Read Babanki 1 Kolìntyàns 5 Bible Online

1 Kolìntyàns 5 - Babanki bible

1 Kolìntyàns 5

¹Ma zhʉ li to ando və gàʼà, kə diʼ to no nəmwèʼè la ghə̀ŋ vətsenvə ə tsi ətsìnə̀sə kəfwaʼlə. Ji yi a ghə̀ŋ tsi fa tsù ə fwàʼlə̀ chò ando viʼi vyi a və ko kɨ Nyìngòŋ ə tsi. Ma zhʉ li la wìʼ diʼ a ghə̀ŋ a ntìntìn, tsi nə̀ wi tìʼ wen.

²Ghə̀ŋ ə ghaŋsə wen byìʼì nki kənyʉ̀ alə byìʼì ghò? A ghə̀ŋ yi boŋsə diʼ ə weynə ə be ə dzɨ̀m ə shisə wìʼ a ghə̀ mwomə nki kənyʉ̀ a ghenə fa ghə̀ŋ ntìntìn

³No tèbè ando ma ko diʼ a ghə̀ŋ a ntìntìn, vəghəŋ diʼ to amuʼ a kəzhwì a əzhiʼ nə̀ Bobo vəghəŋ Yesò. Mà sə diʼ mù ma tyin li nsòʼ kumə wìʼ a ghèn a ghə̀ mwomə nki kənyʉ̀ a ghèn nə̀, to ndə̀ŋndəŋ ando vəghəŋ ə yi tu ndiʼ tèbe amuʼ, mu mà tyin.

⁴Ghə̀ŋ zhùŋtə̀ no zhʉ̀ko, kəzhwì ə kòmkə sə diʼ a ghə̀ŋ a ntìntìn. Ghə̀ŋ be zhùŋtə̀, ghə̀ŋ lyɨ̀ kədyòʼ kì a Bobo Yesò ə ku li a vəghəŋ,

⁵ghə̀ŋ diʼ ku wìʼ na ghèn a Satan, ghə̀ byɨbsə kətsoʼ kə əwèn ə wen, ndiʼ və lù bwoŋsə kəzhwì kə wen a kətsi yi a Bobo Yesò lu bwenə vì.

⁶Əghaŋsə əwen ghə̀ŋ ə ko bòŋ. A ghə̀ŋ kɨli la fɨ̀shɨ̀ŋfə ə nə̀ tyɨftə tèbè a le, fə nè kəbayn kə məka kə kuʼ.

⁷Kə le diʼi la ghə̀ŋ diʼ ə maʼa mbyɨ fa ghə̀ŋ a ntìntìn ə bwenə ə ndiʼ ando əghɨf kəbayn ə fìghə kènə fɨ̀shɨ̀ŋfə tsu, a bwen ali a mbyɨ a kwi dyʉ̀ a ghə̀ŋ a ntìntìn to nə̀ fɨ̀shɨ̀ŋfə. Ma kɨli la ghə̀ŋ sə diʼ to nə̀ əghɨf kəbayn kye nə̀ fɨ̀shɨ̀ŋfə byìʼì ando Yesò yi à diʼi wàyn njɨ̀ kə zhɨ kə məzaʼsə ə vəghəŋ sə diʼ mù və shyə li wen a kəku.

⁸Vəghəŋ sə nzhɨ̀ li kəzhɨ kəməzaʼsə na kènkə, kə Vəghəŋ a zhɨ̀, nə̀ ətyɨm ə byɨghə kò nə̀ mbyɨ. Mbyɨ ə diʼ to nə̀ kəbayn nə̀ fəshɨŋfə, vəghəŋ boŋsə zhɨ̀ nə̀ kəbayn kì a ko kiʼ fəshɨ̀ŋ à diʼ ətyɨm ə ŋwoʼghə nə̀ kənyʉ̀ kì a kə diʼ nəmwèʼè.

⁹Ma tə nyòʼò a ghə̀ŋ la kə ghə̀ŋ ne tsèntə vye viʼi vyi a və tsi ətsìnə̀sə kəfwaʼlə.

¹⁰Ma ko tə ngàʼ alə̀ boʼsə viʼi vyi a və ko byɨmə Nyìngòŋ a və tsi ntsìnə̀sə kəfwaʼlə be bàŋbàŋ, ko viʼi kənlem, ko və tsòŋ, ko nə̀ viʼi vyi a və kùʼsə nshəʼsə, byìʼì ando wìʼ mu ndiʼ ə nyɨŋ viʼi a venə, ghə a làynsə fʉ̀ fa mbyi a shèn.

¹¹Ma tə boŋsə nyòʼ ə gàʼ la, kə ghə̀ŋ ə̀ ntsèntə̀ vye wìʼ a ghə̀ gàʼa la yi diʼ wu byɨmə ali tsi ntsìnə̀ kəfwaʼlə a nə̀ ə dzɨ̀mtə̀ ki kò lʉ̀mə, bàŋbàŋ, ghə̀ be kuʼsə nshəʼsə. Ma gàʼa la kə ghə̀ŋ ne ntsèntə̀ vye viʼi vyi a və ghamə, be nyʉ chòsə̀ məlyʉ̀ʼ bomə, ko və tsoŋ. Kə ghə̀ŋ a mwomsə tebè mwomsə zhɨ̀ vye nki viʼi a venə.

¹²Nò tèbe fa mpfen, mò to nə̀ wu byɨmə ə̀ ko diʼ ə soʼo viʼi a vəwenə ko diʼ a vəghəŋ a nòyn. Ghə̀ŋ diʼ ə nsoʼo to viʼi vyi a və diʼi a vəghəŋ a nòyn.

¹³A lu soʼo to Nyìngòŋ soʼo viʼi vyi a və ko diʼ a vəghəŋ a nòyn. Və nyoʼo li a Ŋwàʼlə̀ Nyìngòŋ la, “Ghə̀ŋ dzɨ̀m shisə wu byɨ yì fa ghə̀ŋ a ntìntìn.”