Read Babanki Shwèʼ 6 Bible Online

Shwèʼ 6 - Babanki bible

Shwèʼ 6

¹A sə ndiʼ a mətsì mə ntsenə̀ ando viʼi və byɨməvə nghoʼo dyʉ̀ tò nə̀ mbì, vi a və ngàʼà gaʼa Glis zìtə̀ sə taŋmə̀ wenə̀ vi a və ngàʼà gaʼa Hibùlù. Viʼi vi a və ngàʼà gaʼa Glis lì ə̀ ntaŋmə̀ gàʼà la və ngə̀tə̀ fo no məntsi ntsèm ku və ki mpfʉ a və ndiʼì a vəwenə a ntìntìn kò və lu nkwʉ̀ʼʉ̀.

²Viʼi ntɨm ə̀ Yesò vi njʉ̀sə̀ bò dzàŋtə̀ viʼi və byɨməvə vi no vətsèm və vì tsèntə. Vəwenə mù gàʼ à vəwenə la, “Kə ko bòŋ la yès ghʉsə ke nshə̀ʼtə̀ kənyʉ̀ kə Nyìngòŋ bòŋsə̀ ŋwʉʼʉ ngə̀tə̀ fozhɨvə.

³Yès ə̀ mu sə gàʼà à ghə̀ŋ a vəlèmə̀ vyesə la, ghə̀ŋ tsuʼ viʼi sòmbo fà ghə̀ŋ a ntìntìn a və kiʼ ntsìnə̀ tofə, kəzhwì kə ŋwoʼəkə be tomsə̀ vəwenə ndi yès ku shwèʼ aghenə à vəwenə.

⁴Və a nè a lì yès mu nkiʼ zhʉ njɨ̀mə̀ be shə̀ʼtə̀ tò ntɨm ə jùŋ.”

⁵Viʼi vəbyɨməvə a vyi sə̀ saŋlə̀ no a nkàyn byìʼì kənyʉ̀ kènkə a viʼi ntɨm ə̀ Yesò ngaʼà lə̀ mù tsuʼ Stifèn andiʼì wìʼ mu ghə̀ byɨmə li à Nyìngòŋ no a nkàyn, kəzhwì kə ŋwoʼəkə be tomsə̀ wen, bè tsuʼ Filib nə̀ Blocholus nə̀ Nikanòl nə̀ Timon nə̀ Balmenas bènə̀ Nikolawus andiʼì wù Antìyòk mu ghə̀ kaʼsə li sə diʼ to nə̀ wù Jus.

⁶Viʼi vəbyɨməvə a vyi tsuʼ viʼi avenə a lì vì nə̀ vəwenə a shɨ viʼi ntɨm ə̀ Yesò vəwenə ghʉ avu à vəwenə a tʉ ə̀ jɨ̀m à vəwenə.

⁷Kənyʉ̀ kə Nyìngòŋ kə mù sə sàykə̀ dyʉ̀ tò nə̀ mbì, viʼi və byɨməvə a Jelusalèm bè sə̀ ghoʼo dyʉ̀ tò nə̀ mbì. Vəpfèm və ngə̀ŋ Nyìngòŋ no vəghoʼo zhʉ ziʼi aghenə bè byɨmə.

⁸Stifèn ndìʼ wìʼ mu Nyìngòŋ bwaʼsə li wen no a nkàyn bè kù kədyòʼ à wen la ghə̀ ə nè nyʉ̀ kanəvə à viʼi a ntìntìn,

⁹alì viʼi ngə̀ŋ ntsèntə̀ vətsenvə a və ntoŋtə la, “Ngə̀ŋ ntsèntə̀ viʼi vyi a və ko bè ndìʼi kòs.” Zìtə̀ kəngùmə̀ wenə̀ və Stifèn. Vəwenə ndìʼ mu və fʉ̀ fà ntə̀ʼ Silen nə̀ fa ntə̀ʼ Alèksandìliyà boʼsə nə̀ loʼo Silisiyà bènə̀ fa loʼo Asìyà.

¹⁰Vəwenə ngùmə̀ wenə̀ Stifèn əzaʼa kəlyɨŋ kətsenkə a vəwenə nko bè kìʼ kənyʉ̀ əgàʼ byìʼàndo Stifèn ngàʼà nə̀ tofə mu à kù kəzhwì kə ŋwoʼəkə.

¹¹Vəwenə mù twə̀s viʼi vətsenvə nə̀ fo la vəwenə wam ə̀ gàʼ tò la, “Yès tə̀ zhʉ ghə̀ gàʼà nyʉ̀ byɨvə byìʼì Mosìs bènə̀ Nyìngòŋ.”

¹²Vəwenə gàʼ a lì no a zhʉ̀ kò bòsə viʼi nə̀ vəchəʼ bènə̀ ndìʼsə̀sə təsoʼ, Vəwenə vì ghàʼ Stifèn ə̀ dyʉ̀ nə̀ wen a shɨ viʼi soʼò nsoʼ.

¹³Ando vəwenə ndyʉ̀ a lì, və lyɨ̀ viʼi vətsenvə la və kwen ə̀ zhò ndzɨ̀ŋ a kətʉ Stifèn. Vəwenə kwen ə̀ vì gàʼ la, “Wìʼ ghèn ko lu mfàŋ ke gaʼa nyʉ̀ byɨvə byìʼì ngə̀ŋ Nyìngòŋ ghoʼo vəghəŋ bènə̀ soʼ yi a Mosìs nlù ziʼi vəghəŋ tsu.

¹⁴Yès tə zhʉ̀ ando ghə̀ gàʼà la Yesò wù Nazalèt ghèn a bə̀ytə ngə̀ŋ Nyìngòŋ vəghəŋ be kwitə ntsìnə̀ a Mosìs nlù ziʼi vəghəŋ tsu.”

¹⁵Viʼi no vətsèm a və ndìʼ a kəshi kə soʼo nsoʼ akì sə ki dyʉ̀sə̀ nə̀ Stifèn ə̀ yen kəʼə wen ghə̀ baynə to nə̀ kəʼə ntsɨ̀ŋ ngə̀ŋ Nyìngòŋ.