Read Babanki Shwèʼ 21 Bible Online

Shwèʼ 21 - Babanki bible

Shwèʼ 21

¹Yès ghʉsə viʼi Efesùs vi ə̀ dyàŋ dyʉ̀ tò fəchìʼ a ntə̀ʼ Cos. Tʉʼ layn, yès dyʉ̀ a ntə̀ʼ Lodes, nè lù fà tsu ə̀ dyʉ̀ a ntə̀ʼ Batalà.

²Andìʼ ando yès ndìʼ tsu, yès yen kəbaŋ kə a mù a kə ndyʉ̀ a loʼ Fònisiya ə kwèn tsu ə lù.

³Yès nè jèʼ no alə̀ dyʉ̀ zaʼa a kəshi kətsenkə sə ki dyʉ̀sə̀ yèn loʼ Saybùs, alì shiʼi ə̀ dyʉ̀ jì fa loʼ Sylia. Kəbaŋ kə a mù akì kə vì tɨ̀mə a ntə̀ʼ Tayà andiʼ kəshi a və ndiʼ shìsə̀ fo tsu, yès mù fʉ̀ tsu.

⁴Andìʼ tsu, yès kəŋ ə̀ yèn viʼi vəbyɨməvə vətsenvə tsu yo vəwenə tsi mətsi sòmbo. Kəzhwì kə ŋwòʼəkə nè vəwenə shə̀ʼtə̀ à Bol la kə ko bòŋ la ghə̀ be dyʉ̀ a Jelusalèm.

⁵Andìʼ ando yès ntsìtə li kwʉ̀ʼ, mù sə kəŋə əlù, vəwenə fʉ̀kə̀ no vətsèm wenə̀ ki vəwenə nə̀ vunə ə̀ vì ətensə yes a chʉ̀ a mù, yo vəwenə gwʉ̀ʼtə alwi yo vəwenə tsu ə̀ jɨ̀m.

⁶Yo vəwenə nè tòŋtə mè yès kwen a kəbaŋ kə a mù ə̀ lù, vəwenə mù bwènə̀ sə pfwo.

⁷Yès lù fa ntə̀ʼ Tayà ə̀ jèʼ tò alə̀ ə̀ dyʉ̀ fʉ̀ a ntə̀ʼ Bolemyas ə̀ ghayntə viʼi vəbyɨməvə vətsenvə tsu yo vəwenə tsi

⁸Tʉʼ lan, yès lù dyʉ̀ a Sisalìyà ə̀ dyʉ̀ kwèn a ngə̀ŋ wutsen a ghə̀ nshə̀ʼtə̀ ntɨm jùŋ Nyìngòŋ, zhiʼ wen diʼ Filib bè tsì tsu. Ghə̀ ndìʼ wìʼ muʼ fa ntìntìn viʼi vyi a və ntsuʼù a Jelusalèm lì.

⁹Ghə̀ nkìʼ vunə ki wen vəkàʼ kò andìʼ la vəwenə tɨmə làmkə. Vəwenə nshə̀ʼtə̀ dyʉ̀ nə̀ gaʼa Nyìngòŋ.

¹⁰Yes tsìtə tsu no mətsi alə̀. Nshə̀ʼtə̀ ghoʼo tsen lù fa Judiyà ə̀ vì tsu, zhiʼ wen diʼ Agabus.

¹¹Ghə̀ vì shì kətəŋ kə Bol ə̀ kwìʼ aghʉ wen nə̀ avu wen tsu tò fà wen a ngə̀ŋ ə̀ gàʼ la, “Kəzhwì kə ŋwòʼəkə gàʼ la, a lè ando Vəjew vi a və diʼì a Jelusalèm ne kwiʼ wìʼ yì a ghə̀ kiʼì kətəŋ kènkə ə ku wen à tɨmə.”

¹²Yo viʼi vyi a və ndiʼì tsu nè zhʉ̀ kənyʉ̀ akènkə ə̀ sènsə Bol la kə ghə̀ be à kùʼ a Jelusalèm,

¹³alì Bol bwènsə̀ gàʼ la, “Ghə̀ŋ ə nè ghò lə̀? Byìʼì ghò a ghə̀ŋ ə ku ngəʼ à mò a tyɨm a? Mà ko kə̀ʼtə̀ ə və kwiʼ mò tò kwiʼi a Jelusalèm, mà kə̀ʼtə̀ əpfʉ tè pfʉ byìʼì Bobo Yesò.”

¹⁴Yès yen mè la yès zì kò yès ə lə̀ kwitə kwòʼtə̀ wen mù ghʉsə ə̀ gàʼ la, “A nè nchò tè ghò nə̀ wù, kə nchò ando Bobo kəŋə.”

