Read Babanki Shwèʼ 28 Bible Online

Shwèʼ 28 - Babanki bible

Shwèʼ 28

¹Andìʼ a zhʉ a yès mfʉ̀ li ə̀ mè fà mù bo diʼ tò a nkàyn, yès zhʉ fà viʼi kəshi a vyi la və dzàŋə̀ loʼ ayi nə̀ Maltà.

²Viʼi loʼ a vyi gyàmtə̀ yès no a nkàyn ə̀ shɨ̀tə̀ zhiʼ à yès byìʼàndo əghʉ nzìtə̀ li əvì, kətaʼ kə sə̀ diʼ no nànto.

³Bol tsèntə̀ gə̀ nkòʼ sə nwe a zhìʼ yì, zhù zhʉ ando shi lɨ̀mə̀ fa tì nkòʼ yì ə̀ fʉ̀ lɨ̀m kəvu kə wen ə̀ ghaŋtə̀ tsu.

⁴Viʼi loʼ a vyi yen ando zhù ayì ə ghàŋə a kəvu Bol ə̀ gàʼ la, “Wìʼ ghèn zì ghə̀ ndiʼ alə zhwi viʼi. Ghə̀ nyɨŋ li mfʉ̀ fà mù, alì Ndòyn dìʼ à wen a kətʉ, ghə̀ dìʼ alə̀ a pfʉ tò pfʉ.”

⁵Bol mès kəvu kə wen, zhù ayì fəŋ a zhìʼ ken la ghə̀ lyomsə li wen no a mpfen.

⁶Vəwenə mù sə kwòʼtə̀ tò la wenə wen a mwìʼ, ko la ghə̀ a laʼtə tò alə̀ ə feŋ ə pfʉ. Vəwenə laʼtə no alə̀ kò a ndiʼ la vəwenə yen li la kənyʉ̀ kətsenkə fʉ̀ li Bol, vəwenə kwitə təkwòʼtə̀ tə vəwenə sə gàʼà la, “Ghə̀ dìʼ alə̀ diʼ Nyìngòŋ tsen!”

⁷Tìʼ loʼ ayì a zhiʼ wen ndìʼ Bubliyus nkìʼ təsɨm a mbyɨ̀ kəshi ayì. Ghə̀ shisə yès no a nkàyn ə̀ zhis yes a mətsi ntaʼ.

⁸A ndìʼ a lì, tìʼ Bubliyus kiʼ bvìʼ, bèm ə wen be tsuʼu. Bol kwen dyʉ̀ a tì ngə̀ŋ yì a ghə̀ nyoŋ tsu, ə̀ ghʉ avu wen à wen a kətʉ ə̀ jɨ̀m, kwaʼa ayi mè.

⁹Andìʼ ando kənyʉ̀ akènkə mfʉ, viʼi və kwaʼkəvə no vətsèm fa loʼ ayì sə vì, Bol be chʉʼʉ vəwenə.

¹⁰Viʼi loʼ a vyi tomsə yes ə̀ ku fo a yès no ghoʼo. A sə ndiʼ ando yès ə̀ nkəŋə əlù, vəwenə we no tè ghò a kəbaŋ kə a mù a yès ə̀ nkəŋə, yès lyɨ̀ ə̀ lù nə̀ wenəvə.

¹¹Yès ntsì a Maltà vəsàŋ vətaʼ, nè sə nlù ə̀ kwèn a kəbaŋ kə a mù a və ndzàŋə̀ nə̀, “vənyìngòŋ və mboʼməsə,” a kə nlu fa Alèksandìliyà ə̀ vì tɨ̀mə tsu byìʼàndo à ndìʼ nəbyɨ̀ŋ, fwof toghə be chò.

¹²Yès jèʼ ə̀ vì tsìtə a ntə̀ʼ Sylacùs mətsi ntaʼ,

¹³ə̀ lù fà ntə̀ʼ ayì ə̀ dyʉ̀ tsì a ntə̀ʼ Legum. Tʉʼ lan fwof ə zìtə̀ sə kuʼu vì fa shyə ten, yès jèʼ mətsi mbò ə̀ vì fʉ̀ a ntə̀ʼ Butiyolì.

¹⁴Ando yès nkwen ə̀ vì tsu, yès kwetə viʼi vəbyɨməvə, vəwenə sensə la yo vəwenə tsi. Yo vəwenə tsi woŋ mpfen, yès mù chò dyʉ̀ a Lum.

¹⁵A ndìʼ a lì mu viʼi vəbyɨməvə a Lum zhʉ li la yes ə vì, vəwenə lù ə̀ vì yèn yes a kəshi kə woŋ a Abyùs, vətsenvə vì yèn yes a kəshi yì a viʼi jèʼ mvì tsi tsu və ndzàŋə̀ nə̀ “nə̀ Ngə̀ŋ sə To”. Bol nè yèn vəwenə no a zhʉ̀ kò ə̀ kù kəzòŋ à Nyìngòŋ, ə̀ zìtə̀ sə̀ kiʼ tyɨm toghə.

¹⁶Andìʼ ando yès mvì zaʼa a Lum, və ghʉsə la Bol ndiʼ tò fà wen a ngeŋ nə̀ sugyèʼ a ghə̀ tsɨ̀ŋə̀ wen.

¹⁷Mətsi chò ntaʼ, Bol dzàŋtə̀ tʉtʉ Vəjew a ntsèntə̀. Vəwenə nè tsèntə̀, ghə̀ gàʼ à vəwenə la, “Vəlèmə̀ vwomə, Vəjew tə ghaʼ mo ə nè və shwìn mò a Jelusalèm be kù mo à viʼi Lum no tè ando mà ko tə̀ nè kənyʉ̀ kə byɨkə kətsenkə à viʼi vəghəŋ, kò a ndiʼ la mà gàʼà li ə̀ mbyɨsə tè kənyʉ̀ kətsenkə kùmə̀ ntsìnə̀ loʼ a ghə̀ nlu fà vətìʼ və vəghəŋ və mbì.

