Read Babanki 2 Kolìntyàns 11 Bible Online

2 Kolìntyàns 11 - Babanki bible

2 Kolìntyàns 11

¹Mà sensə ghə̀ŋ la ma sə ngàʼà dyʉ̀ luwen to nə̀ kəkoynkə, ghə̀ŋ ə bwaʼmə zhʉtə to zhʉtə. Ghə̀ŋ zhʉtə to ali!

²Ghə̀ŋ ə̀ kɨ la ma shɨmtə ghə̀ŋ no nànto ndə̀ŋndəŋ to ando Nyìngòŋ ə shɨmtə. Mà sə diʼ mù ma fas li ə ku ghə̀ŋ a lɨm, a diʼ Yesò, kəŋ la kə ghə̀ŋ ne nkiʼ əmbyɨ no fa mpfen azhʉ̀ a ma kù ghə̀ŋ a wen.

³Ma gaʼa alə̀ fwàynə̀ la viʼi zizi və vi lobtə ghə̀ŋ ko ghə̀ŋ be a nghʉ kətʉ nzhʉ fa Yesò nə̀ tyɨm ə ghə̀ŋ no tsèm ndə̀ŋndəŋ ando Satan nvi nə̀ mənàŋ mə wen ə lobtə Ivè.

⁴Ma fwàynə̀ alə̀ byìʼì ando mà yèn li la ndìʼsə̀ sə dzɨŋ sə sə̀ ziʼi ghə̀ŋ nə̀ nyʉ̀ kədyàŋ kumə Yesò ko andiʼ nyʉ̀ a yès tə ziʼi ghə̀ŋ kumə wen tsu, ghə̀ŋ moʼtə to moʼtə. Wìʼ ə vì, a ghə̀ŋ nə̀ kəzhwì kə, a ko diʼ kəzhwì kə Ŋwoʼkə kì a yès nku a ghə̀ŋ, ghə̀ŋ shi to shi, ə mbe byɨmə ntɨm yì to byɨmə a ghə̀ shə̀ʼtə̀, a ko diʼ ntɨm ə jùŋ yì a yès ə nshə̀ʼtə̀ a ghə̀ŋ.

⁵Viʼi ntɨm a venə a ghə̀ŋ ghʉ la à diʼ no viʼi ntɨm və to və lə̀ ə ko chò mò no te kənyʉ̀ kətsen.

⁶Ma kɨli la ma ko kɨ ə gàʼ ashɨ viʼi ali, kɨ kənyʉ̀ ki a ma gàʼà. Yès sə diʼ mù yès ə diʼi li nakèn kə a ghə̀ŋ to ji sə tsèm.

⁷Kə le diʼ la mà tə shiʼsə wen ghomə ne ghə̀ŋ, ghə̀ŋ sə kuʼmə ə nshə̀ʼtə̀ ntɨm ə jùŋ ə Nyìngòŋ a ghə̀ŋ, ko ma bèmə̀ tebè kəfo, a diʼ mbyɨ mu?

⁸Ma tə shyèʼè a ghə̀ŋ, diʼ to sə ma tsoŋə tsoŋ fa ntsèntə̀sə viʼi vəbyɨmə sə tsensə byìʼì ando ma tə shyèʼ a ghə̀ŋ ali lòʼ ghomə boŋsə lù fa vəwenə.

⁹Ma ndiʼ vəghəŋ, əzhʉ̀ ə tseghə vi kwʉ̀ʼʉ̀, ko ma lù ki kəfo fa ghə̀ŋ no fa mphen ali ko ma ku ngəʼ a wìʼ. A boŋsə tɨmə to vəlemə və vəghəŋ fa Màsìdonìyà tɨmə əfo a mò. Ma ko mbèmə kəfo a ghə̀ŋ no kətsi kətsenkə, ko andiʼ la ma lu bèm.

¹⁰Ma saŋlə la ma ko shì tebè kəfo kətsenkə fa ghə̀ŋ, ko kəfo kə zizi kə tàm mò la kə mà be nsaŋlə̀ to alə̀ ashə lòʼ ə Akayà. Yesò kɨ la mà gàʼà to nəmwèʼè,

¹¹Ghə̀ŋ kwòʼtə la ma gàʼa alə̀ byìʼì ando mà ko kòŋ ghə̀ŋ mu? Nyìngòŋ ə kɨ la mà kòŋ ghə̀ŋ.

