Read Babanki 1 Kolìntyàns 12 Bible Online

1 Kolìntyàns 12 - Babanki bible

1 Kolìntyàns 12

¹Vəlemə və vwomə, ma kəŋ luwen la ghə̀ŋ ə kɨ kənyʉ̀ kumə kəku kikə a kəzhwì kə Ŋwoʼkə ə ku a viʼi.

²Ghə̀ŋ kɨli la a ndiʼ ando ghə̀ŋ bo bu ko ghə̀ŋ lu tɨmə diʼ viʼi və byɨməvə, və nlobtə ghə̀ŋ, lyɨ dyʉ̀ nə̀ ghə̀ŋ a nshəʼsə, a və ko gàʼà.

³A lə kənyʉ̀ kì a ghə̀ŋ ə kɨ la wìʼ zizi ko ghə̀ lu sə ngàʼ ə telə Yesò, a li kəzhwì kə Nyìngòŋ kə tisə wìʼ ayì. Wìʼ zizi ko ghə̀ lu sə ngàʼa ə gàʼa la, “Yesò diʼ Bobo,”a bwen la ghə̀ kiʼi kəzhwì kə Ŋwoʼkə.

⁴Tə nkì tə kəku tə diʼ to kədə̀ŋ, alì a ku to Kəzhwì kə Nyìngòŋ.

⁵Tə nkì tə jisə shwèʼ sə diʼ to kədə̀ŋ, ali və shwèʼè to a Bobo Yesò na ghèn.

⁶Jisə shwèʼ sə diʼ to kədə̀ŋ, alì Nyìngòŋ yi a ghə̀ diʼi jisə na shisə sətsèm a viʼi vətsèm diʼ to əmùʼ

⁷Nyìngòŋ ə ku Kəzhwì kə wen no tèbè a ndò la kə gyàmtə̀ wen ghə̀ nè əshwèʼ jùŋ ghə to viʼi və tsèm.

⁸Kəzhwì na kènkə kə mùʼ nə̀ dyʉ̀ a wu ə tsen, kə ne la ghə̀ ngàʼà nə̀ ətofə, kə dyʉ̀ a wutsen kə ne la ghə̀ nkɨ ə shə̀ʼtə̀ nyʉ̀ vyi a kə diʼi a wen.

⁹Kəzhwì na kènkə kəmùʼ kə ne dyʉ̀ a wutsen, kə nè la əbyɨmə ə wenə ntotə̀, kə sə dyʉ̀ a wutsen, kə ku kədyòʼ la ghə̀ nchʉʼʉ təkwaʼa tə viʼi.

¹⁰Kəzhwì na kèn to kə mùʼ nə̀ dyʉ̀ a wu ə tsen, kə ne la ghə̀ nshwèʼè təshwèʼ tə kaynətə, ə dyʉ̀ a wutsen, kə ku kədyòʼ la ghə̀ nshə̀ʼtə̀ nyʉ̀ mu və lù fa Nyìngòŋ. Kə dyʉ̀ a wu ə tsen, kə nè la ghə̀ nkɨ nəkwoŋ yì a ghə̀ diʼ a ntìntìn nyʉ̀ yi a və lù fa Kəzhwì kə Ŋwoʼkə nə̀ vyi a və lù fa zhwì ə tsevə. Kəzhwì na kì ne sə dyʉ̀ a wutsen, kə ne la ghə̀ ə nkɨ ə gàʼ təgàʼ ko andiʼ la ghə̀ ziʼi fa wìʼ, ə dyʉ̀ a wìʼ ə tsen, kə ne la ghə̀ ə nzhʉ kɨ təgàʼ a titə, shə̀ʼtə̀ kənyʉ̀ ki a tə gàʼà titə gàʼà.

¹¹Ənyʉ̀ na venə no ətsèm a ne to Kəzhwì na kènkə kə mùʼ lə. Kə kù no tèbe nki kəku kə kò, no tèbe a ndò, to ando kə kòŋ.

¹²Vəghəŋ ə kɨ la ə wèn ə wìʼ ə diʼ to əmùʼ ali kiʼ bàs to kədə̀ŋ. Əbàs ə wèn a venə ə tsèntə diʼ to a wèn na ghèn ə mùʼ. Kə lə diʼ ndə̀ŋndəŋ to ali a Klistò.

¹³Vəghəŋ nkaʼkə li ə sə diʼ to əwèn ə mùʼ a tʉʼ a kəzhwì kə Ŋwoʼkə nku mu a vəghəŋ, kò a ndiʼ la, vəghəŋ diʼ viʼi Jus, kò vəghəŋ ə ndiʼ viʼi ətɨm, kò vəghəŋ ə ndiʼ əkòs a wìʼ, ko vəghəŋ ndiʼi fa vəghəŋ a ngeŋsə. Nyìngòŋ ə ku li Kəzhwì na kènkə kə mùʼ, to a vəghəŋ vətsèm.

¹⁴Əwèn ə vəghəŋ ə diʼ alə̀ ko ghə̀ lu nkiʼi to kəbàs kə mùʼ, ghə̀ kiʼi əbàs, və diʼ to kədə̀ŋ.

