Read Babanki Filìbàyns 2 Bible Online

Filìbàyns 2 - Babanki bible

Filìbàyns 2

¹Ghə̀ŋ ndìʼ a kənyʉ̀ kəmùʼ Ghə̀ŋ və Klistò, nakènkə ku tətyɨm tə totə à ghə̀ŋ. Klistò ə kòŋə̀ ghə̀ŋ, ə kòŋ a ghenə bè ku tətyɨm tə zhʉtə tə à ghə̀ŋ. Ghə̀ŋ və Kəzhwì kə ŋwoʼkə diʼ a kənyʉ̀ kəmùʼ. Ghə̀ŋ ə nkìʼ tətyɨm tə bwaʼmətə bènə̀ kusə nshinsə à ghə̀ŋ ə ntìntìn.

²Ando ənyʉ̀ avenə diʼ nəmwèʼè lə̀, mà sensə̀ ghə̀ŋ la ghə̀ŋ be ə nè ənyʉ̀ tsenəvə venə ndi saŋlə ghomə kwʉʼ ə̀ mè. Ghə̀ŋ ə nkiʼ tò kwòʼtə̀ mùʼ, kòŋmə̀ təwen ə təŋtə be shyèʼè tò nè ə tyɨmə mùʼ.

³Kə ghə̀ŋ a nkwòʼtə̀ tò byìʼì təwen ə təŋtə, kə wìʼ a ə nè kənyʉ̀ ə kuʼsə wèn ə wen. Ghə̀ŋ ə mbòŋsə̀ kiʼ ə shiʼsə wèn à ghə̀ŋ ə ntìntìn be lyɨ̀ la viʼi vətsenvə chò ghə̀ŋ.

⁴Kə ghə̀ŋ a ə nè tò ənyʉ̀ a və ku əsè tò à ghə̀ŋ. Ghə̀ŋ ə nè vi a və bè a ku əsè à viʼi vətsenvə.

⁵Ghə̀ŋ ə nkiʼ tò ntsìnə̀ yì a Yesò Klistò ə̀ nkìʼ lì.

⁶Ghə̀ ə̀ mbè ndiʼ Nyìngòŋ alì kò ghə̀ lù kwòʼtə̀ əlyɨ̀ əwen ə wen ndə̀ŋndəŋ wenə Nyìngòŋ.

⁷Ghə̀ bòŋsə̀ ghʉ̀sə no tè ghò ə̀ wen və bwi wen ə nə̀ Wùmə̀nsòŋ, Ghə̀ kaʼkə sə̀ diʼ wù shwèʼ.

⁸Ghə̀ mbè shiʼsə wen ə wen a nse ə̀ byɨmə ə pfʉ ə pfʉ byɨghə a kəntò.

⁹Byìʼì nakènkə, Nyìngòŋ kuʼsə wen a kəshi a kə ŋaŋtə chò no shì tsèm ə̀ kù zhiʼ à wen a ghə̀ chò no təzhiʼ tə tsèm.

¹⁰Nyìngòŋ ə nè ali ndi no tè ghò yì a ghə̀ diʼì a kàŋ ko a nse ko a loʼ vəmpfʉ və nse ə gʉtə nchiʼsə a lwi a nse ə ngumlə̀ əzhiʼ ə Yesò.

¹¹No tè ndò be ə ngàʼà a ndayn la Yesò Klistò dìʼ Bobo gàʼà a lì, ghoʼsə̀ Nyìngòŋ a diʼì Nyìngòŋ ə̀ Tìʼ.

¹²Luwen a vəlèmə̀ və kòŋ ə̀ mò, ando ghə̀ŋ tə zhʉ gɨ̀ ghom, ando mà ndiʼ vəghəŋ, kə a mbòŋsə̀ bòŋə̀ no nkàyn la ghə̀ŋ ntùʼtə̀ zhʉ gɨ̀ ghom ando mà ko bè diʼ vəghəŋ. Ghə̀ŋ myetə nè əshyèʼ yi a ghə̀ faŋə̀ nə̀ gumlə ghə bènə̀ fwàyn ə Nyìngòŋ ndi Nyìngòŋ myetə li bwoŋsə̀ ghə̀ŋ.

¹³Kədiʼ a li byìʼàndo Nyìngòŋ diʼ wenə vəwenə no məzhʉ tsèm, ku kədyòʼ la ghə̀ŋ ə nkòŋ ənè nyʉ̀ a ghə̀ kəŋə la ghə̀ŋ ə nè.

¹⁴Ghə̀ŋ ə nè ənyʉ̀ tsèm tò achi achi, kə ghə̀ŋ ə dèmkə̀ ko ə ntaŋmə̀.

