Read Babanki 1 Kolìntyàns 4 Bible Online

1 Kolìntyàns 4 - Babanki bible

1 Kolìntyàns 4

¹Viʼi ə diʼ ə̀ nlyɨ̀ mo Bol wenə Abolòs to nə̀ viʼi ə shyèʼ ə Yesò vyi a və ku li nyʉ̀ ə lyomtəvə vyi a və kùmə̀ Nyìngòŋ a vəwenə kəvu.

²Nò kənyʉ̀ kə tokə a viʼi ə venə diʼ la vəwenə diʼ ndiʼi, la vəwenə ə shyèʼ to no nəmwèʼè.

³A mò, à diʼ to no kənyʉ̀ kətyətəkə a zhʉ a soʼo ghə̀ŋ soʼo mò kò à soʼo viʼi vətsenvə. Nò tèbe nkàyntə̀ mò ə ko soʼo tebè wenə ghomə.

⁴Ma ko kwòʼtə̀ kɨ tebè kənyʉ̀ kə kəbyɨkə kətsenkə a mà ne, ali kə ko diʼ la ma ko byɨbsə kənyʉ̀. A diʼ to Bobo a ghə̀ soʼo mò.

⁵Ali, kə ghə̀ŋ tyinə nsòʼ ko ndiʼ la zhʉ̀ yi kʉʼʉ li. Ghə̀ŋ kəʼtə, Bobo vi. Ghə̀ a vi ə diʼ làynsə nyʉ̀ ə lyomtəvə vyi a və nyoʼtə ne a kəbəŋ kə fenəkə, ə shə̀ʼtə nyʉ̀ vyi a viʼi əkwoʼtə lyomtə a və wenə a tətyɨm. Nyìngòŋ ə mu bwomsə no ndò to ji a ghə̀ əshyèʼè.

⁶Ma gàʼa nyʉ̀ a venə a vəlemə vwomə kumə wenə ghomə yo Abolòs to nə̀ nchwi ndi ghə̀ŋ ziʼi, ə nè to kənyʉ̀ kì a və nyoʼ a Ŋwàʼlə̀ Nyìngòŋ. Kə wìʼ fa ghə̀ŋ ne nghaŋsə əwen kumə wìʼ ə tsen, cho ghətsen.

⁷A gàʼ ndò a wù la wù chò viʼi vətsenvə a? A diʼ no ghò a wù kiʼi ko andiʼ la və ku ku a wù a? Wù sətsen ə̀ kiʼ kəfo mu və kù ku, wù a ghaŋsə əwen sə və ko kù ku byìʼì gho?

⁸Ghə̀ŋ sə diʼ mù ghə̀ŋ kiʼi li no tèbe ghò a ghə̀ŋ kəŋə! Ghə̀ŋ sə diʼ mù ghə̀ŋ ghò li nkwʉʼ! Ghə̀ŋ ə laʼa la ghə̀ŋ diʼ təfòyn, yès ko diʼ təfòyn. Ndò ku la ghə̀ŋ diʼ to no təfòyn nəmwèʼè ndi vəghəŋ ə̀ soʼo amuʼ a?

⁹Kə kə̀ʼə̀ a mò la Nyìngòŋ ə ghʉ̀ li la yès ə viʼi ntɨm ko diʼ no kəfo, diʼ ə pfʉkə ashɨ viʼi. Kə kə̀ʼə̀ la yès ə diʼ viʼi a və soʼ li ə sə diʼ ə zhwi to ashɨ ə mbyi ə tsèm boʼsə nə̀ ətsɨŋsə Nyìngòŋ sə.

¹⁰Yès ə diʼ nkoyn a viʼi byìʼì Yesò, ghə̀ŋ diʼ viʼi və tofəvə a nyʉ̀ ə Yesò. Yès ə̀ bwaʼa ali ghə̀ŋ to. Viʼi ə kuʼsə ghə̀ŋ ali ko və lə lyɨ tebè yes a kənyʉ̀.

¹¹Ə zàʼa fa luwen, jɨŋ nə̀ zàfə ə yès, ətoŋ mu be zɨmtə yès. Yès ə mòʼo to məsòʼsòʼ mə ndisə, və ghòmə yès, yès ə dzɨŋə, ko yes kiʼi kəshi ə tsi.

¹²Yès ə shyèʼè li shyèʼè to ghə to no nə̀ avu a yèsə. A zhʉ a viʼi telə yès, yès sə boŋsə jɨ̀mə̀ la Nyìngòŋ ə mbwàʼsə vəwenə bwàʼsə, a zhʉ a və ku ngəʼ a yès, yès ə sə wensə to wensə.

¹³A zhʉ a viʼi ə byɨbsə zhiʼ yèsə, yès ə sə gàʼà to nə̀ gɨ̀ bwaʼmə. Viʼi ə lyɨ yès a fo ə maʼa və mbyi, be lyɨ yès a kəməŋ.

¹⁴Ma ko nyoʼo tebè nyʉ̀ venə alə̀ ndi diʼsə kətʉ kəŋkə̀, ma boŋsə nyòʼtə̀ ə ziʼi ghə̀ŋ to nə̀ vunə əkòŋ ə mò.

¹⁵Ghə̀ŋ nkiʼi tebe viʼi a və tuʼu, tyɨftə ghə̀ŋ kumə Yesò, və taŋtə lè ali ghə̀ŋ kiʼ to Tìʼ ə mùʼ. Mà sə diʼ mù ma vi li to nə̀ tìʼ a ghə̀ŋ a kənyʉ̀ ə Yesò Klistò chò fa ntɨm ə jùŋ ə wen yì a ma nziʼi ghə̀ŋ tsu.

¹⁶Ma sə sensə ghə̀ŋ la, ghə̀ŋ ə shəmə ntsìnə̀ ghom.

¹⁷A le kənyʉ̀ kì a mà tɨm Timotì a ghə̀ŋ. Ghə̀ diʼ wàyn ə koŋə ə mò, ma choʼsə wen byìʼì ando ghə̀ dzɨ̀mtə̀ Bobo no akayn. Ghə̀ a ne la ghə̀ŋ kwoʼtə ntsìnə̀ yì a ma tsi to nə̀ wù ə Yesò. Ma ziʼi ntsìnə̀ a ghèn a ntsèntə̀sə viʼi və byɨməvə to ashi ə tsèm.

¹⁸Viʼi vətsenvə a ghə̀ŋ a ntìntìn sə ghaŋsə təwen, kwòʼtə̀ la ma ko be a vì ə yen ghə̀ŋ.

¹⁹Alì mu Bobo sətsen ə tomsə kəvu, ma laʼtə to alə ə vì yèn ghə̀ŋ. Ma ko vi zhʉ to kənyʉ̀ kì a vəwenə ghaŋsə əwen gàʼà, ali be yen to no kədyòʼ kì a vəwenə ə gàʼa la vəwenə kiʼ.

²⁰Byìʼì kəshi kəfòyn ə Nyìngòŋ kə diʼ alə̀, a ko diʼ əchʉ̀ ə nkùmə̀, və yenə kədyòʼ a kì a nyʉ̀ yì a viʼi ə nè.

²¹Ghə̀ŋ kòŋ la mà sə vi a ghə̀ŋ, vi nə̀ ghò? Ghə̀ŋ kòŋ la mà vi nə̀ ngwàyn mu, mà vi nə̀ ə kòŋə bè nə̀ mbwaʼmə lo?