Read Babanki Gàlesìyà 4 Bible Online

Gàlesìyà 4 - Babanki bible

Gàlesìyà 4

¹Kənyʉ̀ a ma gaʼa diʼ la, və sətsen ghʉ wàyndyə a njɨkəbəŋ, ghə̀ bo tyetə, ko ghə̀ lu zhɨ̀ kəfo a kəbəŋ ayì to nə̀ njɨkəbəŋ, ghə̀ a diʼ to sə ghə̀ lye əfo lye, no tèbe ando əfo na vyi kiʼi to no wen.

²Ghə̀ sə kiʼ viʼi a və tuʼmə nə̀ əfo ə wen, be tùʼmə̀ no tebe nə̀ wen, ə zaʼa ando ghə̀ kwi kwʉ̀ʼ ando tìʼ wen nkəŋ.

³Kə diʼ to ndə̀ŋndəŋ ando vəghəŋ ə mbo ndiʼ ko vəghəŋ kɨ nyʉ̀ vyi a və diʼi nəmwèʼè, vəghəŋ shyèʼ kəkòs a zhwì vyi a və soʼo mbi.

⁴Əzhʉ lu kuʼ kwʉ̀ʼ, Nyìngòŋ ə tɨm Wàyn wen. A mbwi wùwì bwi wen, ghə̀ kwi kuʼ a tyi Əsoʼ viʼi Jus,

⁵to ghə̀ ka zen kətʉ kə viʼi vyi a və ndiʼ ati Əsoʼ na yi, ə nè la vəghəŋ ə diʼ vunə ə Nyìngòŋ.

⁶Ando ghə̀ŋ sə diʼ vunə a Nyìngòŋ, ghə̀ wè li Kəzhwì kə Wàyn wen a vəghəŋ a tətyɨm, kə sə ne vəghəŋ dzàŋə Nyìngòŋ gàʼa la, “Bàba, Bàba ghom.”

⁷Kə le diʼi la ghə̀ŋ ko be diʼ əkòs. Ando ghə̀ŋ ə diʼ vunə Nyìngòŋ lə, Nyìngòŋ lu ku əfo vyi a ghə̀ kiʼi a nə̀ vunə wen.

⁸A ndiʼ fa ambì ando ghə̀ŋ nko tɨmə ə bo kɨ Nyìngòŋ, ghə̀ŋ ndiʼ əkòs a fo ə tsenəvə, a ko diʼ tèbe Vənyìngòŋ.

⁹Alì ghə̀ŋ sə ə kɨ Nyìngòŋ luwen. Ma zì ma gaʼa la a diʼ Nyìngòŋ a ghə̀ kɨ ghə̀ŋ. Ghə̀ŋ zizi ghə̀ŋ be bwensə ə shyèʼ a nə̀ ə kəkòs a zhwì ə bwaʼvə kədyàŋ kədyàŋ venə a və soʼ mbyi lə? Byìʼì ghò a ghə̀ŋ kəŋ ə be ə kaʼkə əkòs a əzhwì bwaʼvə kədyàŋ kədyàŋ venə a?

¹⁰Ghə̀ŋ ghʉ li la mətsi mə tsèn, nə̀ və sàŋ və tsenəvə, nə̀ ngàm sə tsensə, nə̀ ngʉ̀ʼ sə tsensə sə diʼ boŋ nəkwoŋ.

¹¹Ma ə fwàynə̀ la ma tə nghomə̀ to ə wèn a mò a shwèʼ yi a mà tə ne a ghə̀ŋ.

¹²Vəlemə vwomə a byɨmə, ma sensə la ghə̀ŋ diʼ to nə̀ mò byìʼì ando mà sə diʼ to nə̀ ghə̀ŋ. Ghə̀ŋ ko nè kənyʉ̀ kəbyɨkə kətsen a mò.

¹³Ghə̀ŋ kɨli la ma ə nvi ə shə̀ʼtə̀ ntɨm ə jùŋ a ghə̀ŋ fa ambì zhʉ mu à nè kwaʼa a ma tə kwaʼa.

¹⁴Əkwaʼa ghomə na yi ə ndiʼ a ghə̀ŋ to nə̀ əmwòmsə̀ ə tsen ghə̀, ali ghə̀ŋ ko nyeʼsə mò ko ghə̀ŋ lu maʼa mò. Ghə̀ŋ ə nshisə mò ando ghə̀ŋ zi ghə̀ŋ shisə ntsɨŋ Nyìngòŋ. Ghə̀ŋ ə shisə mò ando ghə̀ŋ zi ghə̀ŋ shisə nkàyntə̀ Yesò Klistò.

¹⁵A tə fʉ ghò kumə saŋlə yì a ghə̀ŋ tə nkiʼ a? Ma gaʼa to no nəmwèʼè la, kə tu tə mbwaʼmə mu ghə̀ŋ ə ntsuʼtə li ashɨ à ghəŋə ə ku a mò.

¹⁶Mà lə kaʼkə li a wù kəbàyn luwen a ghə̀ŋ to byìʼì ando mà gàʼa nəmwèʼè mu?

