Read Babanki 2 Kolìntyàns 8 Bible Online

2 Kolìntyàns 8 - Babanki bible

2 Kolìntyàns 8

¹Yès kəŋ a vəlemə la ghə̀ŋ kɨ kənyʉ̀ ki a Nyìngòŋ tə ne fa wen a kòŋ kə fʉ̀ a ntsèntə̀sə viʼi vəbyɨməvə a sə diʼi Màsìdonìyà.

²Vəwenə tə nyenə ngəʼ no nànto cho fa mwomsə ə kaynəghə a ghə̀ tə vi a vəwenə ali vəwenə sə bo kiʼi to saŋlə ə ghoʼo ghə̀ ə nku no nànto ə tomsə shyèʼ ə Nyìngòŋ. Vəwenə tə nku ali, sùtə̀ femə no nànto.

³Ma shə̀ʼtə̀ kənyʉ̀ a ghə̀ŋ, mu ma tə yen yenə. Vəwenə ko tə nku to kəfo kì a vəwenə nkiʼi, vəwenə ə kuli chò. Vəwenə tə ku to fa vəwenə a tətyɨm,

⁴ku ali sensə yès la yès ku ji, vəwenə ku be bòŋ gyàmtə̀ viʼi Nyìngòŋ vyi a və tsi a Jelusalèm.

⁵Vəwenə tə ku chò no ando yès tə kwoʼtə. Vəwenə tə sə ku mu vəwenə ku li təwen tə vəwenə a Nyìngòŋ a ambì ə sə be zhʉ to fa yès ando Nyìngòŋ kəŋ.

⁶A lə kənyʉ̀ ki a yès tə sensə Taytùs la ghə̀ gyamtə ghə̀ŋ ghə̀ŋ nè mwetə shyèʼ jùŋghə a ghenə a ghə̀ tə ne ghə̀ŋ zìtə̀ lə̀.

⁷Ghə̀ŋ diʼ mu ghə̀ŋ shə̀tə̀ li mbyɨmə ə sə be shə̀tə̀ shə̀ʼtə̀ kənyʉ̀ kə Nyìngòŋ be kiʼ ətof no nànto. Ghə̀ŋ shətə li ghʉ kətʉ ə kəŋkə̀ a kənyʉ̀ kə Nyìngòŋ ə sə be kòŋ yès no nànto. Ghə̀ŋ shətə li ghaʼ kəku na kenkə a diʼi shyèʼ ə jùŋghə na ghenə.

⁸Ma ko gaʼa alə la ma ku a nə̀ əsoʼ. Ali ma kəŋ diʼ ji a wenə viʼi vətsevə fwomə vəwenə kəŋ gyàmtə̀, ndiʼ ma kɨ la əkòŋ ə ghə̀ŋ diʼ nəmwèʼè mu lo.

⁹Ghə̀ŋ kɨli kòŋ ə kaynəghə yì a Bobo vəghəŋ Yesò Klistò tə kòŋ vəghəŋ. Ghə̀ ndiʼ wu ə ghoʼo ə kaʼkə wù kəfem byìʼì ghə̀ŋ ndiʼ kəfem kəwen kə ne, ghə̀ŋ kiʼi əghoʼ ə Nyìngòŋ.

¹⁰Ma kəŋ ə gàʼ kənyʉ̀ ki a ghə̀ŋ a ma kwòʼtə kumə kənyʉ̀ a kènkə. Ma kəŋ la ghə̀ŋ mwetə kənyʉ̀ ki a ghə̀ŋ tə zìtə̀ a ngwʉʼ a ghə̀ tə cho lə. Ghə̀ŋ tə ndiʼ mbìsə viʼi nkəŋ ə ku, ə be sə diʼ mbìsə ə zìtə̀ ə ku.

¹¹Kə bòŋ la ghə̀ŋ ne mwetə shyèʼè jùŋghə a ghənə. Ghə̀ŋ ku to kəfo kì a ghə̀ŋ kiʼi. Ghə̀ŋ sə ku, əwenə ghəŋə be fwomə to ando ghə̀ tə fwomə ghə̀ŋ mu baʼtə̀ kəku a kì,

¹²byìʼì ando ghə̀ŋ sə nku kəfo, ghə̀ŋ ə nsaŋlə̀ ə ku ki kə a ghə̀ŋ kiʼi, Nyìngòŋ a shì kəku a kì, mu ghə̀ŋ sətsèn faŋ ke kiʼi kəfo, ko Nyìngòŋ a nki kəfo fa ghə̀ŋ.

