Read Babanki Shwèʼ 24 Bible Online

Shwèʼ 24 - Babanki bible

Shwèʼ 24

¹A sə ndiʼ a bàmə mətsi ntàyn, Ananyàs a ndiʼì kətʉ kə tʉtʉ vəpfèm və ngə̀ŋ Nyìngòŋ lù shìʼi a ntə̀ʼ Sisalìyà, wenə̀ vəchəʼ vətsenvə bènə̀ wutsen a ghə̀ nsoʼo nsoʼsə, a və ndzàŋə̀ wen nə̀ Teltulùs. Vəwenə vì a shɨ Felik a ndiʼì Gumnà loʼ aghèn ə̀ shə̀ʼtə̀ ngəʼ vəwenə byìʼì Bol.

²Və dzàŋ Bol, ə kù ji à Teltulùs la ghə̀ gàʼ, ghə̀ mù zìtə̀ sə gàʼà nyʉ̀ venə byìʼì Bol la: “Tì kəbə̀ŋ ə ghoʼo, yès kiʼi li mbwaʼmə̀ no a kəghaf kə dyəkə, byìʼàndo wù soʼo yès nə̀ tofə. Wù ne li nyʉ̀ jùŋvə mvi à yès a loʼ no ghoʼo.

³Yès ə saŋlə̀ à wù no nkàyn byìʼì nyʉ̀ avenə.

⁴Mà ko kòŋ əlyɨ zhʉ wu nànto, sə sensə̀ la wù zhʉtə ntemə nyʉ̀ vyi a yès kìʼ əshə̀ʼtə̀ à wù.

⁵Yès sə tə yèn la wìʼ ghèn dìʼ no wu byɨ fànsə. Ghə̀ moʼò li kəngə̀sə̀ a ntìntìn Vəjew tò a mbì tsèm, be diʼ kətʉ a nòyn mənàŋ mə viʼi Nazalèt.

⁶Yès tə ghaʼa wen ghə̀ kəŋə ə byɨsə ngə̀ŋ Nyìngòŋ yes, ənè la kə ghə̀ ndìʼ laynə a shɨ Nyìngòŋ. Yès tə nghʉ la yès a soʼ wen ando soʼ yes ə kəŋə.

⁸Sə tsen nkàntə̀ wù bèm nyʉ̀ venə à wen, wù be à zhʉ kwʉ̀ʼsə̀ nyʉ̀ tsenəvə vi a yès ə ghàmə̀ wen tsu.”

⁹Vəjew tsèntə̀ gàʼ tò la, nyʉ̀ vyi a və ghàmə̀ wen tsu diʼ nəmwèʼè no tsèm.

¹⁰Gumnà ayì ku ji à Bol la ghə̀ gàʼ, ghə̀ mù lù gàʼ la, “Mà kɨ li la wù soʼ li loʼ ghenə no a ngwʉ̀ʼsə ghoʼsə, ma sə saŋlə̀ luwèn ə nti à wù a shɨ əgàʼ ndi gyàmtə̀ wen ghomə.

¹¹Wù zì wù kəŋ ə̀ yèn tò fà wù a ngeŋ la mətsi cho li tò njʉ̀ səbò luwèn ando mà tə kùʼ a Jelusalèm ə ghoʼsə Nyìngòŋ.

¹²Vəwenə ko tə yèn la mà soʼtə̀ nyʉ̀ yo viʼi. Mà ko tə mòʼ kəngə̀sə̀ kətsenkə a ntìntìn viʼi ngə̀ŋ Nyìngòŋ kò a aloʼ ntsèntə̀, kò no fe yi a tì ntə̀ʼ,

¹³kò andiʼ la vəwenə zì vəwenə diʼ kənyʉ̀ kə mùʼ fa tì nyʉ̀ venə a vəwenə gàʼà byìʼì mò luwèn.

¹⁴Kənyʉ̀ kì kə mùʼ a mà zì mà byɨmə dìʼ tò la, mà kuʼsə Nyìngòŋ, dzɨ̀mtə̀ Jìsə shì a Bobo kəŋə la viʼi ntsi fa tsu no tè ando vəwenə gàʼà la àdìʼ jisə ndzɨ̀ŋsə. Nyìngòŋ aghèn a mà ghoʼsə̀ lə̀ dìʼ yì a vətìʼ və vəghəŋ nghoʼsə̀ fa mbi. Mà be byɨmə a nyʉ̀ vyi a və nyòʼò a soʼ Mosìs no tsèm bènə̀ vi a və nyòʼò a vəŋwàʼlə̀ və nshə̀ʼtə̀sə səghoʼkəsə.

