Read Babanki 2 Tèsàlonyà 3 Bible Online

2 Tèsàlonyà 3 - Babanki bible

2 Tèsàlonyà 3

¹Ə mwetə a vəlemə vyesə, yès ə gàʼa la ghə̀ŋ ə njɨ̀mə̀ a yès ndi yès nè la ntɨm ə jùŋ ə Bobo kwi dyʉ̀ to shì ə tsèm ndi viʼi byɨmə ə nku əkuʼsə a Nyìngòŋ ndə̀ŋndəŋ ando ghə̀ŋ tə byɨmə ə sə ku.

²Ghə̀ŋ jɨm tamə la Nyìngòŋ ə shisə yes fa avu ə viʼi vyi a və kiʼi tətyɨm tə byɨtə nə̀ viʼi a və nè nyʉ̀ ə byɨvə. Viʼi vətsenvə ko byɨmə ntɨm ə jùŋ ghèn.

³Alì Nyìngòŋ ə gàʼa tèbe la ghò, ghə̀ nè to ali. Ghə̀ na nè tətyɨm ə təŋtə ə to ə bwoŋsə ghə̀ŋ fa kəvu ə Deblə̀.

⁴Bobo nè li yès sə kiʼi əchoʼsə a ghə̀ŋ la ghə̀ŋ tsi to ando yès ngàʼ la ghə̀ŋ ə ntsi be diʼ ə faŋ ə̀ ntsi dyʉ̀ to ali.

⁵Yès ə jɨ̀mə̀ la Bobo nè ghə̀ŋ yen əkòŋ yì a Nyìngòŋ ə kòŋ ghə̀ŋ ə be nè la ghə̀ŋ ə wensə to wensə to nə̀ Klistò.

⁶Yès ə gàʼa a ghə̀ŋ a kədyòʼ ə Bobo vəghəŋ Yesò Klistò a vəlemə la, kə ghə̀ŋ nə̀ jèʼè nə̀ viʼi və byɨməvə vi a və bwaʼa, ko və nè tebè kənyʉ̀ ki a yès tə ziʼi ghə̀ŋ la ghə̀ŋ ə nè.

⁷No ghə̀ŋ fa ghə̀ŋ a təwen ə kɨ la ghə̀ŋ diʼ ə shyèʼè to ando yès ə shyèʼè. Yès ə ko tə ə bwaʼa achʉʼ a yès tə bo ndiʼ vəghəŋ.

⁸Yès ə ko ə zhɨ̀ kəfo kə wìʼ faŋ kye lòʼ. Yès ə shyèʼè no nə̀ kədyoʼkə. Yès ə nshyèʼè nə̀nchwì shyèʼè nətʉʼ byìʼì ando yès ə ko ə kòŋ ə ku ngəʼ a ghə̀ŋ.

⁹A ko diʼ la yesə nko kiʼi kədyòʼ ə gàʼ la ghə̀ŋ loʼ yes a əshyèʼ yi a yès ə nè ali faŋ sə shyèʼ to shyèʼ ndi ghə̀ŋ shəmə ə boŋ shyèʼ to nə̀ yes.

¹⁰A ndiʼ tèbè ando vəghəŋ bo diʼ amuʼ, yès gàʼ a ghə̀ŋ la, “A tyen no ndo la ghə̀ ko shyèʼè, kə wìʼ fa ghə̀ŋ a ku kəfo la ghə̀ zhɨ̀.”

¹¹Yès ə gàʼa alə̀ byìʼì ando yès ə zhʉ li la viʼi vətsenvə diʼ a ghə̀ŋ a ntìntìn mu vəwenə tensə li la vəwenə ə ko be shyèʼè tebe no kənyʉ̀ kə tsen kə ə gyàmtə̀ təwen tə vəwenə ə faŋ sə kwensə chò to nə̀ chʉ a nyʉ̀ ə viʼi.

¹²Yès ə gàʼa a viʼi na venə a kədyòʼ ə Bobo Yesò Klistò, gàʼa to no nə̀ kədyoʼkə la, vəwenə shɨtə tsi to ando viʼi diʼ ə tsi, shyèʼ ə kiʼi kəfo ə gyàmtə̀ təwen tə vəwenə tsu.

¹³A ghə̀ŋ a vəlemə, kə ghə̀ŋ bwaʼ, ghə̀ŋ ə nè to nyʉ̀ ə jùŋə və.

¹⁴Wìʼ ə sətsen ə tensə la ghə̀ ko nè tebè kənyʉ̀ ki a yès nyòʼ a ghə̀ŋ a ŋwàʼlə̀ ashə, ghə̀ŋ ghʉ̀ əshɨ a wenə wen. Ghə̀ŋ ghʉ̀ ali, kə ghə̀ŋ na be nè tèbè nyʉ̀ ghə̀ŋ vəwenə ndi kətʉ kə wen kəndiʼ.

¹⁵Alì kə ghə̀ŋ na nè nyʉ̀ a wen alə̀ ando ghə̀ŋ nè a viʼi kəbàyn ghə̀ŋ, ghə̀ŋ ə boŋsə ku kətyiftə a wen to ando ghə̀ŋ kù a lèmə̀ ghə̀ŋ.

¹⁶Ma jɨ̀mə̀ luwen la Nyìngòŋ yi a ghə̀ kù mbwaʼmə nè ghə̀ŋ ə kiʼi mbwaʼmə to məzhʉ̀ ə tsèm, kò à fʉ no tèbe ghò. Bobo faŋ to a ghə̀ŋ vətsèm.

¹⁷A nyòʼò to mò Bol nyoʼtə ətoŋtə akəshi ghèn luwen a ghə̀ŋ nə̀ kəvu ə komkə. A le nchwi yì a ma nyoʼo əzhiʼ ə ghomə no tebe a ŋwàʼlə̀ ə kò, ma ghʉ̀.

¹⁸Bobo vəghəŋ Yesò Klistò diʼi ətyɨm ə jùŋə ə wen to a ghə̀ŋ və tsèm.