Read Babanki Gàlesìyà 2 Bible Online

Gàlesìyà 2 - Babanki bible

Gàlesìyà 2

¹A ndiʼ abàm ə ngʉ̀ʼsə njʉ̀sə̀ kàʼ, ma be bwenə kuʼ a Jelusalèm yo Bànabàs. Ma mbe lyɨ Taytùs.

²Ma nkuʼ tsu byìʼì ando Nyìngòŋ ə diʼi a mò la ma diʼ ə kuʼ. A ndiʼ to ando ma diʼi tsu, ma nyoʼtə gàʼ to fa abàm fa abàm yo viʼi vyi a və ndiʼ tʉtʉ ntsèntə̀sə viʼi vəbyɨməvə a Jelusalèm, ə shətə shə̀ʼtə̀ ntɨm ə jùŋ yì a ma ə nshə̀ʼtə̀ a viʼi a nko diʼ viʼi Jus. Ma ə nshə̀ʼtə̀ ali ndiʼ shyèʼ yì a ma ne luwen nə̀ yi a mà tə nè, kə ghə̀ lə lè to kədyàŋ.

³Taytùs ndiʼ to yo wen ali kò və lu kàyn la və diʼ ə shətə ndyə̀ wen no tèbe ando ghə̀ ndiʼ wù ə Gɨ̀lìs.

⁴Kənyʉ̀ a kèn la və shətə ndyə̀ Taytùs ə fʉ mu à lùsə viʼi və byɨməvə kənlobtə vətsenvə tsu, a və vi nyoʼtə kwen a yès a ntìntìn ə sə mwòmsə ə yen la yes ə tsi ntsìnə̀ yi a yes ə tsi fa yes a ngəŋsə yo və Yesò Klistò a kənyʉ̀ kəmùʼ ale lo. Vəwenə ə kəŋ to ji ə bwensə nè yès ndiʼ əkòs a əsoʼ ə viʼi Jus.

⁵Yès ə nko ə byɨmə kənyʉ̀ na ki no tebe a fəshinə fəzhʉ no fa mpfen, byìʼì ando yès ə kəŋə la ntɨm ə jùŋ ə ghèn a diʼ nəmwèʼè lə faŋ to ghayn ə mùʼ a ghə̀ŋ.

⁶Viʼi vi a və nlyɨ la a diʼ tʉtʉ tsu nko be kiʼ kənyʉ̀ ə kwʉ̀ʼsə akwi kənyʉ̀ yi a ma ziʼi. Ko vəwenə ndiʼ tèbe tʉtʉ ko vəwenə ko diʼ, na ki ə ko diʼi tebè kənyʉ̀ kə tsen kə a mò byìʼì ando Nyìngòŋ ə ko ki fa kəʼ la wìʼ diʼ ndo lo.

⁷Vəwenə ə mboŋsə li yen la Nyìngòŋ ə wè li shwèʼ a ghenə a mo a kəvu la mà shə̀ʼtə̀ ntɨm ə jùŋ a viʼi a ko diʼ viʼi Jus, ndə̀ŋndəŋ to ando ghə̀ ə mbe wè a kəvu a Bità la ghə̀ shə̀ʼtə̀ a viʼi Jus.

⁸Nyìngòŋ a ghə̀ ne la Bità ə ndiʼ wù ntɨm a viʼi Jus diʼ to wen yi a ghə̀ ne la mà ə ndiʼ wù ə ntɨm a viʼi a ko diʼi viʼi Jus.

⁹A sə diʼ to ando Jems wenə Bità nə̀ Joyn a ndiʼ no nàʼ tovə ghaʼ nyʉ̀ a ntsèntə̀sə ə viʼi vəbyɨməvə yen la Nyìngòŋ ə diʼi li ətyɨm ə jùŋə ghə̀ a mò ə ne ma sə be shə̀ʼtə̀ ntɨm ə jùŋ na ghèn, vəwenə ku kəvu a yo Bànabàs, ə diʼi la yo vəwenə sə diʼ to a kənyʉ̀ kəmùʼ. Yo vəwenə mù ghʉ la, yès a nshə̀ʼtə̀ ntɨm ə jùŋ a viʼi a ko diʼ viʼi Jus vəwenə shə̀ʼtə̀ a viʼi Jus.

¹⁰Vəwenə ə be gàʼ ə kwʉ̀ʼsə to la kə yès ne lyesə ə ngyàmtə̀ viʼi kəfem, a diʼ to kənyʉ̀ ki a ma kòŋ no nànto ə nè.

