ə̀ gùf ə̀ vì nə̀ vəwenə a shɨ viʼi nsoʼ, zɨmə̀ gàʼà la, “Viʼi venə diʼ mu vəwenə nəʼə li tò mbì tsèm, luwèn vəwenə vì li nzaʼa a vəghəŋ a ntə̀ʼ,

⁷Jasòn nlyɨ vəwenə ə nshɨtə nghʉ à wen a ngə̀ŋ. Vəwenə vətsèm ə jèʼè kwàʼtə̀ təsoʼ tə fòyn ghoʼo vəghəŋ gàʼà la fòyn tsen bè dìʼ a zhiʼ wen diʼ Yesò.”

⁸Nòyn viʼi wenə̀ viʼi soʼò nsoʼ vi nè sə dyʉ̀ zhʉ kənyʉ̀ akì tò zhʉ kə nè tinsə vəwenə sə fwi no nànto.

⁹Viʼi nsoʼ a vyi nè Jasòn wenə̀ viʼi vəbyɨməvə vi lòʼ ko a vəwenə, və mù ghʉsə vəwenə, vəwenə lù pfwo.

¹⁰Tʉʼ nè jɨ, viʼi vəbyɨməvə vi lyɨ̀ Bol wenə̀ Silàs ə̀ tɨm la vəwenə nyɨŋ ə̀ dyʉ̀ a ntə̀ʼ Belì byìʼì ngəʼ aghèn. Vəwenə dyʉ̀ tsu bè dyʉ̀ kwèn a ngə̀ŋ ntsèntə̀ Vəjew.

¹¹Viʼi a və ndìʼ tsu nkòŋə̀ əzhʉtə kənyʉ̀ əchò viʼi Tèsàlonikà. Vəwenə nkòŋə̀ no a nkàyn əzhʉtə ntɨm jùŋ mù sə dzàŋə̀ Ŋwàʼlə̀ Nyìngòŋ tò mətsi ntsèm ndi yen la nyʉ̀ a Bol nshə̀ʼtə̀ diʼ tò nəmwèʼè lo.

¹²Nghoʼo viʼi tsu, nə̀ ki bènə̀ lʉmə və ghoʼokəvə a ndiʼì viʼi Glis byɨmə à Yesò.

¹³Andìʼ ando Vəjew a və ndìʼ a Tèsàlonikà nzhʉ la Bol be shə̀ʼtə̀ ntɨm jùŋ à viʼi Belì, vəwenə vì tsu sə bosə̀ la vəwenə zìtə̀ soyn.

¹⁴Viʼi vəbyɨməvə tɨm Bol wenə̀ viʼi vətsenvə la vəwenə shiʼi dyʉ̀ a mbyɨ̀ àmù mə ghoʼomə̀ tò a zhʉ ayì, alì Silàs wenə̀ Timotì faŋ tò a Belì.

¹⁵Viʼi vi a wenə̀ və Bol nlu a muʼu tùʼmə̀ nə̀ wen ə̀ dyʉ̀ zaʼa a ntə̀ʼ Atèns ə mù ghʉ̀sə wen tsu bwènə̀ vì a Belì nə̀ ntɨm a Bol ntɨmə la Silàs wenə̀ Timotì zaŋsə vì kwetə wen.

¹⁶Andìʼ ando Bol nkə̀ʼtə̀ Silàs wenə̀ Timotì a Atèns, ə̀ yèn la ntə̀ʼ ayì nkiʼi mənyo no nghoʼo. Kənyʉ̀ ki sə ku ngəʼ à wen no nànto.

¹⁷Ghə̀ ndyʉ̀ a ngə̀ŋ ntsèntə̀ Vəjew ə̀ sòʼtə nyʉ̀ avenə tsu wenə̀ vəwenə bènə̀ viʼi vətsenvə vi a və ngumlə̀ Nyìngòŋ. Ghə̀ mbe dyʉ̀ soʼtə̀ tò nyʉ̀ avenə a təwoŋ no mə ntsi ntsèm wenə̀ viʼi vi a ghə̀ mvi bùmtə̀ tsu.

¹⁸Ndìʼsə̀ sə sətsensə ndìʼ tsu a və ə ndzàŋə̀ nə̀ ndzɨ̀mtə̀sə Ebikulyan nə̀ viʼi Stoyk yen Bol, vətsenvə mù sə bèmə̀ la, “Nki ndìʼsə̀ ghèn lè mwòmsə̀ əgàʼ la ghò, ko ndiʼ la ghə̀ kɨ no kənyʉ̀ a?” Vətsenvə gàʼ la, “Ghə̀ mwòmsə̀ əgàʼ kənyʉ̀ byìʼì vənyìngòŋ və ətɨm.” Vəwenə ngàʼà alə̀ byìʼàndo Bol nziʼi nyʉ̀ byìʼì Yesò be ziʼi la viʼi lu bwènə̀ lù fà pfʉ.

¹⁹Vəwenə mù lyɨ̀ Bol ə̀ dyʉ̀ nə̀ wen a ntsèntə̀ viʼi nsoʼ yì a və mvì zhùŋtə̀ a kwi pfen Ayobagùs ə̀ gàʼ à wen la, “Shə̀ʼtə à yès la àdìʼ nki ziʼi fighə kò a wù ziʼi viʼi lə̀ lo?

²⁰Wù gàʼà nyʉ̀ tsenəvə kènla yès ntɨmə̀ zhʉ, yès a kòŋ la wù shə̀ʼtə̀ nyʉ̀ a vyi ə̀ laynsə à yès?”

