Read Babanki 2 Kolìntyàns 2 Bible Online

2 Kolìntyàns 2 - Babanki bible

2 Kolìntyàns 2

¹A lə kənyʉ̀ ki a mà tə ghʉ la, ma ko ba bwenə vi ə ghàyntə ghə̀ŋ, ndi kə ka ne la ghə̀ŋ nkwoʼ mbyi.

²A ne to ghə̀ŋ ma saŋlə. Sətsen ma be vi ne la kə ghə̀ŋ nsaŋlə̀, à be andiʼ ndò ə ne la mà nsaŋlə̀ a?

³A lə kənyʉ̀ ki a mà tə boŋsə nyòʼ ŋwàʼlə̀. Ndi kə ma ne sə vi, ghə̀ŋ a ghə̀ŋ yi ndiʼ boŋsə ne la ma nsaŋlə̀ boŋsə ne ma nkwoʼ mbyi. Ma kɨli nəmwèʼè la saŋlə ghə̀ŋ nè ma saŋlə.

⁴Mà tə nyoʼo ŋwàʼlə̀ a ghə̀ŋ, nyʉ̀ ə ku ngəʼ a mò no nànto, ko ma saŋlə, a shiʼi to məshɨ fa mo ashɨ. Ma ko tə kòŋ ə nè ə tyinə shəŋsə fwi, mà tə kòŋ ə diʼ la ma kòŋ ghə̀ŋ no nànto.

⁵Kə diʼ to no nəmwèʼè la wìʼ tə nè kənyʉ̀, vəghəŋ sə diʼ ko və lu saŋlə. Ghə̀ ko tə tuʼtə nè kənyʉ̀ na kènkə to a mò, ghə̀ tə nè a ghə̀ŋ vətsèm. Mà gàʼ alə byìʼì ando ma ko kòŋ ə gàʼ ə wyetə kənyʉ̀ na ken.

⁶Ando viʼi və ghoʼovə sə diʼ mù və soʼ li wen ə ku ngəʼ a wen, kə kwʉ̀ʼ li to alì.

⁷Ghə̀ŋ lyesə ku wen luwen be bwaʼsə ə tyɨm ə wen a bwen alì, a ghə̀ a faŋ a kwoʼ mbyi ə fəŋ fa wen a byɨmə.

⁸A lə kənyʉ̀ ki a ma sensə ghə̀ŋ la ghə̀ŋ bwensə nè ghə̀ nkɨ la ghə̀ŋ bo kòŋ ə wen.

⁹Mà tə nyoʼo ŋwàʼlə̀ a yì a ghə̀ŋ ndi yen la, ghə̀ŋ zhʉ̀ mò to nyʉ̀ ə tsèm mu lo.

¹⁰Ghə̀ŋ yi lyesə ku wìʼ a kənyʉ̀ a ghə̀ byɨbsə, kə ne ndiʼ la ma be ə lyesə nku wen. Ma lyesə kù wìʼ azhʉ̀ a kənyʉ̀ kə diʼ ə və lyesə, a ndi mu mà lyesə, ne ghə̀ŋ a jùŋ, to ndə̀ŋndəŋ ando Yesò ə kəŋ.

¹¹Ma nè alə̀ byìʼì ando ma ko kòŋ la Satan a kwen a kənyʉ̀ na yi, byìʼì a vəghəŋ ə kɨ li mɨ̀naŋ mə wen.

¹²Andiʼ ando mà nvi zaʼa a Tɨ̀luwàs sə shə̀ʼtə̀ ntɨm ə jùŋ byìʼì Yesò, ma yen la Nyìngòŋ ə sə diʼ mù ghə̀ boʼtə li ji la mà shə̀ʼtə̀,

¹³ali ma nko yen lèmə̀ vəghəŋ Taytùs tsu, kənyʉ̀ na kì sə ku ngəʼ a mò tyɨm, ma mu toŋtə viʼi tsu, ə lù ə dyʉ̀ a shə Màsìdonìyà.

¹⁴Alì, ma ku kəzòŋ kə Nyìngòŋ. Ghə̀ tisə yès to məzhʉ̀ ə tsèm, yès ə ndzɨ̀mtə̀ fa bàm ə Yesò zhɨ no gho na yì a yes ə nè. Ghə̀ ne yès ə gətə ntɨm ə Yesò, viʼi kɨ wen, ntɨm ayi saykə dyʉ̀ to shì ə tsèm to nə̀ kəlemtəkə kələŋkə.

¹⁵Kə diʼ la yès ə diʼ alə̀ diʼ to nə̀ kələŋ a Yesò ə nyuʼ a Nyìngòŋ a ji la yès ə̀ shə̀ʼtə̀ ntɨm ə jùŋ ə Yesò a viʼi vyi a Nyìngòŋ ə bwòŋsə, nə̀ a viʼi a və lèkə̀.

¹⁶A diʼ a viʼi vyi a və lèkə̀, a diʼ kəlemtə a kə zhwi. Alì a diʼ a viʼi a Nyìngòŋ ə bwòŋsə, kəlemtə na kì kə ə fwomə, ku əbwòŋ yì a ghə̀ ko lu mè. No wìʼ ko kwʉ̀ʼʉ̀ ə nè nki əshyèʼ a ghenə.

¹⁷Yès ko diʼ to nə̀ nghoʼo wìʼ a və lyɨ kənyʉ̀ kə Nyìngòŋ a fo wòŋ, baʼlə a əko. A tɨm Nyìngòŋ ntɨm yès la yès ə nè shwèʼ a ghenə, Yès sə shə̀ʼtə̀ to no nəmwèʼè a nə̀ viʼi shyèʼ ə Yesò, Nyìngòŋ ə lyè yès.