Read Babanki 1 Timotì 5 Bible Online

1 Timotì 5 - Babanki bible

1 Timotì 5

¹Mà gàʼà à wù la kə wù ne kaʼsə gaʼa à wu ə to a kədyòʼ. Wù sə ngàʼà, wù ə lyɨ̀ wen to nə̀ tìʼ wù. Wù sə ə ne kənyʉ̀ à wìʼ, a wu diʼ wuto fa wen, wu ə lyɨ̀ wen tò nə̀ lèmə̀ wù.

²Wù lyɨ̀ ki və tovə tò nə̀ vəlì vyə, lyɨ̀ Ngòynsə ki tò nə̀ vəlemə vyə. Wù ə ne ənyʉ̀ a venə lə tò nə̀ kwoʼtə ə laynə ghə̀.

³Ghə̀ŋ ə tùʼmə̀ nə̀ ki mphʉ vi a və ko kiʼ viʼi la və ə ntùʼmə̀ nə̀ vəwenə.

⁴Alì, wùwì mphʉ sətsen ə nkiʼ vunə, kò vu vunə, wu ne vəwenə ziʼi ə ne ənyʉ̀ vyi a viʼi və byɨməvə ə kiʼi ə nə̀ nè ngwaʼ ə ngə̀ŋ nə̀ vəwenə a mbì. Vəwenə ə ne alə vəwenə a bwènsə̀ loʼo vətiʼi və vəwenə byìʼì a diʼ kənyʉ̀ a Nyìngòŋ ə kòŋə̀.

⁵Nkàyntə̀ wùwì mphʉ yi a ghə̀ ko kiʼ wìʼ la ghə̀ ə ntùʼmə̀ nə̀ wen ə diʼ mu ghə̀ ghʉ li kwoʼtə əwen tò a Nyìngòŋ ə sə jɨ̀mə̀ tò jɨ̀mə̀, loyn nə̀ ə gyàmtə̀ fa wen nətʉʼ nə̀ nə̀nchwì.

⁶Wùwì mphʉ yi a ghə̀ mwòmsə ə nzhɨ tò əwen ə wen sə dìʼ mu kəzhwì kə wen kə pfʉ li no te ando ghə̀ bu jèʼè.

⁷Shə̀ʼtə̀ ənyʉ̀ a venə à vəwenə ndi kə və ne ghàm wìʼ.

⁸A sətsen te ndò nyɨŋ la ghə̀ ko tùʼmə̀ nə̀ viʼi ngwaʼ ngə̀ŋ wen, ma tuʼtə gàʼa viʼi ti ngə̀ŋ wen, kə ne diʼi la ghə̀ tensə li ənyʉ̀ vyi a wù ə byɨmə ə diʼ nè mu ghə̀ byɨfə chò no tebe wìʼ yi a ghə̀ ko təmə ə ndiʼ wù ə byɨmə no fa mpfen.

⁹Wùwì mphʉ sətsen faŋ ke zaʼa ngwʉ̀sə̀ məwum ntʉfə, kə wu lyɨ la ghə̀ tsèntə̀ tənòyn tə ki mphʉ. A diʼ ə ndiʼ wùwì mu ghə̀ nlu lam tò ə ghayn ə mùʼ,

¹⁰viʼi kɨ la ghə̀ kiʼi ntsìnə̀ ə jùŋ, mu ghə̀ tùʼmə̀ li kwisə vunə wen, bè shisə viʼi ə ghayn no a nkàyn. A diʼ ə ndiʼ wìʼ mu ghə̀ tə ə ngyàmtə̀ viʼi və byɨməvə bè gyàmtə̀ viʼi vyi a və kiʼi ngəʼsə. A diʼ ə ndiʼ wìʼ mu ghə̀ be ə ku wen ə wen ə sə nè təshyèʼ tə jùŋtə tò a tənkì a tənkì.

¹¹Kə ghə̀ŋ tsèntə̀ ki mphʉ vi a və ko dwin ə zaʼa a kəlyɨŋ a ghèn a nòyn ə ki mphʉ byìʼì ando təwen tə vəwenə zizi tə be lɨ̀mtə̀ vəwenə be nkəŋ ə lam ə tensə Klistò,

¹²ngəʼ vi à vəwenə byìʼì ando vəwenə ko əghʉ məkàyn mì a vəwenə ə nkàyn à wen.

