Read Babanki 1 Kolìntyàns 15 Bible Online

1 Kolìntyàns 15 - Babanki bible

1 Kolìntyàns 15

¹Ma kəŋ luwen a vəlemə vwomə ə dzɨŋtə ghə̀ŋ nə̀ ntɨm ə jùŋ yì a ma ə nshə̀ʼtə̀ a ghə̀ŋ, ghə̀ŋ zhʉ ə byɨmə ə sə ti to tsu.

²A diʼ ntɨm ə jùŋ na ghèn a ghə̀ zizi ghə̀ bwoŋsə ghə̀ŋ, azhʉ̀ a ghə̀ŋ shətə ghaʼa kənyʉ̀ ki a mà tə shə̀ʼtə̀ a ghə̀ŋ, bwen ali, əbyɨmə ə ghəŋə a lè to kədyàŋ.

³Nò kənyʉ̀ kə tokə ki a ma tə nziʼi ghə̀ŋ diʼ to kəwenkə kə a və nziʼi a mò la, Yesò mpfʉ byìʼì nyʉ̀ əbyɨvə ə vəghəŋ to ando və nə̀ nyoʼo a Ŋwàʼlə̀ Nyìngòŋ,

⁴və bvɨmə wen, a sədiʼ a mətsi ə ntàʼ, ghə̀ lu fa pfʉ to ando və nyoʼo li a Ŋwàʼlə̀ Nyìngòŋ

⁵la, ghə̀ ndiʼi li wèn ə wen a Sefàs ə be diʼ a viʼi ntɨm vyi njʉ̀sə̀ bò.

⁶Ghə̀ ndiʼi li wèn ə wen a ndzɨ̀mtə̀sə wensə sə chò əghɨ ə tayn to ghayn ə mùʼ, viʼi fa vəwenə a ntìntìn bo diʼ ə zàʼa fa layn, və tsenəvə diʼ mù və pfʉkə li.

⁷Ghə̀ ndiʼi li wèn ə wen a Jems ə be diʼ a viʼi ntɨm, no və tsèm.

⁸A kə mwetə ghə̀ mu diʼi ə mwetə wèn ə wen a mò no tèbe ando ma diʼ to nə̀ wìʼ a və mbwi a zhʉ̀ kədyàŋ.

⁹Byìʼàndo ma ko diʼi no tebe wìʼ a ntìntìn ə̀ viʼi ntɨm, ko ma kʉʼʉ li və ntoŋtə mò la wù ə ntɨm byìʼì ando ma ə nfaŋ li ə sə ku ngəʼ to ku a tsèntə̀sə viʼi Nyìngòŋ.

¹⁰Alì byìʼì ətyɨm ə jùŋə Nyìngòŋ, ma sə diʼ kəfo kì a ma diʼi kəwenkə luwen. Ətyɨm ə jùŋə na ghenə ko lè kədyàŋ. Ma boŋsə li shwèʼ no nə̀ kədyoʼkə, shwèʼ chò no ndò a ntìntìn ə̀ viʼi ntɨm no tèbe ando à ko tə nlaynsə shwèʼè mò, à tə nshwèʼè ətyɨm ə jùŋə Nyìngòŋ na yi a mò a wèn.

¹¹Kə diʼ la, kò a nshə̀ʼtə̀ mò shə̀ʼtə̀ ntɨm ə jùŋ a ghə̀ŋ, kò à ə̀ shə̀ʼtə̀ viʼi vətsenvə na vyi, kənyʉ̀ kətokə diʼ to la, və nshə̀ʼtə̀ li, ghə̀ŋ byɨmə.

¹²Ghə̀ŋ le ziʼi la Yesò nlù li fa pfʉ, viʼi vətsenvə fa ghə̀ŋ a ntìntìn njèʼ ale ə gàʼa la viʼi ko lu lù tebè fa pfʉ a?

¹³Nò tèbè ali, kə sətsen ndi nəmwèʼè la viʼi ko lu lù tebè fa pfʉ, a kə a ndiʼi la Yesò nko nlù fa pfʉ.

¹⁴Kə sətsen ə ndiʼ la və kò ə nlùsə Yesò fa pfʉ, a kə ne diʼi la əziʼi ə yesə le li to kədyàŋ, tèbe əbyɨmə ə ghəŋə be andiʼ to byɨmə zɨm ghə̀.

