Read Babanki Gàlesìyà 5 Bible Online

Gàlesìyà 5 - Babanki bible

Gàlesìyà 5

¹Klistò shisə li vəghəŋ fa əshyèʼ kəkòs, ndi vəghəŋ ə ndiʼ fa vəghəŋ a ngəŋ. Ghə̀ŋ nshɨtə lì ghaʼ təwen ə təŋtə, kə wìʼ be na bwensə ne ghə̀ŋ, ghə̀ŋ əshyèʼè kəkòs a soʼ.

²Ghə̀ŋ zhʉtə! a gàʼa mò Bol a ghə̀ŋ la, ghə̀ŋ sətsen moʼtə la və shətə ndyə̀ ghə̀ŋ, a kə a ndiʼi la kənyʉ̀ ki a Klistò nè a ghə̀ŋ le li to kədyàŋ.

³Ma be shɨtə shə̀ʼtə̀ to no shə̀ʼtə̀ a ghə̀ŋ la, no ndò a ghə̀ byɨmə la və shətə ndyə̀ wen, ghə̀ ə kɨ la ghə̀ diʼ ə ghʉ no tə Əsoʼ tə tsèm.

⁴Ghə̀ŋ vyi a ghə̀ŋ kəŋ ə nti akayn ashɨ Nyìngòŋ ə byìʼì ando ghə̀ŋ ghʉ Əsoʼ ghenə, kɨ la ghə̀ŋ gə̀sə̀ li təwen ətəŋtə fa Klistò. Ghə̀ŋ tyenli ətyɨm ə jùŋə ghə̀ yi a Nyìngòŋ ə diʼi li a ghə̀ŋ.

⁵Kəzhwì kə Nyìngòŋ kə nè la vəghəŋ kɨ nəmwèʼè la vəghəŋ lu ətɨmə akayn ashɨ Nyìngòŋ byìʼì əbyɨmə ə vəghəŋ.

⁶Kə diʼ alə̀ byìʼì ando vəghəŋ sətsen ə ndiʼ vəghəŋ və Yesò Klistò, kò wìʼ shətə li ndyə̀ wen kò ghə̀ ko shətə, na kì kə ko kiʼi tebè kənyʉ̀ ə nè. Kənyʉ̀ kə tokə diʼ to la, wìʼ na ndiʼi əbyɨmə ə wen chò fa ji a ghə̀ ne koŋə viʼi fa tsu.

⁷Ghə̀ŋ tə nè akayn. Ma ko kɨ la à tə be tàʼsə ghò tàʼsə ghə̀ŋ la kə ghə̀ŋ ghaʼ kənyʉ̀ kì a kə diʼ nəmwèʼè lo?

⁸Kənyʉ̀ kì a kə tə ne la kə ghə̀ŋ ghaʼa kənyʉ̀ ki a ko diʼ nə̀ nəmwèʼè ko tə lù fa Nyìngòŋ yi a ghə̀ dzàŋ ghə̀ŋ.

⁹Ngàyn tsen nə̀ diʼ la, fəshɨ̀ŋ fə nə̀ tyetə tèbe a le, fə ne makàlà mə kuʼ.

¹⁰Ma kɨli la ando vəghəŋ sə tsèntə diʼ to kənyʉ̀ kə mùʼ vəghəŋ və Bobo, la ghə̀ŋ ko a ndzɨ̀mtə̀ kənyʉ̀ kə wìʼ, a bwen to kənyʉ̀ ki a ma gàʼà, Nyìngòŋ ə na ku ngəʼ a wìʼ yi a ghə̀ nfɨŋsə ghə̀ŋ, kò à diʼ no tebè ndò.

¹¹Və le bè ə tsuʼ to kəghʉ komkə a gho, a vəlemə vwomə, azhʉ̀ a kə diʼ nəmwèʼè la, ma ziʼi la və diʼ ə shətə ndyə̀ ə viʼi a? Kə sətsen ə ndiʼ nəmwèʼè, mu ziʼi yì a ma ziʼi kumə Klistò a ghə̀ mpfʉ a kəntò ko be zafə viʼi Jus.

¹²Ma jɨ̀mə̀ la viʼi vyi a və kəŋ la və nshɨtə ndyə̀ ghə̀ŋ, vəwenə zoʼo təwen tə və wenə.

¹³Vəlemə vwomə a byɨmə, Nyìngòŋ ntsuʼtə li ghə̀ŋ la kə ghə̀ŋ be andiʼ əkòs a əsoʼ ali, kə ghə̀ŋ ghʉ la ando ghə̀ŋ sə diʼ fa ngə̀ŋ la ghə̀ŋ zizi ghə̀ŋ ə nkwetə tèbe ghò yi a ghə̀ fwomə a ghə̀ŋ njòsə wen, ghə̀ŋ sə ne to ne. Ghə̀ŋ ə boŋsə kòŋ təwenə təŋtə. Ə kòŋ a yi ne ghə̀ŋ shyèʼè a vəlemə vəŋə vətsenvə.

