Read Babanki Shwèʼ 23 Bible Online

Shwèʼ 23 - Babanki bible

Shwèʼ 23

¹Bol ki dyʉ̀sə̀ nə̀ viʼi vi a ntsèntə̀ ayì ə̀ gàʼ à vəwenə la, “Vəlèmə̀ vwomə, mà ko kwòʼò kwoʼ la ntsìnə̀ yì a mà tsi a shɨ Nyìngòŋ ə zaʼa fa layn dìʼ ale lo. Mà kɨ la ghə̀ dìʼ to nkàyn”

²Ananyàs a ndiʼì kətʉ kə vəpfèm və ngə̀ŋ Nyìngòŋ gàʼ à viʼi vyi a və nti boʼsə Bol lì la vəwenə ghom kəvu à wen a chʉ̀.

³Bol gàʼ à wen la, “Nyìngòŋ be lu ghòm wù ndə̀ŋndəŋ, wù fəfə kə̀ʼə̀ a nə̀ wen ə ngə̀ŋ a və zuʼu! Wù ŋwʉʼ a fì gàʼà la və soʼ mò ando soʼ ə kəŋə, be kwàʼà soʼ ayi tò nkàyntə̀ wù, əgàʼ la və ghom ə chʉ̀ ghomə.”

⁴Viʼi vi a və nti boʼsə Bol gàʼ à wen la, “Wù telə̀ kətʉ kə vəpfèm və ngə̀ŋ Nyìngòŋ lo?”

⁵Bol bwènsə̀ gàʼ à vəwenə la, “Vəlèmə̀ vwomə, mà ko yì kɨ̀ la ghə̀ dìʼ alə̀, diʼ kətʉ kə vəpfèm və ngə̀ŋ Nyìngòŋ. Mà tu yi kɨ, mu mà ko yì tè wen byìʼàndo və nyòʼò li a Ŋwàʼlə̀ Nyìngòŋ la, ‘Kə wìʼ lù tè wìʼ a ghə̀ soʼo viʼi wen.’”

⁶A sə ndiʼ ando Bol nyen li la fa ntìntìn viʼi a və ndìʼ a ntsèntə̀ ayì, vətsenvə ndìʼ Və Falàsi, vətsenvə diʼ Vəsadùsis, ghə̀ mù zɨ̀mə no a gɨ to la, “Vəlèmə̀ vwomə, mà dìʼ alə̀ diʼ wu Falàsi, mu vətìʼ vwomə bè ndìʼ tò Və Falàsi. Və soʼo mò a shèn luwèn byìʼàndo mà byɨmə la Nyìngòŋ lu nè viʼi lu fà pfʉ.”

⁷Ghə̀ nè gàʼ nyʉ̀ avenə no a zhʉ̀ kò ntaŋ zìtə̀, kəngə̀sə̀ kə bè mù sə̀ diʼ a ntìntìn Və Falàsi bènə̀ Vəsadùsis,

⁸byìʼàndo Vəsadùsis nko byɨmə la viʼi lu lù fà pfʉ, la kəfo kətsenkə ko diʼ a nə̀ ntsɨŋsə ngə̀ŋ Nyìngòŋ ko a nə̀ kəzhwì, alì Və Falàsi mbyɨmə̀ a nyʉ̀ avenə no tsèm.

⁹Təzɨmə tə sə gàʼà dyʉ̀ tò nə̀ mbì. Ndìʼsə̀ sə təsoʼ sətsensə a andìʼ viʼi nòyn Və Falàsi mù lù tɨ̀mə sə taŋmə̀ no nə̀ kədyòʼ kə gàʼà la, “Yès ko yèn kənyʉ̀ kə byɨkə kì à wìʼ ghèn ne. A zì a ndiʼ mu à gàʼ kəzhwì kò ntsɨ̀ŋ ngə̀ŋ Nyìngòŋ tsen à wen!.”

¹⁰Kətʉ kə vəsugyèʼ kə ghoʼo kə kì yen la ntaŋ sə to dyʉ̀ tò nə̀ mbì ghə̀ sə̀ fànə̀ la viʼi a vyi a sàtə Bol tò a kiʼ a kiʼ, ghə̀ gàʼ à vəsugyèʼ vəwen la və shiʼi ə̀ dyʉ̀ lyɨ̀ Bol fʉ̀ nə̀ wen fa tì nòyn ayì ə̀ kwèn nə̀ wen a tì kəbə̀ŋ kə vəsugyèʼ.

