Read Babanki 1 Kolìntyàns 3 Bible Online

1 Kolìntyàns 3 - Babanki bible

1 Kolìntyàns 3

¹Ma ə zizi ko ma lù gàʼà a ghə̀ŋ a vəlemə vwomə a byɨmə ando ma gàʼa a viʼi vyi a və kiʼi kəzhwì kə Ŋwoʼkə. Ma ngàʼà a ghə̀ŋ to sə mà gàʼà a viʼi mbyi, a nə̀ voyndyə a əbyɨmə a Yesò.

²Kənyʉ̀ kì a ma ə̀ ziʼi a ghə̀ŋ ə ndiʼ to nə̀ zhwin a və kù a voyndyə və bwaʼvə, a ko diʼ əfo ə zhɨvə ə to və byìʼì ando ghə̀ŋ nko təmə bo ə kwi ə kwʉʼ. Nò tèbe luwen, ghə̀ŋ ko təmə kwi ə kwʉʼ.

³Ghə̀ŋ bo tsi to nə̀ viʼi mbyi. Ghə̀ŋ kɨli la kənghə̀ʼ kə ə diʼ ghə̀ŋ a ntìntìn, ghə̀ŋ nè nyʉ̀ to nə̀ viʼi mbyi be tsi to nə̀ vəwenə.

⁴A vì azhʉ̀ tseghə wìʼ ə mùʼ ə gàʼa la, “Ma dzɨ̀mtə̀ ziʼi Bol,” ghətsen gàʼa la, “Ma dzɨ̀mtə̀ ghə̀ Abolòs,” kə sə diʼi la ghə̀ŋ bo kumə diʼ to nə̀ viʼi mbyi.

⁵Nò tèbe ali, Abolòs diʼ ndò, Bol diʼ ndò? A vəwenə ə diʼ to viʼi ə shyèʼ a Nyìngòŋ ə ku a ghə̀ŋ la vəwenə shə̀ʼtə̀ ntɨm ə jùŋ ghə̀ŋ zhʉ, ə byɨmə. Nò tèbe ndò ə ne to shwèʼ yì a Bobo ku la ghə̀ ə nè.

⁶Mà tə wè ngwaʼ, Abolòs chì, ali à nè Nyìngòŋ la ghə̀ kwi.

⁷Kə lə diʼ la wìʼ yì a ghə̀ wè nə̀ wìʼ yi a ghə̀ chì ə ko kwʉ̀ʼ tebe a kəfo kətsen, à kwʉ̀ʼ to Nyìngòŋ a ghə̀ nè ghə̀ŋ kwi.

⁸Wìʼ yi a ghə̀ we nə̀ wìʼ yi a ghə̀ chi diʼ to ndə̀ŋndəŋ, no ando diʼ lù kiʼi əmòʼtə wen ando ghə̀ tə nshwèʼè.

⁹Yès no və tsèm ə tsèntə shyèʼ to a Nyìngòŋ. Ghə̀ŋ diʼ əsɨm Nyìngòŋ be diʼ ngə̀ŋ wen.

¹⁰Ma tə lyɨ̀ kəku kì a Nyìngòŋ ə tə kù a mò byìʼì kusə nshinsə wen ə we kəchɨ kə ngə̀ŋ a nə̀ wìʼ a ghə̀ shɨtə kɨ kəmbwom, wìʼ ə tsen ə sə ə bwòm ayi kwì. No ndò ə ntùʼmə̀ a ji yi a ghə̀ bwomə fa tsù.

¹¹Nyìngòŋ ə sə diʼ mù ghə̀ ghʉ̀ li Yesò Klistò la à diʼ kəchɨ kə ngə̀ŋ kì a kə diʼ, wìʼ ko diʼ a ghə̀ zizi ghə̀ be we kəchɨ kətsen.

¹²Viʼi na bwòm a kwi kəchɨ kə ngə̀ŋ na ghèn. Viʼi vətsenvə na bwòm nə̀ gol, vətsevə bwòm nə̀ silvà, vətsevə bwòm nə̀ ngùʼsə jùŋsə, vətsevə bwòm nə̀ nkoʼ, vətsevə bwòm nə̀ nyɨŋsə.

¹³A lu ndiʼ a kətsi yi a Yesò lu bwenə vì və diʼi laynsə no tèbe shyèʼ no ndò a ndayn. Və mwomsə no tèbe shyèʼ ndò nə̀ zhiʼ, ghə̀ diʼi no tèbe nki əshyèʼ ə kò yi a wìʼ tə nshyèʼ.

¹⁴Nyìngòŋ ə lu ku əmoʼtə no a ndò yi a ghə̀ mwomsə shyèʼ ə wen nə̀ zhiʼi, ko ghə̀ lu fwi.

¹⁵Və sətsen lu mwomsə shyèʼè wìʼ ghə̀ fwi, ghə̀ a lè əmòʼtə wen ali ə bwòŋ, ə bwòŋ to nə̀ wìʼ a ghə̀ nyɨŋə chò fa zhìʼ.

¹⁶A ghə̀ŋ kɨli la ghə̀ŋ diʼ ngə̀ŋ Nyìngòŋ, kəzhwì kə Nyìngòŋ kə tsi a ghə̀ŋ a ntìntìn?

¹⁷Wìʼ sətsen ə byɨbsə ngə̀ŋ Nyìngòŋ, Nyìngòŋ be a byɨbsə wen byìʼì ando ngə̀ŋ Nyìngòŋ kiʼi to Nyìngòŋ, no ndò a ghə̀ŋ a ntìntìn diʼ ngə̀ŋ Nyìngòŋ na yì.

¹⁸Kə wìʼ na lobtə wen ə wen. Wìʼ sətsen ə ndiʼ a ghə̀ŋ ntìntìn kwoʼtə la ghə̀ tofə a ji yi a viʼi mbyi ashə nə̀ lyɨ fa tsù, ghə̀ boŋsə kaʼkə a kəkoyn ndiʼ ə̀ kiʼi nkàyntə̀ ətof.

¹⁹Ghə̀ diʼ ne alə byìʼì ando ətof yì a viʼi mbyi venə kiʼi diʼ to nə̀ kəkoyn a Nyìngòŋ. Və nyòʼò li a Ŋwàʼlə̀ Nyìngòŋ la, “Nyìngòŋ ə lyɨ ə tof ə viʼi və tofəvə a nə̀ kətamkə bwensə ghaʼa vəwenə tsu.”

²⁰Və be ə nyoʼo a la, “Bobo ə kɨ təkwòʼtə̀ tə viʼi və tofəvə la tə ko shyèʼè tebè kənyʉ̀.”

²¹Alə, kə wìʼ nè nghaŋsə əwen gàʼà la ghə̀ diʼ wù wìʼ ə ghèn, byìʼì ando Nyìngòŋ ə ku li to əfo ə tsèm a ghə̀ŋ.

²²Kə le diʼ la, kò à diʼ Bol, kò à diʼ Abolòs kò à diʼ no tèbe Sefàs kò à diʼ mbyi ghèn, kò à diʼ ə ntsi, kò à diʼ əpfʉ̀, kò à diʼ əzhʉ̀ ghèn luwen, kò zhʉ̀ yi a ghə̀ lu vì, əfo a venə no ə tsèm tsèntə kiʼi to ghə̀ŋ.

²³Kə diʼ alə̀ a kiʼi Yesò kiʼ ghə̀ŋ, a kiʼ Nyìngòŋ kiʼ Yesò.