¹⁵Kə sətsen ə ndiʼ ali, a kə ne be diʼi la yès ə zhò to ndzɨŋ kumə Nyìngòŋ byìʼì ando yès ə gàʼ la Nyìngòŋ ə nlùsə Yesò fa pfʉ. Kə sətsen ndiʼ nəmwèʼè la viʼi ko lu lù fa pfʉ, a kə a ndiʼi la ghə̀ nko lùsə wen fa pfʉ.

¹⁶Kə sətsèn ə ndiʼ nəmwèʼè la və ko lu lusə viʼi fa pfʉ, a kə a ndiʼi la və ko nlùsə Yesò.

¹⁷Kə sətsen ə ndiʼ la və kò ə lùsə Yesò fa pfʉ, a əbyɨmə ə ghəŋə a diʼ to byɨmə zɨm ghə̀, mbyɨ shəŋsə bo a diʼ to a ghə̀ŋ a kətʉ.

¹⁸Kə yi ndiʼ alə, kə a diʼi la viʼi vyi a və tə sə pfʉ, mu və byɨmə li a Yesò, ə lè li to kədyàŋ.

¹⁹Vəghəŋ sətsen ə ndiʼ mu və kù li təwen tə vəghəŋ a Yesò la ghə̀ gyamtə vəghəŋ, ghə̀ diʼ ə gyàmtə̀ kumə to ntsìnə̀ yì a vəghəŋ ntsì a mbyi luwèn, a kə ne bòŋ la ghə̀ kusə shinsə a vəghəŋ chò ando və kusə no tèbè ando ə tsen a mbyi ashen.

²⁰Alì kə ko diʼ ali. Kə diʼ to no nəmwèʼè la və lusə li Yesò fa pfʉ, a diʼi wen yi a ghə̀ nlù fa pfʉ a ambì ə viʼi vətsèm ə diʼ la viʼi ə lu lù fa pfʉ.

²¹Byìʼàndo pfʉ ə nvi a nse mu à nè wìʼ, a be ne to wìʼ ə tsen la viʼi lu lù fa pfʉ.

²²Kə le diʼ ndə̀ŋndəŋ ando viʼi və tsèm ə pfʉ byìʼì ando Adàm diʼ tìʼ vəwenə, viʼi vətsèm vyi a və byɨmə li a Yesò diʼ lu lù ə ntsi, to ndə̀ŋndəŋ ando ghə̀ nlù ə sə tsi.

²³Nò ndò lu lù fa pfʉ to a wen azhʉ. Yesò ə ndiʼ mbì ə lù, diʼ lu be vì ə lùsə viʼi vyi à diʼ viʼi wen.

²⁴Yesò lu to ə chò no əzhwi byɨvə no tsèm a və soʼo mbyi boʼsə nə̀ adyòʼ no tsèm. Sə chò fa yi abàm, ə mbyi mè, ghə̀ bwensə ku əfòynə ə wen a Nyìngòŋ ə Tìʼ.

²⁵Kə diʼ alə̀ byìʼì ando Yesò zizi ko ghə̀ lu faŋ ke nsoʼo to soʼo ə zaʼa ando ghə̀ a mòʼ viʼi kəbayn wen no vətsèm a nse, ə tomtə aghʉ a vəwenə a kətʉ.

²⁶Wù kəbàyn wen ə yi a ghə̀ lu byɨsə a kəmwetə a diʼ əpfʉ̀.

²⁷Ŋwàʼlə̀ Nyìngòŋ gàʼ la, “Nyìngòŋ ə ghʉ̀ li əfo ə tsèm a wen a tì la ghə̀ nsoʼo.” Ghə̀ sətsèn gàʼ la, “Və ghʉ̀ li no əfò ə tsèm a wen ati” kə ko ə gàʼ ali boʼsə nə̀ Nyìngòŋ ə tsu, kə kə̀ʼə̀ to no a ndayn la à ghʉ̀ Nyìngòŋ ə nghʉ əfo na venə ati ə Yesò.

²⁸Nyìngòŋ ə lu ghʉ̀ mwetə no əfo ə tsèm ati əsoʼ ə Yesò, ə Yesò fa wen a ngəŋ mu ghʉ̀ wèn ə wen ati əsoʼ wìʼ yi a ghə̀ ə nghʉ̀ fò ə tsèm a wen ati, ndiʼ Nyìngòŋ ə soʼo əfòyn ə wen to akwi əfò ə tsèm.

²⁹Viʼi sətsen ndiʼ lu faŋ kə lù fa pfʉ nəmwèʼè, viʼi və to və ne sə shi mu akəshi ə wìʼ mu və pfʉkə li, ətof na yi ə diʼ la ghò? Kə sətsen ə ndiʼ la və ko lu lùsə tebè viʼi fa pfʉ, viʼi sə shi mu akəshi ə̀ viʼi və pfʉkəvə na vyi byìʼì gho?