¹¹A ndiʼ ando Bità nvi a Antìyòk, ma nkəŋkə li ə wen to ashɨ ə̀ viʼi byìʼì ando kənyʉ̀ ki a ghə̀ ne nko diʼ kənyʉ̀ kətɨməkə.

¹²A ndiʼ mibu Jems ə tɨm viʼi la və vi tsu, Bità ə nzhɨ̀ wenə viʼi a nko diʼ viʼi Jus, ko və shətə li ndyə̀ vəwenə. Viʼi a vyi vì no zhʉ̀ko, Bità ə zìtə̀ sə kòtə̀ abàm ko ghə̀ be zhɨ̀ tebè wenə viʼi kətɨm na vi byìʼì ando ghə̀ ə fwàynə̀ viʼi vyi a vəwenə ndiʼ la, və diʼ ə shətə ndyə̀ viʼi ətɨm vyi a və byɨmə li.

¹³Viʼi Jus vətsenvə ə sə be ne to nə̀ wen, no tèbe Bànabàs ə shəmə kənyʉ̀ kə kəndzɨ̀ŋtə̀ na kènkə.

¹⁴A sə diʼ ando mà yen la vəwenə ne nyʉ̀, ko diʼ nyʉ̀ ə tɨməvə to ando ntɨm ə jùŋ yì a ghə̀ diʼi nəmwèʼè ə nziʼi, ma gàʼ a Bità to ashɨ ə viʼi və tsèm ə bèm la, “Wù jeʼ ale ə ndiʼ wù ə Jus, tsi to nə̀ wù kətɨm, boŋsə kaynə la viʼi kətɨm ə ntsi to nə̀ viʼi Jus a?

¹⁵“Vəghəŋ no fa vəghəŋ a ngeŋ diʼ viʼi Jus to no ando və mbwi vəghəŋ, ko ndiʼ la vəghəŋ diʼ viʼi kətɨm vi a və gàʼà la à diʼ viʼi nyʉ̀ ə byɨvə,

¹⁶alì kɨ la və ko ghʉ tebè to la wìʼ diʼ nti a nkayn byìʼì ando ghə̀ ghʉ Əsoʼ viʼi Jus. Wìʼ diʼ nti a nkàyn azhʉ̀ a ghə̀ byɨmə a Yesò Klistò. Vəghəŋ ə sə diʼ mù vəghəŋ be byɨmə a Yesò Klistò ndiʼ vəghəŋ ə ndiʼ a ji tɨmə ashɨ Nyìngòŋ. Əsoʼ ə zizi ko ghə̀ lù ne la wìʼ ə nti a nkàyn ashɨ Nyìngòŋ.

¹⁷Alì vəghəŋ sətsen ə mwomsə ə nti a nkàyn a shɨ ə Nyìngòŋ byìʼì ando vəghəŋ və Yesò diʼ amuʼ, ə be yenə la vəghəŋ ne mbyɨ, kə a ndiʼi la Yesò ə nè la vəghəŋ ə ne mbyɨ mu? Kə ko diʼ alì no fa mphen!

¹⁸Mà sətsen kaʼkə be nè kənyʉ̀ mu ma tə tensə, a kə a diʼi la ma kwaʼa li Əsoʼ.

¹⁹Mà tə ntsi a tyi Əsoʼ alì ko ndiʼ la ghə̀ gyàmtə̀ mò. Luwen ma nghʉsə soʼ na yi ndi ə ntsi to kuʼsə Nyìngòŋ.

²⁰Və bayntə li mò a kəntò yo Klistò. Mà sə diʼ luwen, ko ma be tsi fa mo a ngeŋ, à sə tsi Yesò a mò tyɨm. Ə ntsìnə̀ yì a ma tsi luwen diʼ byìʼì əbyɨmə yì a ma kiʼi a Wàyn Nyìngòŋ yi a ghə̀ nkòŋ mo ə pfʉ byìʼì mò.

²¹Mà zizi ko ma lu tensə ətyɨm ə jùŋə ghə̀ Nyìngòŋ. Wìʼ sətsen sə diʼ ndiʼ ti a nkayn wenə Nyìngòŋ byìʼì to ando ghə̀ ghʉ Əsoʼ, à ne ndiʼ la Yesò mpfʉ to kədyàŋ.”