²¹A ndìʼ a lì viʼi vyi a və mbwi vəwenə a Atèns nə̀ vi a və mvi vi sə tsi tsu nkòŋə̀ ŋwʉʼ no məzhʉ̀ ntsèm, ə nshə̀ʼtə̀ tò nyʉ̀ fivə vi a vəwenə zhʉ fa viʼi vətsenvə.

²²Bol lù tɨ̀mə a ntsèntə̀ ayì a Ayobagùs ə̀ gàʼ la, “Viʼi Atèns, mà yen li la ghə̀ŋ kɨ ghoʼsə vənyìngòŋ a shə̀ no a nkàyn,

²³byìʼàndo mà sə njèʼè kaʼa fa ntə̀ʼ ashə̀ ə̀ yen shi a ghə̀ŋ ghoʼsə vənyìngòŋ a vi tsu no ghoʼo. Ma be yèn kəshi kə kəku kətsen mu və nyòʼ li tsu la, ‘kèn dìʼ à Nyìngòŋ tsen a wìʼ ko kɨ.’ Nyìngòŋ aghèn a ghə̀ŋ gumlə̀ a ghə̀ŋ, ko kɨ̀ tè kɨ lə̀ dìʼ Nyìngòŋ yì a no nkàntə̀ mò shə̀ʼtə̀ nyʉ̀ venə luwèn byìʼì wen.

²⁴Nyìngòŋ aghèn diʼi Nyìngòŋ yì a ghə̀ nshɨ̀tə̀ mbi ghèn nə̀ nyamsə bè shɨ̀tə̀ no fo tsèm a və diʼì tsu. A diʼi wen diʼ Bobo a ghə̀ soʼo kaŋ nə̀ nse, kò ghə̀ lə̀ ntsi a aloʼ mu və bwom nə̀ avu ə nghoʼsə̀ wen tsu.

²⁵Nyìngòŋ aghèn nè la viʼi vətsèm ndiʼ vəto. Ghə̀ ku no ghò à wìʼ a ghə̀ kəŋ, kò andìʼ la wìʼ zì ghə̀ ku no kəfo kətsenkə à wen.

²⁶Nyìngòŋ aghèn nlù bwòm tò wìʼ muʼ a mbi, no viʼi təloʼ tətsèm mfʉ tò fà wìʼ aghèn mùʼ. Ghə̀ ku zhʉ a viʼi a venə diʼ tsi a nse be ku shi a vəwenə zì və tsi tsu.

²⁷Ghə̀ ne a lì ndi viʼi vətsèm nkəŋə wen to nə̀ viʼi kənfyif a li kɨ la vəwenə ne yènə wen, no to ando ghə̀ ko diʼ kəghaf fà wutsen.

²⁸Wu tofə tsen nlù gàʼ la: ‘A nè Nyìngòŋ la vəghəŋ ntsi, jèʼè, be diʼ no tè ghò a vəghəŋ diʼì.’ Viʼi və tofəvə ghə̀ŋ vətsen və bè ngàʼa la: ‘Vəghəŋ bè dìʼ tò vunə wen.’

²⁹Ando vəghəŋ diʼì vunə Nyìngòŋ, vəghəŋ ko diʼ nlyɨ̀ la Nyìngòŋ diʼ kəfo a wìʼ ŋwʉʼʉ ghə̀ kwòʼtə ə̀ ti no tè nə̀ nki kəkas kə kò, ko ghə̀ tsɨf a ngùʼ.

³⁰Nyìngòŋ ghʉ li la ghə̀ zì kò ghə̀ a ku ngəʼ à wìʼ byìʼì mətsi mì a wìʼ nko ntɨmə̀ kɨ̀ kənyʉ̀ byìʼì wen lì, alì gàʼà à no tè ndò, no tè fe luwèn la ghə̀ kwitə tyɨm wen fà wen a nyʉ̀ byɨvə.

³¹Nyìngòŋ nlù gàʼ a lì byìʼàndo ghə̀ ndìʼ mu ghə̀ ghʉ li kətsi kì a ghə̀ lu soʼ viʼi vətsèm tsu a mbi ashə̀ a ji tɨmə. Ghə̀ lu nè wìʼ, yì a ghə̀ ntsuʼ li ə̀ ghʉ soʼ viʼi avenə à wen. Ghə̀ diʼì li kənyʉ̀ a kènkə ə̀ myètə̀ a ndayn a ji la ghə̀ tə nè wìʼ ayì bwènsə̀ lù fà pfʉ.”

³²Andìʼ ando vəwenə nzhʉ Bol gàʼ kənyʉ̀ byìʼì məlù fà pfʉ, viʼi vətsenvə sə chəʼə wen, vətsenvə gàʼà la vəwenə a kòŋ la ghə̀ lù be vì ə gàʼ nyʉ̀ tsenəvə à vəwenə byìʼì kənyʉ̀ akì.

³³Bol lù a zhʉ ayì ə̀ fʉ̀ fa ntsèntə̀ ayì.

³⁴Viʼi vətsenvə dzɨ̀mtə̀ Bol ə̀ byɨmə ntɨm yì a ghə̀ nshə̀ʼtə̀ lì. Dionysius a andiʼì wù ntsèntə̀ yì a və nghaʼa a Ayobagùs lì, nə̀ wùwì tsen a zhiʼ wen ndìʼ Damalìs bènə̀ viʼi vətsenvə ndìʼ a ntìntìn viʼi vyi a və mbyɨmə lì.