Read Babanki 1 Timotì 4 Bible Online

1 Timotì 4 - Babanki bible

1 Timotì 4

¹Kəzhwì kə Ŋwòʼəkə ə diʼi laynsə la, à lu ə dìʼ a mətsi mə kəmwetə, ə viʼi vətsenvə tensə ko və mbe byɨmə əziʼi yi a ghə̀ diʼ nəmwèʼè byìʼì Yesò Klistò ə nə̀ bòŋsə byɨmə əziʼi ə ndzɨŋsə yi a əzhwì ə byɨvə ə ku.

²Tənkì tə əziʼi a tentə ə diʼ ə ziʼi ndìʼsə̀sə ə ndzɨŋsə, ko tətof tə vəwenə tə ko be tɨmə, mu tə pfʉ li sə diʼ sə və nyʉ̀ʼ nə̀ zhiʼ.

³Viʼi a venə ə ziʼi viʼi la kə vəwenə ə bè lam bè gàʼa la vəwenə ə bamə tənkì tə fozhɨvə tə tsentə. Alì mu Nyìngòŋ shɨtə əfo a venə la viʼi və byɨməvə ə a və kɨ li nəmwèʼè, və nku kəzòŋ à wen və zhɨ̀,

⁴byìʼì no te ghò yi a Nyìngòŋ shɨtə ə diʼ a nkàyn. Viʼi ə ko diʼ ə tensə no kəmùʼ a zhʉ a vəwenə nə̀ sə ə zhɨ, və nə̀ jɨ̀mə̀ ku kəzòŋ à wen.

⁵Əfo ə zhivə na venə ə diʼ a nkàyn ashɨ nə̀ Nyìngòŋ byìʼì əjɨ̀m nə̀ kənyʉ̀ kə Nyìngòŋ.

⁶Wù sətsèn ə mbèsə̀ ənyʉ̀ a venə a mà gàʼa lə à viʼi və byɨməvə, wù ne ndiʼ tò no wù ə shwèʼ ə jùŋ à Yesò Klistò. Wù sətsen ghaʼ ə ndìʼsə̀ nəmwèʼè a ghèn, ghə̀ gyàmtə̀ wù ə ne la byɨmə ə wu ə to.

⁷Nyɨŋsə wenə wu fa bàm ə mətitì mə zɨmə mi a mə ko diʼ a nkàyn ashɨ ə̀ Nyìngòŋ. Myəʼsə wenə wu ə ntsi a jisə Nyìngòŋ.

⁸Kə bo kiʼ se a wu sətsen ə mwòmsə ə nzaŋsə ə wen wu, alì mu wu sətsen mwòmsə ə kɨ kənyʉ̀ kə Nyìngòŋ, mu wu kiʼi se tò təshyə tətsèm. Kə diʼ alə byìʼì ando wu kiʼ ntsìnə̀ yi luwen a Nyìngòŋ sə diʼ mu ghə̀ ghʉ li, ə lu bè kiʼ to mə ntsìnə̀ a ghèn no məzhʉ ntsèm.

⁹Kənyʉ̀ a kenkə ə diʼ tò no nəmwèʼè, mu wìʼ ə zi ko ghə̀ lə tensə.

¹⁰Vəghəŋ ə soynə bè shwèʼè nə̀ kədyòʼ ə kiʼi ntsìnə̀ a ghenə byìʼì ando vəghəŋ ə ghʉ kwòʼtə à Nyìngòŋ yi a ghə̀ tsi. A dìʼ wen a ghə̀ mbwòŋsə̀ viʼi və tsèm, bè bwòŋsə viʼi vyi a və byɨmə a wen.

¹¹Ziʼi ənyʉ̀ a venə ə chòsə̀ a soʼ la no tə ndo ə ne kənyʉ̀ ki a wù gàʼà.

¹²Kə a ghʉsə la wìʼ chasə wù byìʼì ando wù dìʼ wàyndyə. Wu diʼ ə ndiʼ kəchwitə à viʼi və byɨməvə, a jisə yi a wù gaʼa fatsu. Wù ntsi ntsìnə̀ ə jùŋ, kòŋ viʼi, diʼi la wù byɨmə à Klistò bè dìʼ nə̀ layn ə.

¹³Wù mwòmsə ndzàŋ Ŋwàʼlə̀ Nyìngòŋ à viʼi, shə̀ʼtə̀ ntɨm ə jùŋ, be ziʼi viʼi ə zaʼa fa zhʉ mà vì.

¹⁴Kə wù a lyesə kəku ki a Kəzhwì kə Ŋwòʼəkə ə ku li à wù lì ando nshə̀ʼtə̀sə ghoʼkəsə ngaʼà ənyʉ̀ byìʼì wù, to ando və vəchəʼ və ngə̀ŋ Nyìngòŋ vi ə ghʉ avu a wù a kətʉ.

¹⁵Ku wenə wu no tsèm ə ne nyʉ̀ venə no tsèm, ndi viʼi vətsèm ə yen la wu kwi.

¹⁶Wù tùʼmə̀ nə̀ wen ə wu, be tùʼmə̀ nə̀ jì yi a wù ziʼi viʼi fatsu. Wu sətsen ə ne tò alə, ə Nyìngòŋ ə bwòŋsə wù, bè bwòŋsə no viʼi vi a wù ziʼi.