Read Babanki Shwèʼ 9 Bible Online

Shwèʼ 9 - Babanki bible

Shwèʼ 9

¹Saul mbu kàyntə̀ tò kədyòʼ la ghə̀ a zhwilə ndzɨ̀mtə̀sə bàm Bobo, ə̀ lù dyʉ̀ à kətʉ kə tʉtʉ vəpfèm və ngə̀ŋ Nyìngòŋ

²ə̀ gàʼ à wen la ghə̀ ku ŋwàʼlə̀ à yì, a ghə̀ dìʼì wìʼ a yì dìʼi wen, bènə̀ kədyòʼ kì a yì kiʼi ndi yì dyʉ̀ a aloʼ ntsèntə̀ Vəjew a Damaskus ə̀ ghaʼtə ndzɨ̀mtə̀sə Yesò no sətsèm ə̀ bwènsə̀ vì nə̀ vəwenə a Jelusalèm, lʉmə nə̀ ki.

³Ghə̀ ku, Saul mù fʉ̀ ə̀ jèʼ sə boʼsə dyʉ̀ a Damaskus, bayn tsenghə bvʉ̀tə̀ fʉ̀ fa kàŋ ə̀ bàŋ ə̀ kàʼa wen a kəshi a ghə̀ ndiʼì tsu.

⁴Ghə̀ feŋ a nse, ə̀ zhʉ̀ ando gɨ̀ tsen ə gàʼà à wen la, “Saul, Saul,byìʼì gho a wù tsuʼu kəghʉ kom a”.

⁵Ghə̀ bèm la, “Adìʼ wù ndo, a Bobo?” Gɨ̀ ayì bwènsə̀ la, “Adìʼ mo Yesò yì a wù ku ngəʼ à wen lì.

⁶Lù kwen ə̀ dyʉ̀ a tì ntə̀ʼ, a və a shə̀ʼtə̀ kənyʉ̀ a wù a wù diʼi nè.”

⁷Viʼi vi a və njèʼè wenə̀ və Saul lì tɨmə ə chìʼ tò la kùʼ byìʼàndo vəwenə nzhʉ gɨ̀ ayì, alì kò vəwenə lu nyenə wìʼ.

⁸Saul lù tɨ̀mə fà nse ə̀ bòʼtə̀ ashɨ wen alì kò ghə̀ lù yèn kəfo. Və mù ghaʼa wen fa kwoŋ ə̀ kwènsə wen a Damaskus.

⁹Ghə̀ tsi mətsi ntaʼ, kò ghə̀ lu nyenə shi, kènla ghə̀ nyʉ li, ko zhɨ kəfo.

¹⁰Andìʼ a lì, ndzɨ̀mtə̀ bàm Yesò tsen diʼ a Damaskus, a zhiʼ wen ndìʼ Ananyàs. Bobo fʉ̀ à wen a kə̀ʼ a jòm ə̀ tòŋtə wen la, “Ananyàs!” Ghə̀ byɨmə ə̀ gàʼ la, “Mà ghèn a Bobo.”

¹¹Bobo gàʼ à wen la, “Lù ə̀ dyʉ̀ a ji yì a və dzàŋə̀ nə̀ Jì Nànə lì ə̀ bèm ngə̀ŋ wìʼ tsen tsu a və dzò wen nə̀ Judàs. Kwen ə̀ dyʉ̀ tsu ə̀ bèm wu Talsus tsen tsu a və dzàŋə̀ wen nə̀ Saul. Adìʼ luwèn ghə̀ jɨ̀mə̀.

¹²Ghə̀ yen to sə a diʼ a jòm la wìʼ tsen a və dzò wen nə̀ Ananyàs kwen li ə mvi ghʉ avu wen à yì a kətʉ ndi yì mbwènsə̀ yenə shì.”

¹³Ananyàs bwènsə̀ gàʼ la, “Bobo, viʼi shə̀ʼtə̀ li nyʉ̀ à mo byìʼì wìʼ aghèn no vəghoʼo, la ghə̀ jèʼè nè viʼi vye yenə ngəʼ a Jelusalèm no nànto.

¹⁴Ghə̀ dìʼ a shèn luwèn nə̀ adyòʼ mù à kù tʉtʉ vəpfèm və ngə̀ŋ Nyìngòŋ la ghə̀ vi ə̀ ghaʼtə no viʼi vətsèm a və jɨ̀mə̀ toŋtə̀ zhiʼ wu.”

¹⁵Bobo gàʼ à Ananyàs la, “Dyʉ̀ tò dyʉ̀ byìʼàndo ma tsuʼ li wen la ghə̀ shyèʼ à mò ə nè la viʼi tɨm nə̀ təfòyn tə bènə̀ viʼi Islel, kɨ mo.

¹⁶Nkàntə̀ mò a dìʼi nki ngəʼ à wen a ghə̀ diʼi yen ənè la viʼi kɨ mo.”

