Read Babanki Kòlòsyàns 4 Bible Online

Kòlòsyàns 4 - Babanki bible

Kòlòsyàns 4

¹Ghə̀ŋ ghaʼa viʼi vyi a və shwèʼè a ghə̀ŋ a jisə jùŋsə a vətiʼ və əshwèʼ, be ku əfo vi a vəwenə diʼ ə kiʼ. Ghə̀ŋ kɨ la ghə̀ŋ be kiʼi tìʼ shwèʼè akàŋ.

²Ghə̀ŋ ne njɨ̀mə̀ to jɨ̀mə̀, kə ghə̀ŋ a bwaʼ, ku kəzòŋ a Nyìngòŋ.

³Ghə̀ŋ be njɨ̀mə̀ a yes la, Nyìngòŋ ə nè yes kɨ jisə ə shə̀ʼtə̀ ntɨm ə jùŋ kumə ənyʉ̀ ə tò və vi a Nyìngòŋ ə diʼi làynsə a yes kumə Yesò. Ma diʼ a ngə̀ŋ nfɨŋ byìʼì ntɨm ə jùŋ na ghèn a ma shə̀ʼtə̀ lə.

⁴Ghə̀ŋ ne njɨ̀mə̀ la mà shə̀ʼtə̀ làynsə ntɨm na ghèn a ji yi a ma diʼ ə shə̀ʼtə̀ fa tsù.

⁵Ghə̀ŋ nə̀ tofə a ji yi a ghə̀ŋ tsi fa tsù ghə̀ŋ və viʼi vyi a və ko təmə byɨmə, kə ghə̀ŋ byɨbsə ə zhʉ̀ yi a ghə̀ŋ kiʼi vye vəwenə.

⁶Əgàʼ ə ghəŋə ndiʼ ə nə̀ mbwaʼmə be fwomə to məzhʉ̀ ə tsèm, ndi ghə̀ŋ kɨ ə shɨtə ə bwensə no ndo.

⁷Lèmə̀ əkòŋ vəghəŋ Tikikùs a əshəʼtə əsoʼgho ə tsèm a ghə̀ŋ kumə mò. Yès ə tsèntə shwèʼè a Bobo amuʼ, ghə̀ shwèʼè to no nə̀ ətyɨm ə wen ə tsèm.

⁸Ma a tɨm to no wen a ghə̀ŋ alə ndiʼ ghə̀ vi ə shə̀ʼtə̀ soʼgho a ghə̀ŋ kumə yes, be lɨ̀msə̀ ghə̀ŋ a ghə̀ŋ əbyɨmə.

⁹Ghə̀ vi wenə Onesimùs ə lèmə̀ vəghəŋ yi à diʼ tamə wù ənòyn nə̀ ghə̀ŋ. Ghə̀ diʼ tamə wù ə byɨmə ə jùŋə, yes ə kòŋ wen no nànto. Vəwenə ne shə̀ʼtə̀ no tèbe ghoʼ yi a ghə̀ nfʉ̀ ashə.

¹⁰Alìstakùs a yo wen diʼ a ngə̀ŋ nfɨŋ gàʼ la mà toŋtə ghə̀ŋ, Mak ə lèmə̀ Bànabàs gàʼ tamə ali. Ghə̀ŋ sə diʼ mù və gaʼa li a ghə̀ŋ kumə Mak. Ghə̀ vi, ghə̀ŋ shisə wen akayn.

¹¹Joshùwà yi a və be toŋtə wen la Justùs li, gàʼ la mà toŋtə ghə̀ŋ. A diʼ to vəwenə viʼi Jus və byɨməvə vi a və shwèʼè yo vəwenə. Ma shwèʼè yo vəwenə ne la viʼi yen əfòynə ə Nyìngòŋ. Vəwenə nè li ma sə diʼ to akayn.

¹²Èbafàlàs yi a ghə̀ diʼi tamə wù ənòyn ə ghə̀ŋ, be diʼ wù ə shwèʼè a Yesò Klistò gaʼa li la mà toŋtə ə ghə̀ŋ. Ghə̀ zhʉsə jɨm no zhʉ̀ko, ghə̀ sə kwoʼtə ghə̀ŋ a wen a jɨ̀m no akayn, sensə la Nyìngòŋ ə nè ghə̀ŋ faŋ to ati əbyɨmə ghə̀ŋ, ə kwi tsù, ə shɨtə kɨ be ne nyʉ̀ ə tsèm vi a ghə̀ kəŋ.

¹³Ma ti to no a nchwò nsòʼ a ghə̀ shwèʼè li a ghə̀ŋ nə̀ kədyòʼ kə be shwèʼè a viʼi vyi a və tsi a Làdisìyà nə̀ viʼi a və tsi a Hìlabolìs.

¹⁴Luk, ə wù chʉʼ viʼi yi a yès ə kòŋ no akayn li wenə Demàs gàʼ la mà toŋtə ghə̀ŋ.

¹⁵Ghə̀ŋ toŋtə vəlemə və vəghəŋ vi a və diʼ a Làdisìyà a yes ə be tòŋtə Nimfà nə̀ ənòyn ə viʼi və byɨməvə vyi a və tsèntə a wen a ngə̀ŋ.

¹⁶Ghə̀ŋ dzàŋ ŋwàʼlə̀ ghèn a ghə̀ŋ a ntìntìn, ghə̀ŋ nè və dyʉ̀ dzàŋ a ənòyn ə viʼi və byɨməvə vi a və diʼ a Làdisìyà. Ghə̀ŋ bè dzàŋ yi a mà nyoʼo, ghə̀ diʼ ə lù fa Làdisìyà ə vi a ghə̀ŋ.

¹⁷Ghə̀ŋ gàʼ a Akibùs la ghə̀ kɨ la ghə̀ diʼ ə mwetə shyèʼ ə Bobo yì a və kù a wen la ghə̀ ne.

¹⁸A nyoʼo to no mò Bol nyoʼtə ətoŋtə akəshi ghèn luwen a ghə̀ŋ nə̀ kəvu ə kòmkə. Kə ghə̀ŋ lyesə la ma diʼ a ngə̀ŋ nfɨŋ. Nyìngòŋ ə ndiʼi ətyɨm ə jùŋə ghə̀ wen a ghə̀ŋ.