Read Babanki Shwèʼ 5 Bible Online

Shwèʼ 5 - Babanki bible

Shwèʼ 5

¹Wutsen ndìʼ a zhiʼ wen ndìʼ Ananyàs, ghə̀ nkìʼ wùwì a zhiʼ wen ndìʼ Safeliyà. Tʉʼ layn kətsi kətsenkə vəwenə baʼlə kəshi kə nse vəwenə kətsenkə,

²ə̀ ghʉ̀ la vəwenə a nyoʼo ghʉ kəbyəʼ kə ko yì ə dyʉ̀ ku tò kəbyəʼ a viʼi ntɨm Yesò.

³Ananyàs ne dyʉ̀ ə̀ kù kəbyəʼ kə ko akì a lì, Bità bèm à wen la, “Wù mòʼtə̀ la Satan kwen à wù a tyɨm ə̀ nè wù zho ndzɨ̀ŋ à kəzhwì kə ŋwoʼəkə ə̀ lyòmtə̀ kəbyəʼ kə ko kì byìʼì ghò?

⁴Mibu wù tə̀ sə baʼlə kəshi kə nse a kèn, à tə̀ nkiʼ tò wù, ntə̀ʼ mbaʼlə̀ tè baʼlə, əko yi bè kiʼ tò wù. Byìʼì ghò a kwòʼtə̀ vi à wù a tyɨm la wù ne nki kənyʉ̀ kènkə a? Wù ko zhò ndzɨ̀ŋ ghèn tò a viʼi, wù be zhò ndzɨ̀ŋ à Nyìngòŋ.”

⁵Ando Ananyàs nzhʉ̀ kənyʉ̀ a kèn no a zhʉ̀ kò, ə̀ fəŋ a nse ə̀ pfʉ. Ə̀ fàyn ghoʼo ghə̀ ghaʼ viʼi no vətsèm a və nzhʉ kənyʉ̀ a kènkə.

⁶Mbvòʼò vunə lyʉmə vətsenvə vì ə̀ lyɨ̀ kəmpfʉ kə wen ə̀ lèmtə a kəbvèm ə̀ fʉ̀ dyʉ̀ bvɨ̀mə̀.

⁷A sə laʼtə tò alə̀, wì Ananyàs a ndiʼì Safeliyà vì a kəshi a Bità ndìʼ tsu, kènla ghə̀ tɨmə kɨ̀ kənyʉ̀ a kə yì chò nə̀ lɨmə wen.

⁸Bità gàʼ à wen la, “Shə̀ʼtə à mò la, ghenə diʼ no ko tsèm a wenə̀ lɨmə wù tə̀ bàʼlə kəshi kə nse tsu lo?” Wùwì ayì byɨmə ə̀ gàʼ la, “A diʼi ko ayi no tsèm lì”.

⁹Bità mù bèm à wen la, “Byìʼì ghò a wenə̀ lɨmə wù tə̀ ghʉ̀ la ghə̀ŋ a mwòmsə̀ kəzhwì kə Bobo a?” Ghə̀ bè gàʼ la, “Viʼi vi a və byèʼè lɨmə wù ə̀ mfʉ̀ mbvɨ̀mə̀ bu ti tò a chʉ̀ ngə̀ŋ luwèn diʼi be a fʉ̀ ə̀ bvɨ̀mə̀ wù tò a lì.”

¹⁰Ando ghə̀ ngaʼa a lì, Safeliyà bwaʼ ə̀ fə̀ŋ à wen a shɨ tò a zhʉ ayì be pfʉ. Fəmbvòʼ fə vunə lyʉmə fì kwen vì ə̀ yèn la ghə̀ be pfʉ bè byèʼè wen ə̀ fʉ̀ nə̀ wen ə̀ dyʉ̀ bvɨ̀mə̀ boʼsə a mbyɨ̀ lɨmə wen.

¹¹Fàyn ghoʼghə ghaʼ viʼi və byɨməvə vi no vətsèm bènə̀ viʼi vətsenvə a və nzhʉ kənyʉ̀ akì.

¹²Viʼi ntɨm ə Yesò sə̀ nè chwitə nə̀ nyʉ̀ kanəvə və fʉ̀ no ghoʼo ədìʼ kədyòʼ kə Nyìngòŋ. Viʼi və byɨməvə no vətsèm sə̀ zàŋsə vì zhùŋtə̀ a kətò Sòlomùyn.

¹³Viʼi a və ko ndìʼ viʼi və byɨməvə nko mwòmə̀ ə tsèntə vəwenə alì kiʼi gumlə ghoʼghə à vəwenə.

¹⁴Lʉmə nə̀ ki a və mbyɨmə̀ à Bobo sə̀ kwʉ̀ʼsə̀ ghoʼo vì tò vi a nòyn ayì.

¹⁵Viʼi yen nyʉ̀ kanəvə vi mù sə̀ bwèʼè viʼi vəkwaʼkəvə vəwenə a mbùŋ bènə̀ a təghàm fʉ̀ ghʉ a mbyɨ̀sə jisə la Bità nè sə nchò no tò kəndemndem kə wen kə kum viʼi a vyi.