³⁰Kə sətsen ndiʼ la və ko lu lusə viʼi fa pfʉ nəmwèʼè, a ne no ghò la yès ku təwen ə tyestə to mənzhʉ̀ ntsèm ko yès ə be fwaynə pfʉ a?

³¹Ma ti to kəʼ pfʉ no mətsi ə ntsèm a vəlemə vwomə! Ma gàʼà alə̀, naynə kumə ghə̀ŋ byìʼì ando vye Yesò, ə Bobo vəghəŋ diʼ to kənyʉ̀ kə mùʼ.

³²Əse ghomə le ndiʼ no ghò? Ando mà tə nsoynə yo və viʼi a Efesùs a və ndiʼi to nə̀ nyamsə ətòʼ, azhʉ̀ a ghə̀ŋ sətsen nghʉ no nəmwèʼè la viʼi ko lu lù fa pfʉ a? Kə sətsen ə ndiʼ alə, a kə a ndiʼi la viʼi vətsevə ngàʼa to no nəmwèʼè la, “vəghəŋ nzhɨ̀ to zhɨ̀ be nyʉ byìʼì ando à lu ndiʼ a boʼòngə̀ŋ ə vəghəŋ phɨkə ə lè.”

³³Kə wìʼ na ə lobtə ghə̀ŋ. Ghə̀ŋ kɨ la, “Ndoŋsə byɨsə ə byɨbsə ntsìnə̀ ə jùŋ.”

³⁴Ghə̀ŋ bwensə vi a ghə̀ŋ a tətof, əghʉ̀sə mbyɨ shi a ghə̀ŋ ə ne. Ma gàʼà alə la ndi diʼsə kətʉ kəŋ kə byìʼì ando ghə̀ŋ vətsevə ko kɨ Nyìngòŋ.

³⁵Wìʼ ə tsen zizi ghə̀ bèm la, “Və lə lu lùsə viʼi fa pfʉ a le? Vəwenə lə lu ə̀ kiʼi nki ə wèn ə kò?”

³⁶Wù bèmə kənyʉ̀, a kə ko kiʼi ətof! Wù sətsen ə wè ashɨ kəfo, ghə̀ faŋ ke pfʉ, ko kə lu fʉ̀.

³⁷Ngwaʼ yì a wù wè ko diʼ əwen kəfo yi a ghə̀ ne ghə̀ kwi kuʼu. Zhʉ tsenghə a sədiʼ to əshɨ kəfo to nə̀ ashɨ ə ngwaʼ kò ashɨ ə ngwaʼ ə tsen.

³⁸A li Nyìngòŋ ku to əwèn yi a ghə̀ kòŋ no tèbè a nki ngwaʼ ə kò, a diʼ to əwèn yi a ghə̀ kwʉ̀ʼ a nki ngwaʼ na yi.

³⁹Tə wèn təfo no tsèm ko diʼ ndə̀ŋndəŋ. Viʼi ə kiʼi to nki wèn ə vəwenə, nyamsə kiʼi ghə̀ vəwenə. Mənyinə kiʼi ghə̀ vəwenə wèn, shʉsə kiʼ ghə̀ vəwenə ə wèn.

⁴⁰Əfo diʼ akàŋ, kiʼ əwenə nəkwoŋ, fo diʼ a nse, kiʼ əwen nə̀ nəkwoŋ. Əfo vyi a və diʼ akàŋ ə kiʼ to nki boŋ ə vəwenə, vyi a və diʼi a nse ə kiʼ to nki ə boŋ ə vəwenə. Əchʉ̀ əzhʉ ə kiʼ boŋ ə wen, sàŋ ə kiʼ ghə̀ wen, mədzɨ̀ŋ ə be kiʼ ə bòŋ ə vəwenə. Nò tèbe fədzɨ̀ŋ fə kò fə kiʼ to bòŋ ə nəkwoŋ.

⁴¹

⁴²A le ando kə lu ndiʼ azhʉ̀ a viʼi lu lù fa pfʉ. Əwen yi a və bvɨmə lu fùwè, ə yi a lù kò lə be ə fwè.

⁴³A vi azhʉ̀ a və bvɨmə əwèn, ko ghə̀ lu ə boŋ, ko ghə̀ be ə kʉʼʉ tèbè a kə fo. Və nà lùsə fa pfʉ, ghə̀ sə boŋ, be kiʼ kədyòʼ.

