Read Babanki 1 Kolìntyàns 11 Bible Online

1 Kolìntyàns 11 - Babanki bible

1 Kolìntyàns 11

¹Ghə̀ŋ ə shəmə ntsìnə̀ ghom ndə̀ŋndəŋ ando ma shəmə ghə̀ Yesò.

²Ma bwomsə ghə̀ŋ byìʼì ando ghə̀ŋ ə ko lyesə mò no fa mpfen be shɨtə ghaʼ əziʼi yì a ma ə nziʼi ghə̀ŋ tsu,

³ali ma kəŋ la ghə̀ŋ ə kɨ la, Yesò diʼ kətʉ̀ kə lʉ̀mə vətsèm, wulɨm diʼ kətʉ̀ a wì wen, Nyìngòŋ ə diʼ kətʉ̀ a Yesò.

⁴Wùlɨm sətsèn ə chiʼtə kətʉ kə wen azhʉ̀ a ghə̀ jɨ̀mə̀ kò azhʉ̀ a ghə̀ shə̀ʼtə̀ ntɨm mu ghə̀ lù fa Nyìngòŋ, ghə̀ kɨ la ghə̀ diʼsə kətʉ kə Yesò, a ghə̀ diʼi kətʉ kəwen.

⁵A wùwì, mu ghə̀ sətsèn njɨ̀mə̀ kò ghə̀ shə̀ʼtə̀ ntɨm mu ghə̀ lù fa Nyìngòŋ ko andiʼ la ghə̀ chiʼtə li kətʉ kə wen, ghə̀ a diʼsə kətʉ kə lɨmə wen, a ghə̀ diʼi kətʉ a wen. Ghə̀ yi ne alə, ko nəkwoŋ na diʼ fa wen nə̀ wùwì yi a və kom li kətʉ̀ kə wen.

⁶Wùwì sətsèn faŋke ndiʼ ə chiʼtə kəfo a wen a kətʉ, a kə ne bòŋ la ghə̀ laynsə kom kətʉ na kì, ali à sətsèn ndiʼ kənyʉ̀ kə kətʉ kədiʼkə ə kom kətʉ, ghə̀ chiʼtə kəfo tsu.

⁷A wulɨm, ghə̀ ko diʼ ə chiʼtə kəfo a wen a kətʉ byìʼì ando Nyìngòŋ ə ne li la ghə̀ əfɨsɨ Nyìngòŋ, diʼi əbayn ə Nyìngòŋ, alì a wùwì, wùwì ne la lɨmə wen ə nkuʼmə̀.

⁸Ghə̀ŋ kɨli la və kò nlyɨ̀ kəkwoŋ kə shə wèn wùwì ə shɨtə wulɨm tsu, və mboŋsə lyɨ̀ kəkwoŋ kə shə ə wèn ə wulɨm ə shɨtə wùwì tsu.

⁹Kə le diʼ to ndə̀ŋndəŋ ando və nko shɨtə wulɨm a wùwì, və nə̀ shɨtə wùwì a wulɨm.

¹⁰A lə kənyʉ̀ ki a wùwì diʼ ə nchiʼtə kəfo a wen a kətʉ a nchwi ə diʼ la ghə̀ diʼ a tyi əsoʼ lɨmə wen, kə ətsɨŋsə Nyìngòŋ sə ne fwisə tin.

¹¹Nò tèbè ali, a vəghəŋ vyi a və byɨmə a Bobo, wùwì ə ko ti fa wen a ngəŋ, a bwen fa wulɨm, ko wulɨm ə ti fa ngəŋ, a bwen fa wùwì.

¹²Və ə nlyɨ̀ kəkwoŋ kə əwen ə wulɨm ə shɨtə wùwì tsu, wùwì besə bwi wulɨm, alì mu à nshɨtə Nyìngòŋ shɨtə fo ə tsèm.

¹³Ghə̀ŋ soʼtə̀ to no fa ghə̀ŋ a ngeŋsə la, kə lə diʼ a le la wùwì ə nti a ntìntìn ə viʼi, jɨ̀mə̀ a Nyìngòŋ ko andiʼ la ghə̀ chiʼtə kətʉ kə wen lo?

¹⁴A ji yi a mbyi diʼ fa tsu ə diʼi to no la, à diʼ kənyʉ̀ kə kətʉ kədiʼkə a wulɨm ghə̀ nkuʼsə kətʉ.

¹⁵Alì a wùwì, a diʼ ə ngòyn ə nkuʼsə kətʉ. Nyìngòŋ ə kù nyɨŋsə kətʉ sə dyefkəsə a wùwì, la ghə̀ ə chiʼtə kətʉ kə wen tsu.

¹⁶Sətsèn wìʼ nkəŋ ə ngwùmə̀ kənyʉ̀ na kèn a mà gàʼ lə̀, mu yès ko kiʼi ji tsen ə be lyɨ shə̀ʼtə̀ nyʉ̀ na venə fa tsù, ko andiʼ la no tèbe ngə̀ŋ Nyìngòŋ ə kiʼi.

¹⁷Ənyʉ̀ ə tsenəvə ə diʼ a ma kəŋ ə gàʼ a ghə̀ŋ luwen, ma ko bwomsə tebè ghə̀ŋ byìʼì ando ghə̀ŋ vi zhùŋtə̀ no zhʉ̀ko ə kuʼsə Nyìngòŋ, ko ghə̀ŋ lu ə shɨtə nyʉ̀ shɨtə, ghə̀ŋ sə boŋsə byɨbsə to byɨbsə.

