Read Babanki Shwèʼ 19 Bible Online

Shwèʼ 19 - Babanki bible

Shwèʼ 19

¹Andìʼ ando Abolòs ndìʼ a ntə̀ʼ Kolìn a shyə Akayà, Bol chò fa tì loʼ ayì ə̀ dyʉ̀ zaʼa a Efesùs ə̀ yèn viʼi vəbyɨməvə vətsenvə tsu,

²ə bèm à vəwenə la, “Andìʼ ando ghə̀ŋ mbyɨmə̀, Kəzhwì kə ŋwòʼəkə mvi li à ghə̀ŋ?” Vəwenə bwènsə̀ la, “Yes nko tɨmə̀ zhʉ̀ tè kənyʉ̀ byìʼì Kəzhwì kə ŋwòʼəkə.”

³Bol bwènsə̀ bèm à vəwenə la, “A tə dìʼ nki mu mə nkò à və tə kù à ghə̀ŋ a?” Vəwenə bwènsə̀ la, “Və nkù mu à yès byìʼì kənyʉ̀ kì a Joyn nziʼì.”

⁴Bol mù gàʼ la, “Joyn nku mu à viʼi vyi a və nkwitə tətyɨm tə vəwenə be gàʼ à viʼi a vyi la, vəwenə dìʼi byɨmə à wìʼ yì a ghə̀ ndiʼì nè vì fa wen a bàm, adiʼ Yesò.”

⁵Viʼi avenə zhʉ a lì mù byɨmə à Bobo Yesò, və ku mu à vəwenə ədìʼ la vəwenə byɨmə li à wen.

⁶Bol mù ghʉ avu wen a vəwenə a tʉ, Kəzhwì kə ŋwòʼəkə mù vì à vəwenə, vəwenə zìtə̀ sə gàʼà təgàʼ tə kədyàŋ, be shə̀ʼtə̀ nyʉ̀ mu və lù fà Nyìngòŋ.

⁷Lʉmə ndìʼ a ntìntìn viʼi avenə ə zaʼa a njʉ̀sə̀bò.

⁸Fà yì a bàm, Bol sə dyʉ̀ kwenə a tì ngə̀ŋ ntsèntə̀ gàʼà wenə̀ Vəjew a tì vəsàŋ vətaʼ nə̀ tyɨm toghə, soʼtə̀ nyʉ̀, kəŋə la vəwenə byɨmə la kənyʉ̀ kì a yi gàʼà byìʼì soʼ fòn Nyìngòŋ diʼ nəmwèʼè.

⁹Viʼi vətsenvə fa vəwenə a ntìntìn to kətʉ ə̀ tyèn la vəwenə ko a byɨmə kənyʉ̀ akì a Bol ngàʼà lì, bè gàʼ nyʉ̀ byɨvə tsenəvə à viʼi a shɨ byìʼì Jì yì a Bobo nkəŋə la və ntsi fa tsu. Bol mù ghʉ̀sə vəwenə ə̀ lyɨ̀ viʼi vəbyɨməvə vi wenə̀ vəwenə sə̀ dyʉ̀ tò mətsi ntsèm a ngə̀ŋ yì a Tylannùs nziʼi viʼi tsu, soʼo nyʉ̀ tsu wenə̀ viʼi.

¹⁰Bol nè kənyʉ̀ akì a tì ngwʉ̀ʼsə səbò, Vəjew nə̀ viʼi tɨm vi a və ndìʼ a Asìyà zhʉ kənyʉ̀ byìʼì Bobo.

¹¹Andìʼ ando Bol mbò dìʼ tò a Efesùs, Nyìngòŋ nè ghə̀ sə nè nyʉ̀ kàynəvə.

¹²Viʼi nlyɨ̀ ndisə shyèʼ wen nə̀ basə ndisə vi a ghə̀ ntyì kəzhʉʼsə kə wen tsu, dyʉ̀ nə̀ wenəvə à viʼi və kwaʼkəvə, və nè vəwenə to, zhwì byɨvə be fʉ̀kə̀ fà vəwenə a təwèn.

¹³Vəjew vətsenvə a və bè njèʼè dzɨ̀mə̀ shìsə zhwì byɨvə bè sə mwòmsə̀ ndzɨ̀mə̀ a zhiʼ Bobo Yesò. Vəwenə mbʉsə ndzɨ̀mə̀, vəwenə sə gàʼà la, “Ma gàʼà à ghə̀ŋ a zhiʼ Yesò yì a Bol ə̀ ziʼi byìʼì wen la, ghə̀ŋ fʉ fà wèn wìʼ ghèn.”

¹⁴Viʼi a və njèʼè nè kənyʉ̀ a kènkə ndìʼ vunə lʉmə vətsenvə sòmbo, a andìʼ vunə pfèm ngə̀ŋ Nyìngòŋ ghoʼo Vəjew tsen a zhiʼ wen ndìʼ Sivà.

