Read Babanki 1 Kolìntyàns 6 Bible Online

1 Kolìntyàns 6 - Babanki bible

1 Kolìntyàns 6

¹Wìʼ fa ghə̀ŋ ə lyɨ nsoʼo wenə lèmə̀ wen ə wu əbyɨmə, ko ghə̀ nlyɨ̀ dyʉ̀ nə̀ wen a viʼi Nyìngòŋ, ghə̀ boŋsə dyʉ̀ nə̀ wen a viʼi, a və ko diʼ viʼi kənyʉ̀ kətɨməkə la vəwenə soʼo byìʼì ghò?

²Kə lə diʼ la ghə̀ŋ ko kɨ la à lu soʼo viʼi Nyìngòŋ soʼo mbyi mu? A sətsen a ndiʼ lù soʼo ghə̀ŋ soʼo mbyi, ghə̀ŋ ne ale ə nsoʼo mənsoʼtə mə bwaʼmə̀ a?

³Kə lə diʼ la ghə̀ŋ ko kɨ la à lu soʼo vəghəŋ soʼ ətsɨŋsə Nyìngòŋ mu? Vəghəŋ sətsen ə ndiʼ lù soʼo ə ətsɨŋsə, vəghəŋ ne a ale ə nsoʼ nyʉ̀ ə mbyi a?

⁴Kə lə diʼ ale, ghə̀ŋ bè lyɨ dyʉ̀ la viʼi ə soʼo, a və ko kʉʼʉ no to kənyʉ̀ kətsen a ngə̀ŋ Nyìngòŋ byìʼì ghò?

⁵Kətʉ kəŋ kə ko dìʼì? Kə lə diʼ la no wu tofə ko diʼ a ghə̀ŋ a ntìntìn a ghə̀ zì ghə̀ tyinə nsòʼ sə a ntìntìn vəlemə mu?

⁶Luwen sə diʼ wìʼ boŋsə lyɨ dyʉ̀ nə̀ lèmə̀ wen ə tsen akəshi kə nsòʼ la viʼi soʼo, a ko diʼ viʼi və byɨməvə.

⁷Nsoʼ a sensə a ghə̀ŋ kiʼi a ghə̀ŋ a ntìntìn lə ə diʼi to no la ghə̀ŋ fəŋ li. Kə bòŋ la viʼi ə̀ boŋsə ne mbyɨ a ghə̀ŋ. Kə bòŋ la à boŋsə lu viʼi vi lobtə ghə̀ŋ, shi əfo ə vəŋə.

⁸Alì no ghə̀ŋ fa ghə̀ŋ a ngeŋ ə ne mbyɨ a vəlemə vəŋə be lobtə vəwenə, shitə əfo ə vəwenə.

⁹Kə le diʼ la ghə̀ŋ ko kɨ la viʼi vyi a və ko diʼ viʼi kənyʉ̀ kətɨməkə ko lu zhɨ̀ tebè kəshi kəfoyn ə Nyìngòŋ mu? Kə wìʼ na ə lobtə wèn ə wen. Viʼi vyi a və tsi nə̀ ki kò wenə lʉ̀mə, a ko kiʼi vəwenə, nə̀ viʼi a və kùʼsə nshəʼsə kò viʼi a və kwaʼ əsoʼ ə làm nə̀ lʉ̀mə vyi a və bwensə tsì nə̀ vətsevə,

¹⁰nə̀ və tsòŋ nə̀ viʼi kəmbàŋbàŋ, nə̀ viʼi a və nyʉ məlyʉ̀ʼ bomə nə̀ viʼi vyi a və byɨbsə əzhiʼ ə viʼi, nə̀ viʼi a və tsoŋ ə tsoŋ toghə ko lu zhɨ̀ kəshi kə əfòynə ə Nyìngòŋ.