¹⁴Nò təsoʼ tə tsèm tsèntə vi fʉ to a əsoʼ ə mùʼ la, “Kòŋ no ndò a wù yenə to ndə̀ŋndəŋ ando wù kòŋ wenə wù.”

¹⁵Alì mu ghə̀ŋ sətsen kaʼkə ə ne to nə̀ nyamsə ətòʼ ə mphiʼi təwen, ghə̀ŋ nkɨ la ntsèntə̀ ghə̀ŋ zizi ghə̀ na mè no ə tsèm.

¹⁶Ma kəŋə gàʼ a ghə̀ŋ la, Ghə̀ŋ ə tsi ando kəzhwì kə Ŋwoʼkə ə tisə ghə̀ŋ. Ghə̀ŋ sətsen ə nè alə, ko ghə̀ŋ be na nè nyʉ̀ vyi a və fwomə a njòsə wen.

¹⁷Ənyʉ̀ vyi a və fwomə a njòsə wèn nkòŋə̀ la vəghəŋ ne, ko diʼ nyʉ̀ vyi a kəzhwì kə Nyìngòŋ kə kəŋə la vəghəŋ nè, ə vyi a kəzhwì kə Nyìngòŋ kə kəŋ la vəghəŋ ə ne a ko diʼ nyʉ̀ vyi a njòsə wen ə vəghəŋ kòŋə̀ ə nè. Ənyʉ̀ na venə diʼi to soyn diʼ la wù ə ne no tebe ghò na yi a wù kòŋə̀ nè.

¹⁸Alì mu kəzhwì kə Nyìngòŋ kə sətsen ə ntisə ghə̀ŋ, ko ghə̀ŋ be na ntsi atyi Əsoʼ.

¹⁹Ənyʉ̀ vyi a njòsə wen sə kòŋ ə ne ə diʼ to a ndayn. Nyʉ̀ venə diʼ: Ə kòŋ la viʼi ntsi nə̀ ki kò nə̀ vəlɨm və viʼi, tsi ə ntsìnə̀sə kəməŋ, tsi to nə̀ bʉsə,

²⁰gumlə nshəʼsə, shəŋə mənyoʼ, bàynə̀ viʼi, soynə, kiʼi kəghəʼ, zaŋsə fwisə tin, kwoʼtə kumə to tə wèn tə vəwenə, ə vi nə̀ kəgəsə kə, gə̀sə̀ viʼi a mənoyntə

²¹kiʼ ashɨ kəmbàŋbàŋ, nyʉ chòsə̀ məlyʉ̀ʼ bomə, kòŋ ə nzhùŋtə̀ ashi nyʉ məlyʉ̀ʼ ne to nə̀ bʉsə. Nki ənyʉ̀ a vyi diʼ to kədə̀ŋ. Ma kù kətyiftə a ghə̀ŋ luwen ndə̀ŋndəŋ ando ma tə ku fa ambì la, “Viʼi vi a və nè nyʉ̀ na venə ko lu kiʼi kəshi a akəshi kə əfòynə ə Nyìngòŋ.”

²²Alì kəzhwì kə Ŋwoʼkə kòŋ la: viʼi ə̀ nkòŋ vətsevə, saŋlə, kiʼ mbwaʼmə, wensə, kiʼi tyɨmə jùŋ ghə̀ be nè njùŋ a viʼi, choʼsə viʼi.

²³Gumlə, kɨ ə ghaʼ təwen. Əsoʼ ə tsenə ghə̀ ə ko tensə tebè no kənyʉ̀ kə mùʼ fa ntìntìn nyʉ̀ a ghèn.

²⁴Viʼi Yesò Klistò diʼ mu vəwenə bayntə li njòsə əwèn nə̀ vəwenə boʼsə nə̀ nyʉ̀ vyi a və fwomə la və nə̀ nè a kəntò.

²⁵Luwen to ando vəghəŋ sə tsì byìʼì Kəzhwì kə Ŋwoʼkə lə, vəghəŋ diʼ ne to nyʉ̀ vyi a kə kəŋə la vəghəŋ ə nè.

²⁶Kə vəghəŋ na ghaŋsə əwèn, kə vəghəŋ na tyinsə tyinsə vəlemə və vəghəŋ, kə vəghəŋ be lye vəwenə nə̀ ashɨ a byɨghə.