Read Babanki Shwèʼ 8 Bible Online

Shwèʼ 8 - Babanki bible

Shwèʼ 8

¹Və nsə nyàblə̀ nə̀ Stifèn a lì, Saul ndiʼ tsu gàʼà tò la və zhwi wen. A bè sə ndiʼ tò a kətsi akì, viʼi vəbyɨməvə vi a və ndìʼ a Jelusalèm zɨ̀tə̀ sə yenə ngəʼ no nànto. Ando və nku ngəʼ à vəwenə a lì, vəwenə nyɨŋkə no vətsèm ə̀ dyʉ̀ a təshyə tə loʼ Judiyà bènə̀ Samalìyà, à faŋ tò viʼi ntɨm Yesò tsu.

²Viʼi vi a və ngumlə̀ Nyìngòŋ bvɨ̀mə̀ Stifèn ə dì pfʉ wen no nànto.

³Saul bòŋsə̀ zìtə̀ sə kəŋə la viʼi vəbyɨməvə me, ə̀ sə kwenə tò a ngə̀ŋ a ngə̀ŋ, ghaʼtə̀ lʉmə nə̀ ki, we vəwenə a mfɨŋ.

⁴Viʼi vəbyɨməvə vi a və nsàykə̀ lì sə shə̀ʼtə̀ dyʉ̀ tò nə̀ ntɨm jùŋ no fe a vəwenə ndyʉ̀.

⁵Filib ndyʉ̀ a ntə̀ʼ ghoʼo tsen a Samalìyà sə shə̀ʼtə̀ nyʉ̀ tsu byìʼì Wìʼ yì a Nyìngòŋ ntsuʼ li ə̀ ghʉ.

⁶Tənòyn tə viʼi vyi a və ndìʼ tsu yen nyʉ̀ kàynə və vi a Filib ə̀ nè sə tùʼù zhʉtə̀ nyʉ̀ tsèm a ghə̀ ngàʼà.

⁷Andìʼ a lì, viʼi vəghoʼo və tsu kiʼi zhwì byɨvə. Filib dzɨ̀m ə̀ shìsə̀ zhwì byɨvə a vyi, no tə kəkò kə sə fʉ̀ dì no a gɨ to. Viʼi kənkwaʼkə bènə̀ vənlaʼfwen bè tokə.

⁸Viʼi ntə̀ʼ a vyi sə saŋlə̀ no nànto.

⁹A nsə ndiʼ a lì wutsen diʼ a ntə̀ʼ ayì, a zhiʼ wen ndìʼ Simon, adiʼ wù shəŋə fənyoʼ, viʼi loʼ a vyi diʼ nə̀ kanə, byìʼì ənyʉ̀ a ghə̀ nè a lì, kuʼsə̀ wenə wen la yì dìʼ no wu ghoʼo.

¹⁰Viʼi vətovə, nə̀ vəbwaʼvə a ntə̀ʼ ayì no vətsèm sə zhʉ tò fà wen be, gàʼà la, “Nyìngòŋ yì a və dzàŋə̀ nə̀ Nyìngòŋ Kədyòʼ kə ghoʼokə vi li nchò fa Simon.”

¹¹Vəwenə sə zhʉ tò fa wen byìʼàndo tʉʼ bwen a ghə̀ nzi shəŋə fənyoʼ be nè nyʉ̀ kanəvə à vəwenə a ntìntìn.

¹²A sə ndiʼ ando vəwenə mbyɨmə̀ li ntɨm jùŋ yì a Filib nshə̀ʼtə̀ byìʼì soʼo fòyn Nyìngòŋ, bènə̀ la Yesò dìʼ wìʼ yì a Nyìngòŋ ntsuʼ li ghʉ, və ku mu à vəwenə, lʉmə nə̀ ki no vətsèm.

¹³No tè Simon fà wen a ngeŋ be byɨmə ntɨm jùŋ ayì, ə̀ shì mu ə̀ faŋ sə diʼ tò wenə̀ Filib, be diʼ nə̀ kaynə byìʼì chwitə vi a Filib ndìʼì bènə̀ nyʉ̀ kaynəvə vi a ghə̀ ə̀ nè.

¹⁴Andìʼ ando viʼi ntɨm Yesò nzhʉ fa Jelusalèm la viʼi Samalìyà byɨmə li ntɨmə Nyìngòŋ, vəwenə tɨm Bità wenə̀ Joyn à vəwenə.