¹⁵A sə ndiʼ kətsi kətsenkə, vəwenə dyʉ̀ yèn wutsen ghə̀ kiʼ kəzhwì kə byɨkə. Vəwenə sə mwòmsə̀ ədzɨ̀m ə shìsə kəzhwì kə byɨkə akì, kə gàʼ à vəwenə la, “Mà kɨ Yesò bè kɨ Bol. Ghə̀ŋ ke dìʼ vəndò?”

¹⁶Ando kə ngàʼa a lì, wìʼ ayì a ghə̀ nkiʼ kəzhwì kə byɨkə akì shen ə̀ ghaʼ vəwenə no vətsèm, ə̀ ghòm no a nkàyn. Vəwenə nyɨŋkə fʉ̀ fà ngə̀ŋ ayì mu və bàtə li ndisə vəwenə bè lyomsə vəwenə a ji byɨ.

¹⁷Vəjew nə̀ viʼi tɨm vi a və ndìʼ a Efesùs nè zhʉ̀ kənyʉ̀ a kə yì chò sə̀ diʼ nə̀ fanə mù sə kuʼsə zhiʼ Bobo Yesò.

¹⁸Viʼi vəbyɨməvə sə fʉ̀ vì a ndayn, shə̀ʼtə̀ nyʉ̀ byɨvə vi a vəwenə tə nè mibu sə byɨmə.

¹⁹Nghoʼo viʼi a vəwenə nè nyʉ̀ fʉ̀ vì nə̀ vəŋwàʼlə̀ vi a vəwenə ndzàŋə̀ nyʉ̀ fənyoʼ a vyi fa tsu ə̀ nyʉ̀ʼ tò a shɨ viʼi vətsèm. Ko vəŋwàʼlə̀ a vyi nto no nànto.

²⁰Kənyʉ̀ kə Nyìngòŋ mù sə sàykə̀ dyʉ̀ tò dyʉ̀, viʼi no və ghoʼo byɨmə byìʼì nyʉ̀ kanəvə vi a vəwenə nyenə.

²¹A bàmə nyʉ̀ avenə, Kəzhwì kə ŋwòʼəkə nè, Bol ghʉ la ghə̀ a chò fa shyə loʼ Macedonia bènə̀ fa Akayà ə dyʉ̀ zaʼa a Jelusalèm. Ghə̀ bè ghʉ̀ la ghə̀ a tsìtə tsu ə mu chò dyʉ̀ a Lum.

²²Ghə̀ ghʉ a lì mù tɨ̀m viʼi vi vəbò a və ngyàmtə̀ wen a ndiʼì Timotì wenə̀ Elastùs, la vəwenə dyʉ̀ a Macedonia a mbì, ghə̀ be tsìtə a Asìyà.

²³Ngəʼ ghoʼo tsen zìtə̀ a Efesùs a mətsi ayì byìʼì Jì yì a Bobo nkəŋə la viʼi ntsi fa tsu.

²⁴Wutsen ndìʼ tsu, ti fo nə̀ kəlàmkə, zhiʼ wen diʼ Demetyòs. Ghə̀ ti mənyo mə ngə̀ŋ jɨm Altemis a ndiʼì Nyìngòŋ wùwì. Shyèʼ aghenə nku ko à viʼi shwèʼ wen no ghoʼo.

²⁵Demetyòs dzàŋtə̀ viʼi shwèʼ wen bènə̀ viʼi vətsenvə a və bè nti fo ə̀ gàʼ à vəwenə la, “Vəlèmə̀ vwomə, ghə̀ŋ ə kɨ la vəghəŋ ə kiʼì ghoʼ vəghəŋ tò fa shyèʼ ghèn a vəghəŋ ə shwèʼè lə̀.

²⁶Ghə̀ŋ zhʉ li be nyen kənyʉ̀ a Bol ghèn ə nè fà ghə̀ŋ a ngəŋsə. Ghə̀ ne li nghoʼo viʼi a Efesùs nə̀ a Asìyà no vətsèm mbyɨmə la vənyìngòŋ vi a və shɨ̀tə̀ lì ko diʼ nkàyntə̀ vənyìngòŋ.

²⁷Ngəʼ lì dìʼ luwèn la viʼi a zìtə̀ ngàʼà nyʉ̀ byɨvə byìʼì shwèʼè vəghəŋ kèn la vəwenə be a nlyɨ̀ ngə̀ŋ jɨ̀m Altemis la àdìʼ kəfo kətsenkə. Na kènkə a nè kò a ndìʼ la Nyìngòŋ aghèn be a nkiʼ ghoʼsə, andiʼ tò wen a viʼi Asìyà nə̀ viʼi mbyi no vətsèm nghoʼsə̀.”