¹⁶Viʼi no vəghoʼo fʉ̀ ə̀ vì fa ntə̀ʼsə shì a sə mboʼsə̀ a Jelusalèm nə̀ viʼi vəkwaʼkəvə vəwenə bènə̀ viʼi vi a zhwì byɨvə nku ngəʼ à vəwenə və chʉʼ vəwenə no vətsèm.

¹⁷Kətʉ kə tʉtʉ vəpfèm və ngə̀ŋ Nyìngòŋ wenə̀ viʼi bàm wen no vətsèm a andiʼì viʼi ntsentə Vəsadùsis zìtə̀ kəghəʼ kə fànsə kə kətsenkə a wèn viʼi ntɨm ə̀ Yesò mù ghʉ̀ la vəwenə ne yen kənyʉ̀.

¹⁸Vəwenə ghaʼ viʼi ntɨm a vyi ə̀ shwìn à vəwenə a ngə̀ŋ mfɨŋ.

¹⁹A nè sə ndiʼ tò nəntʉʼʉ ayì ntsɨ̀ŋ ngə̀ŋ Bobo vì bòʼ chʉ ngə̀ŋ mfɨŋ ayì ə̀ lyɨ̀ vəwenə ə̀ fʉ̀ nə̀ vəwenə ə̀ gàʼ à vəwenə la,

²⁰“Ghə̀ŋ dyʉ̀ a ngə̀ŋ Nyìngòŋ ə̀ shə̀ʼtə̀ no nyʉ̀ tsèm byìʼì ntsìnə̀ fi yì a viʼi və byɨməvə diʼ ntsi.”

²¹Viʼi ntɨm ə̀ Yesò zhʉ kənyʉ̀ a kènkə, tʉʼ lan vəwenə dyʉ̀ a ngə̀ŋ Nyìngòŋ ə̀ zìtə̀ sə̀ ziʼì viʼi tsu. Kətʉ kə tʉtʉ vəpfèm və ngə̀ŋ Nyìngòŋ wenə̀ viʼi bàm ə wen vi dzàŋtə̀ vəchəʼ və Vəjew no vətsèm la vəwenə vi ə̀ ghàʼa ntsèntə̀ bè tɨ̀m viʼi la və dyʉ̀ ə̀ lyɨ̀ viʼi ntɨm ə Yesò fa mfɨŋ ə̀ vì nə̀ vəwenə.

²²Viʼi vi a və ntsɨ̀ŋə̀ ngə̀ŋ Nyìngòŋ lì dyʉ̀ kò və lù yèn viʼi ntɨm Yesò vi a ngə̀ŋ yì a və tə shwìn vəwenə tsu lì, mù bwènə̀ vì shə̀ʼtə̀ à viʼi soʼò nsoʼ vi la,

²³“Yès dyʉ̀ li tsu ə̀ nyen chʉ ngə̀ŋ mfɨŋ ayi mu və shɨtə̀ li nshwin, viʼi ntsɨ̀ŋ vi ti tsɨ̀ŋə̀ chʉ ngə̀ŋ ayi. Yès mboʼ chʉ ngə̀ŋ ayi kò yès ə lù yèn viʼi ntɨm Yesò vi tsu.”

²⁴Tʉtʉ vəpfèm və ngə̀ŋ Nyìngòŋ vi bènə̀ kətʉ kə viʼi vyi a və ntsɨ̀ŋə̀ ngə̀ŋ Nyìngòŋ nè zhʉ̀ a lì sə̀ kantə̀ la à chò ghò nə̀ viʼi ntɨm ə̀ Yesò vi lo.

²⁵Tò a zhʉ ayì wìʼ kwen ə̀ vì ə̀ gàʼ à vəwenə la, “Viʼi vi a ghə̀ŋ tə shwìn a ngə̀ŋ mfɨŋ lì dìʼ a ngə̀ŋ Nyìngòŋ ziʼì viʼi tsu.”

²⁶Kətʉ kə viʼi vyi a və ntsɨ̀ŋə̀ ngə̀ŋ Nyìngòŋ lì nè zhʉ̀ a lì wenə̀ viʼi wen dyʉ̀ ghaʼ viʼi ntɨm a vyi tò nə̀ mbwaʼmə̀ byìʼàndo vəwenə mfànə̀ la viʼi zì və temlə vəwenə nə̀ ngùʼsə.

²⁷Andìʼ ando vəwenə mvi nə̀ viʼi ntɨm Yesò a vyi ə̀ gàʼ vəwenə tɨmə a shɨ viʼi soʼò nsoʼ. Kətʉ kə tʉtʉ vəpfèm və ngə̀ŋ Nyìngòŋ kì gàʼ à vəwenə la,

²⁸“Yès tə chòsə̀ soʼ la kə ghə̀ŋ be ziʼi viʼi nə̀ nyʉ̀ vyi a Yesò tə gàʼ la ghə̀ŋ nziʼì viʼi tsu. Ali ghə̀ŋ sə diʼ mu ghə̀ŋ ziʼi li viʼi no fe a Jelusalèm. Ghə̀ŋ yen kənyʉ̀ a ghə̀ŋ ə ne li a? Ghə̀ŋ kəŋə la viʼi nghàmə̀ yès gàʼà la à tə nè yès la və zhwi Yesò.”

