Read Babanki 1 Kolìntyàns 2 Bible Online

1 Kolìntyàns 2 - Babanki bible

1 Kolìntyàns 2

¹A ndiʼ to ando mà nvi ə yen ghə̀ŋ a vəlemə vwomə ə shə̀ʼtə̀ kənyʉ̀ kì a kə diʼ nəmwèʼè kumə Nyìngòŋ, ma nko ngàʼà ə gàʼà ə jùŋə ghə̀, ko andiʼ la ma ngàʼà tebè to nə̀ wù ə ŋwàʼlə̀.

²Ma ndiʼ mu ma nghʉ̀ li la mà ko ba ə kwoʼtə kənyʉ̀ kətsen kə ando ma diʼ a ghə̀ŋ a ntìntìn, a bwen to ə ngàʼà kumə Yesò Klistò, nə̀ əpfʉ̀ ə wenə a kəntò.

³Ma ndiʼ a ghə̀ŋ a ntìntìn, əwen ghomə bwaʼa, ma tsɨŋtə̀ fwàynə̀ no nànto.

⁴Ma ko nziʼi be shə̀ʼtə̀ ntɨm ə jùŋ nə̀ ətof ə mu ghə̀ lù fa wìʼ, a diʼ ətof ə ten wìʼ tenə la ghə̀ byɨmə kənyʉ̀, ali ma nshə̀ʼtə̀, kə diʼi mwetə kədyòʼ kə kəzhwì kə Kəŋwoʼkə.

⁵Ma gàʼa alə̀ ə nè la kə ghə̀ŋ ne ghʉ byɨmə ghəŋə a ətof ə viʼi, la ghə̀ŋ ghʉ to kədyòʼ Nyìngòŋ.

⁶Nò tèbe ando ma gàʼà nyʉ̀ a venə no tsèm lə̀, yès ə ziʼi nyʉ̀ nə̀ ətof a nə̀ viʼi vyi a və kwi li a vəwenə a byɨmə. Ətof a yi ə ko diʼ ətof ə mbi ghenə kò ətof ə viʼi vyi a və soʼo mbyi ghèn, a diʼ viʼi le dyʉ̀ nə̀ kədyòʼ kə vəwenə.

⁷Ətof yì a yès gàʼà kumə lì diʼ ətof ə lyomtə ghə̀ Nyìngòŋ, mu və lyomtə li fa viʼi. Nyìngòŋ ə nghʉ̀ li mibu ghə̀ shətə mbyi ghèn la, ətof na yi ə lu nè vəghəŋ ə laynə to nə̀ Yesò.

⁸Nò wù ə soʼo ə mùʼ a mbyi a shèn ə nko kɨ ətof na ghenə. A tu ndiʼ la vəwenə nkɨ li, mu vəwenə nko ə bayntə Bobo yi a ghə̀ kiʼi kùʼsə.

⁹Yès ə ziʼi to kənyʉ̀ a və nyòʼò a Ŋwàʼlə̀ Nyìngòŋ la: “Wìʼ ko təmə yen, ko ndiʼ la wìʼ təmə zhʉ, wìʼ ko təmə kwòʼtə kənyʉ̀ ki tèbe kwoʼtə a Nyìngòŋ ə bàtə li a viʼi vyi a və kòŋ wen.”

¹⁰Alì mu Nyìngòŋ ə ne li kəzhwì kə wen kə diʼi làynsə nyʉ̀ ə lyomtəvə ə wen a vəghəŋ. Kəzhwì kə Nyìngòŋ kə nə̀ yenə to nyʉ̀ ə tsèm, yenə no tèbe ghò, no tèbe kì kə a Nyìngòŋ ə lyomtə lyomtə.

¹¹A diʼ to kəzhwì kəŋwoʼkə kì a kə diʼ a wìʼ a wèn a kə kɨ mwetə wìʼ ayi. Kə le diʼ to ndə̀ŋndəŋ ando wìʼ zizi ko ghə̀ lu kɨ kənyʉ̀ kì a kə diʼ a kwòʼtə Nyìngòŋ, a bwen to Kəzhwì kə Nyìngòŋ.

¹²Vəghəŋ ko shi kəzhwì mu kə lù fa mbyi, vəghəŋ boŋsə shi kəzhwì kì a kə lù fa Nyìngòŋ ndiʼ vəghəŋ ə̀ kɨ əfo vyi a ghə̀ kù li a vəghəŋ.

¹³Kə le diʼ la yès ə ko ziʼi, tebè nyʉ̀ nə̀ ətof ə mu ghə̀ lù fa viʼi. Yès ə ziʼi nyʉ̀ a diʼi Kəzhwì kə Nyìngòŋ ando yès ə ziʼi laynsə nyʉ̀ kəzhwì a viʼi vyi a vəwenə kiʼi kəzhwì na kènkə.

¹⁴Wìʼ yi a ghə̀ ko kiʼ kəzhwì kə Ŋwoʼkə ə tyenə əfo vyi a kəzhwì kə Nyìngòŋ əku, byìʼì ando à diʼ əfo kəkoyn a wen. Ghə̀ zizi ko ghə̀ lu ə kɨ əfo a venə byìʼì ando à zizi a ne to Kəzhwì kə Ŋwoʼkə la ghə̀ ə kɨ.

¹⁵Wìʼ yi a ghə̀ kiʼi kəzhwì kə Ŋwoʼkə ə yenə kɨ no nyʉ̀ ə tsèm, ali ko wìʼ ə tsen zizi ghə̀ yen əkɨ kənyʉ̀ kumə wen.

¹⁶Kə diʼ mu və nyòʼò li a Ŋwàʼlə̀ Nyìngòŋ la: “Wìʼ ko nə̀ kɨ kənyʉ̀ kì a Bobo nə̀ kwoʼtə ə tyɨftə wen.” Alì vəghəŋ ə kɨ əkwoʼtə ə Klistò.