Read Babanki 2 Kolìntyàns 1 Bible Online

2 Kolìntyàns 1 - Babanki bible

2 Kolìntyàns 1

¹A nyòʼò mo Bol ə wù ə ntɨm ə Yesò Klistò mu à ntsuʼ Nyìngòŋ ntsuʼ mo fa wen a kòŋ. Ma nyoʼo ŋwàʼlə̀ ghèn a ntsèntə̀sə viʼi Nyìngòŋ vyi no vətsèm a və tsi a Kolìn, be nə̀ a ghə̀ŋ viʼi Nyìngòŋ vyi a ghə̀ŋ tsi ashə Akayà no vətsèm. Ma diʼ yo Timotì ə lèmə̀ ə vəghəŋ a byɨmə.

²Nyìngòŋ ə, Tìʼ vəghəŋ wenə Bobo Yesò Klistò diʼi ətyɨm ə jùŋə ghə̀ a ghə̀ŋ, ə be kù mbwaʼmə a ghə̀ŋ.

³Vəghəŋ ə nkuʼsə Nyìngòŋ ə Tìʼ Bobo vəghəŋ Yesò Klistò. Ghə̀ kusə shɨnsə a viʼi, be bwaʼsə tətyɨm tə viʼi.

⁴Ghə̀ wye tətyɨm tə vəghəŋ a zhʉ a vəghəŋ diʼi no ngəʼ ko a yi, ndi vəghəŋ ə be wye tətyɨm tə viʼi vətsevə a zhʉ̀ a vəwenə ə yenə ngəʼ, ndə̀ŋndəŋ ando Nyìngòŋ wye tətyɨm tə vəghəŋ.

⁵Ghə̀ŋ kɨli la, Yesò Klistò ə nyen li ngəʼ no nànto, yès mu be ə kwenə to ndə̀ŋndəŋ ə ngəʼ wen na yi, Nyìngòŋ sə be wye tyɨmə yèsə no nànto chò fa Yesò Klistò.

⁶Yès sə yenə ngəʼ no zhʉ̀ko, ndi kə gyàmtə̀ wye tyɨmə ghə̀ŋ, ə be ə gyàmtə̀ ghə̀ŋ la ghə̀ŋ bwòŋ. Byìʼì ando sətsen Nyìngòŋ wye tyɨm ə yèsə, yès be a wye ghəŋə. Kə be a ne la ghə̀ŋ to kuʼ ə ghaʼa tyɨm, wensə a ndə̀ŋndəŋ ngəʼ a yès yenə.

⁷Yès ə kɨ nəmwèʼè la əbyɨmə ə ghəŋə na nto tò to. Yès ə kɨ alə̀ byìʼì ando ghə̀ŋ kwen li a ndə̀ŋndəŋ ə ngəʼ yi a yès diʼ tsu, Nyìngòŋ ə sə wye ə tyɨm ghə̀ŋ ndə̀ŋndəŋ ando ghə̀ wye ə yèsə.

⁸Yès ə kəŋ la ghə̀ŋ kɨ ngəʼ shisə a yès nyenə a Esìyà a vəlemə vyesə. Yès tə yenə ngəʼ byɨ tsu no nànto ghə̀ cho kədyòʼ kyeskə yès, sə yenə la yès a pfʉkə.

⁹Yès nko nkɨ la yès na bwoŋ. Alì na kèn kə tə fʉ̀ alə̀ ndi kə yès a ntsi a yès kədyòʼ ali boŋsə sə zhəʼtə a wen ə Nyìngòŋ, a diʼ Nyìngòŋ a ghə̀ lusə viʼi fa pfʉ.

¹⁰Ghə̀ ə bwoŋsə li yès fa chʉ̀ əpfʉ̀ ə, diʼ lù be ə bwoŋsə yes. Yès ə kɨ to no nəmwèʼè la ghə̀ lu bwòŋsə yès.

¹¹Ghə̀ ne bwòŋsə yès byìʼì ando ghə̀ŋ ne ngyàmtə̀ əjɨ̀m a yès. Byìʼì na kenkə nghoʼo viʼi ne nku kəzòŋ byìʼì ando ghə̀ zhʉ li ə jɨ̀mə̀ viʼi no kədə̀ŋ la yès ə ndiʼi a nkàyn.