¹⁵Mà kìʼ tò ndə̀ŋndəŋ kwòʼtə̀ a vəwenə be kìʼ la Nyìngòŋ lu nè viʼi vəjùŋvə nə̀ vəbyɨvə lu fà pfʉ no vətsèm.

¹⁶A le kənyʉ̀ a kə ne mà sə mwòmsə no məzhʉ̀ ntsèm nkiʼ ətyɨm ə laynə ghə̀ a shɨ Nyìngòŋ bènə̀ a shɨ viʼi.

¹⁷“Andìʼ fà bàmə ngwʉ̀ʼsə no səghoʼo a mà ntsi li a kəbəŋ a mà mbwènə̀ vì a Jelusalèm nə̀ ko a və ntɨmə̀ la mà vi kù à viʼi vwomə, be kù à kəku à Nyìngòŋ.

¹⁸Vəwenə nyèn mo a ngə̀ŋ Nyìngòŋ mu mà sə diʼ mu mà ne li nyʉ̀ avenə ə mè mbe shʉ wen ghomə ndi ndiʼ nə̀ laynə shɨ Nyìngòŋ. Kənyʉ̀ kə nko chò tsu kò andiʼ la nòyn viʼi diʼ tsu.

¹⁹Andìʼ tò Vəjew vətsenvə a və nlu fa loʼ Asìyà. A zì à bòŋsə vì vəwenə ə̀ tɨ̀mə à wù a shɨ ə gàʼ kənyʉ̀ byìʼì mò a zhʉ a kənyʉ̀ kətsenkə ndiʼì.

²⁰A bwen a lì, viʼi venə a shèn shə̀ʼtə̀ kənyʉ̀ kì a vəwenə tə yèn la mà byɨsə li ando mà tə gàʼ a shɨ kəbòʼ kə nsoʼ.

²¹Kənyʉ̀ kə mùʼ a mà ne dìʼ tò la, ando mà ndiʼì a vəwenə a ntìntìn, mà zɨmə ə̀ gàʼ la, ‘Və soʼo mò layn alə̀ byìʼàndo ma byɨmə la viʼi lə̀ lù fà pfʉ.’”

²²Felik dìʼ wìʼ, a ghə̀ nkɨ byìʼì Jìsə shìsə a Bobo nkəŋə la viʼi ntsi fa tsu. Andìʼ ando Vəjew nghàmə̀ Bol, Felik gàʼ la kə və be soʼo nsoʼ ayì bè gàʼ la, yì lu tin nsoʼ ayì a zhʉ a Lysiyas a diʼì kətʉ kə vəsugyèʼ kə ghoʼo kə vì li.

²³Ghə̀ gàʼ a lì mù chòsə̀ soʼ à kətʉ kə vəsugyèʼ la ghə̀ shwin Bol alì nbo kye wen ghə̀ fʉ jèʼtə̀ bè gàʼ la, kə və à ntàʼsə̀ viʼi ndoŋsə wen la kə vəwenə a vì nku fo vi à wen a ghə̀ kəŋə.

²⁴Mətsi nè chò nshəʼ alə̀, Felik vì wenə̀ wì wen Dlusila, a ndìʼ wu Jus ə tɨm la və dyʉ̀ ə̀ dzàŋ Bol ghə̀ vì. Bol nè vì, vəwenə mù sə zhʉtə̀ ando Bol ngàʼà byìʼì byɨmə à viʼi kiʼì a Yesò Klistò.

²⁵Bol nè sə gàʼ ə nshə̀ʼtə̀ ando viʼi diʼ ndiʼ kənyʉ̀ kə tɨməkə be ghaʼa təwentə vəwenə, bè shə̀ʼtə̀ ando kətsi kə lu vì a Nyìngòŋ lu soʼ viʼi. Ando ghə̀ ngaʼa kənyʉ̀ akènkə, fàyn ghaʼ Felik, ghə̀ gàʼ la Bol lu a yì ne be dzàŋə wen a zhʉ a yì kiʼi zhʉ.

²⁶Andìʼ a zhʉ ayì, ghə̀ kwòʼtə̀ la Bol a ku ko à yì, ghə̀ mù sə̀ laʼtə̀ tò alə̀ ghə̀ dzàŋə Bol byìʼì kwòʼtə̀ aghenə wenə̀ wen bèsə̀ nyʉ̀.

²⁷Ngwʉ̀ʼsə nè chò səbò, Bolsiyùs Festus vì lyɨ̀ kəshi kə Felik a nə̀ gumnà. Felik sə nlù ghʉ̀sə tò Bol a mfɨŋ byìʼàndo ghə̀ nkəŋə la Vəjew nkòŋə̀ wen.