²⁹Bità wenə̀ viʼi ntɨm ə̀ Yesò vətsenvə vi bwènsə̀ la, “Yès diʼ nzhʉ tò fà Nyìngòŋ, yès ko diʼi nzhʉ fà viʼi.

³⁰Ghə̀ŋ tə nè la və bantə Yesò a kəntò ghə̀ pfʉ, alì Nyìngòŋ yì a vətìʼ və vəghəŋ tə nghoʼsə lì lùsə̀ wen fa pfʉ.

³¹Nyìngòŋ ə kuʼsə li wen à wen a shyə kwoŋ toghə ə ne la ghə̀ ndiʼ kətʉ be diʼi mbwòŋsə̀ ndi ghə̀ ne la viʼi Islel kiʼi jì əkaʼsə tətyɨm tə vəwenə fà vəwenə a nyʉ̀ byɨvə ndi Nyìngòŋ lyesə mbyɨsə vəwenə.

³²Yès dìʼ viʼi və yenəvə a nyʉ̀ venə, ndə̀ŋndəŋ to nə̀ kəzhwì kə ŋwoʼəkə a Nyìngòŋ ə ku a viʼi a və zhʉ fà wen.”

³³Viʼi soʼo nsoʼsə vi nè zhʉ̀ nyʉ̀ avenə, tinsə vəwenə sə fwi no nànto. Vəwenə mù sə̀ kəŋ əzhwilə viʼi ntɨm ə̀ Yesò a vyi,

³⁴alì mu Falàsi tsen a zhiʼ wen ndìʼ Gamalè a andìʼ ndìʼsə̀ soʼ a viʼi vətsèm ə̀ ngumlə̀ wen lù tɨmə ə̀ kàyn la və lyɨ viʼi ntɨm ə̀ Yesò vi ə fʉ̀ nə̀ vəwenə a kəbəŋ tò a fəshitə̀ fə zhʉ alə̀.

³⁵Ghə̀ mù gàʼ à viʼi soʼò nsoʼ vi la, “Viʼi Islel, ghə̀ŋ ntùʼmə̀ nə̀ kənyʉ̀ a ghə̀ŋ ə kəŋə nè a viʼi venə.

³⁶Andìʼ a tʉʼ tsenghə Tyodas fʉ̀ sə̀ gàʼà la yì dìʼ no wu ghoʼo, viʼi dzɨ̀mtə̀ wen əzaʼa no a ghɨ̀ kàʼ. A nè sə̀ diʼ no a zhʉ̀ kò a və nzhwi wen, ndzɨ̀mtə̀sə bàm wen sə gə̀sə̀ tò mùʼ mùʼ.

³⁷Na kènkə nè chò Judàs, a andìʼ wù Galìlì tsen bè fʉ̀ a zhʉ a və nto viʼi lyɨ̀ tənòyn tə viʼi à wen a bàm. Və bè zhwi wen tənòyn tə wen a tìtə sàykə̀ no tətsèm.

³⁸Ma mu sə gàʼà à ghə̀ŋ byìʼì nki kənyʉ̀ kènkə luwèn la, kə ghə̀ŋ à nè kənyʉ̀ kì a ghə̀ŋ ə kwòʼtə ənè à vəwenə. Ghə̀ŋ ghʉsə vəwenə tò a lì byìʼàndo nyʉ̀ venə a vəwenə ghʉ be nè lə̀ sətsèn ndiʼ mu və lù fa wìʼ, kò kəghaf kə à dyʉ̀ ke vəwenə fəŋ.

³⁹Təshwèʼ a tèntə sətsèn ndiʼ mu à kù Nyìngòŋ nku kədyòʼ la vəwenə ə nè, kò kə a mbwaʼmə̀ ə ghə̀ŋ cho vəwenə, ghə̀ŋ bè nè yen mu kə sə̀ kə̀ʼə̀ la ghə̀ŋ ə soynə Nyìngòŋ.” Viʼi soʼo nsoʼ vi zhʉ kətyɨftə yi a Gamalè yi nku,

⁴⁰mù dzàŋ viʼi ntɨm ə̀ Yesò vi la vəwenə bwensə kwèn a ngə̀ŋ. Vəwenə gàʼ və ghòm vəwenə bè kàn la kə vəwenə be gàʼ kənyʉ̀ a zhiʼ Yesò, mù gàʼ la vəwenə ndyʉ̀.

⁴¹Viʼi ntɨm ə̀ Yesò a vyi lù fa kəshi ayì nə̀ saŋlə ghoʼghə byìʼàndo Nyìngòŋ tsuʼ li vəwenə la vəwenə yen ngəʼ byìʼì zhiʼi wen.

⁴²Vəwenə mù faŋ ə̀ sə shə̀ʼtə̀ ntɨm ə jùŋ byìʼì Yesò Klistò tò mətsi ntsèm a ngə̀ŋ Nyìngòŋ bènə̀ a aloʼ viʼi.