¹²Yès ə saŋlə no nànto, kɨ no fa yès a tətyɨm la no tèbe ghò yi a yès tə nè a mbi a shen, nə̀ ji a yès tə tsi vəghəŋ fa tsu, la yès ə nè to nə̀ tətyɨm tə laynə, ti a Nyìngòŋ ə kʉʼʉ. Yès tə ne no tèbe ghò, nè to byìʼì ətyɨm ə jùŋə ghə̀ Nyìngòŋ, a nko diʼ byìʼì ətof ə mbyi.

¹³Yès ə nyoʼo to kənyʉ̀ ki a ghə̀ŋ ando ghə̀ŋ zì ghə̀ŋ dzàŋ kɨ. Ma kɨli la ghə̀ŋ shɨtə kɨ ntsìnə̀ yès luwen, ali diʼ ə na tuʼtə ə kɨ, ndi à lù ndiʼ a kətsi yi a Bobo vəghəŋ Yesò bwenə vi, ghə̀ŋ ə nsaŋlə̀ kumə yès to ndə̀ŋndəŋ ando yès be a saŋlə kumə ghə̀ŋ.

¹⁵To ando mà tə nkɨ la ghə̀ŋ kɨli mò a ji na ghèn. A le kənyʉ̀ ki a mà tə ghʉ̀ la ma ghayntə ghə̀ŋ a ambì mibu dyʉ̀ a Màsìdonìyà ndi mà lù sə bwensə sə nvì ə be yèn ghə̀ŋ, ghə̀ŋ tuʼtə sàŋlə. Mà tə ghʉ̀ alə̀ ndi mà lù sə bwenə vì vəghəŋ be yemə, ghə̀ŋ gyamtə mò, mà dyʉ̀ a Jùdiyà.

¹⁷Kə lə diʼ la mà tə sə ghʉ la ma vì ghàyntə ghə̀ŋ, ko ma kwoʼtə li mu? A lə diʼ la ma baʼtə̀ nyʉ̀ to nə̀ viʼi mbyi mu? A Vəwenə ə byɨmə kənyʉ̀, və sə zhʉtə vəwenə be tensə.

¹⁸Nyìngòŋ ə gaʼa to nəmwèʼè. Ma gàʼa to ndə̀ŋndəŋ a ghə̀ŋ la, ma ko tə ngaʼa təchʉ̀ tə bò a ghə̀ŋ.

¹⁹Ghə̀ŋ kɨli la Wàyn Nyìngòŋ, ə Yesò Klistò yi a yo və Timotì nə̀ Silàs tə nshə̀ʼtə̀ kənyʉ̀ kə wen a ghə̀ŋ ə ko nə̀ gaʼa təgàʼ tə bò. Ghə̀ ngaʼa to kənyʉ̀ ki a kə diʼi nəmwèʼè a nə̀ Wàyn Nyìngòŋ.

²⁰A diʼ wen a ghə̀ nè no ghò na yi a Nyìngòŋ ə nghʉ kə kwʉ̀ʼ. A lə kənyʉ̀ ki a vəghəŋ nə̀ ngàʼa la, “Amèyn” chò fa a wen azhiʼ, kuʼsə Nyìngòŋ.

²¹A ne Nyìngòŋ la vəghəŋ və tsèm ndiʼ ti to a kənyʉ̀ kə muʼ vəghəŋ və Yesò Klistò. A diʼ Nyìngòŋ a ghə̀ tsuʼ yès.

²²Ghə̀ chʉtə li vəghəŋ a ji la ghə̀ ku li Kəzhwì kə Ŋwoʼkə ə Nyìngòŋ a vəghəŋ a tətyɨm ə diʼ nəmwèʼè la ghə̀ lu ku mwetə əfo vyi a ghə̀ ghʉ a vəghəŋ.

²³Mà tə faŋ ke be ə vi a Kolìn byìʼì ando ma ko tə ə kòŋ ə vi ə kəŋkə̀ ghə̀ŋ a kənyʉ̀. Nyìngòŋ ə kɨ la ma gàʼà to nəmwèʼè.

²⁴Vəghəŋ ə kɨ to no nəmwèʼè la əbyɨmə ə ghəŋə to, ko yès ə lu kòŋ ə ntenlə wìʼ tenlə la ghə̀ ne kənyʉ̀ kumə əbyɨmə ə wen. Yès ə boŋsə kòŋ ə vi la vəghəŋ tsentə ə ne kənyʉ̀, kə vi to nə̀ saŋlə a ghə̀ŋ.