Read Babanki Shwèʼ 2 Bible Online

Shwèʼ 2 - Babanki bible

Shwèʼ 2

¹Andìʼ ando kətsi kə ghoʼokə a və ndzàŋə̀ nə̀ Bentakòs mvi, viʼi vəbyɨməvə tsèntə̀ a kəshi kə mùʼ.

²A sətsèn tsen kəfo kətsenkə dèm fa kàŋ to nə̀ fwof ə toghə, shiʼi ə̀ kwèn a ngə̀ŋ yì a vəwenə ndiʼì tsu.

³Vəwenə mù bvʉ̀tə̀ yèn fo və diʼ to nə̀ kəlwàŋ kə zhìʼ ə̀ gə̀sə̀ dyʉ̀ ŋwʉʼʉ no a kətʉ ndò a ghə̀ ndiʼì tsu.

⁴Kəzhwì kə Ŋwoʼəkə kwen à vəwenə a tətyɨm ə̀ nè no mə ndò a ghə̀ ndiʼì tsu zìtə̀ sə̀ gàʼà gaʼa Loʼo kədyàŋ ando kəzhwì akì ntensə wen la ghə̀ gàʼ.

⁵Andìʼ a zhʉ ayì Vəjew diʼ a Jelusalèm a vəwenə mù gumlə Nyìngòŋ mu və lù no fa təloʼ tətsèm a tì mbi.

⁶Vəwenə nè zhʉ̀ Kəfo ki a kə dèmə li, nòyn viʼi no və ghoʼo tsèntə̀. Vəwenə no və tsèm ndìʼ nə̀ mesə wèn byìʼàndo viʼi və byɨməvə a vyi ngàʼà, no ndò zhʉ tò à wen a gaʼa loʼ.

⁷Vəwenə sə̀ diʼ nə̀ kanə, təchʉ̀ tə vəwenə bè zɨm byìʼì kənyʉ̀ akì. Vəwenə mù gàʼ la, “Viʼi venə a və gàʼà a shyə̀ lə̀ lù tò fa Galìlì no vətsèm.

⁸A lè chò ghò mibu no ndò sə zhʉ vəwenə gàʼà tò gaʼa loʼ wen a?

⁹Vəghəŋ dìʼ a shèn vətsenvə diʼ mu və lù fa shyə Balthia, fa shyə Midìyà nə̀ Elam, fa Mesobotamiyà, fa Judiyà nə̀ Kabadosiyà, fa Bontùs nə̀ fa Asìyà.

¹⁰Fa Fligiya nə̀ Bamfiliyà, fa Ijìb bènə̀ təshyə tə Libiyà a tə boʼsə Silen. Və Vətsenvə lù fa Lum, adiʼ Vəjew nə̀ viʼi ntɨm vətsenvə vi a və kwitə li vəwenə və mù sə gumlə̀ Nyìngòŋ Vəjew.

¹¹Vəghəŋ vətsenvə mfʉ mvì fa Klete nə̀ Alebyà. Vəghəŋ ə zhʉ vəwenə gàʼà tò təgàʼ tə təloʼ nə̀ vəghəŋ vi a Nyìngòŋ ne li.”

¹²Vəwenə nè sə̀ bu diʼ nə̀ kanə, kənyʉ̀ a kènkə be ku ngəʼ à vəwenə, kyè mù sə̀ bèmə̀ à kyè la, “Kènkə dìʼì la ghò?”

¹³Alì viʼi vətsenvə bòŋsə̀ sə̀ chəʼə viʼi avenə gàʼà la, “Vəwenə nyʉ məlʉ̀ʼ mə nghaʼ vəwenə.”

