Read Babanki Shwèʼ 22 Bible Online

Shwèʼ 22 - Babanki bible

Shwèʼ 22

¹“Vəlèmə̀ vwomə, nə̀ vətìʼ vwomə, ghə̀ŋ zhʉtə kənyʉ̀ a ma ti a ghə̀ŋ a shɨ əgàʼ ndi gyàmtə̀ wen ə ghom a.”

²Vəwenə nè zhʉ̀ ando ghə̀ ngàʼà gaʼa Hibùlù, vəwenə chiʼ ədyʉ̀ tò la kùʼ. Bol gàʼ la:

³“Mà dìʼ alə̀, diʼ wu Jus, mu və mbwì mo a Talsus, a loʼ Silisiyà, mà kwi ə kuʼ tò a ntə̀ʼ a shə̀, ndìʼsə̀ ghom ndìʼ Gamalè. Ghə̀ ndìʼsə̀ li mò nə̀ təsoʼ tə vətìʼ və vəghəŋ və mbì no tətsèm. Kənyʉ̀ kə Nyìngòŋ kə sə̀ lɨ̀mə̀ à mo a wèn tò ndə̀ŋndəŋ ando kə be lɨ̀mə̀ à ghə̀ŋ a təwèn layn.

⁴Mà nyàblə̀ nə̀ viʼi vəbyɨməvə a və ndzɨ̀mtə̀ Jì fi ghèn a no nkàntə̀ mò ə jèʼè fa tsu layn lə̀, ə̀ zhwilə vətsenvə. Mà nghaʼtə lʉmə nə̀ ki shwìnə̀ a mfɨŋ.

⁵Kətʉ kə tʉtʉ vəpfèm və ngə̀ŋ Nyìngòŋ nə̀ vəchəʼ və loʼ no vətsèm zì və tɨmə a nə̀ viʼi və yenəvə a nyʉ̀ venə a ma gàʼà lə̀. Vəwenə nyòʼò li vəŋwàʼlə̀, ə̀ kù kədyòʼ à mò gàʼà la mà dyʉ̀ ə̀ kù à vəlèmə̀ vwomə Vəjew a ntə̀ʼ Damaskus ə̀ ghaʼtə viʼi vyi a və ndzɨ̀mtə̀ Jì fi aghèn ə̀ vì nə̀ vəwenə a Jelusalèm ndi və ku ngəʼ à vəwenə.

⁶“Andìʼ ando mà njèʼè nè sə mboʼsə̀ dyʉ̀ a Damaskus, bayn tsenghə bvʉ̀tə̀ fʉ̀ fa kàŋ ə̀ bàŋ a kəshi a mà ndiʼì tsu a ntìntìn nə̀nchwì.

⁷Mà fəŋ a nse ə̀ zhʉ̀ ando wìʼ toŋtə̀ mò ə ngaʼ la, ‘Saul, Saul, wù tsuʼu kəghʉ komkə alə̀ byìʼì ghò?’

⁸Mà bèm à wen la, ‘A dìʼ wu ndo a Bobo?’ Ghə̀ bwènsə̀ la, ‘A dìʼ mo Yesò ə wù Nazalèt yì a wu tsuʼ a ghʉ wen lì.’

⁹Viʼi vi a yo vəwenə njèʼè a muʼu yen li bayn ayi alì kò vəwenə lù zhʉ̀ kənyʉ̀ kì a və ngàʼà à mo.

¹⁰Ma mù bèm à wen la, ‘Mà lè zì mà ne no ghò luwèn a Bobo?’ Ghə̀ gàʼ la, ‘Lù kwen ə̀ dyʉ̀ a tì ntə̀ʼ Damaskus, a və a shə̀ʼtə̀ kənyʉ̀ kì a Nyìngòŋ ə kəŋə la wù ne.’

¹¹Bayn ayi ə̀ ne li kò ma be nyenə shi, viʼi vi a yo vəwenə njèʼè a muʼu ghaʼ mo fa kwoŋ ə̀ gùftə̀ kwèn nə̀ mò a Damaskus.

¹²“Wutsen ntsi tsu gumlə̀ Nyìngòŋ be tsi ando soʼ vəghəŋ ə kəŋə, Vəjew no vətsèm ngumlə̀ wen, zhiʼ wen ndìʼ Ananyàs.

¹³Ghə̀ vì tɨ̀mə à mò a mbyɨ̀ ə̀ gàʼ à mò la, ‘Lèmə̀ ghom Saul, bwènsə̀ nyenə shi!’ Tò a zhʉ ayì ashɨ ghomə bòʼkə̀, mà ki ə̀ yèn wen.

¹⁴Ghə̀ gàʼ à mò la, ‘Nyìngòŋ yì a vətìʼ və vəghəŋ nlù sə gumlə̀ lì, ə tsuʼ li wù la wù kɨ kənyʉ̀ a ghə̀ kəŋə la wù nè be yen ə̀ kɨ wù kənyʉ̀ kə tɨmə kə yì a ghə̀ shwèʼè à wen, bè zhʉ̀ ando ghə̀ gàʼà à wù fà wen a ngə̀ŋ,

¹⁵byìʼ ando wù a nti a nə̀ wuyenə à wen, be nshə̀ʼtə̀ nyʉ̀ vyi a wù zhʉ li be nyen fa wu a ngə̀ŋ à viʼi vətsèm.

