Read Babanki 2 Kolìntyàns 10 Bible Online

2 Kolìntyàns 10 - Babanki bible

2 Kolìntyàns 10

¹A sensə to no mò Bol sensə ghə̀ŋ luwen a zhiʼ Yesò Klistò a ghə̀ tuʼmə be bwaʼmə. Ma kɨli la viʼi vətsenvə nə̀ gàʼa la ma zhʉ sə ə nyòʼ kənyʉ̀ nyoʼo, a ghə̀ŋ ma sə gaʼa to no nə̀ ətyɨm ə to ghə̀, ali na vì zaʼa a ghə̀ŋ ntìntìn, ma sə gaʼa to kəbwaʼ kəbwaʼ.

²Ma sensə ghə̀ŋ la kə ghə̀ŋ a nè, mà na vi ə fwàynsə fwàynsə a ghə̀ŋ. Ma kɨli la ma ne vi fwàynsə a viʼi vyi a və gaʼa la yès ə tsi to nə̀ viʼi mbyi.

³Kə diʼ to no nəmwèʼè la yès ə tsi a mbyi ali yes ə ko soynə a nə̀ viʼi mbyi.

⁴Əfo ghòŋ ə yès ko diʼ ə əfo a shɨtə wìʼ nə̀ kəvu kə, à kù Nyìngòŋ a yès la yès ə nsoynə zhɨ kədyòʼ kəbəŋ kəfenəkə tsu.

⁵Yès ə byɨbsə kəngùmə̀ kì a vi kuʼsə wen nè la kə viʼi kɨ Nyìngòŋ. Yès ə tisə təkwòʼtə̀ tə viʼi, ne la vəwenə kwoʼtə nyʉ̀ a ji yi a Yesò ə kəŋ la və nkwoʼtə fa tsu.

⁶Ghə̀ŋ ne diʼi a yès no zhʉ̀ko la ghə̀ŋ sə zhʉ, to fa Klistò, yès mu ku ngəʼ a viʼi a ghə̀ŋ a ntìntìn a və ko zhʉ fa Wen.

⁷Ghə̀ŋ yen ənyʉ̀ to fa ji a və kə fa tsu a ghə̀ŋ ashɨ. Wìʼ ə mu sətsèn ə ngàʼa la ghə̀ diʼ wù ə Yesò, ghə̀ tuʼtə ə kwòʼtə ə kɨ la yès be boŋ diʼ to viʼi Yesò to nə̀ wen.

⁸Bobo ku li kədyòʼ a mò a ghə̀ŋ a kətʉ̀, mu mà sətsèn ə nkumə tebe kədyʉ̀ʼ kumə kədyòʼ na kì, ko ma diʼsə kətʉ byìʼì ando ghə̀ ku la mà kwisə ghə̀ŋ a ghə̀ŋ a byɨmə nə̀ kəwenkə, ghə̀ ko ku la ma mbyɨsə ghə̀ŋ byɨsə nə̀ kəwenkə

⁹Nò tebe ali ma ko kòŋ tebè la ghə̀ŋ nkwoʼtə la ma nyoʼo və ŋwàʼlə̀ vwomə ne la ghə̀ŋ ə mfwàynə̀.

¹⁰Byìʼì viʼi vətsenvə gàʼa la ma zhʉsə nyoʼo ŋwàʼlə̀, gaʼa yì ə sə to kiʼi kədyòʼ ali ma ne sə boŋsə vi a ghə̀ŋ ashɨ ma sə bwaʼsə gaʼa diʼ sə ma ko ki ə gàʼ a ntìntìn ə viʼi.

¹¹Ma kòŋ la nki ə viʼi a venə kɨ la kənyʉ̀ ki a yès nyʉ̀ʼmə nyoʼ ə tɨmə tɨmə diʼ to nə̀ kikə a yès ə vi tèbe vi a ghə̀ŋ a ntìntìn, yès be a gaʼa to kəwenkə.

¹²Yès ə ko ghʉ wenə yèsə ko shəʼmə yo və viʼi vyi a və gàʼ diʼ təwen tə vəwenə. A diʼ a zhʉ a vəwenə shəʼmə be shəmə təwen tə vəwenə, vəwenə ne kənyʉ̀ kì a kə ko kiʼi ətof.

¹³Yès zizi ko yès ə lu nkùmə̀ kədyʉ̀ʼ kumə kənyʉ̀ a yès zizi ko yès ə lu nè. Yès ə kumə kədʉʼ to akwi kənyʉ̀ yi a Nyìngòŋ ə kù li la yès ə nè, ə shwèʼè yèsə a ghə̀ŋ a ntìntìn diʼ mùʼ fa tsu.

¹⁴Yès ko kumə kədyʉ̀ʼ a kənyʉ̀ a yès ə ko tə ne to ando kə yi ndiʼ ndiʼ a zhʉ a yès ə ko tə vì zaʼa a ghə̀ŋ a ntìntìn. Yès ə ndiʼ mbìsə viʼi ə vi nə̀ ntɨm ə jùŋ byìʼì Yesò Klistò a ghə̀ŋ.

¹⁵Yès ə ko kumə kədyʉ̀ʼ shi əkuʼsə a shwèʼè viʼi kədyàŋ. Yès ə kəŋ to la ghə̀ŋ kwi a ghə̀ŋ a byɨmə ndi shyèʼ yì a yès ne a ghə̀ŋ a ntìntìn boŋ kwi.

¹⁶Ghə̀ŋ sətsen ə ne alə̀, yès be shə̀ʼtə̀ dyʉ̀ nə̀ ntɨm ə jùŋ a təloʼ tə tsentə, a wìʼ ko tɨmə shə̀ʼtə̀ tsu ndiʼ kə yes lu kùm kədyʉ̀ʼ a kəshi viʼi kədyàŋ.

¹⁷Və nyòʼò li a Ŋwàʼlə̀ Nyìngòŋ la, “no ndò a ghə̀ kə nkumə kədyʉ̀ʼ, ghə̀ nkumə byìʼì to kənyʉ̀ kì a Bobo ne li.”

¹⁸Kə diʼ alə̀ byìʼì ando wìʼ yi a ghə̀ diʼi la ghə̀ kwʉʼʉ li ko kwʉʼ no tebe a kəfo kətsen. A kwʉʼ to wìʼ yi a gàʼà Nyìngòŋ la ghə̀ kwʉʼʉ li.