¹⁸Vəwenə bèmtə̀ nyʉ̀ à mò mù sə kəŋə əghʉsə mo byìʼàndo vəwenə nko yèn kənyʉ̀ a mà ne a və ndiʼi zhwi mo byìʼì kəwenkə.

¹⁹Ando Vəjew ntensə la kə və à ghʉ̀sə mò, mà mù sènsə la və ghʉsə mo, mà vi a Lum a shèn ndi Fòn ghoʼo zhʉ kənyʉ̀ byìʼì nsoʼ ghom no tè ando mà ko kiʼ kənyʉ̀ kə byɨkə kətsenkə əgàʼ byìʼì viʼi vwomə no fa mpfen.

²⁰A lè kənyʉ̀ a kə ne mà ngaʼ la mà yen ghə̀ŋ vəghəŋ besə a muʼu. Mà dìʼ a mpfɨŋsə alə̀ tò byìʼàndo mà byɨmə à wìʼ yì a viʼi Islel ə ghʉ kwòʼtə vəwenə tò à wen.”

²¹Vəwenə bwènsə̀ gàʼ à wen la, “Yès ko yèn ŋwàʼlə̀ a ghə̀ lu fa Judiyà mvì à shèn à yès byìʼì wù, ko a ndiʼ la vəlèmə̀ vyesə a və lù fa tsu mvi a shə̀ ə vi li nə̀ soʼgho tsen ko ngaʼ kənyʉ̀ kə byɨkə kətsenkə byìʼì wù.

²²Yès ə kəŋə zhʉ kwòʼtə̀ wu byìʼàndo yès ə chò no tè fa fe, zhʉ ando və gàʼà nyʉ̀ byɨvə byìʼì nkì nòyn ghenə a wu dìʼì tsu lə̀.”

²³Vəwenə mù ghʉ̀ kətsi be vi yen Bol. Kətsi akì kə kwʉ̀ʼ, vəwenə fʉ̀ ə̀ vì a kəshi yì a Bol ntsi tsu lì no vəghoʼo. Ghə̀ zìtə̀ fa boʼòngə̀ŋ sə gàʼà à vəwenə, ə̀ gàʼ ə zaʼa fa nəntʉʼʉ, shɨ̀tə̀ shə̀ʼtə̀ kənyʉ̀ kì a ghə̀ ndiʼi shə̀ʼtə̀ à vəwenə byìʼì kəshi kə fòn Nyìngòŋ. Ghə̀ tàŋkə̀ ənè vəwenə kɨ byìʼ Yesò, dzàŋə̀ fa ŋwàʼlə̀ Soʼ yì a Mosìs bènə̀ fa vəŋwàʼlə̀ və nshə̀ʼtə̀ səghoʼkəsə ədìʼ la kənyʉ̀ kì a yi gàʼà dìʼ nəmwèʼè.

²⁴Viʼi vətsenvə byɨmə la ghə̀ gàʼà tò nəmwèʼè, alì vətsenvə tyen la vəwenə ko a byɨmə.

²⁵Vəwenə gə̀sə̀ fà tsu tò nə̀ ntaŋ ando Bol ngàʼa kənyʉ̀ kènkə kə mùʼ tsu la, “Kəzhwì kə ŋwòʼəkə ə nè tò kənyʉ̀ kə tɨməkə əgàʼ à vətìʼ və vəghəŋ və mbì ə̀ chò fà nshə̀ʼtə̀ Azayà la:

²⁶‘Dyʉ̀ gàʼ à viʼi venə la, ghə̀ŋ lu nzhʉ nyʉ̀ tò zhʉ, alì kò ghə̀ŋ ə lu nkɨ la və gàʼà la gho lo, ki shi tò ki alì kò ghə̀ŋ ə lu nyenə no kəfo,

²⁷byìʼàndo tʉ viʼi avenə to, mu vəwenə shwintə li tiʼitiʼi vəwenə, be mbiʼtə ashɨ vəwenə, a bwen a lì mu vəwenə yenə shi be zhʉ nyʉ̀ kɨ, təkwòʼtə̀ tə vəwenə tə be kɨ nyʉ̀, vəwenə bwènə̀ vì à mò, mà chʉʼ vəwenə.’”

²⁸Bol sə ə̀ mèsə̀ dyʉ̀ ə̀ gàʼ la, “Ghə̀ŋ ə lì dìʼi kɨ la ntɨm jùŋ byìʼì bwòŋ a Nyìngòŋ kìʼ à viʼi dìʼ mu və tɨm li à viʼi tɨm, vəwenə diʼ zhʉ!”

²⁹Bol nè gàʼ a lì ə̀ nè Vəjew vi lù sə̀ taŋmə̀ dyʉ̀ no a gɨsə tosə à vəwenə a ntìntìn.

³⁰Bol tsi tsu ngwʉ̀ʼsə səbò a kəshi a ghə̀ nlòʼò tò fà wen a ngə̀ŋ. Ghə̀ nshisə no tè ndò a ghə̀ mvì ghantə wen nə̀ saŋlə ghə̀,

³¹be shə̀ʼtə̀ nyʉ̀ byìʼì soʼ fòn Nyìngòŋ, ziʼì byìʼì Bobo Yesò Klistò. Ghə̀ ngàʼà nə̀ tyɨm toghə kò a ndiʼ la kəfo kətsenkə tàʼsə̀ wen.