¹⁵Sətsen ghə̀ŋ ne alə ko wìʼ lù ghàm ghə̀ŋ a kənyʉ̀. Ghə̀ŋ be ə ndiʼ viʼi kənyʉ̀ kə tɨməkə bè kwʉ̀ʼ mè a nə vunə və juŋəvə Nyìngòŋ a və tsi a tyì mbyi mbyɨsə nə̀ viʼi mbyɨsə. Ghə̀ŋ diʼi ə ndiʼ à vəwenə ntìntìn alì diʼ əbayn à vəwenə to nə mədzɨ̀ŋ.

¹⁶Ghə̀ŋ ə ntsi ando ntɨm ə̀bwòŋ ghèn ə ziʼì la və ntsi ndi à lu ndiʼ a kətsi a Klistò ə bwènə̀ vì, mà ə nsaŋlə̀ la mà ko nshwèʼè kwàʼtə̀ əwen ə ghomə tò kədyàŋ.

¹⁷Mà ne saŋlə̀ be nàynə̀ vəghəŋ a muʼu. Və sətsèn ə̀ zhwì tè mò luwèn mənlyuŋ ə̀ mwomə̀ à dyʉ̀ kwʉ̀ʼsə̀ kəku kì a ghə̀ŋ ə ku à Nyìngòŋ byìʼì əbyɨmə ghəŋə.

¹⁸Ghə̀ŋ diʼ be ə nsaŋlə̀ be nàynə̀ vəghəŋ a muʼu to ndə̀ŋndəŋ.

¹⁹Sətsen Bobo Yesò a tomsə mo ə mà tɨm Timotì à ghə̀ŋ to mətsi ghèn ndi ghə̀ bwenə vì ə̀ shyə̀ʼtə̀ soʼgho à mò byìʼì ghə̀ŋ ə̀ nè ma ə nsaŋlə̀.

²⁰A dìʼ tò wen a ghə̀ kiʼì əkwoʼtə a mà kiʼì byìʼì ghə̀ŋ be kòŋə̀ ə ngyàmtə̀ ghə̀ŋ.

²¹No tè ndò ə nè tò kənyʉ̀ kə ngəŋ ə wen kò vəwenə lu nkòŋə̀ ənè ənyʉ̀ vyi a Yesò Klistò ə kəŋə.

²²No nkàntə̀ ghə̀ŋ ə kɨ əshwèʼ Timotì. Ghə̀ shyèʼè li yo wen ənè la viʼi byɨmə ntɨm ə jùŋ to ndə̀ŋndəŋ ji a wàyn nə̀ shyèʼè à tìʼ wen.

²³Mà kwòʼtə̀ ətɨm ə wen à ghə̀ŋ no zhʉ̀ kò a mà kɨ kənyʉ̀ a kə a fʉ̀ à mò.

²⁴Mà choʼsə̀ à Bobo la kəghaf kə ko be a dyə̀fə ə nkàntə̀ mò vi ə̀ yèn ghə̀ŋ.

²⁵Mà yen li kə be bòŋə̀ la mà be bwensə ə̀ tɨ̀m lèmə̀ vəghəŋ ə Èbàfàlòditùs à ghə̀ŋ. Yo wen ə shyèʼè əsoyn be ntem əghoŋ ghenə a muʼu. A dìʼ wù ntɨm a ghə̀ŋ ə ntɨm li la ghə̀ vi ə̀ ngyàmtə̀ mò.

²⁶Ghə̀ kòŋə̀ no nkàyn əvi yen ghə̀ŋ Ghə̀ ko tə nsaŋlə̀ byìʼàndo ghə̀ŋ tə zhʉ̀ la ghə̀ tə nkwaʼa.

²⁷Ghə̀ tə nkwaʼa no nəmwèʼè ə̀ shwètə̀ to a lə̀ mu ghə̀ əpfʉ alì Nyìngòŋ kusə nshinsə à wen. Nyìngòŋ ko tə kùsə nshinsə tò à wen, Ghə̀ be tə kùsə nshinsə à mò ndi kə mà yèn ə ngəʼ ə̀ chò ando mà yenə.

²⁸A lè kənyʉ̀ a kə ne mà sə lutə̀ kəŋ ətɨm wen à ghə̀ŋ kɨ la ghə̀ŋ ə nsaŋlə̀ ə be yenə wen, ko əkwoʼtə ghomə be a ku ngəʼ à mò.

²⁹Ghə̀ŋ shisə wen a nə̀ lèmə̀ ghə̀ŋ a ghə̀ŋ kiʼi Bobo muʼ. Ghə̀ŋ ə ngumlə̀ nki viʼi venə to nə̀ wen lə̀,

³⁰byìʼàndo ghə̀ tə shwètə̀ əpfʉ byìʼì əshyèʼ Klistò ando ghə̀ tə gyàmtə̀ mò ənè shwèʼ yi a ghə̀ŋ ko zi ghə̀ŋ nè.