¹¹A nè sə ndiʼ nəntʉʼʉ, Bobo vì tɨ̀mə a mbyɨ̀ Bol ə̀ gàʼ à wen la, “Nkiʼ tyɨm toghə tò a lì! Ando wù tɨmə̀ li a nə̀ wuyenə à mò a shɨ viʼi Jelusalèm, wù diʼ be dyʉ̀ tɨmə tò a lì a shɨ viʼi a Lum.”

¹²Tʉʼ nè lan, Vəjew vətsenvə tsèntə̀ ghʉ̀ a məkàyn la vəwenə ko be a zhɨ ko nyʉ tè kəfo, kətsenkə ə zaʼa fa zhʉ a vəwenə a zhwi Bol.

¹³Viʼi avenə a və mbaʼtə̀ kənyʉ̀ akènkə nchò məwum nkàʼ.

¹⁴Vəwenə mù dyʉ̀ yèn tʉtʉ vəpfèm və ngə̀ŋ Nyìngòŋ bènə̀ vəchəʼ ə̀ gàʼ à vəwenə la, “Yès tsentə̀ li nghʉ a məkàyn la yès ko be ten kəfo à yès a təchʉ̀, a bwen la yès zhwi Bol.

¹⁵Yès ə̀ kəŋə luwèn la ghə̀ŋ viʼi soʼò nsoʼsə,tɨm ntɨm à kətʉ kə vəsugyèʼ kə ghoʼokə kì gàʼà à wen la və lyɨ Bol ə̀ vì nə̀ wen à ghə̀ŋ, bɨ̀lə̀ ədiʼ la ghə̀ŋ ə kəŋə ə bèmtə̀ mənyʉ̀lə̀ à wen no nkàyn. Və a sə mvì nə̀ wen ə yès zhwi wen kò a ndiʼ la ghə̀ tɨmə̀ zaʼa a shèn.”

¹⁶Wàyn lèmə̀ Bol, wùwì zhʉ kənyʉ̀ kì a vəwenə mbaʼtə̀ lì ə̀ dyʉ̀ a kəbəŋ kə vəsugyèʼ kì ə̀ shə̀ʼtə̀ à Bol.

¹⁷Bol dzàŋtə̀ kətʉ kə vəsugyèʼ kətsenkə ə̀ gàʼ à wen la, “Lyɨ wàyndyə nkùŋ ghèn ə̀ dyʉ̀ nə̀ wen à kətʉ kə vəsugyèʼ kə ghoʼo kə. Ghə̀ kìʼ kənyʉ̀ əshə̀ʼtə̀ à wen.”

¹⁸Kətʉ kə vəsugyèʼ akì lyɨ̀ wàyndyə nkùŋ ayì ə̀ dyʉ̀ nə̀ wen à kətʉ kə vəsugyèʼ kə ghoʼokə akì ə̀ gàʼ à wen la, “Wù mfɨŋ yì a zhiʼ wen diʼ Bol lì gàʼ la mà lyɨ̀ wàyndyə nkùŋ ghèn ə̀ vì nə̀ wen à wù byìʼàndo ghə̀ kìʼ kənyʉ̀ əshə̀ʼtə̀ à wù.”

¹⁹Kətʉ kə vəsugyèʼ kə ghoʼo kə akì ghaʼ kwoŋ wàyn ayi ə̀ gùftə̀ dyʉ̀ nə̀ wen a kəshi kə lyomtəkə ə̀ bèm à wen la, “Wù kəŋə shə̀ʼtə̀ la ghò à mò a?”

²⁰Ghə̀ gàʼ la, “Vəjew və ghʉ li la à lu ndiʼ a boʼòngə̀ŋ ə vəwenə gàʼ à wù la wù lyɨ Bol ə̀ shìʼi nə̀ wen a kəbòʼ kə nsoʼ, bɨ̀lə̀ diʼ la vəwenə ə kəŋə əbèmtə tò nyʉ à wen.

²¹Kə a zhʉtə kənyʉ̀ akènkə byìʼàndo vəwenə chò məwum nkàʼ a və a lyòmtə̀ mbvʉ̀tə̀ wen a ji, diʼ a lì mu vəwenə ghʉ li a məkàyn la vəwenə ko ten kəfo a vəwenə a təchʉ̀ ə zaʼa fa zhʉ a vəwenə a zhwi Bol. Vəwenə bvʉ̀tə̀ luwèn əzhwi wen, alì kə̀ʼtə̀ əzhʉ la wù a gàʼ la ghò lo.”

