Read Babanki 2 Tèsàlonyà 1 Bible Online

2 Tèsàlonyà 1 - Babanki bible

2 Tèsàlonyà 1

¹A nyòʼò mò Bol yo Silàs nə̀ Timotì nyoʼtə ŋwàʼlə̀ ghèn a ghə̀ŋ nòynə ə viʼi və byɨməvə vi a və diʼi a ntə̀ʼ Tèsàlonikà. Ghə̀ŋ diʼ viʼi Tìʼ vəghəŋ ə Nyìngòŋ, be diʼ viʼi Bobo Yesò Klistò.

²Nyìngòŋ ə, ə Ti wenə Bobo Yesò Klistò ə ndiʼi ətyɨm ə jùŋə ghə̀ a ghə̀ŋ, be kù mbwaʼmə a ghə̀ŋ.

³Vəlemə, yès nə̀ ku kəzòŋ a Nyìngòŋ to məzhʉ̀ ə tsèm byìʼì ghə̀ŋ. A diʼ to no kənyʉ̀ kə jùŋ kə a yès ə nè alə byìʼì ando əbyɨmə ə ghəŋə a Yesò ə kwi dyʉ̀ to ambì, ə kòŋ ə ghəŋə be kwi dyʉ̀ to ambì.

⁴A le kənyʉ̀ ki a yès ə zhʉsə ngaʼa a nòynə viʼi və byɨməvə vətsenvə, yès sə naynə kumə ghə̀ŋ. Yès nə̀ nè alə̀ byìʼì ando ghə̀ŋ timə li to a ghə̀ŋ a byɨmə no tèbe ando viʼi ə tsuʼ kəghʉ ə kəŋkə̀, ghə̀ŋ be yenə ngəʼ sə tsensə ali wensə to wensə.

⁵Əwensə ə ghəŋə ə diʼi to ndayn la Nyìngòŋ ə nə̀ soʼo viʼi to ji tɨmə, diʼ ə nè la ghə̀ŋ ə kwʉ̀ʼ li ə ndiʼ akəshi kə əfòynə ə Nyìngòŋ yi a ghə̀ŋ nyenə ngəʼ byìʼì kəwenkə.

⁶Nyìngòŋ ə lu ku ngəʼ a viʼi vyi a və tə ə ku ngəʼ a ghə̀ŋ byìʼì ando ghə̀ nè to kənyʉ̀ ki a kə diʼ kənyʉ̀ kətɨməkə.

⁷Ghə̀ lu nè, ghə̀ŋ viʼi a ghə̀ŋ nyenə ngəʼ luwen ghə̀ŋ kiʼi nzhʉtə, yes boŋ kiʼi. Ghə̀ ə lu nè kənyʉ̀ na kènkə azhʉ̀ a Bobo Yesò bwensə shiʼi vi fa akàŋ ə diʼi wenə wen wenə ə ntsɨŋsə wen a sə kiʼi kədyòʼ.

⁸A lu ndiʼ ando ghə̀ shiʼi vi wenə ə ntsɨŋsə wen na shisə, kəlwàŋ kə əzhiʼ kə ə bolə, ghə̀ bwensə lòʼ viʼi vyi a və tə mò Nyìngòŋ ə be tensə la və ko zhʉ̀ tebè kənyʉ̀ ki a ntɨm ə jùŋ kumə Bobo vəghəŋ Yesò ə gàʼa.

⁹Nyìngòŋ ə lu byɨbsə vəwenə ə nè vəwenə kiʼi ngəʼ yì a ghə̀ ko lu mè, ə faŋke ndiʼ tebè akəshi yi a Bobo nə̀ diʼ tsu, ko ghə̀ŋ lu yenə kədyòʼ kə kaynə kə ə wen.

¹⁰A lu ndiʼ ando ghə̀ vi a kətsi na yi, viʼi Nyìngòŋ və tsèm ndiʼ nə̀ əkaynə, ku əkuʼsə a wen. No ghə̀ŋ lu bè boŋ diʼ a ntìntìn ə viʼi na venə byìʼì ando ghə̀ŋ byɨmə li nyʉ̀ vyi a yès tə ə shə̀ʼtə̀ a ghə̀ŋ.

¹¹A le kənyʉ̀ ki a yès nə̀ jɨ̀mə̀ a ghə̀ŋ to məzhʉ̀ ə tsèm la Nyìngòŋ ə vəghəŋ nè la ghə̀ŋ ə tsi ntsìnə̀ yì a ghə̀ kwʉ̀ʼ a diʼ yi a ghə̀ dzàŋ ghə̀ŋ la ghə̀ŋ vi ə ntsi. Yès nə̀ jɨ̀mə̀ la ghə̀ ku kədyòʼ ghə̀ŋ ə nè nyʉ̀ ə jùŋ və vi a ghə̀ŋ kòŋ ə nə̀ nè ə be nè mwetə shwèʼ ə ghəŋə to nə̀ viʼi və byɨməvə.

¹²Ghə̀ŋ sətsen ə nè alə, ghə̀ŋ ne ku zhiʼ ə ghoʼoghə a Bobo vəghəŋ Yesò, ghə̀ nè, ghə̀ŋ ə boŋ kiʼi əkuʼsə. Ənyʉ̀ na venə ə kwʉ̀ʼ byìʼì ando Nyìngòŋ ə vəghəŋ wenə Bobo Yesò Klistò ə kiʼi ətyɨm ə jùŋə ghə̀ a ghə̀ŋ.