¹⁵Bità wenə̀ Joyn nè dyʉ̀ zaʼa tsu, ə̀ jɨ̀m à viʼi vəbyɨməvə a vyi ndi Kəzhwì kə ŋwòʼəkə vi à vəwenə,

¹⁶byìʼàndo Kəzhwì kə ŋwòʼəkə nko ntɨmə̀ vì à vəwenə; vəwenə ndìʼ mu vəwenə nshì tò mu a zhiʼ nə̀ Bobo Yesò.

¹⁷Bità wenə̀ Joyn ghʉ avu à vəwenə a tʉ, Kəzhwì kə ŋwòʼəkə mù vì à vəwenə.

¹⁸Adìʼ a zhʉ a Simon nyenə la viʼi ntɨm Yesò ghʉ li avu a tʉ viʼi vəbyɨməvə, Nyìngòŋ nku Kəzhwì kə ŋwòʼəkə à vəwenə, ghə̀ mù sə ku ko à Bità wenə̀ Joyn gàʼà la,

¹⁹“Ghə̀ŋ be kù kədyòʼ kènkə a ghə̀ŋ kiʼì lə̀ à mò ndi mà nghʉ avu a kətʉ no ndò, Kəzhwì kə ŋwòʼəkə be vì à wen.”

²⁰Bità bwènsə̀ gàʼ à wen la, “Məntùŋ myə̀, wenə̀ ko wu ayi, byìʼàndo wù kwòʼtə la wù zì wù zen kəfo a, à kù Nyìngòŋ nə̀ ko!

²¹Wù ko kiʼ no kəshi, ko kənyʉ̀ kətsenkə ənè à yès a tì shwèʼ byìʼàndo Nyìngòŋ lye li tyɨm wu, nyen la wu ko dìʼ wù kənyʉ̀ kə tɨməkə à wen a shɨ̀.

²²Kwitə lì kwòʼtə̀ byɨghə wù a ghenə ə̀ jɨ̀m à Bobo la ghə̀ lyèsə kù wù a kənyʉ̀ kə byɨkə ken a wu kwòʼtə a wù a tyɨm,

²³byìʼàndo ma yen li la wù dìʼ wù kəmbàŋ mbàŋ, be diʼ kəkòs a nyʉ̀ byɨvə.”

²⁴Simon ayì gàʼ à Bità wenə̀ Joyn la, “Mà lonə la ghə̀ŋ jɨm à Bobo byìʼì mo, ndi kə no kənyʉ̀ kə mùʼ fa ntìntìn nyʉ̀ venə a ghə̀ŋ gàʼà lə̀ fʉ à mo.”

²⁵Bità wenə̀ Joyn nè shə̀ʼtə̀ nyʉ̀ vyi a vəwenə nkɨ byìʼì Bobo nə̀ ziʼi wen ə̀ mwètə̀, ə̀ bwènə̀ pfwo a Jelusalèm, sə mpfwo dyʉ̀ be sə shə̀ʼtə̀ dyʉ̀ nə̀ ntɨm jùŋ a ntə̀ʼsə Samalìyà no səghoʼo.

²⁶Ntsɨ̀ŋ ngə̀ŋ Bobo gàʼ à Filib la, “Lù shìʼi dyʉ̀ jì fa shyə tèn, a jì yì a ghə̀ lu fa Jelusalèm sə shiʼì a ntə̀ʼ Gaza lì.” Və ko bè chò fa ji aghèn.

²⁷Filib lù ə̀ sə ndyʉ̀, ə yèn wù Etopiyà tsen, andiʼ no wuto, a ghə̀ ntùʼmə̀ nə̀ nyʉ̀ ko wùwì yì a ghə̀ nsoʼo Etopiyà. Ghə̀ nkuʼù ə̀ kuʼsə Nyìngòŋ a Jelusalèm,

²⁸mù sə bwènə̀ pfwo. Ghə̀ nyɨŋ a kwi fənkwenkwen a gùfə̀ nyamsə,ə dzò pfwo nə̀ ŋwàʼlə̀ nshə̀ʼtə̀ Azayà no a gɨ̀ to.