¹⁷Ananyàs lù ə̀ dyʉ̀ kwèn a ngə̀ŋ ayì ə̀ ghʉ̀ avu wen a kətʉ Saul gàʼà la, “Lèmə̀ ghom Saul, Bobo, a diʼi Yesò yì a wù yì yen a ji ando wù yì mvi a shèn lì, tɨm li mò la mà vi ə̀ nè ashɨ wu mbwènsə̀ yenə shi, bè nè la Kəzhwì kə ŋwòʼəkə vì à wù.”

¹⁸Ando ghə̀ ngàʼà mwètə̀ to myetə fo fʉ̀ fa ashɨ Saul diʼ to nə̀ bo shʉsə ə̀ fəŋkə a nse, ashɨ wen bòʼtə̀, ghə̀ sə bwènsə̀ yenə shi. Ghə̀ lù shi mu.

¹⁹Fa yì a bàm, ghə̀ zhɨ kəfo no a zhʉ̀ kò kədyòʼ kə bwènsə̀ vì a wen a wèn. Saul tsìtə mətsi alə̀ a Damaskus wenə̀ ndzɨ̀mtə̀sə bàm Yesò sətsensə,

²⁰mù zìtə̀ lù fa tsu dyʉ̀ a aloʼ ntsèntə̀sə ə̀ shə̀ʼtə̀ ntɨm jùŋ byìʼì Yesò gàʼà la, “Ghə̀ dìʼ Wàyn Nyìngòŋ.”

²¹No viʼi vətsèm a və nzhʉ ando Saul ngàʼà ndìʼ nə̀ kaynə mù sə bèmə̀ la, “Gaʼa kò ghèn dìʼ wìʼ yì a ghə̀ tə nzhwilə̀ viʼi a Jelusalèm byìʼàndo vəwenə ghoʼsə̀ Yesò lo?. Gaʼa kò ghə̀ tə vì shyə̀ ə be nè tò ndə̀ŋndəŋ kənyʉ̀ a kèn, əghaʼtə viʼi vəbyɨməvə ədyʉ̀ ku à tʉtʉ və vəpfèm və ngə̀ŋ Nyìngòŋ lo?”

²²Saul sə tùʼù shə̀ʼtə̀ dyʉ̀ nə̀ ntɨm jùŋ tò shə̀ʼtə̀. Ghə̀ nshə̀ʼtə̀ a lì dìʼì mwètə̀ la Yesò dìʼ wìʼ yì a Nyìngòŋ ntsuʼ li ə̀ ghʉ, kò a ndiʼ la wù Jus muʼ a ghə̀ ndiʼì a Damaskus nzì ghə̀ soʼtə̀ kənyʉ̀ kì a ghə̀ ngàʼà lì.

²³Mətsi nè chò no ghoʼo alə̀, Vəjew tsèntə mù sə baʼtə̀ əzhwi Saul;

²⁴alì və vì shə̀ʼtə̀ kənyʉ̀ kì a və mbaʼtə̀ ənè nə̀ wen à wen. Vəwenə sə vì bvʉ̀tə̀ wen nəntʉʼʉ, nə̀nchwì a təchʉ̀ tə mbàyn tə ntə̀ʼ ayì əzhwi.

²⁵A lù sə diʼ nəntʉʼʉ kətsi kətsenkə, ndzɨ̀mtə̀sə bàm Saul sə lyɨ̀ wen ə̀ wè a nkyè ə̀ shìsə̀ wen fa kəbʉ̀ʼ a kə ndiʼì a wenə mbàyn ə shìsə̀ wen ə̀ ghʉ̀ a bàmə mbàyn, ghə̀ nyɨŋ.

²⁶Andìʼ ando Saul nkuʼ ə̀ zaʼa a Jelusalèm, sə mwòmsə̀ la ghə̀ tsèntə̀ nòynə ndzɨ̀mtə̀sə bàm Yesò, alì kò vəwenə lù byɨmə la ghə̀ ndiʼ ndzɨ̀mtə̀ bàm Yesò. Vəwenə no vətsèm mfànə̀ wen.

²⁷Balnabas mù vì gyàmtə̀ wen ə̀ lyɨ̀ wen ə̀ dyʉ̀ nə̀ wen à viʼi ntɨm Yesò ə̀ shə̀ʼtə̀ laynsə à vəwenə ando Saul tə yen Bobo a jì ando ghə̀ tə ndyʉ̀ a Damaskus, ghə̀ gàʼ à wen. Balnabas bè gàʼ ando Saul shə̀ʼtə̀ li ntɨm jùŋ a Damaskus byìʼì Yesò nə̀ tyɨmə toghə.

²⁸Saul faŋ ə̀ mù sə tsi tò wenə̀ viʼi ntɨm ə̀ Yesò, jèʼè kaʼa fa Jelusalèm no tsèm, shə̀ʼtə̀ ntɨm ə jùŋ byìʼì Bobo nə̀ tyɨmə toghə.

²⁹Ghə̀ ngàʼà be soʼtə̀ nyʉ̀ wenə̀ Vəjew vi a və ngàʼà gaʼa Glis. Vəwenə mù zìtə̀ sə baʼtə̀ əzhwi wen.

³⁰Viʼi vəbyɨməvə vətsenvə vi nè kɨ kənyʉ̀ akì no a zhʉ̀ kò ə lyɨ̀ wen ə̀ nyɨŋsə ə̀ shìʼsə nə̀ wen a Sisalìyà ə̀ tɨ̀m la ghə̀ bwènə̀ dyʉ̀ a Talsus.

³¹No viʼi vəbyɨməvə vətsèm a Judiyà nə̀ Galìlì bènə̀ a Samalìyà nko be fàynə. Nòyn viʼi vəbyɨməvə mù sə ghoʼo vì tò vì, byɨmə vəwenə be to kuʼu tò kuʼu, Kəzhwì kə ŋwòʼəkə gyàmtə̀ vəwenə, vəwenə ntsi ando Bobo nkəŋə.

³²Zhʉ tsenghə vì kwʉ̀ʼ, Bità sə jèʼè dyʉ̀ a shi no ghoʼo, ə̀ shìʼi dyʉ̀ la ghə̀ ghayntə viʼi vəbyɨməvə a və ndìʼ a ntə̀ʼ Lida.

³³Ando ghə̀ nshiʼi lì ghə̀ yen wutsen tsu a zhiʼ wen ndìʼ Enyàs, mu ghə̀ kwaʼkə li sə nyoŋ tò a kwen a tì ngwʉ̀ʼsə fwomə.

³⁴Bità gàʼ à wen la, “Enyàs, Yesò Klistò nè li la wù to tò luwèn. Lu shɨ̀tə̀ əkwen wù.” No a zhʉ̀ kò Enyàs lù.

³⁵Viʼi no vətsèm a və ntsi a Lida bènə̀ vi a və ntsi a mbwaʼ tsen a və ndzàŋə̀ la Shalòn, nè yen ando Enyàs njèʼè ghayntə kaʼa, ə kwìtə tətyɨm tə vəwenə ə̀ byɨmə à Bobo.

³⁶Andìʼ a Joba, wùwì byɨmə tsen diʼ tsu a zhiʼ wen ndìʼ Tabita, andiʼ a gaʼa Glis zhiʼ a ghenə diʼ Dokas, kənàʼ ki diʼ “ngo.” Ghə̀ nè tò nyʉ̀ jùŋvə məzhʉ tsèm be ku gyàmtə̀ à viʼi kəmfem.

³⁷A sə ndiʼ tò a mətsi ayì, bvìʼ ghaʼ wen ghə̀ pfʉ. Və shʉ̀ bvenə ə wen ə kuʼ nyòŋsə̀ a tì ngə̀ŋ kàŋ.

³⁸Andìʼ a lì kò kəghaf kə ndiʼ əlù fa ntə̀ʼ Joba ə dyʉ̀ a Lida. Ndzɨ̀mtə̀sə bàm Yesò shìsə a sə ndiʼ a Joba nè zhʉ̀ la Bità dìʼ a Lida, vəwenə tɨm viʼi vəbò la və dyʉ̀ ə̀ gàʼ à wen la, vəwenə sensə̀ wen la ghə̀ nyɨŋ ə̀ shiʼi vì ə̀ yèn vəwenə.

³⁹Bità wenə̀ vəwenə lù dyʉ̀ zaʼa tsu, və lyɨ̀ wen ghə̀ kuʼ a tì ngə̀ŋ kàŋ ayì. Ki mpfʉ no vətsèm fa ntə̀ʼ ayì zhùŋtə̀ kàʼa wen mù sə̀ dì, dìʼì ndisə tin shìsə bènə̀ gwʉ̀nə̀ vi a Dokas ntasə̀ a vəwenə à wen.

⁴⁰Bità gàʼ la vəwenə no vətsèm fʉ̀ a kəbəŋ. Vəwenə fʉ̀kə̀, Bità mù gwʉ̀ʼtə alwi wen a nse ə̀ jɨ̀m à Nyìngòŋ, nè jɨ̀m ə̀ mè ə̀ fùʼtə gàʼ à bvenə ayi la, “Tabita, lu.” Ghə̀ bòʼtə̀ ashɨ wen sə lye àdìʼ Bità, ghə̀ lù ŋwʉʼʉ ŋwʉʼʉ.

⁴¹Bità gyàmtə̀ tsòʼsə̀ wen ghə̀ lù tɨ̀mə mù dzàŋtə̀ viʼi vəbyɨməvə vyi bènə̀ ki mpfʉ vyi ə̀ dìʼ à vəwenə la ghə̀ diʼ tò to.

⁴²Soʼgho byìʼì kənyʉ̀ a kènkə sàykə dyʉ̀ a Joba no tsèm, viʼi no və ghoʼo bè byɨmə à Bobo.

⁴³Fa yì a bàm, Bità tsi no alə̀ a Joba a ngə̀ŋ Simon tsen, a ghə̀ ntùʼmə̀ nə̀ gwʉsə nyamsə.