²⁸Nòyn viʼi vi nè zhʉ̀ kənyʉ̀ a kènkə, tinsə vəwenə sə fwi, vəwenə sə zɨmə̀ gàʼà la, “Altemis yì a vəghəŋ ghoʼsə̀ a Efesùs ə̀ ŋaŋtə chò no vənyìngòŋ vətsèm!”

²⁹Zɨmə aghenə sàykə̀ dyʉ̀ a ti ntə̀ʼ no tsèm, nòyn ayì shen ə̀ dyʉ̀ ghàʼ viʼi jèʼ Bol vətsenvə, andiʼ viʼi Macedonia ə̀ kwen ə̀ dyʉ̀ nə̀ vəwenə a kəshi kə ntsèntə̀ ntə̀ʼ. Təzhiʼ tə viʼi a vyi ndìʼ Gayòs wenə̀ Alistakùs.

³⁰Bol nkəŋə ədyʉ̀ tsu əgàʼ à viʼi, alì viʼi vəbyɨməvə tensə la kə ghə̀ à dyʉ̀.

³¹Viʼi vəghoʼkəvə vətsenvə a və ntisə̀ nyʉ̀ a shyə loʼ ayì, ndìʼ ndoŋsə Bol. Vəwenə tɨm ntɨm à wen ə̀ gàʼ la kə ghə̀ à dìʼ kəʼə wen a ntsèntə̀ ayì.

³²Andìʼ a lì, no ndò zɨmə̀ gàʼà tò kəwen kənyʉ̀ byìʼàndo nghoʼo viʼi nko kɨ̀ tè la və yì tsèntə̀ tsu ənè gho lo.

³³Viʼi vətsenvə nyenə tò la Alèksandà kìʼ kənyʉ̀ əgàʼ byìʼàndo Vəjew ngàʼà la ghə̀ cho ə̀ tɨ̀mə a mbì. Alèksandà tsòʼsə̀ kəvu kə wen a kàŋ ə̀ nè la viʼi chɨmə, mù zìtə̀ əgàʼ ədìʼ la à ko yì zìtə̀ Vəjew nzìtə̀ ngəʼ aghèn,

³⁴alì viʼi avenə nè yen ə̀ kɨ̀ la Alèksandà dìʼ wu Jus, vəwenə zìtə̀ sə tsèntə̀ zɨmə̀ a gɨ to la, “Altemis yì a vəghəŋ ə ghoʼsə̀ a Efesùs ə ŋaŋtə chò vənyìngòŋ no vətsèm!” Vəwenə faŋ ə̀ sə̀ zɨmə̀ tò a lì a tì vəhawà vəbò.

³⁵Fa yì bàm, wìʼ a ghə̀ nyòʼò nyʉ̀ be tùʼmə̀ nə̀ ntə̀ʼ ayì nè, viʼi chìʼ la kùʼ, ghə̀ mù gàʼ à vəwenə la, “Viʼi vətsèm ə̀ kɨ la ghə̀ŋ viʼi Efesùs diʼ ntùʼmə̀ nə̀ ngə̀ŋ jɨ̀m Altemis, be tùʼmə̀ nə̀ ngùʼ yì a ghə̀ mfəŋə fa kàŋ a nse, vəghəŋ sə̀ ghoʼsə.

³⁶No wìʼ muʼ ko zì ghə̀ tensə nyʉ̀ avenə. Ma sə gàʼà à ghə̀ŋ la ghə̀ŋ bwaʼsə tətyɨm tyəŋtə, kə wìʼ a dèmə nè kənyʉ̀ ke kwòʼtə̀,

³⁷byìʼe ghə̀ŋ vì li nə̀ viʼi venə vəbò a shèn ko ndiʼ la vəwenə tsoŋ li kəfo fa vəghəŋ a ngə̀ŋ jɨ̀m ko telə Nyìngòŋ vəghəŋ.

³⁸A sətsèn ndiʼ la Demetyòs wenə̀ viʼi shwèʼ wen kiʼ kənyʉ̀ əghàm wìʼ fa viʼi venə tsu, vəwenə lyɨ̀ wìʼ ayì ə̀ dyʉ̀ nə̀ wen a kəshi kə nsoʼ, byiʼ ando viʼi vi a soʼò nsoʼ ə vì tsu no mətsi ntsèm.

³⁹Sətsèn ghə̀ŋ be ə kiʼi kənyʉ̀ ə chò nakènkə a ghə̀ŋ ə kəŋə, ghə̀ŋ ə dyʉ̀ nə̀ kəwenkə a ntsèntə̀ yì a viʼi ntə̀ʼ ə tisə̀ nyʉ̀ tsu,

⁴⁰byìʼàndo kə sətsèn nè fʉ̀ la vəghəŋ ə səʼə li ngəʼ, kə ne mfànsə̀ no nànto. Kə a ndiʼ la wìʼ fa vəghəŋ ne taŋ ə layn fa nsoʼ ayì.”

⁴¹Ghə̀ gàʼ a lì mù gàʼ la no ndò lu mpfwo.