Read Babanki Shwèʼ 26 Bible Online

Shwèʼ 26 - Babanki bible

Shwèʼ 26

¹Aglibà gàʼ à Bol la, “Və ku li kəshi à wù la wù gàʼ kənyʉ̀ byìʼì wen wu.” Bol tsòʼsə̀ kəvu kə wen a kàŋ ə̀ zìtə̀ əgàʼ ndi gyàmtə̀ wenə wen la:

²“Fòn Aglibà! mà kɨ li la à bòŋ kətʉ kom la mà tɨmə à wù a shɨ layn ə̀ gàʼ ndi shʉ kətʉ kom fa nyʉ̀ a Vəjew ə ghàmə̀ mò tsu.

³Nakènkə diʼ nəmwèʼè byìʼàndo wù kɨ li ntsìnə̀ loʼ Vəjew bènə̀ nəkwoŋ a ghə̀ diʼì a vəwenə a ntìntìn no nkàyn, mà mu sə lonə la wù dzensə wen wu ə̀ zhʉ̀tə kənyʉ̀ a mà kəŋə əgàʼ.

⁴“Vəjew no vətsèm ə kɨ ando mà ntsi fa tʉʼ a mà mbò bu wàyndyə be kɨ la mà nkwi tò à yès loʼ bènə̀ a Jelusalèm,

⁵be kɨ mò no fà kəghaf mu vəwenə zì və shə̀ʼtə̀ ə̀ mwètə̀ no nkàyn a zhʉ a vəwenə koŋə, la mà dìʼ wu Falàsi mu mà nlu li sə ghoʼsə̀ Nyìngòŋ no tè a ji kò a Və Falàsi nghoʼsə̀ Nyìngòŋ fa tsu.

⁶Və nè mà ntɨmə a shèn luwèn ə və soʼ mo tò byìʼàndo ma kɨ nəmwèʼè la Nyìngòŋ lu lwinsə məkàyn mì a ghə̀ nlù kàyn ə̀ ghʉ wenə̀ vətìʼ və vəghəŋ və mbì,

⁷à be diʼ tò məkàyn mì a ngwàʼsə təloʼ tə viʼi vəghəŋ venə njʉ̀sə̀bò sə ghoʼsə̀ Nyìngòŋ nə̀nchwì nə̀ nəntʉʼʉ kɨ la vəwenə lu kiʼi. A bè dìʼ tò byìʼì kwòʼtə̀ aghenə a mbè a Vəjew ə ghàmə̀ mò.

⁸Byìʼì ghò a ghə̀ŋ ə Vəjew ə tyenə əbyɨmə la Nyìngòŋ ə lùsə̀ viʼi fà pfʉ a?

⁹“No nkàntə̀ mò nlù sə̀ kwòʼtə̀ la mà diʼi nè no ghò a mà zì mà ne əbyɨsə shwèʼè Yesò ə wù Nazalèt.

¹⁰Andìʼ shwèʼ a ma nshwèʼè a Jelusalèm. Tʉtʉ vəpfèm və ngə̀ŋ Nyìngòŋ nku kədyòʼ la mà nwe viʼi vyi a və ghoʼsə Nyìngòŋ a ji yi a ma ghoʼsə fa tsu luwen a mfɨŋ no vəghoʼo. A bè ndìʼ ando və nchòsə̀ soʼ la və zhwi vəwenə no nkàntə̀ mò ə̀ ntomsə̀.

¹¹Mà nku ngəʼ à vəwenə no a aloʼ ntsèntə̀sə no tsèm no a məzhʉ̀ ntsèm be mwòmsə̀ la vəwenə tyen byɨmə vəwenə à Yesò. Mà mbàynə̀ vəwenə no a jì a mà nlu dyʉ̀ a təloʼ tə tɨm ku ngəʼ à vəwenə tsu.

¹²“A dìʼ tò byìʼì kənyʉ̀ akènkə a mà nlù sə ndyʉ̀ a Damaskus ando tʉtʉ vəpfèm və ngə̀ŋ Nyìngòŋ ntɨ̀m mo bè kù àdyoʼ la mà dyʉ̀,

¹³mà nè fʉ̀ zaʼa a ji a ntìntìn nə̀nchwì, a mbe, bàyn tsenghə fʉ̀ fa kàŋ to chò chʉzhʉ ə bayn a kəshi yì a mò yo viʼi a və njèʼè fà mò a bàm ə̀ ndìʼ tsu.

¹⁴Yès fəŋkə a nse tò vətsèm, mà zhʉ ando gɨ̀ ə gàʼà à mò a gaʼa Hibùlù la, ‘Saul, Saul, wù tsuʼu kəghʉ komkə alə̀ byìʼì ghò? Wù zhuŋsə wen ə wu tò kədyàŋ gàʼà la wù soynə mò.’

¹⁵Mà bèm la, ‘A dìʼ wu ndo, a Bobo?’ Bobo bwènsə̀ gàʼ la, ‘A dìʼ mò Yesò yì a wù tsuʼu kəghʉ kə wen lì.

¹⁶Lù tɨmə a kàŋ. Mà fʉ̀ à wù a kə̀ʼ ə tsuʼ wù a nə̀ wù shyèʼ mò. Wù ne nti a nə̀ wu yenə à mò byìʼì nyʉ̀ venə a wù yenə lan bènə̀ tsenəvə a mà ne dìʼ à wù.