¹²Mà faŋ ə nè tò kənyʉ̀ ki a ma nè, ndiʼi chiʼtə əchʉ ə viʼi vyi a və gàʼa la vəwenə diʼ viʼi ntɨm ə Yesò li, kə vəwenə nkumə kədyʉ̀ʼ gàʼà la yo vəwenə shyèʼ to ji mùʼ.

¹³Viʼi a venə nə̀ zhò to dzɨŋ la vəwenə diʼ viʼi ntɨm, vəwenə diʼ viʼi shyèʼè kənlobtə̀, bɨ̀lə̀ la vəwenə diʼ viʼi ntɨm ə Yesò.

¹⁴Nò tèbè fa mpfen, kə ghə̀ŋ ne ndiʼ nə̀ əkaynə byìʼì tèbe Satan nbɨ̀lə li nè la viʼi nyenə la ghə̀ diʼ ntsɨŋ ngə̀ŋ ə Nyìngòŋ ə baynə.

¹⁵Kə le diʼi la ghə̀ŋ ko diʼ ndiʼ nə̀ əkaynə ə la viʼi shyèʼ ə Satan ə bɨ̀lə̀ diʼi təwen tə vəwenə la vəwenə diʼ tò no viʼi shyèʼ və juŋəvə Nyìngòŋ. Ngəʼ yì a Nyìngòŋ ə lu ku a vəwenə a kəmwètə lu kwʉ̀ʼ a vəwenə a shyèʼè a ghèn.

¹⁶Mà bo kùmtə̀ to kùmtə̀ la kə ghə̀ŋ a kwoʼtə la ma diʼ kəkoyn, ali ghə̀ŋ ndiʼ ə lyɨ̀ mo a nə̀ kəkoyn kə, ghə̀ŋ moʼtə ma boŋ gàʼ to kəkoyn a fəshinə fə əzhʉ̀ alə ndiʼ nkàyntə̀ mò nsaŋlə̀.

¹⁷Ma ghaŋsə gàʼa dyʉ̀ nə̀ kənyʉ̀ kə ashə̀ to nə̀ kəkoynkə, gàʼa ali gàʼa to fa mò ngəŋ. A ko gàʼ Bobo la mà gàʼ alə̀.

¹⁸Ando nghoʼo viʼi ghaŋsə wen byìʼì fo mbyi, nkàyntə̀ mò ə be a nghaŋsə wen.

¹⁹Ghə̀ŋ gàʼa la ghə̀ŋ tofə no nànto, ghə̀ŋ sə yenə nkoyn, ghə̀ŋ moʼtə to moʼtə la və ngaʼa a ghə̀ŋ!

²⁰Ghə̀ŋ moʼtə li viʼi, və sə lyɨ ghə̀ŋ a əkòs, nyàblə̀ nə̀ ghə̀ŋ. Ghə̀ŋ moʼtə li vəwenə sə lobtə ghə̀ŋ, zəʼtə ghə̀ŋ be telə ghə̀ŋ.

²¹Ma diʼsə kətʉ ə gàʼ la ando yès ə ko tə nè nyʉ̀ a venə a ghə̀ŋ, və ghʉ la ma tə mbwaʼa bwaʼa! Mà sə gàʼà luwen to a nə̀ kəkoynkə, ali mu viʼi vətsenvə mu ə ghaŋsə əwèn kumə tèbe ghò, nkàyntə̀ mo be a ne to ali.

²²Vəwenə nə̀ kuʼsə əwèn gàʼa la vəwenə diʼ viʼi Hibùlù. Ma diʼ to wù ə Hibùlù. Vəwenə gàʼa la vəwenə diʼ viʼi Islel. Ma diʼ to wù ə Islel. Vəwenə vətsenvə gàʼa to la vəwenə diʼ viʼi ngwaʼ ngə̀ŋ Ablaham. Ma diʼ to wù ngwaʼ ngə̀ŋ Ablaham.

