Read Babanki 2 Kolìntyàns 12 Bible Online

2 Kolìntyàns 12 - Babanki bible

2 Kolìntyàns 12

¹Mà ne nsaŋlə to saŋlə no tèbe ando se ko diʼ ə tsu. Ma shə̀ʼtə̀ nyʉ̀ a ghə̀ŋ luwen a Bobo ə ne, və vi a mò to sə a tsi jòmsə, nə̀ kì kə a ghə̀ diʼi li nlaynsə a mò a mo kwòʼtə.

²Ma kɨli wu tsen a ghə̀ mbyɨmə li a Klistò, Nyìngòŋ, ə lyɨ̀ wen ghə̀ kuʼ akàŋ no a kəshi yi a kə ŋanŋtə li kuʼ. Ma ko nlaynsə kɨ la, ghə̀ nkuʼ to no nə̀ əwèn wen mu ghə̀ nku a kəzhwì lo. A tuʼtə ə kɨ tò Nyìngòŋ. Luwen sə diʼ ngʉʼsə njʉ̀sə̀ kàʼ a kənyʉ̀ na kènkə nfʉ̀.

³Ma kɨli to ando mà gàʼa li la Nyìngòŋ ə lyɨ̀ li wìʼ na ghèn, ghə̀ kuʼ akàŋ akəshi yi a ghə̀ diʼi tsu ali ko ma nlaynsə kɨ la, ghə̀ nkuʼ to no nə̀ əwèn wen mu, ghə̀ kuʼ a kəzhwì lò. A tuʼtə nkɨ to Nyìngòŋ.

⁴Ghə̀ kuʼ ə zàʼa tsu ə zhʉ nyʉ̀ chʉ̀ ə wen ə zɨm a wìʼ ko zì ghə shə̀ʼtə nə̀ chʉ̀.

⁵Mà tə saŋlə kumə wìʼ na ghèn, ko diʼ la ma saŋlə kumə əwenə ghomə. Kənyʉ̀ ki a mà zizi mà naynə kumə wenə ghomə byìʼì kəwenkə a diʼ tò a kənyʉ̀ a ma bwaʼa tsu.

⁶Ma tə saŋlə kumə tèbe wenə ghomə, ko ma lu a saŋlə a nə̀ kəkoyn kə byìʼì ando mà gàʼa to kənyʉ̀ kì a kə diʼi nəmwèʼè. Nò tèbè ali, mà ko saŋlə, ndi kə wìʼ a nkwoʼtə mò a bwen to nyʉ̀ vyi a ma nè nə̀ vyi a ma gàʼà.

⁷Nyìngòŋ ə ko tə kòŋ la mà nsaŋlə̀ chòsə̀ kumə nyʉ̀ ə kaynə və vyi a ghə̀ diʼi a mò, və diʼ to kədə̀ŋ. A lə kənyʉ̀ ki a ghə̀ moʼtə əkwaʼa ghə̀ kwen a mo wèn ə sə ku ngəʼ a mò no nànto. Əkwaʼa na yi ə nvi to nə̀ wù ntɨm a Satan tɨmə la ghə̀ vi nku ngəʼ a mò, la kə mà nghaŋsə əwèn.

⁸Ma sensə Bobo aghayn a tàʼ la ghə̀ shisə əkwaʼa na ghenə fa mo wèn,

⁹sensə no zhʉ̀ko, ghə̀ gàʼ to la, “mətuʼmə yi a ma tùʼmə̀ nə̀ wù li kwʉ̀ʼʉ̀, byìʼì ando wìʼ sətsen mbwaʼa, ghə̀ mu yen to ando kədyòʼ ə kòmkə ə shə̀tə̀ shyèʼè a wenə a wèn.” Kə lə diʼi la mà na saŋlə no nànto byìʼì nyʉ̀ vyi a ma bwaʼa tsu ndi kədyòʼ kə ə Yesò nshwèʼè a mò.

¹⁰Ma nè ma sə saŋlə azhʉ̀ a ma bwaʼa, viʼi telə mò, nyʉ̀ ə to a mò, və ntsuʼ kəghʉ ə kòmkə, ngəʼ sə tsensə be vi a mò to byìʼì Yesò. Kə diʼ alə̀ byìʼì ando a vi azhʉ̀ a ma bwaʼa, ma sə boŋsə kiʼi kədyòʼ.

¹¹Ma yi gàʼa to nə̀ kəkoynkə mu a ndiʼ mu à ten ghə̀ŋ la mà ngàʼà alì. Ma bwomsə li wenə ghomə, mu a yi ndiʼ kəshi ə kəŋkə̀ ghə̀ŋ bwomsə mò, ghə̀ŋ faŋ kò ghə̀ lə bwomsə. Ma ko kwʉ̀ʼ ə tèbe a kənyʉ̀ ali viʼi ntɨm venə a və lyɨ la və kuʼmə no nànto ə ko chò tebè mò no fa mpfen.

