Read Babanki 1 Kolìntyàns 16 Bible Online

1 Kolìntyàns 16 - Babanki bible

1 Kolìntyàns 16

¹Ma gàʼà kənyʉ̀ kumə əfo vi a zizi və zhùŋtə̀ ə ku ə gyàmtə̀ tsu a viʼi Nyìngòŋ. Ma tə gàʼ la ntsèntə̀sə viʼi və byɨməvə shisə a sə diʼi a Gàlesìyà ə nè kənyʉ̀, ghə̀ŋ diʼ be ə ne to ali.

²A mbì kətsi a tyi no ngàm kò, no ndo ə ntsuʼ kəfo fa ntìntìn əfo vi a ghə̀ kiʼi ə ghʉ̀, ndiʼ mà lù vì, ko və be diʼ ə mòʼo kəfo moʼo.

³A lu ndiʼ ando mà vì, ə mà tɨm viʼi vyi a ghə̀ŋ tsùʼtə nə̀ ŋwàʼlə̀, vəwenə lyɨ̀ dyʉ̀ nə̀ kəku na kènkə a Jelusalèm.

⁴Kə sətsen ə ndiʼ a akayn la mà dyʉ̀ tsu, yo vəwenə a dyʉ̀ amuʼ.

⁵Mà lu chò ji fa Màsìdonìyà mibu vi ə ghàyntə ghə̀ŋ.

⁶Ma ne vi ə tsitə vəghəŋ zhʉ tseghə ə zàʼa ando lɨm na bayn, mà ne sə nlù ə dyʉ̀ no tèbe fè, ə ghə̀ŋ gyamtə ku fo vyi a mà lù nə̀ wenəvə.

⁷Ma ko kòŋ ə vì ə yen ghə̀ŋ to sə ma chò cho. Ma kɨli la Bobo sətsen tomsə vəghəŋ a tsitə.

⁸Ma kwòʼtə ali, diʼ ə tsi a Efesùs ashen ə zàʼa fa kətsi a Bentikòs,

⁹byìʼì ando ji kəʼli a mò la mà shɨtə ne shyèʼ ashen, no tèbe ando viʼi ə soynə mò, to kədə̀ŋ.

¹⁰Timotì vi no zhʉ̀ko, kə ghə̀ŋ a ne la ghə̀ nki əfwàyn a ghə̀ŋ a ntìntìn byìʼì ando ghə̀ ne shyèʼ Bobo ndə̀ŋndəŋ to nə̀ mò.

¹¹Kə wìʼ fa ghə̀ŋ a chasə ə wen. Ghə̀ŋ gyàmtə̀ wen, ghə̀ jeʼ to nə̀ mbwaʼmə ə bwenə vi byìʼì ando yo vəlemə vətsenvə ə kəʼtə wen.

¹²A lèmə̀ vəghəŋ Abolòs, ma sensə li wen no nànto to aghayn aghayn la, wenə vəlemə vətsenvə vi ghàyntə ghə̀ŋ ali ko ghə̀ lu kòŋ ə vì luwen. Əzhʉ na kwʉ̀ʼ ghə̀ vi.

¹³Ghə̀ŋ tsɨŋ təwen ətəŋtə əto a ghə̀ŋ a byɨmə. Ghə̀ŋ nkiʼ ətyɨm ə to ghə̀ kə ghə̀ŋ a fwaynə tebè kəfo.

¹⁴Ghə̀ŋ ə ne no tèbe gho, ghə̀ŋ ə ne koŋə.

¹⁵Ghə̀ŋ kɨli Sɨ̀tèfanàs a vəlemə vwomə, wenə viʼi ngwaʼ ə wen diʼi mbìsə viʼi əbyɨmə Akayà. Vəwenə ku li təwen tə vəwenə sə gyamtə viʼi Nyìngòŋ. Ma sə sensə ghə̀ŋ la,

¹⁶ghə̀ŋ ə nzhʉ fa viʼi alə to nə̀ vəwenə no tèbe nə̀ ndò ə tsen yi a ghə̀ shwèʼè wenə vəwenə.

¹⁷Ma saŋlə kumə ando Sɨ̀tèfanàs nə̀ Fòtùnatùs nə̀ Akaykùs tə vì a mò, byìʼì ando vəwenə tə ə vi ə lyɨ̀ kəshi ə kəŋkə̀.

¹⁸Vəwenə zhʉsə li ətyɨm ə ghomə ndə̀ŋndəŋ ando vəwenə tə ə̀ zhʉsə təŋtə. Ghə̀ŋ ə ngumlə̀ viʼi to nə̀ nki viʼi a venə.

¹⁹Ntsèntə̀ sə viʼi Nyìngòŋ shisə a sə diʼi ashen a Esìyà gàʼ la mà toŋtə ghə̀ŋ. Akwilà wenə Bìsilà nə̀ ntsèntə̀ viʼi və byɨməvə vi a ghə̀ŋ ghaʼa a vəwenə a ngə̀ŋ gàʼ la mà toŋtə ghə̀ŋ no akayn a əzhiʼ ə Bobo.

²⁰Nò vəlemə vəghəŋ no və tsèm ə tɨmə ətoŋtə a ghə̀ŋ. Ghə̀ŋ toŋtə təwen ə təŋtə no a ji ə diʼ əkòŋ ə viʼi və byɨməvə.

²¹A nyoʼo to no mò Bol nyoʼtə ətoŋtə akəshi ghèn luwen a ghə̀ŋ nə̀ kəvu ə kòmkə.

²²Wìʼ sətsèn diʼ ke kòŋ Bobo, Ndòyn a wen a kətʉ. Bobo vi a yès!

²³Bobo Yesò ə ndiʼi ətyɨm ə jùŋə ə wen a ghə̀ŋ.

²⁴Ma kòŋ ghə̀ŋ no vətsèm byìʼì ando vəghəŋ ə tsèntə diʼ vəghəŋ və Yesò to kənyʉ̀ kəmùʼ. Amèyn.