Read Babanki Shwèʼ 18 Bible Online

Shwèʼ 18 - Babanki bible

Shwèʼ 18

¹Bol nè gàʼà à viʼi Atèns myètə̀ ə̀ lù fà tsu ə̀ dyʉ̀ a ntə̀ʼ Kolìn.

²Andìʼ ando ghə̀ ndyʉ̀ zaʼa tsu ə̀ yèn wu Jus tsen a və mbwi wen a loʼ Bontùs, zhiʼ wen diʼ Akwilà. Ghə̀ diʼ mu ghə̀ kwʉ̀ʼtə̀ mvi tò vi tsu wenə̀ wì wen Blisilyà. Vəwenə nlù fa Lum a loʼ Italì ə̀ vì tsu byìʼàndo fòyn Klodùs ndìʼ mu ghə̀ chòsə̀ li soʼ la Vəjew fʉ fà Lum no vətsèm. Bol lù dyʉ̀ yèn vəwenə,

³wenə̀ vəwenə sə tsi be tsèntə nè təshyèʼ a muʼu byìʼàndo vəwenə mbe tasə fo tò nə̀ Bol nə̀ gwʉsə nyamsə, shɨ̀tə̀ təto tsu.

⁴Bol sə dyʉ̀ kwenə a ngə̀ŋ ntsèntə̀ Vəjew tò məntsi mə nzhʉtəmə no ntsèm, soʼtə̀ nyʉ̀ tsu wenə̀ Vəjew bènə̀ viʼi Glis, mwòmsə̀ ənè la vəwenə byɨmə kənyʉ̀ kì a ghə̀ ngàʼà.

⁵Silàs wenə̀ Timotì nè lù fà Macedonia ə̀ vì a Kolìn. Bol ghʉsə no nyʉ̀ tsèm a ghə̀ ə̀ nè ə sə shə̀ʼtə tò ntɨm jùŋ à Vəjew be dìʼì laynsə̀ à vəwenə la Yesò dìʼ wìʼ yì a Nyìngòŋ tsuʼ li nghʉ.

⁶Ando vəwenə ntensə kənyʉ̀ kì a ghə̀ ngàʼà be telə̀ wen, ghə̀ bwèn dzèm wen à vəwenə ə̀ gàʼ la, “Ghə̀ŋ sətsèn nè kənyʉ̀ kènkə alə̀, Nyìngòŋ maʼa ghə̀ŋ, mu à diʼi nsoʼ ghə̀ŋ, mu kəvu komkə ko à ndiʼ tsu. Mà lì a ghʉsə ghə̀ŋ luwèn ə̀ dyʉ̀ nshə̀ʼtə̀ ntɨm jùŋ aghèn à viʼi tɨmə.”

⁷Ghə̀ gàʼ a lì, mù lù ghʉsə Vəjew a vyi ə̀ dyʉ̀ sə tsi a ngə̀ŋ wù kətɨm tsen a zhiʼ wen ndìʼ Titiyòs Justus a ghə̀ mbe gumlə̀ Nyìngòŋ. Ngə̀ŋ wen ndìʼ tò a mbyɨ̀ ngə̀ŋ ntsèntə̀ viʼi Jus.

⁸Wutsen a andìʼ kətʉ kə ngə̀ŋ ntsèntə̀ akì a zhiʼi wen ndìʼ Klisbùs zhʉ ntɨm jùŋ a ghèn, wenə̀ viʼi ngwaʼa ngə̀ŋ wen, bènə̀ viʼi vətsenvə a Kolìn no və ghoʼo byɨmə à Bobo ə̀ shì mu.

⁹A sə ndiʼ nəntʉʼʉ a kətsi kətsenkə, kənyʉ̀ kə fʉ̀ a kə̀ʼ Bol a nə̀ jòm, Bobo gàʼ tsu à wen la, “Kə a fwàyn viʼi venə, ngàʼà tò gaʼa à vəwenə,

¹⁰byìʼàndo mà dìʼ yowù. Wìʼ ko a nè kənyʉ̀ kə byɨkə à wù. Nziʼi tò ziʼi byìʼàndo viʼi vwomə diʼ a ntə̀ʼ a shə̀ no vəghoʼo.”

¹¹Ando ghə̀ ngaʼà a lì, Bol bè tsì a Kolìn ngwʉʼ mpfen nə̀ kəbyeʼ kə, shə̀ʼtə̀ tò ntɨm ə̀ Nyìngòŋ.

¹²Andìʼ ando və ghʉ̀ Galiyò la ghə̀ nsoʼo shə loʼ ayi a və ndzàŋə̀ nə̀ Akayà, Vəjew vətsenvə tsèntə̀ ghàʼ Bol ə̀ dyʉ̀ nə̀ wen a kəshi kə nsoʼ

¹³ə̀ dyʉ̀ gàʼ à Galiyò la, “Wìʼ ghèn nè la viʼi ngumlə̀ Nyìngòŋ a ji tsen a soʼo ko byɨmə.”

¹⁴Ando Bol nkəŋ ŋoʼsə chʉ̀ wen ə gàʼ, Galiyò tin ə̀ gàʼ la, “Ghə̀ŋ zhʉtə a Vəjew! A tu ndiʼ la Bol ghèn kwaʼà li soʼ ko la ghə̀ nè li kənyʉ̀ kə byɨkə kətsenkə, mu mà zhʉtə kənyʉ̀ kì a ghə̀ŋ ə gàʼà.