¹⁸Mbì kənyʉ̀ a ma kəŋ gàʼà diʼ la, viʼi shə̀ʼtə̀ li a mò la ghə̀ŋ vi zhùŋtə̀ to nə̀ ntsèntə̀ viʼi Nyìngòŋ, ghə̀ŋ sə kiʼ kəgəsə a ghə̀ŋ a ntìntìn, ma byɨmə la nyʉ̀ ə tsenəvə ə diʼ tsu a və gàʼà, a diʼ to no nəmwèʼè.

¹⁹Kəgəsə kə yi ndiʼ ndiʼ a ghə̀ŋ a ntìntìn, ndi və nshɨtə yenə kɨ nkàyntə̀ viʼi Nyìngòŋ.

²⁰Ghə̀ŋ zhùŋtə̀ akəshi kə ntaʼ ə sə ne ali, ko a be andiʼ ntaʼ Bobo a ghə̀ŋ vi ə zhɨ̀.

²¹Byìʼàndo ghə̀ŋ zhʉ sə zhɨ̀, viʼi vətsenvə sə kwoʼtə to əfo ə zhivə ngeŋsə ə vəwenə, vətsenvə pfʉ kə jɨŋ sə, viʼi vətsenvə nyʉ məlyʉ̀ʼ, bomə̀.

²²Ghə̀ŋ ko kiʼ aloʼ nzhɨ tsu be nyʉ mu? Ghə̀ŋ diʼ alə̀, chasə ngə̀ŋ Nyìngòŋ! Ghə̀ŋ kəŋ ə ndiʼsə kətʉ kə viʼi vyi a və ko kiʼ kəfo mu? A fʉ̀ no ghò nə̀ ghə̀ŋ a? Ghə̀ŋ kəŋ la mà ə bwomsə ghə̀ŋ a nyʉ̀ a venə mu? Mà zizi ko ma lu mwòm.

²³Kənyʉ̀ kì a ma zhʉ fa Nyìngòŋ a diʼ to kəwenkə ma ziʼi ghə̀ŋ tsu. Kə diʼ la, a ndiʼ nətʉʼ kətsi yi a və mbaʼlə̀ Bobo Yesò, ghə̀ lyɨ̀ li kəbayn kə məka,

²⁴a sə diʼ ando ghə̀ ku kəzòŋ a Nyìngòŋ, ghə̀ byəʼlə ə gàʼ la, “Ghenə diʼ əwèn ghomə a ma kù byìʼì ghə̀ŋ. Ghə̀ŋ ne ə nè alə̀ kwoʼtə mò.”

²⁵A sə diʼ ando və zhɨ li mwetə, ghə̀ ne to ali nə̀ ndoŋ, ə gàʼ la, “Ndoŋ ghèn diʼ ndoŋ məkàyn mə mfimə̀ ando və chiʼ nə̀ mənlyuŋ mwomə̀. Ghə̀ŋ lyɨ ə nyʉ. No zhʉ̀ko a ghə̀ŋ ə nyʉ ghə̀ŋ ə kwoʼtə mò.”

²⁶Kə le diʼi la ghə̀ŋ sətsen ə zhɨ̀ kəbayn kènkə, nyʉ ndoŋ ghèn no zhʉ̀ko, a kə a ndiʼ la ghə̀ŋ shə̀ʼtə̀ ntɨm əpfʉ ə Bobo ə zaʼa ando ghə̀ lù bwenə vì.

²⁷Kə lə diʼ la, no ndo sətsen ə zhɨ̀ kəbayn kə Bobo na kènkə be nyʉ ndoŋ Bobo na ghèn a ji a ghə̀ ko ku kùʼsə a wen, ghə̀ nkɨ la ghə̀ ne mbyɨ kumə əwen Bobo nə̀ mənlyuŋ mə wen.

²⁸Nò ndò ə nlye lì wèn ə wen mibu ghə̀ zhɨ̀ kəbayn na kì be nyʉ̀ fa ndoŋ na ghèn,

²⁹byìʼì ando no ndò a ghə̀ sətsèn ə zhɨ̀ kəbayn na kènkə be nyʉ fa ndoŋ na ghèn, ko ghə̀ kwoʼtə kəfo kì a ghə̀ zhɨ, ghə̀ nkɨ la ghə̀ dzàŋ ngəʼ a wen kətʉ.

³⁰A le kənyʉ̀ kì a kə ne viʼi sə bwaʼa vətsevə kwaʼa a ghə̀ŋ a ntìntìn no və ghoʼo, vətsevə be pfʉkə.

³¹Alì mu vəghəŋ sətsen ə nchò mbì ə lyè təwen tə vəghəŋ, ko Nyìngòŋ ə ba ə soʼ vəghəŋ.

³²Nyìngòŋ sətsèn ə̀ soʼo vəghəŋ, a andiʼ jì ziʼi vəghəŋ ndi kə və lu soʼ ə byɨsə vəghəŋ nə̀ viʼi mbyi amuʼ.

³³Kə le diʼ a vəlemə vwomə la, Ghə̀ŋ ne zhùŋtə̀ no zhʉ̀ko ə zhɨ̀, ghə̀ŋ kəʼtə no viʼi vətsèm, ə vì.

³⁴Wìʼ sətsen ə ndiʼ, jɨŋ ə zafə wen, ghə̀ zhɨ̀ mibu vì, bwen alì və vi tsentə̀, ghə̀ a ne Nyìngòŋ soʼ byɨbsə wen. Ma lu tisə nyʉ̀ ə tsenəvə vyi a ghə̀ŋ tə nyòʼ li azhʉ̀ a mà vi ə yen ghə̀ŋ.