Read Babanki Gàlesìyà 1 Bible Online

Gàlesìyà 1 - Babanki bible

Gàlesìyà 1

¹A nyòʼò mò Bol nyòʼò ŋwàʼlə̀ ghèn. Ma diʼ wù ə ntɨm ko andiʼ la à ghʉ viʼi. A ko tsuʼ wìʼ tsuʼ mo. A tsuʼ Yesò Klistò wenə Nyìngòŋ ə Tìʼ yi a ghə̀ nlùsə wen fa pfʉ ntsuʼ mo la ma ndiʼ wù ntɨm.

²Yo və vəlemə və byɨmə vì a və diʼ ashen ə tɨmə ətoŋtə a ghə̀ŋ ntsèntə̀sə viʼi və byɨməvə vyi a və diʼi shə ə Gàlesìyà.

³Nyìngòŋ ə Tìʼ vəghəŋ wenə Bobo Yesò Klistò ə diʼi ətyɨm ə jùŋə ghə̀ a ghə̀ŋ, ə be ku mbwaʼmə a ghə̀ŋ.

⁴Yesò ə nku li wen ə wen ə pfʉ byìʼì mbyɨsə vəghəŋ ə bwoŋsə vəghəŋ fa mbyi ghèn a mbyɨ ə ghoʼ tsu lə̀. A diʼ to kənyʉ̀ ki a Nyìngòŋ ə Tìʼ vəghəŋ ə nkəŋə.

⁵Ma jɨ̀mə̀ la viʼi Əkuʼsə Nyìngòŋ to məzhʉ̀ ə tsèm. Amèyn.

⁶Ma diʼ nə̀ əkaynə la ghə̀ŋ zaŋsə li kaʼkə fa bàm ə Nyìngòŋ yi a ghə̀ ndzàŋ ghə̀ŋ byìʼì ətyɨm ə jùŋə ghə̀ ə Klistò, luwen ghə̀ŋ sə dzɨ̀mtə̀ dyʉ̀ nə̀ ntɨm ə kədyàŋ.

⁷Ma ko gàʼà tebè la ntɨm ə jùŋə tsen be diʼ. Ma gàʼà la viʼi vətsenvə sə boŋsə sàsə̀ ətof ə ghəŋə, mwomsə ə nkwitə ntɨm ə jùŋ byìʼì ə Yesò.

⁸Alì, no tèbe wìʼ fa yès kò ntsɨ̀ŋ Nyìngòŋ fa kàŋ sətsèn be shə̀ʼtə̀ ntɨm, ghə̀ diʼ nəkwoŋ fa yi a yès ə nshə̀ʼtə̀ li a ghə̀ŋ, Nyìngòŋ moʼ ngəʼ a kətʉ wìʼ ayi.

⁹Yès ə tə ə gàʼ a ghə̀ŋ, ma sə be gàʼà kwʉʼsə luwen la, wìʼ sətsen ə nshə̀ʼtə̀ ntɨm ə kədyàŋ a ghə̀ŋ, a kodiʼ yi a ghə̀ŋ ə nzhʉ̀ fa yès, Nyìngòŋ a moʼ ngəʼ a kətʉ wìʼ ayi.

¹⁰Kə le diʼi luwen la, ma ne kənyʉ̀ ki a viʼi nkòŋ mò mu ki a Nyìngòŋ a kòŋ lo? A le diʼ la ma ne la viʼi ə nsaŋlə̀ mu? Mà sətsen ə nkəŋ ə ne la viʼi ə nsaŋlə̀, ko ma be a ndiʼ wù ə shwèʼè ə Klistò.

¹¹Vəlemə vwomə a byɨmə, ma kəŋə la ghə̀ŋ ə kɨ la ntɨm ə jùŋ yì a ma shə̀ʼtə̀ ə ko lù fa wìʼ.

¹²Ma ko tə zhʉ ntɨm na ghèn fa wìʼ, wìʼ ko tə ziʼi kənyʉ̀ a mò. A tə diʼ no nkàyntə̀ Yesò Klistò a ghə̀ tə diʼ nyʉ̀ na venə a mo no tsèm.

¹³Ma kɨli la ghə̀ŋ nzhʉ li ji yi a ma ə ntsi to ando ma mbo dzɨ̀mtə̀ ji shisə a viʼi Jus nkuʼsə Nyìngòŋ fa tsu. Ghə̀ŋ kɨli to ando ma ntsuʼ kəghʉ kə nòyn ə viʼi və byɨməvə no nànto be mwomsə ə myetə vəwenə.

¹⁴Ma ə nkɨli ə dzɨ̀mtə̀ ji shisə a viʼi Jus nkuʼsə Nyìngòŋ fa tsu chò tebe mbvòʼò ghom a ndiʼ viʼi Jus, ghʉ kətʉ tsu no nànto ntsi ntsìnə̀ a vətìʼ vwomə ntsi.

¹⁵Alì, Nyìngòŋ a ghə̀ ntsuʼ mo mibu və bwi mò, ə dzàŋ mò byìʼì ətyɨm ə jùŋə ghə̀ wen la mà ə shyèʼè a wen.

¹⁶A ndiʼ ando Nyìngòŋ ə nkòŋ ə diʼ Wàyn wen a mò ndiʼ mà shə̀ʼtə̀ ntɨm ə jùŋ kùmə̀ wen, a viʼi a nko diʼ viʼi Jus, ma nko dyʉ̀ ə bèm kənyʉ̀ a wìʼ.

¹⁷Ma ko nkuʼ no tèbe a Jelusalèm ə bèm kənyʉ̀ a viʼi ntɨm vyi a və sə ndiʼ a mo ambì. Ma boŋsə lù to lù dyʉ̀ a loʼ Alabìyà ə lù fa tsu ə bwensə vi to a Dàmasɨkùs.

¹⁸Ma ne kuʼ a Jelusalèm no abàm ə ngʉ̀ʼ sə tàʼ ə yen Bità, yo wen ə tsitə mətsi njʉ̀sə̀ tàyn.

¹⁹Ma ko be yen wù ə ntɨm ə tsen tsu a bwen to Jems, à ndiʼ lèmə̀ Bobo Yesò.

²⁰Kənyʉ̀ kèn a ma nyòʼò a ghə̀ŋ lə diʼ to nə̀ nəmwèʼè. Nyìngòŋ ə kɨ la ma ko zhò ndzɨ̀ŋ!

²¹Ma ne lù fa Jelusalèm ə ndyʉ̀ ashə ə Silìyà nə̀ Sìlisìyà.

²²A ndiʼ ali viʼi a və ndiʼ a ntsèntə̀sə viʼi vyi a və byɨmə Klistò a ashə Jùdiyà ə nko kɨ mo.

²³Vəwenə ə nzhʉ̀ Nyʉ̀ to zhʉ̀ a viʼi ngàʼà kùmə̀ mò la, “Wìʼ yi a ghə̀ tə ntsuʼ kəghʉ kə vəghəŋ fa ambì lì ə bwensə li sə shə̀ʼtə̀ kənyʉ̀ kumə əbyɨmə yì a ghə̀ tə nkəŋə la ghə̀ mè.”

²⁴Vəwenə mù sə bwomsə Nyìngòŋ byìʼì mò.