¹⁴Bità ando ghə̀ ndiʼì wenə̀ viʼi ntɨm ə̀ Yesò vətsenvə vi njʉ̀mùʼ mù fʉ̀tə̀ vì ə̀ gàʼ a gɨ to la, “Ghə̀ŋ ə viʼi Jus bènə̀ ghə̀ŋ vi no vətsèm a ghə̀ŋ ə tsi a Jelusalèm, ghə̀ŋ zhʉtə à! Ghə̀ŋ diʼi əkɨ la,

¹⁵Viʼi venə ko bomə məlʉ̀ʼ ando ghə̀ŋ ə kwòʼtə̀ byìʼàndo luwèn bò bu tò təzhʉ abʉ̀muʼ a boʼòngə̀ŋ.

¹⁶Kənyʉ̀ akènkə a vəwenə ə nè lə̀ bòŋsə̀ dìʼ kənyʉ̀ a nshə̀ʼtə̀ Jowel ə̀ nlù gàʼa. Ghə̀ nlù gàʼa la,

¹⁷Nyìngòŋ ə gàʼ a la, ‘A lu ndiʼ a mətsi mə̀ kənsèsə̀, Mà ku kəzhwì komkə à viʼi no vətsèm. Vu vəŋə ə lʉmə nə̀ ki lu nshə̀ʼtə̀ nyʉ̀ à viʼi a Nyìngòŋ ə̀ shə̀ʼtə̀ à vəwenə. Mà lu nè ə mbvòʼò wìʼ ə yèyn nyʉ̀ to sə tsi jòm, be ne jòmsə ə ntsi viʼi vətovə ghə̀ŋ.

¹⁸Nəmwèʼè, mà lu be ku kəzhwì komkə no te à viʼi shyèʼè mò, lʉmə nə̀ ki a mətsi a mì, vəwenə nshə̀ʼtə̀ nyʉ̀ vyi a mà nshə̀ʼtə̀ à vəwenə.

¹⁹Mà lu ne nyʉ̀ kanəvə a kàŋ ə be dìʼ chwitə a nse. Viʼi lu yen mənlyuŋ nə̀ zhiʼ bènə̀ mbòʼ fələʼ.

²⁰A lu ndiʼ a tʉʼ ayì, chʉzhʉ kaʼkə ndiʼ mfɨnə̀, sàŋ be mbò to nə̀ mənlyuŋ. Mibu kətsi kə ghoʼokə kə Bobo kə sə vì.

²¹A lu ndiʼ a tʉ a nyʉ̀ avenə fʉ̀, Bobo bwòŋsə̀ no ndò a ghə̀ dzàŋə̀ zhiʼ wen’”.

²²Bità gàʼ a lì bè gàʼ la, “Ghə̀ŋ viʼi Islel, ghə̀ŋ tuʼù zhʉtə nyʉ̀ venə a mà kə ə gàʼ lə̀! Yesò ə wù Nazalèt ndìʼ wìʼ a Nyìngòŋ ndiʼì li à ghə̀ŋ a ndayn. Ghə̀ ndìʼì əchò fa nyʉ̀ kanəvə bènə̀ chwitə a ghə̀ nè əchò fà wen ə Yesò à ghə̀ŋ a ntìntìn. Nkàyntə̀ ghə̀ŋ ə kɨ nyʉ̀ avenə.

²³Və mbaʼlə̀ li Yesò aghèn ando Nyìngòŋ ə̀ nshɨ̀tə̀ li ə̀ ghʉ bè kɨ, ghə̀ŋ zhwi wen a ji la ghə̀ŋ ə̀ nku wen à viʼi ne nyʉ̀ byɨvə. Vəwenə bantə wen a kəntò,

²⁴alì Nyìngòŋ nè ghə̀ lù fa pfʉ ə̀ bwòŋsə̀ wen fa kədyòʼ kə pfʉ byìʼàndo ji ko ndìʼ a pfʉ nzì ghə̀ lə̀ ghaʼa wen.