¹³Vəwenə ə jèʼè loʼsə, kwenə tò ngə̀ŋ a ngə̀ŋ, moʼo kùwòŋ, kwenə chò a nyʉ̀ nə̀ viʼi bè gàʼà ənyʉ̀, a ko diʼ kəshi kə vəwenə ə və gaʼa.

¹⁴Mà lə kəŋ la ki mphʉ vi a və ko dwìn bwènsə̀ lam ə mbwi vunə tùʼmə̀ nə̀ ngwaʼ ngə̀ŋ vəwenə ndi kə viʼi kəbàyn vəghəŋ a kiʼi jì ə ngàʼà ənyʉ̀ ə byɨvə byìʼì vəghəŋ.

¹⁵Mà gàʼà alə byìʼì ando ki mphʉ vətsenvə sə dìʼ mu vəwenə kaʼkə li ə sə dzɨ̀mtə̀ dyʉ̀ tò nə̀ Satan.

¹⁶A sətsen no te wùwì ə byɨmə ə ko, nkiʼ ki mphʉ a wen ngwaʼ ə ngə̀ŋ, ghə̀ ə ntùʼmə̀ nə̀ vəwenə. Kə ghə̀ kuʼsə kəbyèʼè akì a kətʉ nə̀ viʼi və byɨmə, ndìʼ ngə̀ŋ Nyìngòŋ ə tùʼmə̀ tò nə̀ ki mphʉ vi a və ko kiʼi viʼi a və ə ntùʼmə̀ nə̀ vəwenə.

¹⁷Və diʼ ə ngumlə̀ bè loʼo zomtə vəchəʼ vi a və shɨtə ne shwèʼ ə vəwenə, bè shɨtə loʼo zomtə əvi a və shə̀ʼtə̀ ntɨm ə jùŋ be ziʼi viʼi,

¹⁸byìʼì ando Ŋwàʼlə̀ Nyìngòŋ ə gàʼa la, “Kə wù ə kwiʼi əchʉ ə mbòŋ la kə ghə̀ baʼtə̀ asaŋ.” Kə mbè gàʼa la, “No te wù ə shyèʼ ə ko diʼ ə kiʼi əmòʼtə wen.”

¹⁹Wìʼ ə vi ə gàʼa kənyʉ̀ kə byɨkə à wù byìʼì chəʼ ngə̀ŋ Nyìngòŋ, kə wu a zhʉ̀tə, a bwen tò la ghə̀ gàʼa li alì, no viʼi vətsenvə tomsə wen.

²⁰Chəʼ ngə̀ŋ Nyìngòŋ ə ne mbyɨ, wu gham ə wen tò a ndayn ndi viʼi vətsenvə yen ə fàyn.

²¹Mà gàʼà à wù no nə̀ kədyòʼ kə, a ashɨ ə̀ Nyìngòŋ nə̀ Yesò Klistò nə̀ ntsɨ̀ŋ shisə a Nyìngòŋ tsuʼtə la, wù shɨtə ghaʼ əghʉ ənyʉ̀ a venə a mà gàʼa a wù lə̀. Wù sə ə ne ənyʉ̀ a venə, kə wù ə ne to viʼi vətsenvə ghʉsə vətsevə.

²²Kə wù a ə lyuŋlyuŋ əghʉ avu a wìʼ a kətʉ ə nè la ghə̀ ə kwʉʼmə a kəlyɨŋ ə ne shwèʼ a ngə̀ŋ Nyìngòŋ, a bwen alì wù ne tsentə wìʼ a yi a tì ənyʉ̀ ə byɨvə ə wen. Mwòmsə ə ndiʼ nə̀ laynə.

²³Kə wù a faŋ ə nyʉtə tò mu, wù nyʉtə kəshi kə məlyʉ̀ʼ ndi mə gyàmtə̀ məkwaʼtə mèn a mə zàŋsə ku ngəʼ a wu a bèm lə̀.

²⁴Viʼi vətsenvə ə ne ənyʉ̀ ə byɨvə, ə dìʼ a ndayn, diʼi tò no la kə sə dìʼ ə Nyìngòŋ soʼ vəwenə, viʼi vətsenvə ne ənyʉ̀ ə byɨvə, və lyɨ̀ zhʉ mimbu və fʉ a ndayn.

²⁵Kə lə dìʼ to ndə̀ŋndəŋ la ando viʼi ə ne njùŋ ghə̀ zaŋsə diʼi a ndayn mu ghə̀ faŋ ke diʼi no te a zhʉ a yi, kə sə to ə və lyomtə njùŋ a yi.