Read Babanki 2 Kolìntyàns 3 Bible Online

2 Kolìntyàns 3 - Babanki bible

2 Kolìntyàns 3

¹Ghə̀ŋ kwòʼtə̀ la yès be kaʼkə sə gaʼa bwomsə təwen ə tyestə ando viʼi vətsenvə nə̀ nè mu? Yès ko diʼ shi ŋwàʼlə̀ fa viʼi vətsenvə ə a ghə diʼi la yès diʼ viʼi ntɨm, ko yès nkəŋ tebè la ghə̀ŋ nyòʼ və ŋwàʼlə̀ a yès, yès njèʼè nə̀ vəwenə a və diʼi la yès diʼi viʼi ntɨm.

²Ghə̀ŋ diʼ to nə̀ ŋwàʼlə̀ yì a yès kiʼi mu və nyoʼo a yès a tətyɨm ndiʼ no ndo ndzaŋə, zhʉ kɨ kənyʉ̀ ki a və gaʼa.

³Ghə̀ŋ diʼ ŋwàʼlə̀ a Yesò nyoʼo to fa wen a ngəŋ, ghə̀ nchò fa yès a kəvu. Ghə̀ ko nyoʼ ŋwàʼlə̀ na ghèn nə̀ ntu ə ŋwàʼlə̀, ghə̀ boŋsə nyoʼ nə̀ Kəzhwì kə Nyìngòŋ yi a ghə̀ tsi. Ghə̀ ko nyoʼo a kwi ngùʼ, ghə̀ nyoʼo a tətyɨm ə viʼi.

⁴Yès ə kɨ la nyʉ̀ a venə diʼ to no nəmwèʼè byìʼì ando yès ə choʼsə Nyìngòŋ, ə chò fa Klistò.

⁵Yès ə ko gàʼà la Yès ə kwʉ̀ʼʉ̀ li fa yès a ngeŋsə. A nè Nyìngòŋ la yès nkwʉ̀ʼ.

⁶A nè wen la yès kwʉ̀ʼʉ̀ ə nshə̀ʼtə̀ kənyʉ̀ kumə məkàyn mə mfimə̀ mì a ghə̀ zhɨ wenə viʼi. Məkàyn na mèyn ko diʼ a soʼ yì a və nyoʼo, à diʼ məkàyn mə Kəzhwì kɨ Ŋwoʼkə. Əsoʼ mughə yì a və nyoʼo ə nè viʼi pfʉ, kəzhwì kə Ŋwoʼkə nè la və ndiʼ.

⁷Ghə̀ŋ kɨli la Əsoʼ ə ndiʼ a mbì a ŋwàʼlə̀ mu və nyoʼ a ngùʼ ali, ghə̀ diʼi baynə Nyìngòŋ. Əsoʼ ə nè li la əkə̀ʼ ə Mosìs ə nbàynə̀ no nànto, viʼi Islel ə gho ə ki, no tèbe ando ghə̀ baynə ali, lɨmə dyʉ̀ dyʉ̀. Əsoʼ ə sətsen ndiʼ mu ghə̀ diʼi li nki bayn na ghèn ali, vi nə̀ əpfʉ̀,

⁸ko kəzhwì kə Ŋwoʼkə a vi nə̀ baynə ghə̀ chò ghə̀ əsoʼ a?

⁹Əsoʼ ə sətsen ndiʼ mu ghə̀ ə nè la və nsoʼo byɨbsə viʼi ali kiʼ nki bayn alə, kənyʉ̀ ki a kə ne la viʼi ndiʼ nti a nkayn ashɨ ə Nyìngòŋ a faŋ ke kiʼi əbayn ghə̀ chò a?

¹⁰Kə le diʼi la əbayn mə məkàyn mə mfimə̀ ə vi li to chò ə baynə əsoʼ, a ghə̀ ko be kwʉ̀ʼʉ̀ a kənyʉ̀ kətsenkə.

¹¹Əsoʼ ə ndiʼi əbayn ghə̀ lɨmə̀ dyʉ̀ dyʉ̀. Kə diʼi la əbayn kəzhwì kə Ŋwoʼkə ə chò ghə əsoʼ byìʼì ando kəzhwì kə Ŋwoʼkə ko lu mè.

¹²Ando yès ə kɨ nəmwèʼè la kənyʉ̀ kə məkàyn mə mfimə̀ ə chò kə ə məkàyn mə mumə̀. A le kənyʉ̀ ki a yès ə shə̀ʼtə̀ ntɨm a ghèn, ko yèsə fwàynə̀.

¹³Yès ko diʼ to nə̀ Mosìs a ghə̀ nchiʼtə əkə̀ʼ wen nə̀ kəbàs kə ndisə la kə viʼi Islel yen ando əbayn ə Nyìngòŋ ə mè dyʉ̀ fa tsu.

¹⁴Nò fa mpfen, vəwenə nyenə ko andiʼ la və kɨ kənyʉ̀, à sə diʼ tèbe layn ghə̀ŋ bo diʼ to ali. Vəwenə ndzàŋə̀ ŋwàʼlə̀ məkàyn mə mumə̀, ko və lu zhʉ kɨ. Kə ndiʼ alə̀ byìʼì ando kəfo ki bo chiʼtə ə tof ə vəwenə to chiʼtə, a diʼ to Yesò a ghə̀ zizi ghə̀ lyisə kəfo na kì.

¹⁵Kə diʼ to no nəmwèʼè la à diʼ tèbè ə zàʼa fa layn, a zhʉ a vəwenə dzàŋə ŋwàʼlə̀ Əsoʼ ə Mosìs, ko və lu zhʉ kɨ tebè kɨ byìʼì ando kəfo kə bo chiʼtə ətof ə vəwenə to chiʼtə.

¹⁶Alì, no zhʉ̀ko a wìʼ ə bwenə vi a Bobo, ghə̀ lyisə kəfo na kì fa wen a shɨ.

¹⁷Kə diʼ alə̀ byìʼì ando Bobo wenə Kəzhwì kə Ŋwoʼkə diʼ to kənyʉ̀ kə mùʼ. No fe a kəzhwì kɨ Bobo kə diʼ, ko viʼi be diʼ əkòs.

¹⁸Vəghəŋ vi a və byɨmə a Yesò və tsuʼ li kəbàs kə ndisə na ki ko kə mbe chiʼtə tebè əkə̀ʼ ə vəghəŋ, vəghəŋ sə diʼ nyenə əbaynə Bobo. Ali Bobo a diʼi kəzhwì nè la vəghəŋ ə kwʉ̀ʼʉ̀ ando Bobo kəŋ, ndiʼi kuʼsə dyʉ̀ to dyʉ̀ nə̀ əbaynə wen na yi. A lə shwèʼè ə Bobo yi a ghə̀ diʼi a kəzhwì.