Read Babanki 1 Kolìntyàns 8 Bible Online

1 Kolìntyàns 8 - Babanki bible

1 Kolìntyàns 8

¹Ma kəŋ ə gàʼa kənyʉ̀ luwen kumə əfo ə zhɨvə vyi a və moʼo a nshəʼsə. Vəghəŋ ə kɨ la vəghəŋ vətsèm ə kiʼ ətof. Ətof ə vì to nə̀ əghaŋsə ə wenə ali əkòŋ ə bwòm viʼi bwòmə.

²Wìʼ yi a ghə̀ kwòʼtə̀ la ghə̀ kɨli kənyʉ̀ diʼ ali ko ghə̀ ə kɨ ə zàʼa ando ghə̀ ndiʼ ə kɨ.

³Alì mu wìʼ sətsen ə̀ kòŋ Nyìngòŋ, Nyìngòŋ a nkɨ wen.

⁴Ə gàʼ kənyʉ̀ kumə əfo ə zhɨvə vyi a və moʼo Vənyìngòŋ tsu, vəghəŋ ə kɨ la nshəʼsə ə ko diʼ tebè kəfo. Vəghəŋ ə kɨ la Nyìngòŋ yi a ghə̀ tsi diʼ to əmùʼ.

⁵Nò tèbe ando viʼi vətsenvə ə̀ kwòʼtə̀ la Vənyìngòŋ və tsenəvə diʼ, vətsenvə diʼ a nse, vətsevə be diʼ a akàŋ, to kədə̀ŋ,

⁶à diʼ a vəghəŋ, vəghəŋ kɨ la, Nyìngòŋ ə diʼ to əmùʼ, a diʼ Tìʼ. A shɨtə wen ə shɨtə no fo ə tsèm ə ne la vəghəŋ ə ntsi, gumlə wen. A be diʼ to Bobo ə mùʼ, a yi Yesò Klistò, mu və ə nshɨtə fo ə tsèm chò fa wen, vəghəŋ sə tsi to byìʼì wen.

⁷Nò tèbè ali, à ko diʼ viʼi və tsèm a və kɨ kənyʉ̀ a kènkə. Viʼi vətsenvə sə diʼ mù kənyʉ̀ kə vənyìngòŋ na kènkə kɨŋtə li vəwenə, vəwenə sə ə zhɨ̀ əfo ə zhɨvə a və mòʼo Vənyìngòŋ tsu no zhʉ̀ko, vəwenə faŋ ə sə kwòʼtə̀ kənyʉ̀ a kì to kwòʼtə. A lə kənyʉ̀ kì a kə byɨbsə tə kwòʼtə̀ tə vəwenə byìʼì ando ghə̀ bwaʼa.

⁸Əfo ə zhɨvə zizi ko və lu ne la vəghəŋ və Nyìngòŋ ə diʼ a akayn. Vəghəŋ ə tyen kə zhɨ ko vəghəŋ lu le tebè kəfo, ə zhɨ tebe zhɨ ko və lu se tebè kəfo.

⁹Ghə̀ŋ tuʼmə, kə ji yi a ghə̀ŋ nè nyʉ̀ fa ghə̀ŋ ngeŋ fa tsu a nè viʼi vyi a əbyɨmə ə vəwenə ə bwaʼa fəŋ a mbyɨ.

¹⁰Wu kɨ la wìʼ sətsen ə yen wù nə̀ ətof yì a wù kiʼi, wu ŋwʉ̀ʼ a ngə̀ŋ kəshəʼsəkə akəshi kə kəzhɨ, a kə a tenə wen azhʉ̀ a ghə̀ kiʼi kwòʼtə̀ ə bwaʼ ghə, la ghə̀ zhɨ̀ əfo ə zhɨvə mu və mòʼo li a Vənyìngòŋ.

¹¹Kə sətsen fʉ̀ alə, a ndiʼ la ətof ə wu byɨbsə li lèmə̀ wù yi a kwòʼtə̀ ə wenə ə bwaʼa, mu Yesò ə mpfʉ li byìʼì wen.

¹²Ghə̀ŋ əkɨ la ghə̀ŋ ne ali, a nè ndiʼ mù ghə̀ŋ nè li mbyɨ a vəlemə vəŋə ando ghə̀ŋ byɨbsə li əkwòʼtə̀ bwaʼa ghə̀ ə vəwenə, a diʼ mbyɨ a ghə̀ŋ ne a Yesò.

¹³Kə le diʼi la nyàm sətsèn ə ndiʼ mu ghə̀ zizi ghə̀ ne la lèmə̀ ghom ne mbyɨ, ko ma bè lu phiʼ nyàm, ndi kə mà ne ghə̀ fəŋ.