Read Babanki 2 Tèsàlonyà 2 Bible Online

2 Tèsàlonyà 2 - Babanki bible

2 Tèsàlonyà 2

¹Yès ə kəŋ ə gàʼ a ghə̀ŋ kumə to əvi ə Bobo vəghəŋ Yesò Klistò, be kumə ando vəghəŋ və vəwenə lu ə tsèntə diʼ amuʼ. Yès ə sensə ghə̀ŋ a vəlemə la,

²kə ghə̀ŋ ne moʼtə viʼi vyi a və diʼi la kətsi kì a Bobo lù vi sə diʼ mù kə vi li, ə fwàynsə ghə̀ŋ ə be boŋsə biʼ kətʉ̀ ə kəŋkə̀. Kənyʉ̀ na kènkə zizi kə ə ndiʼ mu à gàʼ wìʼ, diʼ la ghə̀ shə̀ʼtə̀ ntɨm mu ghə̀ lù fa Nyìngòŋ, zhʉ tseghə kə diʼ mu a tə fʉ̀ ziʼi ə tsen ghə̀, zhʉ tseghə kə nə̀ diʼ mù wìʼ shə̀ʼtə̀ ə gàʼ la kə fʉ a ŋwàʼlə̀ mu a nyoʼ yès ə tɨm a ghə̀ŋ.

³Kə ghə̀ŋ moʼtə la wìʼ ə lobtə ghə̀ŋ no fa mphen byìʼì ando kətsi na kì ko lu vi ə zaʼa ando viʼi və ghoʼo və lù ə soynə Nyìngòŋ, wù ətyɨm ə byɨghə fʉ tɨmə. Və lu myetə wù ətyɨm ə byɨghə na ghèn akəshi kə əzhiʼ.

⁴Wù byɨ na ghèn lu fʉ ə soyn Vənyìngòŋ və tsenəvə no tèbè nə̀ gho ə tsen yi a viʼi ə gumlə, ə diʼ la ghə̀ to chò Vənyìngòŋ na vi. Ghə̀ lu dyʉ̀ kwen nyʉ̀ʼmə a ngə̀ŋ Nyìngòŋ ə ghoʼo ə gàʼa la à diʼ to no wen diʼ Nyìngòŋ.

⁵Ma kɨli la ghə̀ŋ bo kwoʼtə ando ma ngàʼa nyʉ̀ na venə a ghə̀ŋ ando vəghəŋ ə bo diʼ amuʼ

⁶Nò ghə̀ŋ ə kɨ kənyʉ̀ ki a kə taʼsə la kə wù nyʉ̀ ə byɨvə ghèn fʉ tɨmə luwen. Ghə̀ na fʉ̀ tɨmə to azhʉ̀ yi a Nyìngòŋ ə kəŋ.

⁷A diʼ luwen lə ghə̀ nyoʼtə shyèʼè ə nè la viʼi ə ntensə Nyìngòŋ. Kənyʉ̀ ki a ma gaʼa ə ko na fʉ mwetə tebè a ndayn, a bwen to la Nyìngòŋ ə lyisə li wìʼ yi a ghə̀ ti a ji luwen taʼsə la kə nyʉ̀ na venə fʉ̀.

⁸Və lyisə wìʼ na ghèn fa ji, wù ətyɨm ə byɨghə na ghèn fʉ. Bobo Yesò lu vi no tèbe achʉʼ ə ko ə zhwi wen nə̀ kəzhwì mu kə fʉ fa wen a chʉ̀, benə əbayn ə ghoʼoghə ə wen.

⁹Wù nyʉ̀ ə byɨvə na ghèn lu vi nə̀ kədyoʼkə, mu a ku Satan ə kumə nè nyʉ̀ ə kaynə və ə tsenəvə, diʼi nchwisə ndzɨŋ sə tsensə a viʼi.

¹⁰Ghə̀ lu ə kiʼ ətyɨm ə byɨghə, dzɨŋsə viʼi vyi a və diʼ ə pfʉkə, to a jisə a jisə. Vəwenə lu pfʉkə byìʼì ando vəwenə ko tə kòŋ ə zhʉ̀ ntɨm yì a ghə̀ diʼi nəmwèʼè kùmə̀ Bobo vəghəŋ ndiʼ Nyìngòŋ ə bwoŋsə vəwenə.

¹¹A le kənyʉ̀ ki a kə lu nè la Nyìngòŋ ə jisə vəwenə ə nè la vəwenə ə byɨmə nyʉ̀ ə dzɨŋ,

¹²a ghə̀ soʼ ə byɨbsə vəwenə vi a və tyenə ə byɨmə ntɨm ə jùŋ yì a ghə̀ diʼi nəmwèʼè no və tsèm ə sə kòŋ to nyʉ̀ ə byɨvə.

¹³Yès diʼ ku kəzòŋ a Nyìngòŋ to məzhʉ̀ ə tsèm byìʼì ghə̀ŋ ə vəlemə. Bobo kòŋ li ghə̀ŋ, ghə̀ŋ sə diʼ a nòyn ə̀ viʼi vyi a ghə̀ ə̀ ntsuʼ no fa kəzìtə̀ ə bwoŋsə chò fa əshyèʼ yi a kəzhwì kə Ŋwoʼkə ə nè ə ghʉ̀ ghə̀ŋ ə laynə ə be chò fa əbyɨmə yi a ghə̀ŋ kiʼi kùmə̀ nyʉ̀ vyi a və diʼi nəmwèʼè.

¹⁴Nyìngòŋ ə ndzàŋ li ghə̀ŋ chò fa a ntɨm ə jùŋ yi a yès ə shə̀ʼtə̀ a ghə̀ŋ ndi ghə̀ŋ vi ə boŋ kiʼ əghoʼ yì a Bobo vəghəŋ Yesò Klistò ə kiʼ.

¹⁵Yès sə gaʼa a ghə̀ŋ a vəlemə la, ghə̀ŋ ghaʼ əbyɨmə ə ghəŋə, kə ghə̀ŋ a byɨmə la wìʼ ə nè, ghə̀ŋ moʼtə ziʼi nəmwèʼè yì a yès ə nziʼi a ghə̀ŋ lì ə be nyòʼ a ghə̀ŋ a ŋwàʼlə̀ lì.

¹⁶Bobo vəghəŋ Yesò Klistò no fa wen a ngeŋ wenə Tiʼi vəghəŋ ə Nyìngòŋ yi a ghə̀ kòŋ vəghəŋ ə nè li la vəghəŋ ə̀ kiʼ ətyɨm ə zhʉ̀təghə to məzhʉ̀ ə tsèm be kɨ nəmwèʼè la və lu kiʼi əfo vyi a ghə̀ ghʉ̀ byìʼì ətyɨm ə jùŋ ghə̀ ə wen.

¹⁷Ghə̀ a nè ghə̀ŋ kiʼi ətyɨm ə zhʉ̀təghə nə̀ kədyoʼkə ə nè nyʉ̀ ə jùŋə və be gaʼa to nyʉ̀ ə jùŋə to məzhʉ̀ ə tsèm.