²⁵A diʼ ando fòyn Devìt ə̀ ngaʼà li byìʼì Yesò la, ‘Mà nyenə Bobo Nyìngòŋ à mò a shɨ tò məzhʉ̀ ntsèm, ghə̀ diʼ à mò a shyə kwoŋ toghə, ndi kə no kəfo kətsenkə à nə̀ʼsə̀ mò.

²⁶Byìʼì kənyʉ̀ akènkə, tyɨm ə̀ ghomə saŋlə̀, mà be ghoʼsə̀ wen nə̀ chʉ̀ ghomə, tè bè a lì, ma ki dyʉ̀sə̀ tò nə̀ kənyʉ̀ kì a ghə̀ lu nè à mò,

²⁷byìʼàndo wù ko lu kyemə kəzhwì kom la kə faŋ a loʼ viʼi və pfʉkəvə, ko à ndiʼ la wù a ghʉsə bvenə wù shwèʼ nəmwèʼè wù la ghə̀ fwe.

²⁸Wù diʼì li jisə shyə̀sə à mò a mà zì mà jèʼ fa tsu ndi ndiʼ ə to. Mà ne ndiʼ nə̀ saŋlə ghə̀ byìʼàndo wù dìʼ yowù no məzhʉ̀ ntsèm.’”

²⁹Bità mù dyʉ̀ mbì əgàʼ la, “Vəlèmə̀ vwomə, mà zì ma gàʼ à ghə̀ŋ no nəmwèʼè byìʼì tìʼ vətìʼ və vəghəŋ ghə̀ mbì ə fòn Devìt la ghə̀ mpfʉ li, və bvɨ̀mə̀ wen, se wen bo sə diʼ əkuʼ əzaʼa lan.

³⁰Devìt ə̀ ndìʼ nshə̀ʼtə̀ ghoʼo Nyìngòŋ mu Nyìngòŋ nzhɨ li məkàyn wenə̀ wen la ghə̀ lu ŋwʉʼsə wù ngwaʼa ngə̀ŋ wen à wen a kəfwoyn.

³¹Ghə̀ nyen li kənyʉ̀ kì a Nyìngòŋ ndìʼ ne nè mibu zhʉ yi kuʼ ə̀ kwʉ̀ʼ mù gàʼ kùmə̀ wìʼ yì a Nyìngòŋ ntsuʼ li ə̀ ghʉ la ghə̀ lu lù fa pfʉ la, ‘Nyìngòŋ ko lu kyemə wen a loʼ viʼi vəpfʉkəvə, bvenə ə wen ko lu fwè.’

³²Nyìngòŋ nkye li la Yesò aghèn lu fa pfʉ. Vəghəŋ vətsèm dìʼ viʼi və yenəvə a kənyʉ̀ aghèn.

³³Ghə̀ mù lyɨ̀ wen ə̀ kùʼsə à wen a shyə kwoŋ ə̀ toghə. Yesò shi kəzhwì kəŋwoʼəkə kì a Tìʼ wen ə̀ nghʉ la ghə̀ lu ku à wen, ə̀ ku kəzhwì akì a ghə̀ŋ ə yenə be zhʉ à yès luwèn.

³⁴Vəghəŋ kɨ li la fòyn Devìt fa wen a ngə̀ŋ nko kùʼ a kàŋ, alì ə̀ gàʼ la, ‘Bobo Nyìngòŋ ngàʼa à Bobo ghom la, ŋwʉʼmə à mò a shyə kwoŋ ə̀ toghə,

³⁵Əzaʼa fa zhʉ a mà a ne viʼi kəbàyn ə̀ wù ə ndiʼ ntomsə aghʉ wù.’”

³⁶“Viʼi Islel no vətsèm diʼi əkɨ nəmwèʼè la Nyìngòŋ ə ne li Yesò ghèn a ghə̀ŋ tə̀ bayntə a kəntò lə̀ sə diʼ Bobo bè diʼ Klistò.”

