Read Babanki 2 Timotì 3 Bible Online

2 Timotì 3 - Babanki bible

2 Timotì 3

¹Mà kəŋ la wù ə kɨ la, à lu ə ndìʼ a mətsi mə kəmwetə, ə ngəʼsə lu ə ndìʼ no sə ghoʼo.

²Viʼi lu ə ntùʼmə̀ tò nə̀ təwen tə vəwenə, kòŋ ə ko no a nànto, ghaŋsə əwen, ko və lu lyɨ la wùtsen ə diʼ kəfo. Vəwenə lu ə telə̀ viʼi, bè to kətʉ fà vətìʼ vəwenə nə̀ vəlì vəwenə. Vəwenə ko lu nku kəzòŋ à wìʼ byìʼì no kənyʉ̀ kə tyetəkə kətsenkə a wìʼ ə ne à vəwenə, ko mfwàynə̀ Nyìngòŋ.

³Vəwenə ko lu nkiʼ əkusə nshinsə, ko və lyèsə ku viʼi, gàʼa ənyʉ̀ ə byɨvə byìʼì viʼi, ko vəwenə ə ghaʼa təwen tə vəwenə, tsi tò nə̀ nyamsə, ko və nkòŋ ə yenə kənyʉ̀ kə jùŋkə.

⁴Vəwenə mbaʼlə̀ viʼi nə̀ ə gaʼa ə vəwenə, shenə nè kənyʉ̀ ko və kwòʼtə̀, chasə viʼi vətsenvə. Vəwenə ko lu nkòŋə̀ Nyìngòŋ, bòŋsə kòŋ tò nyʉ̀ njòsə wen.

⁵Vəwenə lu ə nfɨsə̀ viʼi vyi a və ghoʼsə Nyìngòŋ, alì ken la vəwenə əzhʉ fa wen no fa mpfen. Kə wù ə nkiʼ kənyʉ̀ kətsenkə ə ne we nkì ə viʼi a venə.

⁶Viʼi vətsenvə ə diʼ a ntìntìn nə̀ vəwenə, jèʼè kwenə a aloʼ ə̀ viʼi, lobtə ki vyi a və ne li nchosə nyʉ̀ ə byɨvə ə sə kiʼ tətyɨm tə bwaʼa tə. Vəwenə ne li, ki a venə ə sə tsi tò a vəwenə a tyì soʼ.

⁷Ki a venə mwòmsə̀ ə nkɨ kənyʉ̀ kə fikə, alì kenla vəwenə tɨmə nzhʉ kənyʉ̀ kùmə̀ əziʼi yi a ghə̀ diʼì nəmwèʼè.

⁸Viʼi a venə ə taʼsə əziʼi yi a ghə̀ diʼì nəmwèʼè tò ndə̀ŋndəŋ ando Janès wenə̀ Jambles ə nlu sə taʼsə əziʼi ə Mosìs. Vəwenə ə nkiʼ təkwòʼtə̀ tə byɨtə, ko və mbe kwʉ̀ʼmə̀ a kənyʉ̀ kətsenkə a ntìntìn byɨmə.

⁹Vəwenə ə ko ŋwʉʼ kəghaf byìʼì ando viʼi ə yenə myetə la vəwenə ə diʼ ngu. Ndə̀ŋndəŋ tò ando kənaʼ kə Janès wenə̀ Jambles ə mbayn li.

¹⁰Timotì, wù sə dìʼ luwèn alə mu wù ndzɨ̀mtə̀ li əziʼi ə ghomə, nə̀ ntsìnə̀ ghom, nè kənyʉ̀ ki a mà tə ə nkwòʼtə̀ ə lu ə nè. Wù yen li jì yi a ma choʼsə Klistò fatsu, kiʼi ətyɨm ə zhʉtə ghə̀, kòŋ viʼi, kɨ ə kwiʼi ətyɨm.

¹¹Wù yen li ando və tə ntsuʼ kəghʉ ə kom mbè yenə ngəʼ shisə a və tə ku à mò a ntə̀ʼ Antìyòk. Wù kɨ ə nyʉ̀ vyi a və tə chò nə̀ mò a ntə̀ʼ Ikonùm nə̀ Lista, ma kwiʼi tò ətyɨm ə byèʼè ngəʼsə ashi, Bobo shìsə mò fa a ngəʼsə na shìsə no sətsèm.

¹²Mà gàʼà nəmwèʼè la, no ndo a ghə̀ sətsèn ə kòŋ ə ntsi ntsìnə̀ Nyìngòŋ, dzɨ̀mtə̀ Yesò Klistò, mu viʼi ne nku ngəʼ à wen.

¹³Viʼi və byɨvə nə̀ viʼi vyi a və diʼi la və dìʼ kəfo, diʼ ne ə byɨfə dyʉ̀ tò nə̀ mbì, lobtə viʼi, viʼi vətsenvə be lobtə vəwenə.

¹⁴Alì fa wù, faŋə mbyɨmə tò nəmwèʼè yi a və tə ziʼì wù tsu li. No wù ə nkɨ ndìʼsə̀ shi a sə tə ziʼì wù nə̀ kənyʉ̀ a kenkə.

¹⁵Wù kwòʼtə̀ to ando və nlu sə ziʼì wù nə̀ ənyʉ̀ mu və fʉ̀ fa Ŋwàʼlə̀ Nyìngòŋ tò no fa ətʉ̀ʼ a wù mbo bu wàyn. Ənyʉ̀ a venə ə diʼ ə ku ətof à wù ndi wù byɨmə à Yesò Klistò a ghə̀ bwòŋsə̀ wù.

¹⁶No te kənyʉ̀ kə ko a və nyoʼo a Ŋwàʼlə̀ Nyìngòŋ kə diʼ mu à nkù Nyìngòŋ la və nyoʼo, kə boŋə kwʉʼmə la və nziʼi viʼi tsu, shə̀ʼtə̀ la viʼi shwe li fatsu, tomsə viʼi fatsu, dìʼsə̀ viʼi fatsu ndi və ə ntsi ntsìnə̀ ə tɨmə.

¹⁷Ənyʉ̀ a venə ə diʼ ə nè la wù ə shyèʼ ə Nyìngòŋ ə kwʉʼ myetə̀ ə ne no tənkì tə təshwèʼ tə jùŋtə tə tsèm.