¹⁵Kəghʉ̀ kə sətsèn gàʼ la, “Ma ko diʼ kəbàs kə wèn byìʼì ando ma ko diʼ kəvu,” Wu gàʼà wokenkə mu a ne la kə kə ndiʼi kəbàs kə wèn a?

¹⁶Kətiʼitiʼi kə ə sətsen ə gàʼà la, “Ma ko diʼ kəbàs kə wen byìʼì ando ma ko diʼ ashɨ,” Ko na kikə mu a nè la kə kə be diʼ kəbàs kə wèn.

¹⁷Əwèn no tsèm sətsen ə ndiʼ to ashɨ, ghə̀ ne zhʉ nyʉ̀ ale? Əwèn ə no tsèm sətsen ə ndiʼ to tiʼitiʼi, ghə̀ ne nlèmsə fo ale a?

¹⁸Əwèn wìʼ ədiʼ alə̀ mu Nyìngòŋ ə ne əghʉ̀ la no tèbe kəbàs kə kò kə ə ndiʼ to a ji yi a ghə̀ kòŋ fa tsù.

¹⁹Əbàs a venə ə yi ntsèntə̀ diʼ to kəbàs kə mùʼ, əwèn ə ne ndiʼ no le?

²⁰Kə diʼ la, əbàs əwèn ə diʼ no ə ghoʼo ali, əwen diʼ to əmùʼ.

²¹Əshɨ ə zizi ko ghə̀ lu gàʼ a kəvu kə la, “Wù ko kiʼ shwèʼ a mò,” ko kətʉ kə zizi kə gàʼ a ghʉ la, “Wù ko kiʼ shwèʼ a mò.”

²²Əbàs əwen vi a və yenə la və ko tuʼ ə to ə boŋsə diʼ vyi a və ko yi ndiʼ wìʼ a pfʉ.

²³Vəghəŋ nə̀ boŋsə tùʼmə̀ nə̀ bàs wèn vyi a vəghəŋ ə yenə la və ko tuʼ ə kuʼmə, vyi a və vi nə̀ diʼsəkətʉ diʼ vyi a və shɨtə tuʼmə̀ nə̀ wen və,

²⁴chò no ando və tuʼmə nə̀ bàs vyi a və bòŋ. Alì Nyìngòŋ ə nshɨtə əwen a ji a ghə̀ na kuʼsə bàs vyi a vəghəŋ ə yenə la və ko tuʼ ə kiʼ əshyèʼ.

²⁵Kə diʼ alə̀ byìʼì ando əwèn ə diʼ to a kəfo kə mùʼ, no tèbe kəbàs kə əwèn kə kò kə tùʼmə̀ nə̀ kətsen.

²⁶Kəbàs kə əwèn kə mùʼ kə sətsen nə̀ kiʼ ngəʼ, a əbàs əwen ə tsèm ne ntsèntə̀ diʼ to a ngəʼ. Və sətsen ə bwomsə kəbàskə əwen kə mùʼ, a əbàs əwen ə tsèm ne saŋlə to saŋlə.

²⁷Ghə̀ŋ vətsèm diʼ alə̀ tsèntə diʼ əwèn ə Yesò, no ndò a ghə̀ŋ ntìntìn diʼ kəbàs kə mùʼ fa tsu.

²⁸A diʼ a ngə̀ŋ Nyìngòŋ mu Nyìngòŋ ə gə̀sə̀ li viʼi ə ghʉ̀ a tə chʉ̀ tə shwèʼ to tənkì a tənkì. Ghə̀ ghʉ̀ li viʼi ambì, a diʼ viʼi ntɨm, ə kùmtə nə̀ nshə̀ʼtə̀sə. Fa yi abàm ghə̀ ghʉ̀ ndìʼsə̀sə ə be ghʉ̀ viʼi vyi a və ne nyʉ̀ ə kaynəvə ə ghʉ̀ vətsevə la və nə̀ chʉʼʉ viʼi nə̀ viʼi a və gyàmtə̀ viʼi vətsenvə. Ghə̀ ghʉ̀ li viʼi la və ə̀ tisə viʼi ə ghʉ̀ vətsevə la və nkɨ təgaʼ tə tsentə, ko andiʼ la à ziʼi wìʼ ə ziʼi vəwenə tsu.

²⁹Ghə̀ŋ ko yen la à ko diʼ viʼi vətsèm à diʼi viʼi ntɨm? A ko diʼ viʼi və tsèm à diʼi nshə̀ʼtə̀sə kò ndìʼsə̀sə. Ko a ne tebè viʼi vətsèm ne nyʉ̀ ə kaynəvə.

³⁰A ko kiʼ viʼi və tsèm kiʼ kəku ə nchʉʼʉ viʼi. Ko a kiʼ viʼi və tsèm kiʼ kəku ə ngàʼà təgaʼ ko andiʼ la à ziʼi wìʼ a vəwenə, ko a kiʼi viʼi və tsèm kiʼ kəku ə kɨ nyʉ̀ vyi a və gàʼà a təgàʼ na ghèn.

³¹Ghə̀ŋ ə soynə ə kiʼi kəku a kə kiʼ shwèʼ ghoʼoghə. Ma diʼ ji a ghə̀ŋ luwen, ghə̀ bòŋ kwʉʼʉ.