²³Vəwenə ngàʼa la vəwenə diʼ viʼi və shyèʼè ə Yesò. Ma bòŋə shyèʼè a Yesò, chò tèbè vəwenə. Mà sə gàʼà dyʉ̀ to sə ma bomə bomə. Ma shyèʼè li nchò vəwenə. Və shwinə̀ li mò a nfɨŋ to aghayn aghayn chò ando və shwinə̀ vəwenə. Və ghòmə li mò to aghayn a kədə̀ŋ ə be shwe ə zhwi mo to aghayn aghayn.

²⁴Viʼi Jus nghòmə li mò aghayn a tàyn, a diʼ no zhʉ̀ko a və ghomə, və ghòmə məkwinkwinə məwumə ə ntàʼ njʉ̀sə̀ abʉ̀muʼ.

²⁵Və ghòmə li mò nə̀ mbàŋsə aghayn a tàʼ, ə temlə mò nə̀ nguʼsə əghayn ə mùʼ. Kəbaŋ kə buŋkə li nə̀ mò a mù aghayn a tàʼ. Ma lyəŋ li a mù ə zhʉsə a kətsi kɨ mpfen.

²⁶Mənkuŋ mə nghoʼkəmə shwe li ə lyɨ̀ mo no aghayn a ghoʼo ando ma dyʉ̀ ajèʼ, ma be shwetə əpfʉ avù və tsoŋə. Ma shwetə li əpfʉ avù ə viʼi ə lòʼ yès, nə̀ a avu ə tɨmə. Ma shwetə li əpfʉ a ntə̀ʼ sə ghoʼsə, ə shwetə ashə ə viʼi ko diʼ tsu. Ma shwetə li əpfʉ̀ a mù mə ghoʼkə mə, shwetə əpfʉ avù ə̀ viʼi a və lobtə diʼi la və byɨmə li.

²⁷Ma shyèʼè li nchwosə, à viʼi aghayn to kədə̀ŋ, ma tsì to a məkəʼ, ə vi zhʉ tseghə, ma tsì ko andiʼ la ma zhɨ̀ tebè kəfo ko ndiʼ la ma nyʉ̀ tèbè mu, ko ndiʼ la ma kiʼi no kəfo ə zhɨ̀, ko andiʼ la ma kiʼi ngə̀ŋ ə tsì tsu, ko ndiʼ la ma kiʼi no tèbe ndisə ə mòʼ.

²⁸Jisə diʼ to kədə̀ŋ a mà yenə ngəʼ fa tsù ali diʼ tò kənyʉ̀ kə mùʼ a ma kwoʼ to məzhʉ̀ ə tsèm, a diʼ ji a viʼi vəbyɨməvə diʼ fa tsu to vətsèm.

²⁹Ma yenə wìʼ ghə̀ bwaʼa kumə kənyʉ̀ kə Nyìngòŋ, kənyʉ̀ a kì sə ku ngəʼ a mò, ma sə diʼ to sə a diʼ mo. Və ne wìʼ ə fəŋ a mbyɨ, kənyʉ̀ a kì sə ku ngəʼ a mò no nànto.

³⁰Mà sətsen ndiʼ ə nghaŋsə tèbe əwen, a mà ne ghaŋsə kumə nyʉ̀ vyi a və diʼi la ma bwaʼa.

³¹Tìʼ Bobo Yesò, ə Nyìngòŋ yi a və diʼ nkuʼsə wen to məzhʉ̀ ə tsèm ə kɨ la ma ko zhò ndzɨŋ.

³²A ndiʼ to ando ma ndiʼ a ntə̀ʼ Dàmasɨkùs, wìʼ yi a fòyn Aletàs ə ghʉ la ghə̀ nsoʼo ntə̀ʼ a yì ə gàʼ viʼi tɨmə kaʼ shì ə sə bvʉ̀ mò ə ghaʼ,

³³ali və we mò a nkəm ə nyɨŋsə shìsə mò fa kəbʉʼ a kə ndiʼì a əwenə mbàyn a kəbəŋ na yi ə shiʼsə mò, ma nyɨŋ, kò ghə̀ lə ghaʼa mo.