¹¹Viʼi vətsenvə fa ghə̀ŋ a ntìntìn ndiʼ to lə, ali luwen sə diʼ mù və shʉ li mbyɨ shəŋsə ə ne ghə̀ŋ sə laynə, ə be nè ghə̀ŋ sə diʼ viʼi kənyʉ̀ kətɨməkə a shɨ ə Nyìngòŋ. Ənyʉ̀ a venə ə̀ diʼ mu və fʉ̀ byìʼì kədyòʼ kə Bobo Yesò Klistò mu à nè Kəzhwì kə Nyìngòŋ a vəghəŋ.

¹²Wu ə tsen zizi ghə̀ gàʼ la, “Mà zizi a mà ne no tèbe ghò.” Kə diʼ to no nəmwèʼè ali a ko a diʼ ənyʉ̀ ə tsèm a və zizi və gyamtə wìʼ. A diʼ a mò, mu mà zizi a mà ne no tèbe ghò, ali ko ndiʼ la ma diʼ ndiʼ kəkòs no a kənyʉ̀ kətsen.

¹³Wìʼ zizi ghə̀ gàʼà la, “Ghə̀ŋ zhɨ no tèbe ghò, kə kwenə to bèm, əbèm diʼ to kəshi kə fozhɨvə.” Kə diʼ to no nəmwèʼè, ali Nyìngòŋ ə diʼ lù byɨbsə ə bèm na yi boʼsə nə̀ ə fozhɨvə. Əwèn wìʼ ko diʼ la və ə̀ ne nyʉ̀ ə kəfwaʼlə tsu, və boŋsə diʼ ə nè shyèʼ a Bobo, a diʼ Bobo a ghə tuʼmə nə̀ əwèn a yi.

¹⁴Nyìngòŋ ə nlùsə li Bobo fa pfʉ̀, diʼ lù be lùsə nkàyntə̀ vəghəŋ chò fa wen a kədyòʼ.

¹⁵Kə lə̀ diʼ la ghə̀ŋ ko kɨ la əwèn ə ghəŋə ə diʼ ə sho əwèn ə Yesò mu? A wu gàʼ la mà zizi mà lyɨ̀ ə sho əwèn ə̀ Yesò ə ne la à ndiʼ sho əwèn ə njèʼtə̀ a? Kə zizi ko kə lu ndiʼ ali!

¹⁶A sətsen wìʼ tsen kəshi wenə njèʼtə̀, mu wenə wen diʼ ndiʼ to a kəfo kə mùʼ! Kə diʼ to ndə̀ŋndəŋ ando və nyoʼo a Ŋwàʼlə̀ Nyìngòŋ la, “Vəwenə və bò a ndiʼ to kəfo kə mùʼ.”

¹⁷A diʼ a wìʼ yi a ghə̀ tsèntə wenə Bobo, ghə̀ diʼ ə kiʼ to ətyɨm ə mùʼ wenə wen.

¹⁸Ghə̀ŋ nyɨŋsə wenə ghə̀ŋ fa bàm nyʉ̀ ə kəfwaʼlə. Wìʼ ne no tèbe kənyʉ̀ kə kəbyɨkə kə kò, ko ghə̀ a byɨbsə əwèn əwen, ali mu ghə̀ sətsen nè kənyʉ̀ kə fwaʼlə kə wenə wùwì kò wenə wulɨm, ghə̀ a byɨbsə əwèn ə wen.

¹⁹Kə lə diʼ la ghə̀ŋ ko kɨ la ghə̀ŋ ə diʼ ngə̀ŋ Nyìngòŋ ə ku la Kəzhwì kə Ŋwoʼkə ntsi a ghə̀ŋ a ntìntìn mu. Ghə̀ŋ ko bè diʼ fa ghə̀ŋ a ngeŋ. A kiʼi Nyìngòŋ kiʼ ghə̀ŋ.

²⁰Nyìngòŋ sə diʼ mù ghə̀ zen li ghə̀ŋ ə lòʼ. Ghə̀ŋ lyɨ̀ li təwen ə təŋtə ə nè nyʉ̀ tsu a və ku əkuʼsə a Nyìngòŋ.