¹⁵Yès bè tsìtə tsu mù bàʼtə fo vyesə ə̀ lù kùʼ a Jelusalèm.

¹⁶Yo viʼi vəbyɨməvə vətsenvə ndyʉ̀ tsu a muʼu mù və lù fa Sisalìyà. Vəwenə lyɨ̀ yès yo vəwenə dyʉ̀ tsì a ngə̀ŋ wù Saybùs tsen, zhiʼ wen diʼ Mnasòn, a andiʼì wu byɨmə no fà kəghaf.

¹⁷Yès dyʉ̀ zaʼa a Jelusalèm, viʼi vəbyɨməvə shisə yes tsu nə̀ saŋlə ghə̀.

¹⁸Tʉʼ layn, yo və Bol dyʉ̀ yèn Jems ali vəchəʼ və viʼi və byɨməvə.

¹⁹Bol toŋtə vəwenə ə̀ shə̀ʼtə̀ no nyʉ̀ tsèm a Nyìngòŋ ə ne à viʼi tɨm əchò fà wen a shwèʼ.

²⁰Vəwenə zhʉ nyʉ̀ avenə sə ghoʼsə̀ Nyìngòŋ mù gàʼ à Bol la, “wu zi wu yen la ngwaʼ və Jus a və zi ko və lu taŋ əbyɨmə li be ghʉ soʼ Mosìs no nkayn.

²¹Və shəʼtə̀ li à vəwenə la wu ziʼì Vəjew a və tsi a təloʼ tə tɨm la kə vəwenə nghʉ təsoʼ tì a Mosìs ə vì nə̀ təwentə, mbe shə̀ʼtə̀ la wù gàʼà la kə vəwenə a nshyə ndyə̀ tə vunə vəwenə, la wù tensə̀ nyʉ̀ vyi a ntsìnə̀ Vəjew ə kəŋə.

²²Vəwenə a zhʉ la wù vi li. Yès zì yès nè ale?

²³Viʼi diʼ a shə̀ vəkàʼ a və ghʉ li kənyʉ̀ a məkàyn wenə̀ və Nyìngòŋ. Ne tò kənyʉ̀ a yès a gàʼ la wù ne

²⁴Wù a lyɨ̀ vəwenə wenə̀ və wenə dyʉ̀ shʉ̀ təwen təŋtə ndi nlaynə a shɨ Nyìngòŋ, wù loʼ no ghò yì a vəwenə ndiʼ lòʼ ndi və kom tʉ vəwenə. Wù sətsèn nè a lì, və à yèn nəmwèʼè la no tè ghò a və tə ngàʼà byìʼì wù dìʼi ndzɨ̀ŋ byìʼàndo no nkàntə̀ wù ə̀ ghʉ soʼ Mosìs.

²⁵Yes ntɨm li ŋwàʼlə̀ à viʼi tɨm vi a və sə diʼ viʼi vəbyɨməvə la, yès ghʉ li la kə wìʼ fà tsu a nzhɨ kəfo a kə sə diʼ mu və moʼò li a nə̀ kəku à vənyìngòŋ, bè gàʼ la kə vəwenə a nlo mənlyuŋ kò pfiʼ nyàm a və sɨŋsə̀ sɨŋsə, bènə̀ la kə wìʼ fa tsu lù tsì nə̀ wùwì kò nə̀ wulɨm a ko diʼ ghə̀ wen.”

²⁶Tʉʼ layn, Bol lyɨ̀ viʼi a vyi wenə̀ vəwenə dyʉ̀ shʉ̀ təwen tə vəwenə, ghə̀ mù lù dyʉ̀ kwèn a ngə̀ŋ Nyìngòŋ ə̀ shə̀ʼtə̀ mətsi mì a vəwenə ndìʼi ne mwètə̀ ə shʉ̀ təwen tə vəwenə, bè shə̀ʼtə̀ zhʉ yi a no ndò fà vəwenə a ntìntìn ndiʼ ne ku kəku kə wen ando soʼ ndìʼì.

²⁷Andìʼ ando mətsi a mì sòmbo nsə mè dyʉ̀, Vəjew vətsenvə mu lù fa loʼ Asìyà yen Bol a ngə̀ŋ Nyìngòŋ ə̀ nè ngəʼ zìtə̀ a tì nòyn viʼi vi, vəwenə ghaʼ Bol,

²⁸mù sə zɨmə gàʼà la, “Wo viʼi Islel, ghə̀ŋ gyàmtə̀! Ghèn dìʼ wìʼ yì a ghə̀ jèʼè ziʼì nyʉ̀ byɨvə byìʼì viʼi Islel nə̀ soʼ Mosìs bènə̀ ngə̀ŋ Nyìngòŋ ghèn. A sə diʼ luwèn, ghə̀ be nlyɨ̀ viʼi tɨm ə̀ nkwen wenə̀ vəwenə a ngə̀ŋ Nyìngòŋ, sə mbyɨ shi nè la kə və ndiʼ ŋwoʼo.”

