Read Babanki Kòlòsyàns 3 Bible Online

Kòlòsyàns 3 - Babanki bible

Kòlòsyàns 3

¹Ando ghə̀ŋ sə diʼ mù Nyìngòŋ ə lùsə li ghə̀ŋ və Yesò fa pfʉ amuʼ, ghə̀ŋ ghʉ tətyɨm təŋtə a nyʉ̀ yi a və diʼi akàŋ, akəshi yi a Yesò ŋwʉ̀ʼ tsu ashə kwoŋ ə toghə Nyìngòŋ.

²Ghə̀ŋ ghʉ təkwòʼtə̀ təŋtə a nyʉ̀ yi a və diʼi a kàŋ, a kodiʼ nyʉ̀ vyi a və diʼi a nse,

³byìʼì ando ghə̀ŋ sə diʼ mù ghə̀ŋ pfʉ li, və lyomtə ə ntsìnə̀ ghə̀ŋ vye və Yesò yi a ghə̀ diʼi wenə Nyìngòŋ amuʼ.

⁴Yesò a diʼ ə ntsìnə̀ shəŋsə. A lu ndiʼ ando ghə̀ bwenə vi a ndayn, ghə̀ŋ ndiʼ vye vəwenə ati əghoʼ ə wen.

⁵Ghə̀ŋ maʼa nyʉ̀ ə byɨvə no ətsèm. Kə wìʼ ə tsi nə̀ wùwì a kodiʼ wi wen kò nə̀ wulɨm a kodiʼ lɨmə wen. Ghə̀ŋ maʼa ətsìnə̀sə kəfwaʼlə. Kə ghə̀ŋ kiʼi əkwoʼtə a ghə kòŋə̀ ə nè mbyɨ. Ghə̀ŋ maʼa ashɨ bòghə byìʼì ando ashɨ bòghə diʼi la ghə̀ŋ gumlə əfo ə nse, a kodiʼ Nyìngòŋ.

⁶Nyìngòŋ fwisətin, diʼ lù ku ngəʼ ə ghoʼo a viʼi vyi a və ko zhʉ̀ byɨmə wen, nè ənyʉ̀ a venə.

⁷Ghə̀ŋ tə ə nè nyʉ̀ ə byɨvə a venə a ji yi a ghə̀ŋ tə tsi fa tsù.

⁸Alì ma sə gàʼa a ghə̀ŋ luwen la ghə̀ŋ maʼa nyʉ̀ na venə no ətsèm to nə̀ fwisətinə. Kə ghə̀ŋ baʼtə̀ ə ne mbyɨ a viʼi kò zhò ndzɨŋ ə byɨsə əzhiʼ ə wìʼ. Kə gaʼa ə fwaʼləghə ne nfʉ̀ fa ghə̀ŋ chʉ̀.

⁹Kə wìʼ fa ghə̀ŋ nə̀ zhò ndzɨŋ a wù ə tsen, byìʼì ando ghə̀ŋ moʼtə li ətsìnə̀sə mu sə nə̀ nyʉ̀ vyi a ghə̀ŋ tə nè,

¹⁰ə boŋsə ghaʼa ntsìnə̀ ə fi. Ghə̀ŋ diʼ viʼi və fi və a Nyìngòŋ bwom ə sə ne la ghə̀ŋ fɨsə wen a nyʉ̀ yi a ghə̀ŋ ne ndi ghə̀ŋ tuʼ kɨ wen akayn.

¹¹Ali, ə nəkwoŋ ko diʼ ko ghə̀ lu ndiʼ a wìʼ, kò à diʼ wù ə Jus kò à diʼ wù ə Glek, kò və shɨtə li wen kò və ko shɨtə, kò à diʼ wù kətɨm. Ə nəkwoŋ kodiʼ a viʼi vi a diʼi əkos nə̀ viʼi vyi a və diʼ fa ngəŋ, ali kənyʉ̀ kə tokə diʼ to Yesò. Ghə̀ diʼ a ntìntìn viʼi wen və tsèm.

¹²Ando ghə̀ŋ sə diʼ viʼi a Nyìngòŋ ə tsuʼ li a viʼi wen ə sə koŋə, ghə̀ŋ moʼ ntsìnə̀ ə jùŋ, tùʼmə̀ nə̀ viʼi, ə nshiʼsə təwenə təŋtə a nse, bwaʼmə, be wensə.

