Read Babanki 1 Tèsàlonyà 5 Bible Online

1 Tèsàlonyà 5 - Babanki bible

1 Tèsàlonyà 5

¹Ghə̀ŋ ko kiʼi no tèbe ə shyèʼ tsen ghə̀ mibu yes nyòʼ ə shə̀ʼtə̀ a ghə̀ŋ a vəlemə la à le kətsi kò əzhʉ̀ yi a Bobo lu bwenə vì.

²Yes ə gàʼa alə̀ byìʼì ando ghə̀ŋ ə kɨ fa ghə̀ŋ ngeŋsə la, kətsi kì a Bobo lu bwenə vi lu kwʉ̀ʼ, ko wìʼ ə kɨ, ghə̀ lu vi ndə̀ŋndəŋ ando tsòŋ nə̀ vi nətʉʼ.

³Viʼi lu ə gàʼa la, “Mbwaʼmə diʼ, ngəʼ ko diʼ,” ngəʼ ne bvɨtə vi a vəwenə fwàynsə to alə ndə̀ŋndəŋ ando ə wùwì ne bvɨtə zhʉ əzaf ə wàyn azhʉ̀ ə bwi. Nò wìʼ fa tsu ko ne nyɨŋ.

⁴Ghə̀ŋ diʼ alə̀ a vəlemə vyomə ko ghə̀ŋ diʼ to nə̀ viʼi vyi a və tsi a ntìntìn nfɨnə diʼ kətsi kə ə Bobo na kènkə lù bvɨtə vi a ghə̀ŋ to nə̀ tsòŋ.

⁵Byìʼì ando no ghə̀ŋ və tsèm ə tsi ntsìnə̀ ə jùŋə to nə̀ viʼi a və nè nyʉ̀, chwìchwì ə baynə. Vəghəŋ ə ko nè tebè nyʉ̀ alə ando və nè a kəlyomtə kò a kəbəŋ kə fenəkə.

⁶Ando kənyʉ̀ na ki ə sə diʼ alə, vəghəŋ ə kodiʼ ə nə̀ dèmə̀ bʉnə to nə̀ viʼi vətsenvə, vəghəŋ ə diʼ ə nə̀ boŋsə nyʉ̀ʼ, bvɨtə be ghaʼa təwen tə vəghəŋ,

⁷byìʼì ando viʼi nə̀ nè və sə bʉnə to nətʉʼ, viʼi a və nyʉ məlyʉ̀ʼ əbe nyʉ bomə to nətʉʼ.

⁸Vəghəŋ ə boŋsə nè nyʉ̀, chwìchwì ə baynə. Kə le diʼi la vəghəŋ diʼ ə nə̀ ghaʼa təwen tə vəghəŋ. Vəghəŋ diʼ ə nə̀ choʼsə Nyìngòŋ, kòŋ Nyìngòŋ be kòŋ viʼi ndiʼ kə ne diʼi la vəghəŋ mòʼo li kòŋ nə̀ byɨmə ghenə to nə̀ kəfòkə ə sə kɨŋtə əwen ə vəghəŋ tsu, la kwoʼtə yì a vəghəŋ kiʼ la Nyìngòŋ ə lu bwòŋsə vəghəŋ diʼ to nə̀ kəfòkə a vəghəŋ chiʼi ə kɨŋtə kətʉ kə vəghəŋ nə̀ kəwenkə.

⁹Vəghəŋ diʼ ə nə̀ alə byìʼì ando Nyìngòŋ ə ko wʉ vəghəŋ ashə ə ku ngəʼ a vəghəŋ. Ghə̀ nè alə ndiʼ Bobo vəghəŋ Yesò Klistò bwoŋsə vəghəŋ.

¹⁰Ghə̀ npfʉ̀ byìʼì vəghəŋ ndi vəghəŋ nə̀ vəwenə lu ndiʼ to muʼ azhʉ̀ a ghə̀ bwenə vi, kò vəghəŋ ndiʼ və to, ko və pfʉkə li.

¹¹Ali ma sə gàʼa la, ghə̀ŋ ku ətyɨm ə to ghə̀ a vəlemə vəŋə, gyàmtə̀ vəwenə no tèbe ando ghə̀ŋ sə gyàmtə̀ to no luwen.