²⁹Kəzhwì kə ŋwòʼəkə gàʼ à Filib la ghə̀ dyʉ̀ ə̀ boʼsə a mbyɨ̀ fənkwenkwen ayì ndi wenə̀ wìʼ ayì njèʼè dyʉ̀ a muʼu.

³⁰Filib nyɨŋ ə̀ dyʉ̀ boʼsə ə̀ zhʉ ando ghə̀ dzò nyʉ̀ fa tì ŋwàʼlə̀ nshə̀ʼtə̀ Azayà. Filib bèm à wen la, “Wu lè zhʉ kɨ kənyʉ̀ kì a wù dzò a?”

³¹Wù shwèʼ ayì bwènsə̀ la, “Mà lè zì mà zhʉ ə̀ kɨ̀ ale, a bwèn tò la wìʼ shɨtə ə̀ shə̀ʼtə̀ à mò a?” Ghə̀ gàʼ a lì mù gàʼ à Filib la, ghə̀ kuʼ ə̀ vì ŋwʉʼʉ a wen a kwi fənkwenkwen fi ndi wenə̀ wen njèʼè dyʉ̀ a muʼu.

³²Kəshi kə ŋwàʼlə̀ kì a ghə̀ ndzò ndìʼ kènkə la; “Ghə̀ nko kiʼ no tò kənyʉ̀ kə tyetəkə əgàʼ. Ghə̀ ndìʼ to nə̀ byi njɨ̀, a və gùftə̀ ədyʉ̀ shyə, ko to nə̀ we byi njɨ̀ a zhʉ a və komə nyɨŋsə fà wen a wèn.

³³Və nlù nyàblə̀ nə̀ wen, kènla wìʼ fʉ̀ li ətomsə wen. Wìʼ ko lu shə̀ʼtə̀ kənyʉ̀ byìʼì vunə wen byìʼàndo ghə̀ nsə diʼ mu ghə̀ pfʉ li, kènə̀ wàyn.”

³⁴Wù shyèʼ ayì mù gàʼ à Filib la, “Ma lonə wù, shə̀ʼtə̀ à mò la, ghə̀ nlu gàʼ nyʉ̀ venə byìʼì ngə̀ŋ kətʉ wen mu, ghə̀ nlù gàʼ byìʼì wu ə kədyàŋ lo?”

³⁵Filib zìtə̀ fa kəshi kə ŋwàʼlə̀ a kèn sə shə̀ʼtə̀ kuʼu nə̀ ntɨm jùŋ byìʼì Yesò à wen.

³⁶Vəwenə sə jèʼè dyʉ̀ ə dyʉ̀ zaʼa a kəshi kətsenkə, ə̀ yèn mu, wù shwèʼ yì gàʼ à Filib la, “Yen mu a shèn a, ale zì à taʼsə no gho luwèn la kə mà shi mu a?”

³⁷Filib bwènsə̀ à wen la, “Və zì və ku mu à wù a zhʉ a wù byɨmə nə̀ tyɨmə wu no tsèm.” Wù shyèʼ ayì byɨmə ə̀ gàʼ la, “Mà byɨmə la Yesò Klistò dìʼ wè Nyìngòŋ.”

³⁸Wù shwèʼ ayì gàʼ, à wìʼ yì a ghə̀ ngùfə̀ fənkwenkwen fì la ghə̀ tɨmə. Filib wenə̀ wù shwèʼ aghèn shiʼi fà yì a kətʉ, ə̀ kwèn ə̀ dyʉ̀ a tì à mù ayì. Filib ku mu à wen.

³⁹Andìʼ ando vəwenə mfʉ̀ vi fà tsu, Kəzhwì kə Nyìngòŋ kə bvʉ̀tə̀ lyɨ̀ Filib ə̀ lù nə̀ wen. Wù shwèʼ ayì mù lù sə pfwo dyʉ̀, saŋlə no nànto.

⁴⁰Ando Kəzhwì kə Bobo kə nlyɨ Filib lì, ghə̀ bvʉ̀tə̀ yèn wen ə wen a kəshi kətsenkə, a və dzò nə̀ Azotus mù sə jèʼè chòmə̀ no fa ntə̀ʼsə sətsèm tsu, shə̀ʼtə̀ ntɨm jùŋ, ə̀ kaʼ ə̀ jèʼ vì zaʼa a Sisalìyà, andiʼì ntə̀ʼ ghoʼo a ghə̀ ndiʼì tsu.