Read Babanki 1 Tèsàlonyà 2 Bible Online

1 Tèsàlonyà 2 - Babanki bible

1 Tèsàlonyà 2

¹Vəlemə, no ghə̀ŋ fa ghə̀ŋ a ngeŋ diʼ ə kɨ la məvi yì a yes ə nvi ə gyàmtə̀ ghə̀ŋ li nko lè kədyàŋ.

²Ghə̀ŋ kɨ li la a ndiʼ mibu yès vi a Tèsàlonikà mu yès ə yen li ngəʼ no nànto, və be telə yès no nànto a ntə̀ʼ Filìbay. Nyìngòŋ ə vəghəŋ nè la yès shə̀ʼtə̀ ntɨm ə jùŋ a ghə̀ŋ mu ghə̀ lù fa Nyìngòŋ no nə̀ ətyɨm ə to ghə̀, no tèbe ando viʼi ə ko ə kòŋ ə zhʉtə.

³Kənyʉ̀ a yes ə nshə̀ʼtə̀, yes ə nko shə̀ʼtə̀ nè nə̀ kənlobtə kə no faphen ko nə̀ əkwoʼtə byɨ ghə̀.

⁴Yes ə mbòŋsə̀ gaʼa to ando Nyìngòŋ ə kəŋ byìʼì ando ghə̀ tə ə tsuʼ yes la yes shə̀ʼtə̀ ntɨm ə jùŋ ghèn, ko yes lu shə̀ʼtə̀ tebè fa ji yi a viʼi kəŋ. Yes ə shə̀ʼtə̀ ə nè la Nyìngòŋ ə saŋlə byìʼì ando ghə̀ kɨli tətyɨm təŋtə.

⁵Ghə̀ŋ kɨli la yes əko vi a ghə̀ŋ ə gàʼa gaʼa kənlobtə no faphen. Nyìngòŋ ə kɨ no nəmwèʼè la yes ə nko shə̀ʼtə̀ ntɨm ə jùŋ a ghə̀ŋ la ghə̀ŋ ku kəfo kətsenkə a yes.

⁶Yes ə ko ə nè kənyʉ̀ la wìʼ fa ghə̀ŋ, kò no ndo bwomsə yes.

⁷Yes nzizi yes bèmə əfo fa ghə̀ŋ a nə̀ viʼi ntɨm ə Yesò ali yes bwaʼsə chiʼ to chiʼi. Yes ə ndiʼ a ghə̀ŋ alə to nə̀ lùwàyn a ghə̀ nyòŋsə̀ vunə wen.

⁸Yes ə shə̀ʼtə̀ ntɨm ə jùŋ a ghə̀ŋ mu à ku Nyìngòŋ, be ku təwen ə tyetə a ghə̀ŋ, byìʼì ando yes ə kòŋ ghə̀ŋ no nànto.

⁹Vəlemə, ghə̀ŋ kɨli ando yes ə nshyèʼ no nə̀ kədyoʼkə. Yes ə nshyèʼ nə̀nchwì shyèʼ nətʉʼ ndi kə ghə̀ŋ faŋ nlè kəfo a yes a kətʉ ando yes ə shə̀ʼtə̀ ntɨm ə jùŋ na ghèn a ghə̀ŋ a Nyìngòŋ ə ku la yes ə shə̀ʼtə̀.

¹⁰Ghə̀ŋ diʼi nchwò nsòʼ nyʉ̀ yi a yes tə nè, no Nyìngòŋ ə kɨ. Yes tə nè nyʉ̀ a ghə̀ŋ to nə̀ viʼi və byɨməvə, və diʼ to nyʉ̀ tɨməvə ne nyʉ̀ laynə və.

¹¹Yes tə ə ghaʼa ghə̀ŋ to ando tiʼi wàyn nə̀ gaʼa a vunə wen,

¹²sensə ghə̀ŋ la ghə̀ŋ ə nkiʼ ətyɨm ə to ghə̀, tsi ntsìnə̀ yì a Nyìngòŋ ə kòŋ. Ghə̀ dzàŋ ghə̀ŋ la ghə̀ŋ vi tsèntə akəshi kə əfòyn ə wen,be nkiʼ əbayn ə ghoʼoghə.

¹³Yes ə ku kəzòŋ a Nyìngòŋ to məzhʉ̀ ə tsèm byìʼì ando à ndiʼ ando yès nvi ə shə̀ʼtə̀ ntɨm ə yì a Nyìngòŋ ə gàʼa la yes vi shə̀ʼtə̀ a ghə̀ŋ, ghə̀ŋ zhʉ̀ ə byɨmə la à diʼi ntɨm mu ghə̀ lù to no fa Nyìngòŋ, a kodiʼ fa wìʼ. Ntɨm na ghèn ə shyèʼ a ghə̀ŋ a ntìntìn ə viʼi və byɨməvə.

¹⁴Vəlemə, nyʉ̀ vyi a və ə nfʉ a ənòyn ə viʼi vyi a və mbyɨmə a Yesò Klistò a Jùdiyà fʉ̀ li to mə a ghə̀ŋ. Viʼi lòʼ ə ghə̀ŋ nku li ngəʼ a ghə̀ŋ, a diʼ to ndə̀ŋndəŋ ngəʼ sisə a viʼi Jus ə nku a viʼi və byɨməvə na vi.

¹⁵Viʼi Jus vətsenvə ə zhwilə nshə̀ʼtə̀ sə ghoʼkəsə, sətsensə be zhwi Bobo Yesò, ə sə be dzɨ̀mə̀ shisə yes fa ntə̀ʼsə. Vəwenə ə nè la tinə Nyìngòŋ ə fwi, be diʼ viʼi kəbàyn no tèbe a ndò,

¹⁶a ji la vəwenə tə ə mwomsə ə tàʼsə la kə yès shə̀ʼtə̀ ntɨm ə jùŋ a viʼi kətɨm ndi ghə̀ nè Nyìngòŋ ə bwoŋsə vəwenə. Vəwenə nè li to mbyɨsə alə sə kuʼ nkwʉʼ. Tinə Nyìngòŋ ə fwi li, ghə̀ sə diʼi ə diʼ kənyʉ̀ a vəwenə luwen!

¹⁷Yes ə kəŋ ə gàʼ a vəlemə vyesə la, a ndiʼ ndo viʼi vətsenvə nè la yes ə lù əwʉ̀sə ghə̀ŋ a fəshinə fə zhʉ̀ alə, yes ə lù to nə̀ wenə ə yes ə ali tətyɨm tyetə faŋ ə sə kwoʼtə to ghə̀ŋ. Tətyɨm ə tyetə ə ko ə diʼ a akayn byìʼì ghə̀ŋ, yes ə mwomsə no nə̀ kədyoʼkə ə bwenə ə vi ə yen ghə̀ŋ.

¹⁸Yes tə ə ndiʼ ə bwenə ə vi ə yen ghə̀ŋ, no tèbe mò ə Bol mwomsə ə zàʼa aghayn à bò ali, Satan əko əwʉ̀sə la yès vi.

¹⁹Ma ə kəŋ ə vi a ghə̀ŋ byìʼì ando à diʼ ghə̀ŋ a ghə̀ŋ nè la yes ə kiʼ əkwoʼtə be nè yes saŋlə, diʼ lù fʉ naynə kumə kəfo kì a yes ə lu ə kiʼi azhʉ̀ a Bobo vəghəŋ Yesò bwenə li nvi. A kəfo na kì kə ə diʼ to no ghə̀ŋ?

²⁰Nəmwèʼè, ghə̀ŋ ne la yes ə naynə be saŋlə.