¹²Vəlemə, yes ə sensə la, ghə̀ŋ shɨtə gumlə viʼi vyi a və shwèʼè a ghə̀ŋ a ntìntìn alə̀ to nə̀ əchʉ̀ ənòyn nə̀ viʼi və byɨməvə. Vəwenə tisə ghə̀ŋ be tùʼmə̀ nə̀ ghə̀ŋ.

¹³Ghə̀ŋ kòŋ vəwenə be gumlə vəwenə no akayn byìʼì nyʉ̀ ə tsèm vi a vəwenə nè a ghə̀ŋ. Ghə̀ŋ ə nyʉ̀ʼmə nə̀ mbwaʼmə to məzhʉ̀ ə tsèm.

¹⁴Yes ə sensə tamə ghə̀ŋ a vəlemə la, ghə̀ŋ ku kətyiftə a viʼi vyi a və ko kòŋ tebè ə nə̀ shyèʼ, ə nè la viʼi və fwàynkəvə ə nkiʼ tətyɨm tə totə, ə gyàmtə̀ viʼi vyi a vəwenə ə kəŋ ə gyamtə. Ghə̀ŋ ə kiʼ əkwiʼ ətyɨm no tèbe a ndò.

¹⁵Kə wìʼ fa ghə̀ŋ nə̀ bwensə mbyɨ nə̀ mbyɨ, ghə̀ŋ mwomsə ə nè nyʉ̀ ə jùŋə və a ghə̀ŋ təwen, be nè a viʼi və tsèm.

¹⁶Ghə̀ŋ mwomsə ə nə̀ saŋlə to məzhʉ̀ ə tsèm,

¹⁷jɨ̀mə̀ a Nyìngòŋ ə to məzhʉ̀ ə tsèm.

¹⁸A nə̀ fʉ̀ no tèbe ghò, ghə̀ŋ ə ku to kəzòŋ a Nyìngòŋ. A le nyʉ̀ vyi a Nyìngòŋ ə kəŋ la ghə̀ŋ ə nè byìʼì ando ghə̀ŋ və Yesò Klistò diʼ to muʼ.

¹⁹Kə ghə̀ŋ ne taʼsə shwèʼè yì a kəzhwì kə Ŋwoʼkə ə nè a ghə̀ŋ a ntìntìn,

²⁰kò tensə ntɨm yì a viʼi shə̀ʼtə̀ a ghə̀ŋ mu ghə̀ lù fa Nyìngòŋ.

²¹Ghə̀ŋ boŋsə kaʼtə no nyʉ̀ ə tsèm ə yen la, və le lù to no fa Nyìngòŋ ə lo. Ghə̀ŋ yen to kə nəmwèʼè kə ghə̀ŋ a byɨmə,

²²ə yen nə̀ ki a kodiʼ nəmwèʼè, ghə̀ŋ tensə.

²³Nyìngòŋ yi a ghə̀ kù mbwaʼmə a vəghəŋ na nè ghə̀ŋ ndiʼ nə̀ laynə ə no tèbe a ji ə kò, ə wʉ̀ ntsìnə̀ ə ghəŋə nə̀ kəzhwì ə kəŋkə̀ nə̀ əwen ghenə, ko wìʼ lu ghàm ghə̀ŋ a kənyʉ̀ no fa mphen a kətsi yi a Bobo vəghəŋ Yesò Klistò bwenə vi.

²⁴Nyìngòŋ ə dzàŋ li ghə̀ŋ la ghə̀ŋ nə̀ diʼ viʼi wen, yès kɨ la kə na diʼ to ali byìʼì ando ghə̀ ko tɨmə gàʼ kənyʉ̀, ə faŋ ke nè.

²⁵Vəlemə, ghə̀ŋ nə̀ jɨ̀mə̀ a yès.

²⁶Ghə̀ŋ toŋtə vəlemə no və tsèm to no a ji ə diʼ ə kòŋ ə viʼi və byɨməvə.

²⁷Ma sensə ghə̀ŋ a kədyòʼ ə Bobo la ghə̀ŋ dzàŋ ŋwàʼlə̀ ghèn a viʼi və byɨməvə no və tsèm.

²⁸Bobo vəghəŋ Yesò Klistò ə diʼi ətyɨm ə jùŋ ghə̀ wen a ghə̀ŋ.