²²Kətʉ kə vəsugyèʼ kə ghoʼokə kì gàʼ à wen la, kə ghə̀ à mwòm əshə̀ʼtə̀ à wìʼ la ghə̀ shəʼtə̀ li kənyʉ̀ a kènkə à wen, mù gàʼ à wen la ghə̀ lu ndyʉ̀.

²³Kətʉ kə vəsugyèʼ kə ghoʼokə kì dzàŋtə̀ tʉ vəsugyèʼ və wen la vəbò ə̀ gàʼ à vəwenə la, “Ghə̀ŋ lyɨ vəsugyèʼ təghɨ təbò ə boʼsə nə̀ vəsugyèʼ vətsenvə a və nyɨŋə a tʉ nyamsə məwum sòmbo, bènə̀ vi a və soynə nə̀ aghoŋ təghɨ təbò, wenə̀ vəwenə mbvʉ̀tə̀ ədyʉ̀ a Sisalìyà. Vè vəwenə mbaʼtə̀ əlù a təzhʉ abʉ̀muʼ nəntʉʼʉ layn.

²⁴Ghə̀ŋ ku vəlyəŋ vətsenvə à Bol, ghə̀ njèʼè à yì a tʉ. Ghə̀ŋ mwomsə əjèʼ nə̀ wen to nkàyn ə dyʉ̀ nə̀ wen à gumnà Felik.”

²⁵Kətʉ kə vəsugyèʼ akì mù nyòʼ nyʉ̀ venə a ŋwàʼlə̀ ə̀ kù la vəwenə dyʉ̀ nə̀ wen, ŋwàʼlə̀ ayì ngàʼà la:

²⁶“A nyòʼ mò Klodùs Lysiyas, nyoʼ ŋwàʼlə̀ ghèn à wù a Felik Gumnà jùŋə. Mà tɨmə toŋtə à wù.

²⁷Kə diʼ la Vəjew tə ghàʼ wìʼ ghèn sə kəŋə əzhwi, mà vì kwen a yì a kənyʉ̀ yo vəsugyèʼ vwomə ə̀ bwòŋsə̀ wen ando mà tə zhʉ̀ la ghə̀ dìʼ wù Lum.

²⁸Mà tə lyɨ̀ wen ə̀ shiʼi nə̀ wen a vəwenə kəbòʼ kə nsoʼ byìʼàndo mà tə nkəŋə əkɨ la və ghaʼa wen mu ghə̀ byɨsə ghò lo.

²⁹Ando mà tə shìʼi lì, mà bòŋsə̀ yèn la vəwenə gàʼà a nyʉ̀ byìʼì soʼ vəwenə kò a ndiʼ la ghə̀ byɨsə li kənyʉ̀ a zi və zhwi wen kò we wen a mfɨŋ byìʼì kəwenkə.

³⁰Və nè shə̀ʼtə̀ à mò la və bò baʼtə̀ tò bàʼtə əzhwi wen, mà nyen la kə bòŋ la mà tɨm wen à wù tò luwèn. Ma be gàʼ à viʼi a vyi a və ghàmə̀ wen lì la vəwenə dzɨ̀mtə̀ əvì shə̀ʼtə̀ ngəʼ vəwenə à wù.”

³¹Kətʉ kə vəsugyèʼ akì zhʉ kənyʉ̀ kì a kətʉ kə vəwenə yì gàʼ ə̀ lyɨ̀ Bol tò nəntʉʼʉ ayì vəwenə jèʼ ə̀ dyʉ̀ zaʼa a Antibatlìs.

³²Tʉʼ lan, vəsugyèʼ vi a və njèʼè a kəghʉ̀ lì bwènə̀ pfwo. Bol lù sə̀ dyʉ̀ wenə̀ vi a və njèʼè a tʉ vəlyəŋ lì.

³³Vəwenə lyɨ̀ wen wenə̀ vəwenə dyʉ̀ zaʼa a Sisalìyà ə̀ ku wen à gumnà ə boʼsə nə̀ ŋwàʼlə̀ yì a və tə kù à vəwenə lì.

³⁴Gumnà ayì dzàŋ ŋwàʼlə̀ ayì ə̀ bèm à Bol la ghə̀ lù fa loʼ kò lo? A nè sə ndiʼ ando ghə̀ nzhʉ̀ la Bol lù fa loʼ Silisiyà,

³⁵ghə̀ gàʼ à wen la, “Mà lu zhʉ nsoʼ wù a zhʉ a viʼi vyi a və ghàmə̀ wù lì vi li.” Ghə̀ gàʼ a lì mù gàʼ la vəsugyèʼ vəwen lyɨ Bol ə̀ dyʉ̀ ghʉ̀ a ntuʼ yì a Helòd mbwomə.