¹⁷Mà ne bwòŋsə wù fà avu viʼi Islel bènə̀ fà avu viʼi tɨm vi a ma tɨm wù à vəwenə luwèn.

¹⁸Wù ne bòʼtə ashɨ vəwenə be shìsə vəwenə fà ti mfɨnə̀ ə kwensə a tì bayn. Wù ne nè, vəwenə fʉ fà tì soʼ Satan ə̀ dyʉ̀ à Nyìngòŋ ndi və lyesə kù nyʉ̀ byɨvə vəwenə bè nè vəwenə nkiʼ kəshi a tì nòyn viʼi vi a Nyìngòŋ tsuʼli byìʼì byɨmə yi a vəwenə kiʼ à mò.’

¹⁹“Mà ko tə tyèn a fòn Aglibà, ənè kənyʉ̀ kì a bayn yi tə fʉ̀ fa kàŋ və gàʼ à mò la mà nè.

²⁰Ma tə zìtə̀ sə̀ ziʼi viʼi fa Damaskus a mbì, ə̀ ziʼi viʼi a Jelusalèm, ə̀ ziʼi viʼi a loʼ Judiyà no tsèm bè ziʼi viʼi tɨm la vəwenə kwitə tətyɨm tə vəwenə fà vəwenə nyʉ̀ byɨvə ə vì à Nyìngòŋ, la vəwenə nè nyʉ̀ vyi a və dìʼì la vəwenə kwitə li tətyɨm tə vəwenə.

²¹A dìʼ kənàʼ kə kənyʉ̀ a Vəjew nghàʼ mo a ngə̀ŋ Nyìngòŋ sə̀ kəŋə əzhwi,

²²alì Nyìngòŋ ngyàmtə̀ mò ə kuʼ ə zaʼa lan, mà sə ti a shə̀ luwèn a nə̀ wu yenə əshə̀ʼtə̀ nyʉ̀ venə à viʼi vətsèm, a viʼi vətyetəvə nə̀ vəghoʼkəvə. Kənyʉ̀ a ma gàʼà bè dìʼ tò ndə̀ŋndəŋ kənyʉ̀ a Mosìs bènə̀ nshə̀ʼtə̀sə səghoʼkəsə ndìʼ mu vəwenə shə̀ʼtə̀ li la kə lu chò.

²³Vəwenə nlù gàʼ la, Wìʼ yì a Nyìngòŋ ntsuʼ li ə̀ ghʉ diʼi yenə ngəʼ ə pfʉ be ndiʼ mbì wìʼ əlù fa pfʉ əshə̀ʼtə̀ à Vəjew bènə̀ viʼi tɨm la və zì və bwoŋsə vəwenə, na kènkə ndìʼ to a nə̀ baynə à vəwenə.”

²⁴Bol nè gàʼ ə̀ zaʼa a kəshi ghèn, Festus zɨmə ə̀ gàʼ la, “Bol, wù dìʼ alə̀ bomə̀. Ŋwàʼlə̀ ghèn a wu ziʼì no nànto lə ne li wù sə bomə̀!”

²⁵Bol bwènsə̀ la, “Mà ko bomə̀ a Mbè, nyʉ̀ venə no tsèm a ma gàʼà dìʼ nəmwèʼè be kiʼ tof.

²⁶Fòn Aglibà, mà zì mà gàʼ kè nə̀ fanə à wù byìʼàndo wù kɨ nyʉ̀ a venə no tsèm ko à ndiʼ la kətsenkə nchò li fa tsu ke wù kɨ byìʼàndo və nko ncho a kənlyòmtə.

²⁷Fòyn Aglibà, mà kɨ la wù byɨmə nyʉ̀ vyi a nshə̀ʼtə̀sə səghoʼkəsə nlù nyòʼ. Kə ko diʼ a lì?”

²⁸Fòn Aglibà bwènsə̀ bèm à wen la, “Wù lè kwòʼtə̀ la wù zì wù lyɨ tò kətemə kə zhʉ kènkə əkwitə mo mà ndiʼ wu byɨmə a?”

²⁹Bol shisə la, “A zì a ndiʼ lan, à zì a ndiʼ a boʼòngə̀ŋ, mà jɨ̀mə̀ tò la Nyìngòŋ ne wù ndiʼ wu byɨmə ə boʼsə nə̀ viʼi vətsèm vi a və zhʉtə̀ kənyʉ̀ a ma gàʼà lan, la vəwenə ndiʼ to nə̀ mò ə chò tò la mà dìʼ wù mfɨŋ.”

³⁰Fòyn mù lù wenə̀ gumnà nə̀ Beniys bènə̀ viʼi vi a wenə̀ vəwenə ndìʼ a muʼu

³¹sə bèsə̀ dyʉ̀ nə̀ kənyʉ̀ akì gàʼà la, “Wìʼ ghèn ko nè no kənyʉ̀ kə byɨkə kətsenkə a kə dìʼì la ghə̀ ndiʼ a mfɨŋ ko la və zhwi wen.”

³²Fòn Aglibà gàʼ à Festus la, “A tu ndiʼ la wìʼ ghèn ko sènsə la Fòyn ghoʼo fà Lum soʼ nsoʼ wen mu və ghʉsə li wen ghə̀ ndyʉ̀.”