¹³Ma ko gàʼà la ghə̀ŋ ku ne ənyʉ̀ ə bwaʼmə a viʼi vətsenvə ə tò a ghə̀ŋ. Ma bòŋsə̀ kəŋ to la nyʉ̀ ə ndiʼ to ndə̀ŋndəŋ a viʼi vətsèm.

¹⁴Ghə̀ŋ kiʼi fo luwen no ghoʼo, ma sə kəŋ la ghə̀ŋ ku a viʼi vətsenvə vyi a və ko kiʼi, ndiʼ vəwenə lù sə kiʼi be boŋ tomsə ghə̀ŋ azhʉ̀ a ghə̀ŋ gho. Kə yi ndiʼ alə ə nyʉ̀ a ndiʼ to ndə̀ŋndəŋ a ghə̀ŋ və tsèm,

¹⁵to ando və nyoʼo a Ŋwàʼlə̀ Nyìngòŋ la, “A ndiʼ ando və ndyʉ̀ boŋtə əfo ə zhɨvə a və ntoŋtə nə̀ mana lì, viʼi vyi a və nboŋtə və ghoʼo, kə byəʼkə nko faŋ, viʼi a və nboŋtə to ntèʼ ə mu sə kiʼi, ko və lù tyetə chòsə̀.”

¹⁶Ma ku Kəzòŋ kə Nyìngòŋ ando ghə̀ ne Taytùs sə kiʼi əkòŋ a ghə̀ŋ ando ma kiʼi.

¹⁷Ghə̀ tə byɨmə ə vi ə yen ghə̀ŋ ando yès tə gàʼ, ə sə gàʼà ali mu ghə̀ tə sə kòŋ ə vi no to fa wen a ngeŋ.

¹⁸Yès ə be tɨmə lèmə̀ yès ə tsen wenə wen, a diʼ wìʼ viʼi kòŋ wen a ntsèntə̀ sə viʼi Nyìngòŋ ashə̀ no akayn byìʼì ando ghə̀ kɨli ə shə̀ʼtə̀ ntɨm ə jùŋ.

¹⁹Ə kwʉ̀ʼsə, ghə̀ diʼ mu a tsuʼ ntsèntə̀sə viʼi Nyìngòŋ ntsuʼ wen la yo vəwenə njèʼè ne shyèʼ jùŋ ghə̀ a ghenə, ku əkuʼsə a Nyìngòŋ ə be diʼi la yès ə kòŋ ə ngyàmtə̀.

²⁰Yès ə mwomsə ə shə̀tə̀ ghaʼa kəku a kènkə byìʼì ando yès ə ko kòŋ la wìʼ ə lù ghàm yès ə gàʼ la yès ko tə nshɨtə ghaʼa kəku na kì.

²¹Yès ə ne alə̀ byìʼì ando yès bàʼtə li ə ne to nyʉ̀ a və kwʉ̀ʼ ashɨ Nyìngòŋ benə ashɨ viʼi.

²²Yès a sə tɨmə vəwenə be tɨmə boʼsə nə̀ lèmə̀ yès ə tsen, ghə̀ diʼ mù yès mwomsə li wen, ghə̀ ndiʼi a yès to aghayn aghayn la ghə̀ kòŋ ə ngyàmtə̀, be ndiʼi mwetə luwen ando ghə̀ choʼsə ghə̀ŋ no nànto la ghə̀ kòŋ ə gyàmtə̀ ghə̀ŋ.

²³A Taytùs, ghə̀ shyèʼè yo wen amuʼ nə̀ a kənyʉ̀ kə muʼ, ə gyàmtə̀ ghə̀ŋ. Vəlemə vətsenvə venə a wenə vəwenə diʼ amuʼ lyɨ kəshi kə ntsèntə̀sə viʼi Nyìngòŋ vyi a və diʼi ashə̀. Ə shyèʼ ə vəwenə ə nè, viʼi kuʼsə Yesò.

²⁴Ghə̀ŋ ə diʼ lì a viʼi a venə la ghə̀ŋ kòŋ vəwenə, la nyʉ̀ vyi a yès gàʼa kumə ghə̀ŋ diʼ to no nəmwèʼè, ndiʼ ntsèntə̀sə viʼi Nyìngòŋ yen no vətsèm.