Read Babanki 2 Kolìntyàns 9 Bible Online

2 Kolìntyàns 9 - Babanki bible

2 Kolìntyàns 9

¹Ma kɨli la ma ko tə be diʼ ə nyòʼo a ghə̀ŋ kumə əgyàmtə̀ yì a ghə̀ŋ kiʼi ə tɨm a viʼi Nyìngòŋ a Jelusalèm,

²byìʼì ando ma kɨli la ghə̀ŋ sə bvɨtə ə gyàmtə̀. Ma tə sə zhʉ kənyʉ̀ a ki ando viʼi Màsìdonìyà gàʼ la, ghə̀ŋ viʼi Akayà tə sə bvɨtə ə ku no fa ngʉ̀sə a sə cho li. Vəwenə tə zhʉ̀ əwen vəwenə sə fwomə vəwenə sə be kòŋ no nànto ə ku.

³Luwen ma mu ntɨm, vəlemə venə la vəwenə vi ndiʼ ghə̀ŋ baʼtə̀ ando mà tə gàʼ la ghə̀ŋ ə baʼtə̀. Kə ko bòŋ la vəwenə vi yen la mà tə zhʉ̀ kənyʉ̀ a kì to kədyàŋ.

⁴Kə sətsen fʉ̀ la yo viʼi Màsìdonìyà vi, yo vəwenə ko andiʼ la ghə̀ŋ baʼtə̀ li, a yès a diʼsə kətʉ kumə nyʉ̀ vyi a yès tə gàʼ kumə ghə̀ŋ, nkàyntə̀ ghə̀ŋ be diʼsə kətʉ no nànto.

⁵A le kənyʉ̀ kì a mà tə yen la kə bòŋ la mà gaʼa vəlemə venə vi ə yèn ghə̀ŋ ambì, wye vəwenə nè mwetə baʼtə̀ kumə kəku ki a ghə̀ŋ tə mbaʼtə̀, ə diʼ la à kòŋ to no ghə̀ŋ ə ku ko andiʼ la və kwiʼi ghə̀ŋ kwiʼi.

⁶Ghə̀ŋ diʼ kɨ la no ndò a ghə̀ wè to ntèʼ, a ghə̀ lù be pfì to ntèʼ, no ndò a ghə̀ wè no kə ghoʼo, a ghə̀ lù pfì to no kə ghoʼo.

⁷Nò tèbe ndo ə sə nku, ghə̀ nku to kəfo kì a ghə̀ ghʉ a wen tyɨm la ghə̀ a ku. Kə wìʼ na ku sə və kwiʼi wen kwiʼi. Kə wìʼ na sə ku nku sə ghə̀ kyemə kyemə byìʼì ando Nyìngòŋ kòŋ wìʼ yì a ghə̀ kù nə̀ saŋlə.

⁸Nyìngòŋ ə kiʼi kədyòʼ ə bwàʼsə ghə̀ŋ nə̀ əfo və ghoʼo chò vyi a ghə̀ŋ kəŋ ndiʼ ghə̀ŋ nkiʼi to kiʼi no məzhʉ̀ ə ntsèm be kiʼi kə kwʉ̀ʼʉ̀ nè nyʉ̀ ə jùŋə və tsu,

⁹ando və nyoʼo a Ŋwàʼlə̀ Nyìngòŋ la, “wu kənyʉ̀ kətɨməkə kə nə̀ kɨ ə ku əfo no ghoʼo a viʼi kəfem. Njùŋ wen faŋ li to ghayn ə mùʼ nəmwèʼè.”

¹⁰A kù Nyìngòŋ ku ngwaʼ a viʼi la və we, a ku to wen ku əfo ə zhɨvə, a diʼ to wen ə ku ə kwʉ̀ʼsə ngwaʼ a ghə̀ŋ, a ghə̀ŋ a ntsìnə̀sə ndiʼ ghə̀ŋ we ə na pfì jùŋ no ghoʼo.

¹¹Nyìngòŋ na bwaʼsə ghə̀ŋ ə ku tənki tə fo a ghə̀ŋ to tətsèm, a ghə̀ŋ a ngyàmtə̀ viʼi tsu. Ghə̀ŋ na ku a yès ə yès sə nku a viʼi, vəwenə nku kəzòŋ a Nyìngòŋ,

¹²byìʼì ando kəku a kènkə a ghə̀ŋ kù ko gyàmtə̀ to viʼi Nyìngòŋ. Ghə̀ŋ ne la vəwenə nku kəzòŋ a Nyìngòŋ no nànto.

¹³Əshyèʼè a ghenə a ghə̀ŋ ne lə̀ ə diʼi ətyɨm ə jùŋə ghə̀ yì a ghə̀ŋ kiʼi a viʼi, ə be diʼi mwetə la ghə̀ŋ zhʉ ntɨm ə jùŋ ə Yesò yì a ghə̀ŋ jèʼè shə̀ʼtə̀. Kənyʉ̀ na kì ə na ne, viʼi nkuʼsə Nyìngòŋ, to kədə̀ŋ.

¹⁴Viʼi na yen alə̀ ə nkòŋ ghə̀ŋ no nànto, jɨ̀mə̀ a ghə̀ŋ byìʼì ətuʼmə ə kaynəghə yì a Nyìngòŋ ə tuʼmə nə̀ vəwenə chò fa ghə̀ŋ.

¹⁵Kəzòŋ kə Nyìngòŋ byìʼì Wàyn wen yì a ghə̀ nku a vəghəŋ. A diʼ kəku kə kaynə kə.