Read Babanki 2 Timotì 2 Bible Online

2 Timotì 2 - Babanki bible

2 Timotì 2

¹A dìʼ fà wù a wàyn ə ghom Timotì, wu diʼ ə nto cho fa ətyɨm ə jùŋ a Yesò Klistò a ghə̀ diʼi li à wù.

²Wù tə ə zhʉ nyʉ̀ vyi a ma tə nziʼi ashɨ nə̀ viʼi. Wù diʼ ə lyɨ̀ əziʼi ghenə luwen ə ziʼi viʼi və jùŋvə vyi a zì vəwenə be ə ziʼi viʼi vətsenvə.

³Wù diʼ ə yen ngəʼ to nə̀ sugyèʼ ə jùŋ yi a ghə̀ zhʉmə fà Yesò Klistò.

⁴No te sugyèʼ ə ko ə mwòmsə ə ne əshwèʼ ə wen a nkàyn ndi ə nè la kətʉ kə shwèʼ wen ə nsaŋlə̀. Ghə̀ ko moʼ wenə wen a kənyʉ̀, a kə ko diʼ shwèʼè ə sugyèʼ.

⁵Wù kənyɨŋ zi ko ghə̀ lə nyɨŋ ə zhɨ a bwen tò la ghə̀ ghʉ li təsoʼ tə kənyɨŋ a tyì.

⁶No ndo a ghə̀ shyèʼè a wen a sɨm nə̀ kədyòʼ kə, ghə̀ pfì əfo ambì.

⁷Wù kwòʼtə̀ kənyʉ̀ kenkə a mà gàʼa lə, byiʼ ando Bobo a nè ə wù zhʉ kɨ ənyʉ̀ avenə no ə tsèm.

⁸Kwòʼtə̀ Yesò Klistò. Ghə̀ nfʉ̀ fa ngwaʼ ə ngə̀ŋ ə̀ Devìt. Nyìngòŋ ə lusə li wen fa ə pfʉ, a diʼ ntɨm ə jùŋ yi a ma shə̀ʼtə̀.

⁹Mà yenə ngəʼ, və shwinə̀ mò a nə̀ wù ə mfɨŋ alə tò byiʼ ando ma ziʼi ntɨm ə jùŋ à viʼi. Alì kənyʉ̀ kə Nyìngòŋ a kenkə ə diʼ mu və zi ko və lu shwìn.

¹⁰A dìʼ byìʼì kənyʉ̀ a kenkə a ma kiʼi kwiʼi ətyɨm tò ənyʉ̀ ə tsèm byìʼì viʼi vyi a Nyìngòŋ tsuʼ li ndi vəwenə lu kiʼi əbwòŋ chò fa Yesò Klistò ə kiʼi əkuʼsə no məzhʉ ntsèm.

¹¹Kənyʉ̀ kenkə a və gàʼà lə ə diʼ tò no nəmwèʼè la: “Vəghəŋ sətsen pfʉ vəghəŋ ve wen, mu vəghəŋ lu ndiʼ vəghəŋ vəwen. Ə vəghəŋ lu bwènə̀ ə ntsi to vəghəŋ və wen a muʼ.

¹²Vəghəŋ sətsen ə ghaʼa ətyɨm a tyi ngəʼsə, vəghəŋ və wen lu ə soʼo mbyi. Vəghəŋ sətsen tensə la vəghəŋ ə ko kɨ wen, ghə̀ lu be tensə la ghə̀ ko kɨ vəghəŋ.

¹³Vəghəŋ sətsen bwìn dzèm à wen, ko ghə̀ lu bwìn dzèm a vəghəŋ, byìʼì ando ghə̀ zi ko ghə̀ lu tyen ə wenə wen.”

¹⁴Wù mbèsə̀ nyʉ̀ venə a mà gàʼa a wù lə à viʼi, pfàntə vəwenə a shɨ Nyìngòŋ la, kə vəwenə ə jèʼè soʼtə̀ chò nə̀ nyʉ̀, byìʼì nyʉ̀ a və zì ko və lu ə gyàmtə̀. Ənyʉ̀ a venə ə gyàmtə̀ tò ə byɨsə viʼi vyi a və zhʉtə.

¹⁵Mwòmsə̀ no nə̀ kədyòʼ kə ə nè la Nyìngòŋ yen la wù dìʼ wù ə shyèʼ yi a ghə̀ ko diʼsə kətʉ ə ne əshwèʼ ə wen, bè ziʼi tò nəmwèʼè yi a ghə̀ diʼi a ntɨm ə jùŋ ə̀ wen.