³⁷Viʼi avenə nè zhʉ̀ nyʉ̀ vyi a Bità ngàʼà, və sə̀ ku ngəʼ à vəwenə a tətyɨm no nànto. Vəwenə mù bèm à Bità wenə̀ viʼi ntɨm Yesò vətsenvə vi la, “Vəlèmə yès lè zì yès ne ale?”

³⁸Bità bwènsə̀ gàʼ à vəwenə la, “No ghə̀ŋ vətsèm kwitə tətyɨm tyəŋtə fà ghə̀ŋ a nyʉ̀ byɨvə ə̀ shì mu ə dìʼ la ghə̀ŋ ə byɨmə li a Yesò Klistò ndi Nyìngòŋ lyèsə ku nyʉ̀ byɨvə ghə̀ŋ, ə̀ kù Kəzhwì kə Ŋwoʼəkə kènkə à ghə̀ŋ.

³⁹Kəzhwì kə Ŋwoʼə kènkə a Nyìngòŋ nghʉ li la ghə̀ lu ku lə̀ ə dìʼ à ghə̀ŋ, nə̀ a vunə vəŋə bènə̀ à viʼi a və diʼì no kəghaf. A dìʼ viʼi vi no vətsèm a Bobo Nyìngòŋ dzàŋə̀ li la və vi à wen.”

⁴⁰Bità gàʼ a lì bè shə̀ʼtə̀ kùʼ nə̀ nyʉ̀ à viʼi a vyi no ghoʼo bè sə̀ sensə̀ vəwenə gàʼà la, “Ghə̀ŋ gyàmtə̀ tə wen tyəŋtə ndi kə Nyìngòŋ lù ku ngəʼ à ghə̀ŋ ando ghə̀ ndiʼ lu ku à viʼi tətyɨm təbyɨtə a kəlyɨŋ kə luwèn.”

⁴¹Byìʼì a lì viʼi no vəghoʼo byɨmə gaʼa Bità, və ku mu à vəwenə. Viʼi əzaʼa nkamsə sətaʼ kwʉ̀ʼsə̀ a nòyn viʼi və byɨməvə vi a kətsi akì

⁴²vəwenə bè kù təwen tə vəwenə sə̀ zhʉtə̀ nyʉ̀ vyi a viʼi ntɨm ə̀ Yesò nziʼì gə̀tə̀ no kənyʉ̀ kə kò akì a vəwenə nkiʼi zhɨ be jɨ̀mə̀ tò a kənyʉ̀ kə mùʼ.

⁴³Nyìngòŋ nè viʼi ntɨm ə Yesò və sə̀ nè nyʉ̀ kanəvə no ghoʼo, və nè viʼi vətsèm sə̀ diʼ nə̀ kanə.

⁴⁴Viʼi və byɨməvə vi faŋ ə̀ sə̀ diʼ tò a kənyʉ̀ kə mùʼ be gə̀tə̀ no mə ghò yì a vəwenə nkiʼi à vəwenə a ntìntìn.

⁴⁵Vəwenə bàʼlə fo vi a vəwenə nkiʼi ə̀ gə̀tə̀ ko yi à viʼi vəbyɨməvə vi a və nko kiʼ.

⁴⁶Vəwenə vi zhùŋtə̀ à ngə̀ŋ Nyìngòŋ tò mətsì ntsèm. Vəwenə nè fʉ̀, və sə jèʼè zhɨ tò à ngə̀ŋ a ngə̀ŋ be saŋlə̀ a kənyʉ̀ kə mùʼ,

⁴⁷be ghoʼsə̀ Nyìngòŋ. Viʼi vətsèm sə̀ ki vəwenə, vəwenə kuʼmə tò byìʼì ntsìnə̀ jùŋ yì a vəwenə ntsi. Bobo sə̀ kwʉ̀ʼsə̀ viʼi vi a ghə̀ mbwòŋsə̀ li à vəwenə a nòyn tò mətsì ntsèm.