¹³Ghə̀ŋ kiʼ ətyɨm ə zhʉ̀təghə a ghə̀ŋ təwenə, ghə̀ŋ mbe lyesə ku no zhʉ̀ ko a wìʼ kiʼi ngəʼ wenə lèmə̀ wen. Ghə̀ŋ lyesə ku təwen tyəŋtə to ndə̀ŋndəŋ ando Bobo lyesə li kù ghə̀ŋ.

¹⁴Ghə̀ŋ boʼsə kòŋ a tʉ nyʉ̀ venə no tsèm. A diʼ kòŋ a ghə̀ kwiʼi no tèbe ghò to a kəfo kə mùʼ, nè kə boŋ kwʉ̀ʼ.

¹⁵Ghə̀ŋ moʼtə mbwaʼmə yì a Yesò ku ghə̀ tisə təkwòʼtə̀ təŋtə, ə dzàŋ ghə̀ŋ la ghə̀ŋ fʉ̀ vi ə diʼ a wenə ə mùʼ, kiʼi mbwaʼmə be ku kəzòŋ a wen.

¹⁶Əgaʼa ə Yesò ndiʼ a ghə̀ŋ tətyɨm. Ghə̀ŋ lyɨ̀ ətof ə tsèm ə ziʼi be ku kətyiftə a ghə̀ŋ təwen. Ghə̀ŋ zhɨmə dzaŋsə Nyìngòŋ nə̀ dzaŋsə laynəsə shisə a kəzhwì kə Ŋwoʼkə nè la ghə̀ŋ zhɨmə. Ghə̀ŋ zhɨmə, ku kəzòŋ a Nyìngòŋ a ghə̀ŋ tətyɨm.

¹⁷Ghə̀ŋ nè no tèbe ghò, kò ghə̀ŋ gaʼa gaʼa, ghə̀ŋ gàʼa to a azhiʼ Bobo Yesò, ku kəzòŋ a Nyìngòŋ, ə Tìʼ chò fa wen.

¹⁸Ghə̀ŋ diʼi ə gumlə lʉmə vəŋə a ki və lamkəvə. A diʼ kənyʉ̀ a viʼi vyi a və dzɨ̀mtə̀ Bobo diʼ ənè.

¹⁹Ghə̀ŋ diʼ ə kòŋ ki vəŋə a lʉ̀mə və lamkəvə. Kə ghə̀ŋ ə fwàynsə a vəwenə.

²⁰Voyndyə, ghə̀ŋ zhʉ to fa vətiʼi vəŋə no a nyʉ̀ ə tsèm byìʼì ando nakèn kə na nè la Nyìngòŋ ə saŋlə.

²¹Vətiʼi və vunə, kə ghə̀ŋ nə̀ tsɨblə nə̀ vunə vəŋə, ndiʼi kò vəwenə nə̀ ə yenə la kə vəwenə kə ko be diʼ.

²²Ghə̀ŋ viʼi vi a ghə̀ŋ shwèʼè to ne əkosə, ghə̀ŋ zhʉ fa vətìʼ və əshwèʼè ghə̀ŋ vi a və diʼi a nse no nyʉ̀ ə tsèm. Kə ghə̀ŋ ne kənyʉ̀ azhʉ̀ a ghə̀ŋ kəŋ la vəwenə yen ə kòŋ ghə̀ŋ. Ghə̀ŋ nshwèʼè nə̀ tyɨm ə ghəŋə no tsèm to nə̀ viʼi vyi a və əfwaynə Nyìngòŋ.

²³Ghə̀ŋ nshwèʼè no tèbe ghò, ghə̀ŋ shwèʼè to nə̀ ətyɨm ə ghəŋə no tsèm, sə ghə̀ŋ shwèʼè a Nyìngòŋ, kə a ndiʼ sə ghə̀ŋ shwèʼè a wìʼ,

²⁴kɨ la Nyìngòŋ ə na ku moʼtə ghə̀ŋ nə̀ fo vi a ghə̀ ghʉ̀ a viʼi wen. Byìʼì ghə̀ŋ shwèʼè to Bobo.

²⁵Ghə̀ lu bwensə loʼ no tèbe wù byɨ ə kò to nə̀ ndə̀ŋndəŋ mbyɨ yi a ghə̀ nè. Ghə̀ ko lyɨ tebè wìʼ ə tsen nəkwoŋ.