¹⁶Luwèn lə̀, kə be a zhwi zhʉ, lu shì mu ə̀ sènsə Bobo la ghə̀ lyesə nyʉ̀ byɨvə wù.’

¹⁷“Mà bwènə̀ dyʉ̀ a Jelusalèm ə̀ dyʉ̀ a ngə̀ŋ Nyìngòŋ sə njɨ̀mə̀, kənyʉ̀ kə fʉ̀ a mò a kə̀ʼ sə a tsi jòm.

¹⁸Ma yen Bobo, ghə̀ gàʼà gàʼ à mò la, ‘Zàŋsə̀ lù fʉ̀ fà Jelusalèm a shə̀ byìʼàndo viʼi avenə ko byɨmə kənyʉ̀ a wù gàʼà byìʼì mò.’

¹⁹Ma bwènsə̀ gàʼ à wen la, ‘Bobo, vəwenə kɨ li nəmwèʼè la no nkàntə̀ mò tə njèʼè fà a loʼ ntsèntə̀sə ghaʼtə̀ viʼi vyi a və byɨmə à wù dyʉ̀ shwìntə̀ a mfɨŋ be ghòmə̀.

²⁰Andìʼ ando və nzhwi Stifèn ando ghə̀ nti a nə̀ wuyenə byìʼì wù, nkàntə̀ mò ndìʼ tsu tomsə̀ la və zhwi wen. A ntùʼmə̀ nə̀ mò tùʼmə̀ nə̀ gwʉ̀nə̀ viʼi vyi a və nzhwi wen.’

²¹Bobo bè gàʼ à mò tò la, ‘Lu, byìʼàndo ma tɨm wù no kəghaf à viʼi tɨm.’”

²²Bol ngàʼà a lì, vəwenə zhʉtə̀ tò zhʉ̀tə. Ghə̀ nè gàʼ ə̀ zaʼa kəlyɨŋ kènkə, vəwenə zìtə̀ sə̀ zɨmə̀ no a gɨsə sə̀ tosə gàʼà la, “Ghə̀ŋ zhwi kəfo akènkə ə̀ màʼà dyʉ̀! Ghə̀ ko kwʉ̀ʼ əndiʼ.”

²³Vəwenə sə nzɨmə̀, ə̀ tsùʼtə ghʉnə vəwenə vətsenvə sə bvɨ̀ŋə̀ a kàŋ, ŋwàʼà kəbyìʼ waŋ ə kuʼsə a kàŋ.

²⁴Kətʉ kə vəsugyèʼ kì gàʼ və lyɨ̀ Bol ə̀ kwen ə̀ dyʉ̀ nə̀ wen a tì kəbə̀ŋ kə vəsugyèʼ kì ə̀ ghòm wen no nkàyn ndi ghə̀ shə̀ʼtə̀ la Vəjew venə zɨmə gàʼà nyʉ̀ venə alə̀ byìʼì wen byìʼì ghò lo.

²⁵Andìʼ ando və nkwìʼi wen mù sə kəŋə ə nghòmə̀, ghə̀ bèm à kətʉ kə vəsugyèʼ kətsenkə a kə nti boʼsə wen la, “Soʼ lè byɨmə la və ghom wù Lum kènla və soʼ li wen əyen la ghə̀ byɨsə li kənyʉ̀ lo?”

²⁶Kətʉ kə vəsugyèʼ akì nè zhʉ̀ kənyʉ̀ akènkə ə̀ dyʉ̀ bèm à kətʉ kə vəsugyèʼ kə ghoʼo kə kì la, “Wù kəŋə ə mwòmsə gho? Wìʼ ghèn dìʼ alə̀ diʼ wù Lum.”

²⁷Kətʉ kə vəsugyèʼ kə ghoʼokə akì dyʉ̀ yèn Bol ə̀ bèm à wen la, “shə̀ʼtə̀ à mò, la wù bè dìʼ wù Lum lo.” Bol bwènsə̀ la yì dìʼ wù Lum.

²⁸Kətʉ kə vəsugyèʼ akì gàʼ la yi nlòʼò ko no ghoʼo mibu ndiʼ wù Lum, alì Bol gàʼ la, “Mà dìʼ wù Lum fà bwi.”

²⁹Ando ghə̀ ngàʼa a lì no a zhʉ̀ kò, viʼi vyi a və kəŋə ə ghòmə wen, zìtə̀ sə kòytə̀ a bàm. Fàynə vì à kətʉ kə vəsugyèʼ kì ando ghə̀ nzhʉ la Bol dìʼ wù Lum mu ghə̀ be kwìʼi wen nə̀ mpfɨŋsə.

³⁰Tʉʼ lan, kətʉ kə vəsugyèʼ kə ghoʼokə kì gàʼ la və zatə wen, be gàʼ la tʉtʉ vəpfèm və ngə̀ŋ Nyìngòŋ bènə̀ viʼi soʼò nsoʼsə vì tsèntə̀ byìʼàndo ghə̀ nkəŋə əzhʉ la Vəjew ə ghàmə̀ Bol byìʼì ghò lo. Vəwenə vì ghə̀ mù gàʼ la Bol cho ə̀ tɨmə a mbì ntsèntə̀ ayì.