Read Babanki 1 Timotì 3 Bible Online

1 Timotì 3 - Babanki bible

1 Timotì 3

¹Ə gaʼa nəmwèʼè la no ndò a ghə̀ kəŋ ndi kətʉ a ngə̀ŋ Nyìngòŋ, mu ghə̀ kəŋ ə shwèʼ ə kuʼmə ghə̀.

²Kətʉ a ken diʼ ndiʼ wìʼ a viʼi ko ghàmə̀ wen, ghə̀ diʼ ə nkiʼ tò wùwì ə mùʼ, kɨ ə ghaʼ wenə wen, bwaʼsə tyɨm wen, zhʉmə, tùʼmə̀ nə̀ viʼi ghayn, bè kɨ ə ziʼi viʼi və byɨməvə no a nkàyn.

³A ko diʼ ə ndi wìʼ a ghə̀ nyʉ məlyʉ̀ʼ bomə, ko ghə̀ zəʼtə viʼi, ghə̀ ko ne nyʉ̀ to kəntolə̀, ko ghə̀ diʼ wù kəŋ nsoʼo, ko wù ntaŋ, ashɨ ə wen ə ko diʼ mbò a ko.

⁴Ghə̀ di ndiʼ wìʼ a ghə̀ shətə ghaʼ ngwaʼa ə ngə̀ŋ ə wen no a nkàyn. Ghə̀ diʼ ə ne la vunə wen ə zhʉmə wen bè gumlə.

⁵Wìʼ lə sətsen ndiʼ ke kɨ tuʼmə nə̀ ngwaʼ ngə̀ŋ wen, ghə̀ a tuʼmə nə̀ ngə̀ŋ Nyìngòŋ a?

⁶A diʼ ə ndi wìʼ a ghə̀ ko byɨmə to fəkʉ̀ʼ, a bwen a lì ghə̀ ə ghaŋsə əwen, ə Nyìngòŋ ku ngəʼ à wen to ando ghə̀ nku à Deblə̀.

⁷A diʼ ə ndi wìʼ, a no viʼi vətsenvə ə bwomsə ə wen, ndi kə ghə̀ ne diʼisə kətʉ ə fəŋ a kətam ə Deblə̀.

⁸Ənyʉ̀ a venə a mà gàʼa lə̀ ə be dyʉ̀ to ndə̀ŋndəŋ à viʼi vyi a və shyèʼ a ngə̀ŋ Nyìngòŋ. Vəwenə ə diʼ ə nkiʼ ntsìnə̀ ə jùŋ, gàʼa nəmwèʼè, kə vəwenə a nku tə wen tə vəwenə à məlyʉ̀ʼ, kə ashɨ vəwenə a mbò a ko.

⁹Vəwenə ə diʼ tɨmə a nəmwèʼè a və diʼ li kumə ə byɨmə nə̀ tyɨm ə muʼ.

¹⁰Viʼi və byɨməvə diʼ ə mwòmsə ə vəwenə ambì, vəwenə chò, və mu ghʉsə la vəwenə ə nshwèʼ a ngə̀ŋ Nyìngòŋ.

¹¹Ki vi a və shyèʼ a ngə̀ŋ Nyìngòŋ be diʼ nkiʼ ntsìnə̀ ə jùŋ, ko vəwenə gaʼa kùwòŋ, ali dìʼ tò a vəwenə a ətof, ne no te ghò tò nəmwèʼè.

¹²No te wù ə shwèʼ ə ko a ngə̀ŋ Nyìngòŋ ə diʼ ə nkiʼ tò wùwì ə mùʼ bè tùʼmə̀ nə̀ vunə wen, bè tùʼmə̀ nə̀ ngwaʼa ə ngə̀ŋ ə wen no a nkàyn.

¹³Viʼi vi a və nè shwèʼ ə vəwenə a nkàyn ə kiʼ zhiʼ ə jùŋ ghə̀, bè kiʼ tətyɨm təto tə ə gàʼà ənyʉ̀ byìʼì əbyɨmə yi a vəwenə ə kiʼi à Yesò Klistò.

¹⁴Mà ə nyòʼò ŋwàʼlə̀ ghèn à wù, kiʼ kwoʼtə la ma nyɨŋ əvi yen wù,

¹⁵mu kənyʉ̀ kə sətsen ə nè la mà laʼtə, wù a kɨ jì shiʼsə a viʼi diʼ ə nə̀ tsi fatsu a ngə̀ŋ ə Nyìngòŋ, a diʼ nòyn ə viʼi və byɨməvə ə Nyìngòŋ yì a ghə̀ tsi. Ənòyn a ghenə tomsə kənyʉ̀ ki a kə diʼi nəmwèʼè. Tomsə əziʼi nəmwèʼè tò ando kətaʼa nə̀ kəchɨ kə ngə̀ŋ kə ə ne kə sə to, bè ghaʼa ngə̀ŋ la ghə̀ tɨmə nto.

¹⁶Kə diʼ tò no nəmwèʼè la byɨmə ə vəghəŋ ə kiʼ kənyʉ̀ kə lyomtəkə la Nyìngòŋ diʼi laynsə, kə ghoʼo nò alə: Klistò ə nlu li vi ə lyɨ̀ əwen wìʼ, kəzhwì kə Ŋwòʼəkə diʼi la ghə̀ diʼ a nkàyn ashɨ ə Nyìngòŋ, Ntsɨŋsə Nyìngòŋ yenə wen, və ziʼi ənyʉ̀ byìʼì wen a təloʼ tə tsèm, viʼi mbyi byɨmə à wen, Nyìngòŋ lyɨ̀ kuʼ nə̀ wen a kàŋ.