⁴⁴Və zhʉ sə mbvɨ̀mə̀, a sə diʼ kətsoʼ kəwen, və lu sə lùsə fa pfʉ, a ndiʼ əwen kəzhwì. To ando wen ə kətsoʼ diʼ, kə diʼi la əwen kəzhwì be diʼ.

⁴⁵Və nyòʼò li a Ŋwàʼlə̀ Nyìngòŋ la, “Adàm ə wù mbì ndiʼ wìʼ a Nyìngòŋ ə ne, ghə̀ sə tsi” ali Adàm ə bàm, a diʼ Yesò tə vi sə diʼ kəzhwì kì a kə ne la viʼi nkiʼ ntsìnə̀.

⁴⁶A ko vi əwen kəzhwì yi a Nyìngòŋ ə nku ambì, à vi əwen kətsoʼ, əwen kəzhwì ə dzɨ̀mtə̀.

⁴⁷Wù mbì ndiʼ mu və shɨtə nə̀ kətsoʼ kə, wù bàm ə sə diʼ mu ghə̀ lu fa kaŋ.

⁴⁸Viʼi vyi a və diʼi a nse diʼ to nə̀ viʼi vyi a və shɨtə nə̀ Kətsoʼ kə, viʼi vyi a və diʼ akàŋ diʼ lù ndiʼ to nə̀ wìʼ yi a ghə̀ ə lu fa kaŋ.

⁴⁹Vəghəŋ ə fɨsə wìʼ yi a və nshɨtə nə̀ kətsoʼ kə luwen, a diʼ to li a vəghəŋ be lù fɨsə wìʼ yi a ghə̀ nlu fa akàŋ.

⁵⁰Kənyʉ̀ ki a ma gàʼà a vəlemə vwomə diʼ la, wìʼ ko lu yenə əfòynə Nyìngòŋ nə̀ kətsoʼ kə wèn kenkə, kəfo kì a kə fwè zizi ko kə lu kiʼi kəfo ki a kə ko lu fwè.

⁵¹Ghə̀ŋ zhʉtə, mà shə̀ʼtə̀ kənyʉ̀, kəlyomtəkə wìʼ ə temə kɨ. Vəghəŋ ko lu pfʉ me tebè və tsèm, ali diʼ lù bvɨtə ə kwitə to vətsèm to zhʉ̀ ə mùʼ.

⁵²Və lu toŋ əsoŋ ə mwetəghə, ə kənyʉ̀ na kènkə bvɨtə fʉ̀. Və lu toŋ əsoŋ na yi, ə viʼi və pfʉkəvə lù fa pfʉ to ghayn ə mùʼ. Ghə̀ŋ diʼ alə̀, diʼ lù kwitə, ə nkiʼ əwen ə fighə.

⁵³Kə diʼ alə̀ byìʼì ando əwèn vəghəŋ ghenə a lu pfʉ lə, be fùwè ndiʼ ə kaʼkə a wen, a ghə̀ ko lu be lu fwè ko ghə̀ be lu pfʉ.

⁵⁴A lu ndiʼ ando əwen ə vəghəŋ kwitə ə ko ghə̀ be ndiʼ ə fwè, ə kənyʉ̀ ki a və nyoʼo a Ŋwàʼlə̀ Nyìngòŋ kwʉ̀ʼ. Və nyòʼo la, “Və tem li zhɨ̀ pfʉ.”

⁵⁵“Əpfʉ kədyòʼ ə kyəkə kì ye? Ə ncho ə wù ə ye?”

⁵⁶Əncho pfʉ ə nə̀ fʉ̀ fa mbyɨ, kədyòʼ kə mbyɨ kə lu fa Əsoʼ.

⁵⁷Alì kəzòŋ kə dyʉ̀ a Nyìngòŋ yi a ghə̀ ne la vəghəŋ tem ə zhɨ̀ pfʉ chò fa a Bobo vəghəŋ Yesò Klistò.

⁵⁸Ma sə gàʼà a ghə̀ŋ a vəlemə vwomə və juŋəvə la, ghə̀ŋ shɨtə ghaʼ əbyɨmə ə ghəŋə, kə ghə̀ a nə̀ʼkə̀. Ghə̀ŋ ə nghablə, shyèʼ a Bobo to məzhʉ̀ ə tsèm byìʼì ando ghə̀ŋ kɨli la shwèʼè ghəŋə a wen zizi ko ghə̀ lu ə lè to kədyàŋ.