²⁹Vəwenə ngàʼà a lì byìʼ ando vəwenə nyen li Bol a tì ntə̀ʼ wenə̀ wù Efesùs tsen a və ndzàŋə̀ wen nə̀ Tlophimùs mù sə̀ kwòʼò tò la Bol lyɨ̀ li wen, wenə̀ wen nkwen a tì ngə̀ŋ Nyìngòŋ.

³⁰Ngəʼ mù zì tò shì tsèm a ntə̀ʼ, viʼi shen ə̀ dyʉ̀ ghaʼ Bol ə̀ gùf fʉ̀ nə̀ wen fa tì ngə̀ŋ Nyìngòŋ ə̀ chiʼtə təchʉ̀ ti.

³¹A nè sə ndiʼ ando nòyn ayi ə̀ mwòmsə əzhwi Bol, və tɨm la və dyʉ̀ ə̀ shə̀ʼtə̀ à kətʉ kə vəsugyèʼ kə ghoʼokə viʼi Lum la Jelusalèm lɨmə la bèm.

³²Ghə̀ nè zhʉ̀ kənyʉ̀ akì no a zhʉ̀ kò, ə̀ lyɨ̀ vəsugyèʼ bènə̀ tʉtʉ vəsugyèʼ vətsenvə, wenə̀ vəwenə shen shìʼi a kəshi ayì. Viʼi a vyi nè yèn wen tò yenə wenə̀ vəsugyèʼ kò vəwenə bè kùm kəvu a wèn Bol.

³³Kətʉ kə vəsugyèʼ akì dyʉ̀ à Bol ə̀ gàʼ və ghaʼ wen ə̀ kwìʼi wen nə̀ mpfɨŋsə səbò. Ghə̀ mù bèm à viʼi a vyi la, “Wìʼ ghèn dìʼ ndo? Ghə̀ nè ghò?”

³⁴Viʼi vətsenvə fa tì nòyn ayì sə zɨmə̀ kənyʉ̀ kə mùʼ, vətsenvə zɨmə̀ gàʼà kə kədyàŋ kə. Kətʉ kə vəsugyèʼ kə ghoʼokə kì yen la kəmfɨŋmə̀ kə diʼ no nànto kò a ndiʼ la ghə̀ zì ghə̀ kɨ la à chò ghò lo. Ghə̀ mù gàʼ la vəsugyèʼ vi lyɨ Bol ə̀ kùʼ nə̀ wen a kəbəŋ vəsugyèʼ.

³⁵Vəwenə jèʼ ə̀ dyʉ̀ zaʼa a nsəʼsə əkuʼ a kəbəŋ ayì ə̀ tsòʼsə̀ Bol byìʼàndo nòyn a ghə̀ mvì fa bàm mbyɨfə,

³⁶zɨmə gàʼà tò la, “Və zhwi wen!”

³⁷Andìʼ ando və nsə kəŋə əkwen nə̀ Bol a kəbəŋ vəsugyèʼ, ghə̀ bèm à kətʉ kə vəsugyèʼ akì la, “A mà lè zì mà gàʼ kənyʉ̀ à wù a?” Ghə̀ bwènsə̀ gàʼ la, “Wu gaʼa gàʼà Glis a? Gaʼa.

³⁸Wù lì ko diʼ wù Ijìb yì a ghə̀ nzìtə ngəʼ a shèn ə̀ gùf viʼi à wen a bàm ə zaʼa a nkamsə səkàʼ ə̀ dyʉ̀ nə̀ vəwenə a nse zɨm la vəwenə mfʉ̀ zhwilə̀ viʼi lì.”

³⁹Bol bwènsə̀ à wen la, “Mà dìʼ wu Jus, mu və mbwì mo a ntə̀ʼ Talsus a loʼ Silisiyà. Mà dìʼ alə̀ mu mà fʉ̀ fa ntə̀ʼ to. Mà lonə la wù ku mo nə̀ jì mà gàʼ à viʼi venə.”

⁴⁰Kətʉ kə vəsugyèʼ kì ku ji, Bol tɨmə a nsəʼsə əkuʼ a kəbəŋ ayì ə chìʼ viʼi nə̀ kəvu kəwenkə. Vəwenə nè chɨmə mè no a zhʉ̀ kò, ghə̀ gàʼ à vəwenə a gaʼà Hibùlù la: