Read Babanki 1 Kolìntyàns 10 Bible Online

1 Kolìntyàns 10 - Babanki bible

1 Kolìntyàns 10

¹Ma kəŋ a vəlemə vwomə la ghə̀ŋ be kwoʼtə ando vətiʼ vəghəŋ ə njèʼè tsi ə boʼsə a nse zɨm, mboʼsə sə diʼi ji a vəwenə no və tsèm, vəwenə lu jèʼ ə dyʉ̀ zàʼa a mù mə baŋə mə̀, mə tinə, vəwenə tɨm no vətsèm.

²Nyìngòŋ ə nku li mu a vəwenə a mboʼsə a yi no vətsèm ə be ku mu a mù mə baŋə mə̀, vəwenə sə diʼ ndzɨ̀mtə̀sə bàm Mosìs.

³Vəwenə no vətsèm nzhɨ̀ li kəfo kə zhɨkə kə mu à ku Nyìngòŋ,

⁴ə be nyʉ mu, mu à ku Nyìngòŋ. Mu na mèyn ə nfʉ fa əwu yi a ghə̀ njèʼè fa vəwenə a ntìntìn. Əwu na ghenə ə ndiʼ Klistò.

⁵Nyìngòŋ ə ne no tèbe alə̀, ko ghə̀ lə nsaŋlə a viʼi və ghoʼovə a vəwenə a ntìntìn, vəwenə sə pfʉkə, le dyʉ̀ a nse ə zɨm.

⁶Ənyʉ̀ na venə diʼ nchwi ə ku kətyiftə a vəghəŋ la kə vəghəŋ na kòŋ nyʉ̀ ə byɨvə to nə̀ vəwenə,

⁷gumlə nshəʼsə to ando vəwenə vətsenvə ə ngumlə̀. Və nyoʼo li a ŋwàʼlə̀ Nyìngòŋ la, “Vəwenə ə nyʉ̀ʼmə li a nse ə zhɨ̀ ə be nyʉ, fa bàm a tsu vəwenə lù ə sə benə ku əkuʼsə a nshəʼsə.”

⁸Vəghəŋ ə ko diʼ ə nkwen a ntsìnə̀sə kəfwaʼlə yi a vəwenə vətsenvə ə ntsi, kənyʉ̀ a kì ə ne li, vəwenə pfʉ nkam məwumə mbò a njʉ̀sə̀ tàʼ to kətsi kə mùʼ.

⁹Vəghəŋ ə ko diʼ ə mwomsə Bobo ando vəwenə vətsenvə ə mwomsə, kənyʉ̀ na kì kə ne, zhusə lɨmlə ə zhwilə vəwenə.

¹⁰Vəghəŋ ə ko diʼ ə ndèmkə̀ to ando vəwenə vətsenvə ndèmkə̀, kənyʉ̀ na kì ne, ntsɨ̀ŋ Nyìngòŋ yì a ghə̀ nzhwilə̀ viʼi lì ə zhwilə vəwenə.

¹¹Ənyʉ̀ na venə ə̀ nfʉ̀ a vəwenə a nchwi, və be nyòʼò ə ghʉ əku kətyiftə a vəghəŋ byìʼì ando əzhʉ̀ boʼsə li ə mbyi mè.

¹²Kə le diʼi la no ndò yi a ghə̀ kwòʼtə̀ la ghə̀ ti a nkàyn diʼi tùʼmə̀, kə ghə̀ na fəŋ.

¹³Nò mwomsə ə tsen ghə̀ ko diʼ a ghə̀ vì a ghə̀ŋ ko andiʼ la ghə̀ tɨmə vì a wìʼ. Nyìngòŋ ə tuʼmə. Ghə̀ ko a moʼtə la mwòmsə̀ ə vi a ghə̀ to chò kədyòʼ ə kəŋkə̀. Əmwòmsə̀ ə sətsèn vì a ghə̀ŋ, ghə̀ a diʼ ji yì a ghə̀ŋ nyɨŋ fa tsù, ko mwòmsə̀ na yi a to ghoʼ ghə̀ŋ.

¹⁴Alì, ghə̀ŋ nyɨŋsə təwen ə təŋtə fa gumlə nshəʼsə a doŋ shom sə jùŋsə.

¹⁵Ma gàʼà a ghə̀ŋ to nə̀ viʼi a və kiʼi ətof. Ghə̀ŋ kwoʼtə kənyʉ̀ ken a ma gàʼà no fa ghə̀ŋ a ngeŋsə.

¹⁶Vəghəŋ nə̀ nyʉ̀ʼ lyɨ ntaʼ ə kwòʼtə pfʉ ə Yesò, və jɨm a kwi ndoŋ məlyʉ̀ʼ ə nyʉ̀, kə diʼi la məmluŋ mə Yesò ne li vəghəŋ ntsentə vəghəŋ vəwen to kəfo kə mùʼ. Vəghəŋ nə̀ gə̀tə̀ əfo ə zhɨvə azhʉ̀ na ghèn ə zhɨ̀, kə nə̀ diʼi la ə wèn ə Yesò ə ne li vəghəŋ vəwenə ntsentə to kəfo kə mùʼ.

¹⁷Kə diʼ alə̀ byìʼì ando vəghəŋ nə̀ ndiʼ tèbe və ghoʼo, və tsèntə ə zhɨ̀ to kəbayn kə mùʼ, kə diʼ la vəghəŋ ə diʼ to ə wèn ə mùʼ.

¹⁸Ghə̀ŋ yen viʼi Islel a! Vəwenə ə ngə̀tə̀ kəfo kì a və kù a kwi kəbaŋ kəku ə zhɨ̀, kə sə diʼi la vəwenə tsentə li wenə və Nyìngòŋ.

¹⁹A ghə̀ŋ lə zhʉ̀ kɨ no tèbe kənyʉ̀ kì a ma gàʼà a? Ma gàʼà ə boʼ la əfo ə zhɨvə vyi a və moʼo a əse a nshəʼsə ə diʼ no kəfo kə tsenkə mu, la no nshəʼsə a vyi diʼ kəfo lo?

²⁰Jòʼ. Ma gàʼà la, və mòʼo əse a əzhwi byɨvə, vəwenə ko mòʼo a Nyìngòŋ. Ma ko kòŋ la vye əzhwì byɨvə ə nzhɨmə̀.

²¹Ghə̀ŋ zizi ko ghə̀ŋ lu ə nyʉ̀ fa ndoŋ ə Nyìngòŋ be nyʉ̀ fa ndoŋ əzhwì byɨvə. Ghə̀ŋ zizi ko ghə̀ŋ lu zhɨ̀ akwi kəbaŋ ə Bobo be dyʉ̀ zhɨ̀ akwi kəbaŋ əzhwì byɨvə.

²²Vəghəŋ kəŋ səʼ Bobo la ətin ə wen ə fwi mu? A vəghəŋ le kiʼi kədyòʼ chò wen a?

²³Viʼi vətsenvə nə̀ gàʼa la vəghəŋ ə kiʼi kədyòʼ ə ne no tèbe ghò, alì a ko diʼ nyʉ̀ ə tsèm a və gyàmtə̀ vəghəŋ. Viʼi vətsenəvə nə̀ gàʼa la vəghəŋ ə kiʼi kədyòʼ ə ne no tèbe ghò, ali a ko diʼ nyʉ̀ ə tsèm a və bòŋ.

²⁴Kə wìʼ fa ghə̀ŋ a nshwèʼè ə gyàmtə̀ to wenə wen, ghə̀ŋ nshwèʼè ə gyàmtə̀ viʼi vətsenvə.

²⁵Ghə̀ŋ mpfiʼi no tèbe nki nyàm ə kò a və baʼlə a nguʼ ə nyàm. Ghə̀ŋ sə phiʼi, kə ghə̀ŋ a kayntə kənyʉ̀ kumə nyàm ayi, əghʉ̀ nyʉ̀ a ghə̀ŋ kwòʼtə.

²⁶Ŋwàʼlə̀ Nyìngòŋ gàʼ la, “Nse ghèn diʼ alə̀, a kiʼi Bobo, nə̀ no tèbe nə̀ ghò yi a ghə̀ diʼi tsu.”

²⁷Wìʼ yi a ghə̀ ko tɨmə mbo byɨmə Yesò, sətsèn ə laʼa wù la wù vi zhɨ̀ a wen a ngə̀ŋ, wù dyʉ̀, wù zhɨ̀ no tebe ghò yì a və ku la wù zhɨ̀. Wù sə zhɨ̀, kə wu a moʼtə la kənyʉ̀ kətsen kə ə ku ngəʼ a wù kwòʼtə.

²⁸Alì wù sətsen kəŋ zhɨ̀, wìʼ gàʼ mwetə a wù la, “və yi mòʼo əfo ə zhɨvə a venə a əse,” kə wu bè a zhɨ̀ byìʼì kənyʉ̀ ki zizi kə ku ngəʼ a wù a kwoʼtə̀ nə̀ ghə̀ wìʼ na ghèn a ghə̀ shə̀ʼtə̀ kənyʉ̀ na kènkə a wù lì.

²⁹Ma gàʼà la wù shɨtə ki kwoʼtə ə wen, a ko diʼ yə̀, byìʼì ando ə kwoʼtə̀ ə wù ə kədyàŋ ə ko diʼ ə tàʼsə la kə ma ne ando ma kòŋ.

³⁰Mà sətsèn ə zhɨ̀ əfo ə zhɨvə, ku kəzòŋ a Nyìngòŋ, ko və lu ə ndiʼ ə ghamə mo kumə kəfo kì a ma zhɨ, a diʼ ali ma zhɨ, ku kəzòŋ.

³¹Kə lə diʼ la, ghə̀ŋ sə nzhɨ̀ no tèbe ghò, kò ghə̀ŋ nyʉ nyʉ, kò ghə̀ŋ nè no tèbe ghò, ghə̀ŋ ne to ə ku kuʼsə a Nyìngòŋ.

³²Kə ghə̀ŋ ə ntsi a ji ə ne la viʼi Jus kò viʼi Gɨ̀lìs kò viʼi və byɨməvə Nyìngòŋ fəŋ a mbyɨ.

³³Ghə̀ŋ ə ne to ando ma mwomsə ə ne la viʼi vətsèm ə nsaŋlə̀, no tèbe a gho a ma nè. Ma ko kəŋ to njùŋ ghom, ma kəŋ jùŋ a viʼi və ghoʼo və ndi Nyìngòŋ ə bwoŋsə vəwenə.