¹⁶Kə wù ə nzhʉtə ə gàʼ ə kəndzɨ̀ŋtə̀ yi a və gaʼa a mbyì a shə̀ byìʼì ando ghə̀ kò ku ə ghoʼsə à Nyìngòŋ. Tənkì tə əgaʼa a tentə tə ne tò la viʼi ghʉsə jì shì a Nyìngòŋ ə kəŋ.

¹⁷Viʼi vətsenvə vyi a və gaʼa əgaʼa a ghenə ə diʼ Hymenùs wenə Filitùs. Əgàʼ ə vəwenə ə diʼ to nə̀ chʉ kəshi kì a kə nə̀ mpfiʼi njò əwen ə̀ wìʼ.

¹⁸Vəwenə ə ziʼi la Nyìngòŋ sə dìʼ mu ghə̀ lusə li vəghəŋ fa pfʉ. Əziʼi a ghenə ə diʼ no əziʼi ə ndzɨŋ. Ghə̀ ne li la viʼi vətsenvə tyen la və ko bè mbyɨmə à Klistò.

¹⁹Alì kə to ə nə̀ʼsə kəchɨ kə ngə̀ŋ ki a Nyìngòŋ ə dìʼ mu ghə̀ we li a diʼ Klistò. Və nyoʼ li la, “Ghə̀ kɨ viʼi a və diʼ viʼi wen,” bè nyòʼ la, “No mə ndò yi a ghə̀ gàʼà la ghə̀ dzɨ̀mtə̀ Bobo ə diʼ ə ghʉsə ənyʉ̀ ə byɨvə vyi a ghə̀ nè.”

²⁰Wù kɨ la, à diʼ a ngə̀ŋ ghoʼo kaŋ nə̀ bolə diʼ tsu to tənkì a tənkì. Ətsenəvə ə diʼ mu və shɨ̀tə̀ nə̀ kəso kəko, tsenəvə dìʼ mu və shɨ̀tə̀ nə̀ kəkas kə, tsenəvə dìʼ mu və tsɨf nə̀ ənkòʼ ə mbwom tsenəvə nə̀ kətsoʼ kə. Və nè və sə lyɨ̀ əkayntə əkaŋ vyi a və shɨ̀tə̀ nə̀ kəso kəko kò nə̀ kəkas kə, we əfo tsu a zhʉ a və tsuʼtə ənyʉ̀, lyɨ̀ tsenəvə vyi we əfo tsu no a zhʉ ko.

²¹A sətsen no te ndò ghʉsə ənyʉ̀ ə byɨvə ə ndìʼ nə̀ laynə, Nyìngòŋ a lyɨ̀ wen tò nə̀ əkayntə wìʼ byìʼ ando ghə̀ ku li wenə wen ə sə dìʼ ə nkàyntə̀ wù ə shyèʼ à wen, kəʼtə ə ne no tənkì tə shyèʼ tə jùŋ tə no tə tsèm.

²²Nyɨŋ bwènə̀ fa əbàm ə təmwòmsə̀ yi a tə ku ngəʼ à mbvòʼò wìʼ li ə mwòmsə̀ ə ne nyʉ̀ tɨməvə, ə byɨmə à Klistò ə kòŋ viʼi bè tsi nə̀ mbwaʼmə. Wù ne nyʉ̀ a venə no ə tsèm we viʼi vyi a və jɨ̀mə̀ à Bobo nə̀ tətyɨm tə laynə tə.

²³Kə wù nə̀ nzhʉtə ə gàʼ kə kəndzɨ̀ŋtə̀ yi a ghə̀ ko shyèʼè no kənyʉ̀. Wù kɨ la əgaʼa a ghenə ə vi tò nə̀ ntaŋ.

²⁴Wù kɨ la wù ə shyèʼ ə Nyìngòŋ ə ko diʼ ə ntaŋmə̀. Ghə̀ diʼ ə bwaʼmə wenə no ndo, bè shɨtə ziʼi viʼi tò no a nkàyn, be kiʼi əghaʼa ətyɨm a nə̀ ndìʼsə̀.

²⁵Tisə viʼi vyi a və nkəmə kənyʉ̀ ki a wu gàʼà nə̀ mbwaʼmə, kɨ la Nyìngòŋ ne nè ə vəwenə kwitə tətyɨm tə vəwenə fa vəwenə mbyɨsə ə bwènə̀ vi ə kɨ kənyʉ̀ ki a kə diʼ nəmwèʼè.

²⁶Vəwenə sə dìʼ mu və fəŋ li a kətam nə̀ Deblə̀ ə sə ə ne ə shwèʼ ə wen, alì mu Nyìngòŋ zi ghə̀ ne tə tof tə vəwenə bwenə vi, vəwenə nyɨŋ fʉ̀ fa kətam a ghèn.