¹⁷Viʼi na vi ə lɨmə to alə a ghə̀ŋ kənyʉ̀ ndi ghə̀ŋ byɨmə kənyʉ̀ a vəwenə gaʼa, ali kiʼ to əkwoʼtə ə byɨghə. Vəwenə ə kəŋ la ghə̀ŋ moʼtə mo ə lɨmə to nyʉ̀ a vəwenə gaʼa.

¹⁸Kə bòŋə to no ə lɨ̀mə̀ a nyʉ̀ a wù ne azhʉ a diʼ nyʉ̀ jùŋə və no zhʉ̀ko. Ghə̀ŋ ə lɨ̀mtə̀ to məzhʉ ntsèm a ko diʼ to azhʉ̀ a vəghəŋ diʼ to muʼ.

¹⁹Vunə vwomə və juŋəvə, ma zhʉ̀ lɨ̀m kumə ghə̀ŋ to no ando luwàyn nə̀ azhʉ̀ lɨm ə wàyn. Ma ne nzhʉ lɨ̀m to alə ə zaʼa ando ghə̀ŋ ne ntsi ntsìnə̀ to nə̀ Klistò.

²⁰Ndò ku la vəghəŋ diʼ to a muʼ luwen ndiʼ mà kwitə ji yi a mà gàʼ fa tsù a ghə̀ŋ a? Ətyɨm ə ghomə ku ngəʼ a mò kumə ghə̀ŋ no nànto.

²¹Ghə̀ŋ venə a ghə̀ŋ kəŋ ə ntsi ati Əsoʼ alə̀, ghə̀ŋ shə̀ʼtə̀ li a mò la, ghə̀ŋ ko kɨ kənyʉ̀ ki a Əsoʼ gàʼ mu lo?

²²Və nyòʼo li a ŋwàʼlə̀ Nyìngòŋ la, Ablaham ə nkiʼi vunə və lʉmə və bò. Ghə̀ tsen diʼ mu à mbwi wùwì, a ndiʼ kəkòs a wen, ghətsen diʼ mu à mbwi wùwì, a kodiʼ kəkòs.

²³Wàyn yi a lì wen ndiʼ kəkòs li ə sədiʼ mu və bwi to no ando və nə̀ bwi no ndò, ali yi a lì wen ko diʼ kəkòs diʼ mu və bwi byìʼì ando Nyìngòŋ nghʉ̀.

²⁴Vəghəŋ zizi və lyɨ nyʉ̀ na venə ə shəʼmə kənyʉ̀ tsu. Ki venə və bò lə̀ ndiʼ to nə̀ məkàyn na mèyn ə mbò. Ghə̀ muʼ ə lyɨ kəshi kə məkàyn mi a Nyìngòŋ ə zhɨ̀ wenə Mosìs a phèn ə Sinày, ghə̀ bwi li vunə, vəwenə ndiʼ ə ndiʼ əkòs. Əzhiʼ wùwì na ghèn ə ndiʼ Hagà.

²⁵Hagà lyɨ kəshi kə phèn ə Sinày alòʼ ə Alabìyà. Ghə̀ lyɨ kəshi kə Jelusalèm yì a ghə̀ diʼi luwen. Wen wenə vunə wen diʼ əkòs.

²⁶Sèla lyɨ kəshi kə Jelusalèm yì a ghə̀ diʼi akàŋ, ko ghə̀ diʼ kəkòs. Ghə̀ diʼ lì vəghəŋ.

²⁷Və nyòʼò li a Ŋwàʼlə̀ Nyìngòŋ la: “Wù nsaŋlə a wùwì yi a wù ko tɨmə bwi wàyn. Wù zɨmə naynə a wù yi a wàyn ko tɨmə zaf ə wù, byìʼì ando wùwì yi a və kyemə sə kiʼ vunə, və ghoʼo chò vunə wùwì yì a ghə̀ kiʼi lɨm.”

²⁸Vəlemə vwomə a byɨmə, ghə̀ŋ diʼ to nə̀ Izìk byìʼì ando ghə̀ŋ diʼi vunə Nyìngòŋ ando ghə̀ nghʉ̀.

²⁹A ndiʼ a tʉʼ na yì, wàyn wùlɨm yi a və mbwi wen to no ando və nə̀ bwi no tèbe wàyn kò, sə tsuʼ kəghʉ kə wàyn yi a və sə bwi mu à nè Kəzhwì kə ŋwoʼkə lì. Kə le be fʉ̀ to ali luwen.

³⁰Alì Ŋwàʼlə̀ Nyìngòŋ ə gàʼa la ghò? Ghə̀ gaʼa la, “Saŋ ə wùwì kəkòs yi wenə wàyn wen, byìʼì ando wàyn kəkòs na ghèn ko lu zhɨ̀ tebè fa kəfo ə tiʼi vəwenə. A lu zhɨ to wàyn wùwì yi à ko diʼ kəkòs.”

³¹Ghə̀ŋ yen li a vəlemə vwomə a byɨmə la, vəghəŋ ko diʼ vunə wùwì kəkòs yì. Vəghəŋ ə diʼ vunə wùwì yi à ko diʼ kəkòs.