¹²Ma tə bwaʼmə ə lyɨ̀ əzhʉ̀ ə diʼ nchwisə nyʉ̀ a ghə̀ŋ nə̀ tənki tə nyʉ̀ ə kaynəvə tə tsentə, nə̀ təshyèʼ tə kaynə tə, tə diʼi la ma diʼ to no nkàyntə̀ wù ə ntɨm.

¹³A diʼ gho ə jùŋ a mà tə ne a ənòyn ə viʼi və byɨməvə vətsenvə ə fàŋ ke nè a ghə̀ŋ a? Kənyʉ̀ kì a mà tə faŋ ke nè a ghə̀ŋ tə ndiʼ to la ma ko tə ku ngəʼ a ghə̀ŋ. A sə diʼ kənyʉ̀ kə kəbyɨkə a mà tə ne, ghə̀ŋ lyèsə li ku a mò!

¹⁴Ghə̀ŋ kɨ la ma vi ə ghayntə ghə̀ŋ luwen andiʼ aghayn a tàʼ, diʼ vì ko andiʼ la ma bèm kəfo a ghə̀ŋ byìʼì ando ma kəŋ to ghə̀ŋ, a ko diʼ fo vəŋə. No fa mpfen a nə̀ boŋsə tuʼmə nə̀ vətìʼ və vunə nə̀ vəpfi tùʼmə̀ nə̀ vunə, a ko diʼ vunə ə ntùʼmə̀ nə̀ vəwenə.

¹⁵Ma saŋlə ə byɨbsə no tèbe ghò ə be ə ku wen ghomə ə gyamtə ghə̀ŋ. Byìʼì ghò a ma kòŋ ghə̀ŋ no nànto alə, ghə̀ŋ kòŋ mò to ntèʼ a?

¹⁶Ghə̀ŋ yen li tò no nəmwèʼè la ma ko tə mbèmə kəfo fa ghə̀ŋ, ali ghə̀ŋ vətsevə be gàʼà la ma tə ə lobtə ghə̀ŋ ə zhò ndzɨŋ a ghə̀ŋ.

¹⁷Mà tə lobtə ghə̀ŋ a le? Wù ə tsen fa ntìntìn ə viʼi vyi a mà tə tɨm a ghə̀ŋ tə lobtə ghə̀ŋ mu?

¹⁸Ma tə sensə Taytùs la ghə̀ vi ə yèn ghə̀ŋ, wenə vəlemə vətsenəvə vi wenə wen. A le diʼ la Taytùs tə vi shi kəfo fa ghə̀ŋ mu? A kò yo Taytùs ti to a kənyʉ̀ kə mùʼ, tsi to ntsìnə̀ ə muʼ?

¹⁹Ghə̀ŋ kwòʼtə la yès nyoʼtə nyʉ̀ venə alə byìʼì ando yès ə kəŋ ntaŋ ə chʉ̀ yèsə laynə a ghə̀ŋ ashɨ mu? Jòʼ! yès ə gaʼa to nə̀ viʼi Yesò ashɨ Nyìngòŋ. Yès sə gaʼa nyʉ̀ a venə a ghə̀ŋ no ətsèm alə̀ to byìʼì ando yès ə kòŋ ghə̀ŋ, kəŋ la ghə̀ŋ nkwi a jisə yi a Nyìngòŋ ə kəŋ fa tsu a vəlemə.

²⁰Ma əfwanə la ma ne vì, ko ghə̀ŋ diʼ ando ma kəŋ la ghə̀ŋ ndiʼ, ə ghə̀ŋ boŋsə yèn mo, ko ma diʼ ando ghə̀ŋ kəŋ la mà ndiʼ. Mà zizi a mà sə vi, ə yen ghə kəngùmə̀ kə diʼ a ghə̀ŋ a ntìntìn, nə̀ kəghəʼ kə, nə̀ tinə fwi, nə̀ kənywi kə, nə̀ gàʼà əbyɨghə, nə̀ kùwòŋ nə̀ əghaŋsə ə wèn, be yen ghə̀ŋ, ghə̀ŋ tsi a kəngəsə kumə tsi to tsi.

²¹Ma fwàynə̀ la ma ne vì, ə Nyìngòŋ ə nè, a mà ə̀ diʼsə kətʉ kumə ghə̀ŋ, la ma ne vi ə yèn nghoʼ viʼi ko andiʼ la və kwitə li ntsìnə̀ byɨ yì a vəwenə tə ntsi, a yi viʼi vyi a və dzɨ̀mtə̀ ki no nànto nə̀ ki, a və jèʼtə̀ no nànto.