¹⁵Ando ghə̀ŋ bòŋsə̀ soʼo nyʉ̀ byìʼì ziʼi tsenghə, nə̀ təzhiʼ tə viʼi bènə̀ soʼo ghə̀ŋ lə̀, à kɨ tò ghə̀ŋ. Mà zì kò mà lə̀ tɨ̀mə ə̀ nsoʼo nki nyʉ̀ à nə̀ venə.”

¹⁶Ghə̀ gàʼ a lì ə̀ gàʼ la və dzɨ̀mə̀ shìsə̀ Vəjew a vyi fà kəshi kə nsoʼ akì.

¹⁷Viʼi a vyi ghaʼ Sòstenìs a andiʼì kətʉ a ngə̀ŋ ntsèntə̀ Vəjew ə̀ ghòm wen tò a chʉ̀ kəshi kə nsoʼ ayì alì kò Galiyò lə̀ gàʼ tè kənyʉ̀.

¹⁸Bol bè tsìtə no məntsi alə̀ wenə̀ viʼi vəbyɨməvə a Kolìn ə̀ mù tòŋtə vəwenə ə̀ lù wenə̀ Blisilyà bènə̀ Akwilà fà ntə̀ʼ Senchilì ə̀ dyʉ̀ a loʼ Sylia. Mibu vəwenə sə nkwen a nkanuʼ əlù, mu Bol kom li kətʉ kə wen byìʼàndo ghə̀ ndìʼ mu ghə̀ ghʉ li kənyʉ̀ kətsenkə a məkàyn wenə̀ Nyìngòŋ.

¹⁹Vəwenə jèʼè ə̀ dyʉ̀ zaʼa a ntə̀ʼ Efesùs, Bol ghʉsə Blisilyà wenə̀ Akwilà ə̀ dyʉ̀ a ngə̀ŋ ntsèntə̀ Vəjew wenə̀ vəwenə sə soʼtə̀ nyʉ̀ tsu.

²⁰Vəwenə sə̀ sensə̀ Bol la ghə̀ tsìtə wenə̀ vəwenə no məntsi mə ghoʼomə̀, alì ghə̀ tensə.

²¹Andìʼ ando ghə̀ nlù, ghə̀ gàʼ à vəwenə la, “Mà lu be bwènə̀ vì, a zhʉ a Nyìngòŋ sətsèn kòŋ.” Ghə̀ gàʼ a lì mù lù ə̀ mòʼtə̀ Blisilyà wenə̀ Akwilà a Efesùs.

²²Bol nè dyʉ̀ zaʼa ntə̀ʼ Sisalìyà ə̀ kuʼ dyʉ̀ tòŋtə ntsèntə̀ viʼi vəbyɨməvə a Jelusalèm, ə lù fà tsu bwènə̀ shiʼi fa Antìyòk,

²³ə̀ tsìtə tsu no alə̀. Ghə̀ nè lù fa tsu ə̀ jèʼè chò fa shì tsèm a Galesìyà bènə̀ Fligiya, gyàmtə̀ dyʉ̀ nə̀ ndzɨ̀mtə̀sə bàm Yesò ndi vəwenə nkiʼ tyɨmə toghə a shi aghèn.

²⁴Wu Jus tsen lù vì a Efesùs mu ghə̀ kwì a Alèksandìliyà, zhiʼ wen diʼ Abolòs. Ghə̀ nkɨ əgàʼ a ji a no ndò nkòŋ əzhʉtə. Ghə̀ nkɨ nyʉ̀ fa tì Ŋwàʼlə̀ Nyìngòŋ no ghoʼo.

²⁵Ghə̀ ndìʼ mu ghə̀ bè ziʼi nyʉ̀ byìʼì jisə shìsə a Bobo kəŋ la viʼi ntsi fa tsu, ə sə gàʼà no nə̀ kədyoʼkə, be ziʼi viʼi byìʼì Yesò a ji a ghə̀ ndìʼì la ghə̀ nkɨ kənyʉ̀ a ghə̀ nziʼì. Ghə̀ ntùʼù kɨ tò nyʉ̀ vyi a Joyn wu ku amù nziʼì byìʼì mu mì a ghə̀ nku à viʼi lì.

²⁶Blisilyà wenə̀ Akwilà nè zhʉ̀ ziʼi yi a ghə̀ nziʼi nə̀ tyɨmə toghə a ngə̀ŋ ntsèntə̀ ə̀ gàʼ la Abolòs vì a vəwenə ngə̀ŋ. Ghə̀ vì, vəwenə shɨ̀tə̀ shə̀ʼtə̀ jì yì a wen a Nyìngòŋ kəŋ la viʼi ntsi fa tsu.

²⁷A sə ndiʼ ando Abolòs ngàʼà la ghə̀ a kòŋ ətɨmə dyʉ̀ a Akayà, viʼi vəbyɨməvə a Efesùs gyàmtə̀ wen ə̀ nyòʼ ŋwàʼlə̀ à viʼi vəbyɨməvə a Akayà gàʼà la vəwenə shisə wen no a nkàyn. Ghə̀ tɨmə̀ ə̀ dyʉ̀ tsu ə̀ sə ku gyàmtə̀ ghoʼghə à viʼi vyi a və sə ndiʼ mu və byɨmə li byìʼì bòŋə̀ tyɨm ə Nyìngòŋ.

²⁸Abolòs soʼo nyʉ̀ no a nkàyn, dìʼì laynsə fa Ŋwàʼlə̀ Nyìngòŋ la Yesò dìʼ wen Klistò. No wu Jus muʼ nko bè gàʼ kənyʉ̀ byìʼì ziʼi yi a ghə̀ nziʼì.